Eŋɛnywiwema Matie Tɔ 10:1-42
10 Yesu yɔ yi nukplavi 12 lɔwo bɔ yí na ŋsɛn wo nɔ woanyanɔ gbɔngbɔnvɔnwo* yí adanɔ dɔ̀ hamɛhamɛwo nɔ amɛwo.
2 Apotru 12 lɔwo ŋkɔwo ke: Simɔ ci wogbeyɔnɔ mɔ Piɛ, koɖo nɔviɛ Andre; Ʒaki, Zebede vi koɖo nɔviɛ Ʒan;
3 Filipu koɖo Batelemi; Toma koɖo Matie ci yí nyi tagajɔtɔ; Ʒaki Alufe vi koɖo Tade;
4 Simɔ ci yí sɔnɔ zo do enu nu koɖo Ʒudasi Iskariɔti ci yí vasa Yesu.
5 Yesu ɖo ŋsu 12 cɛwo ɖaɖa yí do se nɔ wo mɔ: “Míŋgbeyi jukɔn bu mɛ tɔwo gbɔ o yí míŋgbeyi Samari jugan ɖe mɛ hɛnnɛ o;
6 vɔ Izraɛli xwe mɛ tɔ ciwo yí nyi lɛngbɔ bubuwo gbɔ míayinɔ.
7 Nɔ míyikɔɔ, míɖekɔ kunu anunuɔ mɔ: ‘Jeŋkwi mɛ Fyɔɖuxu lɔ gogo.’
8 Mída dɔ̀ nɔ dɔ̀nɔwo, afɔn amɛkukuwo, ada dɔ̀ nɔ kponɔwo, anya gbɔngbɔnvɔnwo ti le amɛwo mɛ. Gbali míxɔɛ, gbali míani.
9 Míŋgbeji shika alo gacuho alo gajun do ehogodu míwotɔwo mɛ o.
10 Míŋgbehɛn ŋɖuɖu do godu mɛ nɔ mɔzɔnzɔn lɔ alo awu* amɛve alo fɔkpa alo ekpo o; ɖo ele mɔ dɔwatɔ axɔ yi ŋɖuɖu.
11 “Nɔ míɖo jugan ɖe alo kɔxwi ɖekpokpui mɛɔ, míji mɛ ciwo yí axɔ mí kpɔ yí anɔ wo gbɔ keke ana nɔ hwenu míaso.
12 Nɔ míɖo axwe ɖe mɛɔ, mído gbe nɔ axwe lɔ mɛ tɔwo.
13 Nɔ axwe lɔ xɔ míɔ, fafa ci míbiɔ ni anɔ koɖi; vɔ nɔ axwe lɔ dexɔ míɔ, fafa míwotɔ agbetrɔva mí ji.
14 Fiɖekpokpui ci míayi yí wodexɔ mí alo se míwo nyɔwoɔ, míxuxu afɔkɔ míwotɔwo nɔ mítotoɔ le axwe lɔ alo jugan lɔ mɛ.
15 Ŋnukɔ nɔ mí le nyɔnɔnwi mɛ mɔ, Sodomu koɖo Gomora tɔ akandomɛ wu jugan ŋtɔ́ tɔ le kojoɖogbe.
16 “Míkpɔ ɖa! Míle shigbe lɛngbɔwo nɛ yí ŋdɔdɔ mí ɖaɖa ehlawo mɛ; eyi taɖo míje aye shigbe edanwo nɛ yí anyi xomɛvunɔwo shigbe hwanlinwo nɛ.
17 Mínɔ zanŋte do agbetɔwo nu, ɖo woakplɔ mí yi kojoɖoxuwo yí aya mí le wowo nukplaxuwo.
18 Woakplɔ mí yi ŋkɔ nɔ ejukplɔtɔwo koɖo efyɔwo do enyɛ ŋci nɔ anyi kunuɖeɖe nɔ wo koɖo jukɔnwo.
19 Vɔ nɔ wolé míɔ, míŋgbeloloɔ nɔ enyɔ ci míanu alo lé míanui do o; ɖo le gaxoxo lɔ mɛɔ, woana mí enyɔ ci míanu.
20 Ðo denyi míwoɖekɛ yí axo nuxu o, vɔ gbɔngbɔn ci yí so míwo Da gbɔ yí axo nuxu to mí ji.
21 Gbesɔ kpe niɔ, nɔvi asɔ nɔvi jo amɔ wo le wu, eda asɔ evi jo, eviwo afɔn gu do wowo dawo koɖo wowo nɔwo ji yí ana woawu wo.
22 Eyi amɛwo pleŋ agbe ŋwa nɔ mí do anyi ŋkɔ ŋci; gan mɛ ci yí ado ji keke ayi vɔvɔnuɔ, woahwlin gan.
23 Vɔ nɔ woci yumɛ nɔ mí le jugan ɖe mɛɔ, míshi yi ebu mɛ; ɖo ŋnukɔ nɔ mí le nyɔnɔnwi mɛ mɔ, mídadan to Izraɛli juwo pleŋ mɛ vɛ gbɔxwe Agbetɔvi lɔ ava o.
24 “Enukplavi dewunɔgan yi nukplamɛtɔ o yí edɔwavi can dewunɔgan yi xwetɔ o.
25 Nɔ nukplavi vale shigbe yi nukplamɛtɔ nɛ yí edɔwavi vale shigbe yi xwetɔ nɛɔ, ésun xoxo. Nɔ amɛwo yɔ axwetɔ lɔ mɔ Bɛlzebul* ɖe, wodayɔ axweɛ mɛ tɔwo ahan sɔwu ba?
26 Eyi taɖo míŋgbevɔn nɔ wo o, ɖo ŋɖekpokpui ci wocɔn nu do avaci dandanŋgbe yí ŋɖekpokpui ci yí le wlawla mɛɔ, woavanya nu so nu.
27 Enyɔ ci ŋnu nɔ mí le vinvin mɛɔ, mínui le klɛnklɛn mɛ; enyɔ ci ŋɖɔ kpa yí nu nɔ míɔ, míde exɔ ta anui.
28 Míŋgbevɔn nɔ mɛ ciwo yí wunɔ lankpu lɔ gan yí wodatɛnŋ awu ese* lɔ o; vɔ mívɔn nɔ mɛ ci yí atɛnŋ awu ese lɔ koɖo lankpu lɔ le Gehena* mɛ.
29 Wosanɔ hwiʒihwiʒi amɛve yí xɔnɔ gajun hwɛhwɛ kuɖeka ci yí denyi ŋɖe* o, alo? Gan eɖe daje nyigban le wo mɛ yí míwo Da danya o.
30 Vɔ éhlɛn eɖakwi ciwo pleŋ yí le ta nɔ mí ŋtɔkpu.
31 Eyi taɖo míŋgbevɔn o, míxɔ afi wu hwiʒihwiʒi sugbɔwo.
32 “Mɛɖekpokpui ci yí anu le amɛwo ŋmɛ mɔ yejeshiŋ ɖɛɔ, nyɛ can nanu le ŋmɛ nɔ Danyɛ ci yí le jeŋkwi mɛ mɔ ŋjeshi ɖɛ.
33 Vɔ mɛɖekpokpui ci yí agbeŋ le amɛwo ŋmɛɔ, enyɛ can nagbi le ŋmɛ nɔ Danyɛ ci yí le jeŋkwi mɛ.
34 Míŋgbebu mɔ fafa yí ŋhɛn va nyigban lɔ ji o; ŋdehɛn fafa vɛ o, vɔ ewi yí ŋhɛn vɛ.
35 Ðo ŋhɛn evu va gblamɛ nɔ ŋsuvi koɖo dalɔ, nyɔnuvi koɖo nɔlɔ, evishi koɖo asunɔ.
36 Ɛɛ, agbetɔ ketɔnɔwo anyi yiŋtɔ xomɛtɔwo.
37 Mɛɖekpokpui ci yí lɔn dalɔ alo nɔlɔ sɔwuŋ ɔ, deje anyi nukplavi anyitɔ o; eyi mɛɖekpokpui ci yí lɔn eviɛ ŋsuvi alo eviɛ nyɔnuvi sɔwuŋ ɔ, deje anyi nukplavi anyitɔ o.
38 Mɛɖekpokpui ci yí delɔn yí sɔ efuntrenamɛci* yitɔ yí kplɔ ŋdoɔ, deje anyi nukplavi anyitɔ o.
39 Mɛɖekpokpui ci yí tekpɔ mɔ yeahwlɛn ye gbe* gan ɔ, ásɔ bu; eyi mɛɖekpokpui ci yí sɔ yi gbe* bu do enyɛ ŋciɔ, ágbevakpɔɛ.
40 “Mɛ ci yí xɔ míɔ, éxɔ nyɛ can; eyi mɛ ci yí xɔŋ ɔ, éxɔ Mɛ ci yí dɔŋ ɖaɖa hɛnnɛ.
41 Mɛ ci yí xɔ enyɔnuɖɛtɔ nɔ ci enyi enyɔnuɖɛtɔ ŋciɔ, áxɔ enyɔnuɖɛtɔ fɛncu; eyi mɛ ci yí xɔ amɛjɔjɔɛ nɔ ci enyi amɛjɔjɔɛ ŋciɔ, áxɔ amɛjɔjɔɛ fɛncu.
42 Eyi mɛɖekpokpui ci yí ana eshi fafa kɔnkpu ɖeka kpaŋ amɛ hwɛhwɛ cɛwo ɖe nɔ anu ci enyi anyi nukplavi ŋciɔ, ŋnukɔ nɔ mí le nyɔnɔnwi mɛ mɔ, dagɔn yi fɛncu maxɔ gbeɖe o.”
Gɔnmɛnuŋwlɛnŋwlɛn
^ Alo “gbɔngbɔn makɔmakɔwo.”
^ Alo “awu bu.”
^ Satana woyɔnɔ ahan; ényi ega nɔ gbɔngbɔnvɔnwo.
^ Alo “agbe,” eyi nyi agbenɔnɔ mɔkpɔkpɔ.
^ Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “asariɔn.” Kpɔ Enumɛɖeɖewo B14.
^ Kpɔ Enyɔgbe Veviwo mɛ Ðeɖe.
^ Alo “ese.”
^ Alo “ese.”
