Eŋɛnywiwema Matie Tɔ 11:1-30
11 Ci Yesu nu ŋciwo yi nukplavi 12 lɔwo ɖo awa nɔ wo ɖegbɔɔ, éso le nɔ yí kpe eju buwo mɛ keŋ ayi kpla nu amɛwo yí agbeɖe kunu nɔ wo.
2 Vɔ ci Ʒan le gakpa mɛ yí se edɔ ciwo Kristo wakɔɔ, édɔ yi nukplaviwo ɖaɖa
3 nɔ woabiɔɛ se mɔ: “Eo yí nyi Mɛ ci yí ɖo avaa, alo mìakpɔ emɔ nɔ mɛbu?”
4 Yesu ɖo ŋci nɔ wo mɔ: “Míyi ayi nu enyɔ ciwo mísekɔ koɖo ŋciwo míkpɔkɔ nɔ Ʒan:
5 Ðɛyɛɔ, ŋkuvitɔnnɔwo kpɔkpɔ nu, atakunɔwo zɔnkɔ zɔnlin, edɔ̀ mi nɔ kponɔwo yí tokunɔwo le tonu sekɔ; wofɔnkɔ amɛkukuwo yí nunuɔ eŋɛnywi lɔ nɔ wamɛnɔwo.
6 Mɛ ci ŋdenyi afɔklɛnnu nɔ kpɔnɔ jijɔ.”
7 Ci Ʒan nukplaviwo ɖedoɔ, Yesu tɔ nuxu xoxo so Ʒan nu nɔ amɛahwa lɔ mɔ: “Nyi kpɔgbe míyi le zogbejiɔ? Klogbu ci yí jihɔn dodoɔ we nɔ yɔa?
8 Cucucu ɖe, nyi kpɔgbe míyiɔ? Ŋsu ci yí do awu nywiwo* yɔa? Mídenya ba? Mɛ ciwo yí donɔ awu nywiwoɔ, efyɔwo xomɛwo yí wonɔnɔ.
9 Ecɛyɛ ɖe, nyi yí taɖo míyiɔ? Míyi ayi kpɔ nyɔnuɖɛtɔ yɔa? Ɛɛ, ŋnukɔ nɔ mí mɔ, Ʒan gangan wu enyɔnuɖɛtɔ xoxoxo.
10 Yi nyɔ wonu ɖɛ mɔ: ‘Kpɔ ɖa! Ŋdɔdɔ anyi ŋɛdotɔ ɖaɖa ŋkɔ nɔ eo,* áje ŋkɔ nɔ eo yí adra emɔ ji do ɖɛ nɔ eo!’
11 Ŋnukɔ nɔ mí le nyɔnɔnwi mɛ mɔ, le agbetɔ ciwo pleŋ nyɔnuwo ji mɛɔ, ɖekɛ desɔ koɖo Ʒan Amɛʒindoshimɛtɔ o. Vɔ mɛ ci yí nyi amɛ hwɛhwɛtɔ le jeŋkwi mɛ Fyɔɖuxu lɔ mɛ gangan wui.
12 So hwenu Ʒan Amɛʒindoshimɛtɔ lɔ tɔ dɔ keke vaje evyɛɔ, jeŋkwi mɛ Fyɔɖuxu lɔ yí nyi ŋci amɛwo nyanya veviɖe. Eyi mɛ ciwo yí le gbla ji ni veviɖe xoxoɔtɔɛ.
13 Ðo enyɔnuɖɛtɔwo pleŋ koɖo Ese lɔ nu ŋciwo yí ajɔ ɖɛ keke vaje Ʒan ji;
14 yí nɔ mígbe can mílɔn can ɔ, eyi nyi ‘Eli ci nyɔ wonu ɖɛ mɔ yɛava.’
15 Mɛ ci eto li nɔ le si.
16 “Mi yí nasɔ mɛ ciwo yí li gbɛ sɔ koɖoɔ? Wole shigbe ɖevi ciwo yí le nyinɔnɔ le afi mɛ yí yɔyɔ wowo kpenawo
17 yí nunuɔ mɔ: ‘Mìxu kpɛn nɔ mí, vɔ mídeɖu we o; mìji enuwamuha, gan mídefan avin yí xo akɔnta o.’
18 Nɛnɛke ci Ʒan vaɔ, deɖunɔ nu o, kpɔ denunɔ vɛn o; vɔ amɛwo nu mɔ, ‘Gbɔngbɔnvɔn le mɛ.’
19 Ci Agbetɔvi lɔ vaɔ, éɖunɔ nu yí nunɔ vɛn; vɔ amɛwo nu mɔ, ‘Kpɔ ɖa! Ŋsu cɛ nyi sukanuɖutɔ yí nunɔ vɛn sugbɔ yí gbenyi tagajɔtɔwo koɖo nuvɔnwatɔwo xlɔ.’ Vɔ enujɔjɔɛ ciwo mɛɖe wakɔ yí wokpɔnɔ yí nyanɔ mɔ yɛnya ŋɖɛ.”
20 Eyi Yesu tɔ enyɔ gbegbe nɔ eju ciwo mɛ ewa enujiŋ sugbɔtɔ le, ɖo wodetrɔ ji mɛ o. Énu nɔ wo mɔ:
21 “Babɛ nɔ mí, Korazɛntɔwo! Babɛ nɔ mí, Bɛtsaidatɔwo! Ðo nɔ enyi enujiŋ ciwo tɔxu míkpɔ yí Tirutɔwo koɖo Sidɔntɔwo kpɔɔ, woatrɔ ji mɛ xoxo yí ata enuwamuvɔn yí ale afi.
22 Vɔ ŋnukɔ nɔ mí mɔ, enuwo akandomɛ nɔ Tirutɔwo koɖo Sidɔntɔwo sɔwu míwo le Kojoɖogbe.
23 Eyi míwo Kapɛrnawumutɔwo, woagangan mí keke míayi tɔ jeŋkwia? Oo, keke Yɔdu* mɛ míayi kpɔ míwoɖekiwo le. Ðo nɔ enyi enujiŋ ciwo tɔxu míkpɔ yí Sodomutɔwo kpɔɔ, wowo ju akpɔtɔ ali keke vaje egbɛ.
24 Vɔ ŋnukɔ nɔ mí mɔ, enuwo akandomɛ nɔ Sodomutɔwo sɔwu míwo le Kojoɖogbe.”
25 Hwenɔnuɔ, Yesu mɔ: “Edanyɛ, jeŋkwi koɖo nyigban Xwetɔ, ŋkanfu eo le amɛwo mɛ; ɖo èwla ŋcɛwo do ŋɖɛnyatɔwo koɖo wemanyatɔwo yí dasɛ wo nɔ ɖevihwɛwo.
26 Ɛɛ, Edanyɛ, ɖo ahan èji mɔ yeawɛ nɛ.
27 Edanyɛ sɔ nuwo pleŋ do alɔ̀ mɛ nɔŋ yí mɛɖe dejeshi Evi lɔ ɖɛ nywiɖe sɔ zeto Eda lɔ nu o; ahanke mɛɖe dejeshi Eda lɔ nywiɖe sɔ zeto Evi lɔ koɖo mɛɖekpokpui ci yí Evi lɔ lɔn mɔ yeadasɛ Eda lɔ nɔ nu o.
28 Míva ŋgbɔ, míwo ciwo pleŋ yí enu ci kɔ nɔ yí agban kpɛnkpɛn nɔ mafa akɔn nɔ mí.
29 Mísɔ acikplakɔ anyitɔ ɖo míwoɖekiwo ji yí akpla nu so ŋgbɔ, ɖo ŋfa xomɛ yí hwe nyɛɖeki kpɔtɔ le ji mɛ; eyi míakpɔ* gbɔndomɛ.
30 Ðo acikplakɔ anyitɔ sɔsɔ degbɔnnu o* yí anyi gban foɖa.”
Gɔnmɛnuŋwlɛnŋwlɛn
^ Alo “ehoganwuwo.”
^ Yi gɔnmɛɖeɖe tiin: “ɖaɖa ŋmɛ nɔ eo.”
^ Alo “Hadɛsi” ci yí nyi agbetɔviwo pleŋ yɔdu. Kpɔ Enyɔgbe Veviwo mɛ Ðeɖe.
^ Alo “míwo sewo akpɔ.”
^ Alo “dekpɛn o.”
