Eŋɛnywiwema Matie Tɔ 13:1-58
-
LABALU CIWO YESU DO SO FYƆÐUXU LƆ NU (1-52)
-
Jinukudotɔ lɔ (1-9)
-
Enu ci yí taɖo Yesu do labaluwo (10-17)
-
Yesu dre jinukudotɔ labalu lɔ mɛ (18-23)
-
Jinuku nywi koɖo egbe vwinwo (24-30)
-
Aciku hwɛhwɛ koɖo kpɔnnɔcike (31-33)
-
Yesu zan labaluwo yí na enyɔnuɖɛ lɔ vamɛ (34, 35)
-
Yesu dre jinuku nywi koɖo egbe vwin labalu lɔ mɛ (36-43)
-
Dɔkunu ci wosɔ wla koɖo jenu xɔafi lɔ (44-46)
-
Eɖɔ̀ ci wodɔ do axu mɛ (47-50)
-
Dɔkunu yoyuwo koɖo xoxwiwo (51, 52)
-
-
Wogbe Yesu le yiŋtɔ ju mɛ (53-58)
13 Yesu so le axomɛ gbenɔgbe yí vayi nɔ nyinɔnɔ do axu tu.
2 Amɛahwa ɖeka va trɔdi yí eɖo tɔjihun mɛ yí nɔ nyinɔnɔ. Amɛ lɔwo pleŋ le te le axu lɔ tu.
3 Eyi edo labaluwo yí sɔ kpla nu sugbɔ wo. Énu mɔ: “Jinukudotɔ ɖeka yi jinuku dogbe.
4 Hwenu edokɔ jinuku lɔwoɔ, ɖowo je emɔ tu yí xeviwo va can wo ɖu.
5 Ebuwo je ekpewo mɛ fini ekɔ desugbɔ le o yí womi kaka, ɖo ekɔ lɔ deyi gu o.
6 Vɔ ci nyidɔn tɔ veveɔ, wofyɔn yí ku, ɖo eke deyi gu nɔ wo o.
7 Ebuwo gbeje aŋwakanwo mɛ yí aŋwakanwo vlu yí cɔn wo ji.
8 Ahanke ebuwo gbeje nyigban nywi ji yí tɔ sɛnsɛn. Ðowo sɛn 100, ebuwo sɛn 60 yí ebuwo gbesɛn 30.
9 Mɛ ci eto li nɔ le si.”
10 Eyi taɖo yi nukplaviwo va gbɔ yí biɔɛ se mɔ: “Nyi yí taɖo èdokɔ labaluwo yí sɔ kplakɔ nu woɔ?”
11 Éɖo ŋci nɔ wo mɔ: “Wona gbe míwo nɔ míamɔŋje jeŋkwi mɛ Fyɔɖuxu lɔ nyɔwlawla kɔkɔɛwo mɛ. Vɔ wodena gbe wowo o.
12 Mɛ ci shi enu leɔ, woana sugbɔ yi doji yí avale shi zan; vɔ mɛ ci shi enu deleɔ, woaxɔ kankin ci yí le shi ŋtɔkpu.
13 Eyi taɖo ŋdodoɔ labaluwo yí sɔ xoxoɔ nuxu nɔ wo; ɖo ci wokpɔkpɔ nu can ɔ, wodekpɔkpɔ ŋɖe o yí ci woseseɛ can ɔ, wodeseseɛ ŋɖe o. Ahanke wodeseseɛ ŋɖe gɔnmɛ nɛ.
14 Enyɔ ci Ezai nu ɖɛ yí jɔkɔ do wo ji. Énu mɔ: ‘Míasi pɛɛ, vɔ mídase mɛ kpɔ o; míakpɔɛ pɛɛ, vɔ mídanya ŋci míkpɔ kpɔ o.
15 Ðo eji mɛ vasɛnŋ nɔ jukɔn cɛ yí wose nyɔ lɔ gan wodo tokuitokui yi; woŋwla wowo ŋkuviwo hɛnnɛ nɔ woŋgbekpɔ ŋɖe koɖo wowo ŋkuviwo yí ase nyɔ ɖe koɖo wowo towo yí agbese gɔnmɛ ni koɖo wowo jiwo keŋ atrɔva ŋgbɔ nɔ mada dɔ̀ nɔ wo o.’
16 “Vɔ míkpɔ jijɔ ɖo míwo ŋkuviwo kpɔkpɔ nu yí míwo towo sekɔ nu.
17 Ðo ŋnukɔ nɔ mí le nyɔnɔnwi mɛ mɔ, enyɔnuɖɛtɔ koɖo amɛjɔjɔɛ sugbɔ ji mɔ yewoakpɔ ŋciwo míkpɔkpɔ, gan wodekpɔ wo o; yí ase enyɔ ciwo míseseɛ, gan wodese wo o.
18 “Ecɛyɛ míɖo to ase jinukudotɔ labalu lɔ gɔnmɛ.
19 Jinuku ci yí je emɔ tu lɔ yí nyi mɛ ci yí se Fyɔɖuxu ŋɛnywi lɔ vɔ dese gɔnmɛ ni o; eyi nuvwinwatɔ lɔ va sɔnɔ ŋci wodo lɔ so yi ji mɛ.
20 Ci yí je ekpewo mɛ yí nyi mɛ ci yí se nyɔ lɔ yí xɔɛ koɖo jijɔ kaka.
21 Vɔ ci enyɔ lɔ dedo ke do eji mɛ niɔ, énini na nɔ hwenu ɖe; eyi nɔ enuwo tɔ kpikpi alo wotɔ aya dodo ni do nyɔ lɔ ŋciɔ, éjuinni kaka.
22 Ci wodo do aŋwakanwo mɛ yí nyi mɛ ci yí seseɛ nyɔ lɔ, vɔ tamɛbubukpɔ xexe* cɛ mɛ tɔwo koɖo amɛblebleŋsɛn dɔku tɔ vlu yí cɔnnɔ nyɔ lɔ ji yí devasɛnnɔ ku o.
23 Vɔ ci wodo do nyigban nywi ji yí nyi mɛ ci yí seseɛ nyɔ lɔ yí seseɛ gɔnmɛ ni. Ésɛnnɔ ku; ɖowo nyinɔ 100, ebuwo nyinɔ 60 yí ebuwo nyinɔ 30.”
24 Égbedo labalu bu nɔ wo yí nu mɔ: “Jeŋkwi mɛ Fyɔɖuxu lɔ le shigbe ŋsu ci yí do jinuku nywi do boji nɛ.
25 Hwenu amɛwo le alɔn dɔnkɔɔ, yi ketɔnɔ vado egbe vwinwo do jinuku lɔwo gblamɛ yí so yi.
26 Ci jinuku lɔ shin yí sɛn kuɔ, egbe vwin lɔwo can to.
27 Axwetɔ lɔ dɔwaviwo va gbɔ yí biɔɛ se mɔ, ‘Axwetɔ, de jinuku nywi èdo do agble lɔ mɛ ba? Lé ewɛ yí egbe vwinwo va le mɛɔ?’
28 Éɖo ŋci nɔ wo mɔ, ‘Ketɔnɔ ɖeka yɔ, ŋsu ɖeka yí wɛ ahan.’ Eyi dɔwavi lɔwo biɔɛ se mɔ, ‘Èji mɔ mìayi ayi hun egbe vwin lɔwo sia?’
29 Énu nɔ wo mɔ, ‘Oo; ɖo nɔ mímɔ yewoahun egbe vwin lɔwoɔ, míavagbe nyanya ahun jinuku lɔwo hɛnnɛ.
30 Mítashi wo nɔ wo koɖo ve ashin doju keke avaje jinukusɔsɔ hwenu; eyi le jinukusɔsɔ hwenuɔ, nanu nɔ mɛ ciwo yí aɖe jinuku lɔ mɔ: Míhun egbe vwin lɔwo doŋkɔ yí abla wo eta-eta yí atɔ zo wo. Yi goduɔ, míalɔ jinuku lɔ kɔ do ava mɛ nɔŋ.’”
31 Égbedo labalu bu nɔ wo mɔ: “Jeŋkwi mɛ Fyɔɖuxu lɔ le shigbe mutadiku* ci ŋsu ɖeka do do yi boji nɛ.
32 Le nyɔnɔnwi mɛɔ, eyi nyi aciku ci yí hwe wu acikuwo pleŋ; vɔ ci eshin ɔ, évagangan wu ŋciwo pleŋ wodo yí vatrɔ aci keke xeviwo vaɖo atɔ do yi lɔ̀viwo ji.”
33 Égbedo labalu bu nɔ wo mɔ: “Jeŋkwi mɛ Fyɔɖuxu lɔ le shigbe kpɔnnɔcike ci nyɔnu ɖeka sɔ do kpɔnnɔɣɔ enudregban gangan amɛtɔn mɛ keke kpɔnnɔɣɔ nyanya lɔ pleŋ vaho nɛ.”
34 Yesu do labaluwo yí sɔ nu nyɔ cɛwo pleŋ nɔ amɛahwa lɔ. Le nyɔnɔnwi mɛɔ, dexonɔ nuxu nɔ wo labalu mado o,
35 keŋ nɔ nyɔ ci wonu ɖɛ to enyɔnuɖɛtɔ lɔ ji avamɛ mɔ: “Nake nu ado labaluwo. Nadra ŋciwo yí le wlawla mɛ so gɔnmɛjeje ɖii.”*
36 Yi goduɔ, énu nɔ amɛahwa lɔ yí woso; yí eyi axomɛ. Yi nukplaviwo va gbɔ yí nu ni mɔ: “Dre egbe vwin ci wodo do boji labalu lɔ mɛ nɔ mì.”
37 Édre mɛ nɔ wo mɔ: “Mɛ ci yí do jinuku nywi lɔ yí nyi Agbetɔvi lɔ;
38 ebo lɔ yí nyi xexe lɔ. Jinuku nywi lɔ yí nyi Fyɔɖuxu lɔ viwo; vɔ egbe vwin lɔwo yí nyi nuvwinwatɔ lɔ viwo.
39 Ketɔnɔ ci yí do wo yí nyi Legba. Jinukusɔsɔ hwenu lɔ yí nyi xexe* lɔ vɔvɔnu. Jinukuɖetɔ lɔwo yí nyi mawudɔlawo.
40 Vɔ shigbe lé wohun egbe vwin lɔwo yí tɔ zo wo nɛɔ, ahanke ajɔ le xexe* lɔ vɔvɔnu nɛ.
41 Agbetɔvi lɔ adɔ yi dɔlawo ɖaɖa yí woaɖe ŋciwo pleŋ yí dɔ amɛwo klɛnnɔ nu koɖo mɛ ciwo yí dewanɔ do ese ji swi le yi Fyɔɖuxu lɔ mɛ
42 yí asɔ wo dɔŋkpe do ezokpu ci yí bibiɛ lɔ mɛ. Enɔ yí woafan vin yí aɖu aɖukli le nɛ.
43 Hwenɔnuɔ, amɛjɔjɔɛwo aklɛn shigbe ewe nɛ le wowo Da Fyɔɖuxu lɔ mɛ. Mɛ ci eto li nɔ le si.
44 “Jeŋkwi mɛ Fyɔɖuxu lɔ le shigbe dɔkunu ci wosɔ wla do ebo ɖeka ji nɛ. Ŋsu ɖeka kpɔɛ yí sɔ wla. Eyi eji jɔɛ keke yí evayi sa ŋciwo pleŋ yí le shi yí xwle ebo lɔ.
45 “Jeŋkwi mɛ Fyɔɖuxu lɔ gbele shigbe ajɔdotɔ mɔzɔntɔ ci yí jijiɛ jenu xɔafiwo kpɔ nɛ.
46 Ci evakedo jenu ehovevi tɔ ɖeka nuɔ, évayi sa ŋciwo pleŋ yí le shi zeɖeka yí xwli.
47 “Jeŋkwi mɛ Fyɔɖuxu lɔ gbele shigbe eɖɔ̀ ci wodɔ do axu mɛ nɛ yí ele kpavi hamɛhamɛ.
48 Ci eɖɔɔ, woduin va agoji yí nɔ nyinɔnɔ yí can kpavi nyɔnyɔtɔwo kɔ do nuwo mɛ; vɔ wosɔ dɔndɔntɔwo kɔŋgbe.
49 Ŋci yí ajɔ le xexe* lɔ vɔvɔnu nɛ. Mawudɔlawo avama amɛvwinwo koɖo amɛjɔjɔɛwo mɛ
50 yí asɔ amɛvwinwo dɔŋkpe do ezokpu ci yí bibiɛ lɔ mɛ. Enɔ yí woafan vin yí aɖu aɖukli le nɛ.
51 Yesu biɔ wo se mɔ: “Míse nyɔ lɔwo pleŋ gɔnmɛa?” Woɖo ŋci ni mɔ: “Ɛɛ.”
52 Eyi enu nɔ wo mɔ: “Nɔ enyi ahan ɔ, mínya mɔ nukplamɛtɔ ɖekpokpui ci wokpla nu so jeŋkwi mɛ Fyɔɖuxu lɔ nu le shigbe axwetɔ ci yí ɖeɖeɛ enu yoyuwo koɖo enu xoxwiwo ti le yi dɔkunuwo ɖoxu nɛ.”
53 Ci Yesu do labalu cɛwo ɖegbɔɔ, éso le nɔtɔxu.
54 Ci etrɔyi yi ju mɛɔ, étɔ enu kplakpla amɛwo le Ʒuifuwo nukplaxu. Ékpaca wo keke wonu mɔ: “Fini ŋsu cɛ kpɔ ŋɖɛnyanya cɛ soɔ? Fini ekpɔ ŋsɛn le yí sɔ wakɔ enujiŋ cɛwoɔ?
55 De kapita vi yɔ ba? De nɔlɔ woyɔnɔ mɔ Mari yí nɔviɛŋsuwo nyi Ʒaki, Ʒozɛfu, Simɔ koɖo Ʒudasi ba?
56 Nɔviɛnyɔnuwo pleŋ dele lɛ ba? Ecɛyɛ ɖe, fini ekpɔ ŋcɛwo pleŋ soɔ?”
57 Eyi taɖo wogbe mɔ yewodaxɔɛ ji se o. Vɔ Yesu nu nɔ wo mɔ: “Wobunɔ enyɔnuɖɛtɔ le fishiafi; vɔ yiŋtɔ ju mɛ koɖo yiŋtɔ xomu mɛ ɖekɛ wodebuini le o.”
58 Eyi dewa enujiŋ sugbɔ le nɔ o, ɖo wodeɖo xɔse o.
Gɔnmɛnuŋwlɛnŋwlɛn
^ Kpɔ Enyɔgbe Veviwo mɛ Ðeɖe.
^ Ényi aciku hwɛhwɛ ɖeka ci wokpɔnɔ le Palestine yí aci yitɔ jinjinnɔ mɛta amɛnɛ han.
^ Alo taŋfuin, “so hwenu woɖo xexe lɔ.”
^ Kpɔ Enyɔgbe Veviwo mɛ Ðeɖe.
^ Kpɔ Enyɔgbe Veviwo mɛ Ðeɖe.
^ Kpɔ Enyɔgbe Veviwo mɛ Ðeɖe.
