Eŋɛnywiwema Matie Tɔ 16:1-28
16 Le nɔɔ, Farizitɔwo koɖo Sadusitɔwo va gbɔ yí dui kpɔ mɔ yi le wa enujiŋ ɖeka so jeŋkwi mɛ nɔ yewoakpɔ.
2 Éɖo ŋci nɔ wo mɔ: “Nɔ fiɛfi ɖoɔ, mínunɔ mɔ, ‘Aya mɛ akɔ, ɖo jeŋkwi bya hiin.’
3 Yí le nyidinmɛɔ, mínunɔ mɔ, ‘Vuvɔ awa yí eshi aja gbɛ, ɖo jeŋkwi bya yí aya mɛ cɔn viin.’ Míkpɔnɔ jeŋkwi mɛ yí nyanɔ lé aya mɛ anɔ do; vɔ mídemɔŋje ŋciwo yí jɔjɔ kakacɛ yɛ mɛ o.
4 Egbɛvi amɛvwinwo koɖo egbejimanɔtɔwo* jijiɛ mɔ yewoakpɔ enujiŋ; vɔ wodakpɔ enujiŋ ɖe to akpo nɔ Ʒonasi tɔ o.” Eyi ci enu ahan ɔ, éso gbeɖe wo ɖɛ.
5 Enukplavi lɔwo so axu lɔ yí yi ago xlɔtɔ lɔ ji, vɔ woŋlɔbe yí wodehɛn kpɔnnɔ o.
6 Yesu nu nɔ wo mɔ: “Míkpɔ nywiɖe yí anɔ zanŋte do Farizitɔwo koɖo Sadusitɔwo kpɔnnɔcike nu.”
7 Eyi taɖo wotɔ nunu le wowonɔnɔwo mɛ mɔ: “Mìdesɔ kpɔnnɔ ɖe o.”
8 Ci Yesu nya ahan ɔ, énu mɔ: “Nyi yí taɖo mínunuɔ le míwonɔnɔwo mɛ mɔ, yewodesɔ kpɔnnɔɔ? Xɔse hwe nɔ mí sugbɔ.
9 Mídemɔŋje mɛ hɔɖo o? Alo mídeɖo ŋwi kpɔnnɔ amatɔn ci ŋsɔ na ŋsu 5 000 yí woɖu koɖo kishi nɛni ci yí kpɛtɛ ɖɔ yí míhɛn yi ba?
10 Alo kpɔnnɔ amadrɛ ci ŋsɔ na ŋsu 4 000 yí woɖu koɖo kishi gangan* nɛni ci yí kpɛtɛ ɖɔ yí míhɛn yi ba?
11 Lé ewɛ yí mídenya mɔ de kpɔnnɔ nu yí ŋxokɔ nuxu so nɔ míɔ? Vɔ mínɔ zanŋte do Farizitɔwo koɖo Sadusitɔwo kpɔnnɔcike nu.”
12 Eyi wovamɔŋje mɛ mɔ Farizitɔwo koɖo Sadusitɔwo nukplakplawo nu yí enukɔ le mɔ yewo le nɔ zanŋte do, denyi kpɔnnɔcike yɔ o.
13 Ci Yesu vaɖo Sezare ci yí le Filipi ɔ, ébiɔ yi nukplaviwo se mɔ: “Mi amɛwo nunɔ mɔ Agbetɔvi lɔ nyiɔ?”
14 Woɖo ŋci ni mɔ: “Mɛɖewo nukɔ mɔ Ʒan Amɛʒindoshimɛtɔ, mɛbuwo mɔ Eli yí mɛɖekawo can mɔ Ʒeremi alo enyɔnuɖɛtɔ ɖe.”
15 Ébiɔ wo se mɔ: “Vɔ míwo ɖe, mi yí míwo nunɔ mɔ nyɛŋnyiɔ?”
16 Simɔ Piɛ ɖo ŋci ni mɔ: “Eo yí nyi Kristo, Mawu agbeagbe Viɛ lɔ.”
17 Yesu nu ni mɔ: “Wocu shi nɔ eo, Simɔ Ʒonasi viɛ; ɖo denyi agbetɔ* yí na ènya ahan o, vɔ Edanyɛ ci yí le jeŋkwi mɛ yɔ.
18 Ŋnukɔ nɔ eo hɛnnɛ mɔ: Eo yí nyi Piɛ, yí ekpe cɛ ji naɖo anyi hamɛ do yí yɔdu* gbowo datɛnŋ aɖu ji o.
19 Nasɔ jeŋkwi mɛ Fyɔɖuxu safliwo na eo yí ŋɖekpokpui ci àbla le nyigban lɔ jiɔ, ále blabla xoxo le jeŋkwi mɛ yí ŋɖekpokpui ci àcu le nyigban lɔ jiɔ, ále cucu xoxo le jeŋkwi mɛ.”
20 Eyi edo se nɔ yi nukplaviwo veviɖe mɔ, woŋgbenu nɔ mɛɖe mɔ eye yí nyi Kristo lɔ o.
21 So hwenɔnuɔ, Yesu tɔ nu mɛ dredre nɔ yi nukplaviwo mɔ yeɖo ayi Ʒerusalɛmu. Eyi jumɛgawo, avɔnsatɔwo gawo koɖo esekplamɛtɔwo atre fun sugbɔ nɔ ye; woawu ye, vɔ yeafɔn le ŋkeke amɛtɔntɔ lɔ gbe.
22 Eyi Piɛ kplɔɛ yi ekpa yí tɔ nyɔ gbegbe ni mɔ: “Axwetɔ, Mawu ŋgbelɔn o; ecɛ ajɔ do eo ji kpɔ gbeɖe go.”
23 Vɔ étrɔ ŋgbe do Piɛ yí nu ni mɔ: “Gboteyi ɖaa, Satana! Afɔklɛnnu ènyi nɔŋ; ɖo de Mawu susuwo yí le eo shi o, vɔ agbetɔwo susuwo yɔ.”
24 Yi goduɔ, Yesu nu nɔ yi nukplaviwo mɔ: “Nɔ mɛɖe ji mɔ yeakplɔ ŋdoɔ, le gbe yiɖeki yí asɔ efuntrenamɛci* yitɔ yí akplɔ ŋdo matrɔmatrɔ.
25 Mɛɖekpokpui ci yí ji mɔ yeahwlɛn ye gbe* gan ɔ, ásɔ bu. Eyi mɛɖekpokpui ci yí bu yi gbe* do enyɛ ŋciɔ, ákpɔɛ.
26 Le nyɔnɔnwi mɛɔ, nɔ mɛɖe je agbla yí ɖo ŋciwo pleŋ yí le xexeɛ mɛ gan yí sɔ agbe* yitɔ bu ɖe, nyɔna ci yí le mɛ niɔ? Alo nyi agbetɔ atɛnŋ asɔ xwle yi gbeɔ?*
27 Ðo Agbetɔvi lɔ ava le Edalɔ ŋsɛn mɛ koɖo yi dɔlawo. Eyi acu fɛn nɔ mɛɖekaɖeka do wana yitɔ ŋci.
28 Ŋnukɔ nɔ mí le nyɔnɔnwi mɛ mɔ, mɛɖewo le mí mɛ yɛ yí wodaku keke ana nɔ hwenu woakpɔ Agbetɔvi lɔ yí agbɔgbɔ le Fyɔɖuxu yitɔ mɛ o.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “hashiwatɔwo.”
^ Alo “kishi ci mɛ woxwlenɔ nuwo do.”
^ Yi gɔnmɛɖeɖe tiin: “gbaza koɖo ehun.”
^ Alo “Hadɛsi” ci yí nyi agbetɔviwo pleŋ yɔdu. Kpɔ Enyɔgbe Veviwo mɛ Ðeɖe.
^ Kpɔ Enyɔgbe Veviwo mɛ Ðeɖe.
^ Alo “ese.”
^ Alo “ese.”
^ Alo “ese.”
^ Alo “ese.”
