Eŋɛnywiwema Matie Tɔ 17:1-27
17 Le ŋkeke amadɛn goduɔ, Yesu kplɔ Piɛ, Ʒaki koɖo nɔviɛ Ʒan yí wowoɖekɛwo yi eto yiji ɖeka ji.
2 Eyi nɔnɔmɛ trɔ nɔ Yesu le ŋmɛ nɔ wo; yi ŋmɛ dada zo shigbe ewe nɛ yí yi wuwo ɣe* pepepe shigbe klɛnklɛn nɛ.
3 Wokpɔ Moizi koɖo Eli yí wole seŋ kankɔ koɖi.
4 Eyi Piɛ nu nɔ Yesu mɔ: “Axwetɔ, enyɔ mɔ mìle lɛ. Nɔ èjiɔ, nacu zava amɛtɔn do lɛ: ɖeka anyi aotɔ, ɖeka anyi Moizi tɔ yí ɖeka anyi Eli tɔ.”
5 Enyɔ lɔ nukɔ ele vɔɔ, yí azɔ klɛnklɛn ɖeka cɔn wo ji. Egbe ɖeka ɖyi so azɔ lɔ mɛ yí nu mɔ: “Mɛ cɛ yí nyi anyi Vi ci kɔ ŋdelɔnnɔ nu le o; yi nu kpenɔ nɔŋ. Míɖo to yi.”
6 Ci enukplavi lɔwo se nyɔ cɛɔ, wovɔn haan yí sɔ ŋmɛwo cɔn nyigban.
7 Eyi Yesu gbosɔ wo yí tɔ alɔ̀ wo yí mɔ: “Míso je te. Míŋgbevɔn o.”
8 Ci wofɔn ta yi jiɔ, wodegbekpɔ mɛɖe sɔ zeto Yesu nu o.
9 Ci woɖyiɖyiɛ le eto lɔ jiɔ, Yesu do se nɔ wo mɔ: “Míŋgbenu ŋtegannu ci míkpɔ lɔ nɔ mɛɖe keke ana nɔ hwenu woafɔn Agbetɔvi lɔ so ku o.”
10 Vɔ nukplavi lɔwo biɔɛ se mɔ: “Nyi yí taɖo esekplamɛtɔwo nunɔ mɔ, Eli ɖo ava doŋkɔɔ?”
11 Éɖo ŋci nɔ wo mɔ: “Eli ava nyao yí adra enuwo pleŋ do.
12 Vɔ ŋnukɔ nɔ mí mɔ Eli va vayi, gan wodekpɔɛ yí jeshi o yí ŋci yí dro wo yí wocu kpɔ koɖi. Ahanke Agbetɔvi lɔ akpe fun le alɔ̀ mɛ nɔ wo nɛ.”
13 Eyi nukplavi lɔwo mɔŋje mɛ mɔ Ʒan Amɛʒindoshimɛtɔ lɔ nyɔ enukɔ nɔ yewo.
14 Ci wogogokɔ amɛahwa lɔɔ, ŋsu ɖeka gbosɔɛ yí je klo ji ni yí mɔ:
15 “Axwetɔ, ku ŋshishi nɔ vinyɛ ŋsuvi, ɖo élé jigbudɔ̀ yí edɔ̀ lɔ sɛnŋ ni. Éjenɔ zo mɛ yí gbejenɔ eshi mɛ.
16 Ŋkplɔɛ va nɔ ao nukplaviwo, vɔ wodetɛnŋ da dɔ̀ lɔ ni o.”
17 Yesu ɖo ŋci mɔ: “Egbɛvi amɛdɔndɔn maɖoxɔsewo, keke na nɔ hwenu yí nanɔ mí gbɔ asɔ sɛn ɔ? Keke na nɔ hwenu yí nado ji asɔ nɔ koɖo míɔ? Míkplɔ ɖevi lɔ vɛ nɔŋ.”
18 Eyi Yesu wa adan do gbɔngbɔnvɔn lɔ yí eto le ŋsuvi lɔ mɛ. Edɔ̀ lɔ mi ni zeɖeka.
19 Yi goduɔ, enukplavi lɔwo vakpɔ Yesu do akpo yí biɔɛ se mɔ: “Nyi yí taɖo mìwo detɛnŋ nyi tiɔ?”
20 Yesu ɖo ŋci nɔ wo mɔ: “Ci míwo xɔse hwe yí dɔ. Ŋnukɔ nɔ mí le nyɔnɔnwi mɛ mɔ, nɔ míɖo xɔse yí egangan shigbe mutadiku* nɛɔ, míanu nɔ eto cɛ mɔ, ‘So ayi je hunɖaa;’ eyi aso ayi. Yí ŋɖekpokpui daglo mí o.”
21 * ——
22 Hwenu Yesu koɖo yi nukplaviwo bɔ do Galile yí enu nɔ wo mɔ: “Wojikɔ asa Agbetɔvi lɔ yí asɔ do alɔ̀ mɛ nɔ amɛwo.
23 Woawui, vɔ woafuin do agbe le ŋkeke amɛtɔntɔ lɔ gbe.” Ecɛ na yí nukplavi lɔwo ci ŋshishi mɛ sugbɔ.
24 Ci wovaɖo Kapɛrnawumu ɔ, ŋsu ciwo yí xɔkɔ drakma amɛve* taga le amɛwo shi gbosɔ Piɛ yí biɔɛ se mɔ: “Míwo nukplamɛtɔ yɛdecunɔ drakma amɛve taga lɔ ba?”
25 Éɖo ŋci mɔ: “Ɛɛ.” Vɔ ci eɖo axwe lɔ mɛɔ, Yesu doŋkɔ yí biɔɛ se mɔ: “Simɔ, lé èkpɔɛ doɔ? Miwo shi yí nyigban ji fyɔwo xɔnɔ taga alo jɔnɔ nu leɔ? Wowo viwo shi yɔa alo mɛbuwo shi?”
26 Éɖo ŋci mɔ: “Mɛbuwo shi yɔ.” Eyi Yesu nu ni mɔ: “Nɔ enyi ahan ɔ, wowo viwo deɖo ana taga o.
27 Vɔ nɔ mìŋgbenyi afɔklɛnnu nɔ woɔ, yi axu tu yí ada mlɛ. Eyi kpavi ŋkɔtɔ ci àleɔ, ke aglan ni. Àkpɔ gajunho* ɖeka. Sɔɛ asɔ yi na do nu nɔ enyɛ koɖo eo.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “kɔkɔ.”
^ Ényi aciku hwɛhwɛ ɖeka ci wokpɔnɔ le Palestine yí aci yitɔ jinjinnɔ mɛta amɛnɛ han.
^ Kpɔ Enumɛɖeɖewo A3.
^ Yi gɔnmɛɖeɖe tiin: “drakma amɛve ho.” Kpɔ Enumɛɖeɖewo B14.
^ Yi gɔnmɛɖeɖe tiin: “statɛ.” Éwa drakma amɛnɛ. Kpɔ Enumɛɖeɖewo B14.
