Eŋɛnywiwema Matie Tɔ 14:1-36
14 Hwenɔnuɔ, Erodi ci yí nyi Galile jujikpɔtɔ* se woxoxoɔ nuxu so Yesu nu.
2 Énu nɔ yi dɔwaviwo mɔ: “Ʒan Amɛʒindoshimɛtɔ yɔ. Éfɔn so ku, eyi taɖo ewawa enujiŋ cɛwo.”
3 Erodi* le Ʒan yí blɛ yí cui do gakpa mɛ do Erodiasi ci yí nyi fofoɔ Filipu ashiɛ ŋci.
4 Ðo Ʒan nunɔ ni mɔ: “Desɔgbe mɔ àɖi ɖɛ o.”
5 Ci eji mɔ yeawu Ʒan can ɔ, évɔnvɔn nɔ amɛwo, ɖo wokpɔ mɔ enyɔnuɖɛtɔ Ʒan nyi.
6 Vɔ ci woɖuɖuɔ Erodi jigbezan ɔ, Erodiasi viɛ nyɔnuvi ɖu we keke ejɔ ji nɔ Erodi sugbɔ.
7 Éta nu yí ɖo gbe nɔ nyɔnuvi lɔ mɔ nɔ yɛbiɔ ŋɖekpokpui yeɔ, yeasɔɛ ni.
8 Eyi nɔlɔ dɔɛ yí enu mɔ: “Sɔ Ʒan Amɛʒindoshimɛtɔ lɔ ta do kpanutasɛ mɛ anaŋ.”
9 Éwa ɖeka nɔ efyɔ lɔ, vɔ ci eta nu le ŋmɛ nɔ mɛ ciwo yí ɖukɔ nu* koɖiɔ, éɖe gbe mɔ wo le sɔ eta lɔ ni.
10 Eyi taɖo edɔ amɛ ɖaɖa yí wovayi so ta nɔ Ʒan le gakpa lɔ mɛ.
11 Wosɔ ta lɔ do kpanutasɛ mɛ va nɔ nyɔnuvi lɔ yí esɔ yi jo nɔ nɔlɔ.
12 Le yi goduɔ, yi nukplaviwo sɔ yi cɔ vayi ɖyi. Eyi wova nu enu ci yí jɔ nɔ Yesu.
13 Ci Yesu se nyɔ lɔɔ, éde tɔjihun mɛ yí yi texwe ɖeka ci yí le azɔge keŋ anɔ nɔ yiɖekɛ. Vɔ ci amɛahwa lɔ se ahan ɔ, wosɔ afɔ so eju lɔwo mɛ yí kplɔɛ do.
14 Ci eto le tɔjihun lɔ mɛɔ, ékpɔ amɛ sugbɔ ɖekawo, wowo nu wa ŋshishi ni yí eda dɔ̀ nɔ wowo mɛ ciwo yí ble.
15 Vɔ fiɛfimɛɔ, yi nukplaviwo va gbɔ yí nu ni mɔ: “Fini mìle jinjin do axwe gbɔ yí gamɛ can yi, eyi taɖo tashi mɛ lɔwo nɔ woayi kɔxwiwo mɛ ayi xwle nu aɖu.”
16 Vɔ Yesu nu nɔ wo mɔ: “Deʒan mɔ woayi o; míwoŋtɔwo mína ŋɖuɖu wo nɔ woaɖu.”
17 Wonu ni mɔ: “Ŋɖe le mì shi sɔ zeto kpɔnnɔ amatɔn koɖo kpavi amɛve nu ba.”
18 Yesu nu mɔ: “Mísɔ wo vɛ nɔŋ.”
19 Eyi enu nɔ amɛahwa lɔ mɔ wo le nɔ nyinɔnɔ do egbewo ji. Ésɔ kpɔnnɔ amatɔn koɖo kpavi amɛve lɔwo yí kɔ ta yi ji yí do gbe ɖaɖa.* Ci eŋɛ wo mɛ ɖegbɔɔ, ésɔ wo jo nɔ yi nukplaviwo yí yi nukplaviwo ma wo nɔ mɛ lɔwo.
20 Eyi wo pleŋ ɖu nu yí xodu ɖɔ, wolɔ kankan kpɛtɛwo yí woɖɔ kishi 12.
21 Ŋsu ciwo yí ɖu nu yi 5 000 han, wodehlɛn nyɔnuwo koɖo ɖeviwo do mɛ o.
22 Zeɖeka le yɛ goduɔ, éna yi nukplaviwo ɖo tɔjihun mɛ yí kpe ago xlɔtɔ ji nɔ axu lɔ doŋkɔ ni, hwenu yiŋtɔ le amɛahwa lɔ klankɔ.
23 Ci eklan amɛahwa lɔ ɖegbɔɔ, éyi eto ji yiɖekɛ yí ado gbe ɖaɖa. Ezan kpe nu yí ele nɔ yiɖekɛ.
24 Hwenɔnuɔ, tɔjihun lɔ jinjin* nywiɖe do agoji, eyi axublablawo dodoɔ aya ni sɛnŋsɛnŋɖe, ɖo jihɔn xo yí dodoɔ go wo.
25 Vɔ fɔnfɔnmɛɔ,* Yesu zɔn zɔnlin to axu lɔ ji yí va wo gbɔ.
26 Ci enukplavi lɔwo kpɔ Yesu zɔn axu lɔ ji gbɔgbɔɔ, jika so wo yí womɔ: “Edrɔ mìkukua?” Vɔnvɔn lé wo yí wodo axwa.
27 Vɔ Yesu xo nuxu nɔ wo zeɖeka yí mɔ: “Mígbe dɔn! Enyɛ yɔ; míŋgbevɔn o.”
28 Piɛ nu ni mɔ: “Axwetɔ, nɔ eo yɔɔ, nà nɔ mazɔn zɔnlin to eshi lɔ ji yí ava eo gbɔ.”
29 Yesu nu ni mɔ: “Va!” Eyi Piɛ to le tɔjihun lɔ mɛ yí zɔn zɔnlin to eshi lɔ ji yí kpe Yesu gbɔ.
30 Vɔ ci ekpɔ yí jihɔn xoxoɔ sɛnŋsɛnŋɖeɔ, évɔn yí tɔ eshi lɔ gɔnmɛ yiyi. Eyi edo axwa mɔ: “Axwetɔ, xɔ nɔŋ!”
31 Zeɖeka tɔntɔn ɔ, Yesu do alɔ̀ ɖaɖa yí dwin ti yí nu ni mɔ: “Xɔse hwe nɔ eo ɖoɖu. Nyi yí taɖo èxo nu kpɔɔ?”
32 Ci woɖo tɔjihun lɔ mɛ ɖegbɔɔ, jihɔn lɔ mi xoxo.
33 Eyi mɛ ciwo yí le tɔjihun lɔ mɛ bubɔ ni* yí nu mɔ: “Mawu Vi ènyi nyao.”
34 Eyi woso etɔ lɔ yí vayi Genezarɛti ju mɛ.
35 Ci mɛ ciwo yí le nɔtɔxu kpɔɛ yí jeshiɔ, wodo ŋɛ ɖaɖa amɛwo le eju ciwo pleŋ yí trɔdo wo mɛ yí amɛwo hɛn wowo mɛ ciwo yí ble vɛ ni.
36 Eyi woɖe kuku nɔ Yesu mɔ yɛ le lɔn nɔ yewoatɔ alɔ̀ yi wu toga kpetii. Edɔ̀ mi keŋkeŋ nɔ mɛ ciwo yí tɔ alɔ̀ yi wu.
Gɔnmɛnuŋwlɛnŋwlɛn
^ Yi gɔnmɛɖeɖe tiin: “Tetraki.” Ahan woyɔnɔ efyɔ ci yí kpɔnɔ eju ɖe ji nɔ Rɔma Cɛkpatɔ lɔ nɛ.
^ Eyi nyi Erodi Antipasi. Kpɔ Enyɔgbe Veviwo mɛ Ðeɖe.
^ Alo “nɔ ekplɔn nu.”
^ Alo “éyra do wo ji.”
^ Alo “Stadi nɛniɖe.” Stadi ɖeka nyi mɛta 185.
^ Enyinyiɛ ezan ga 3 va nyidin ga 6 han.
^ Alo “na bubu yi.”
