Eŋɛnywiwema Matie Tɔ 18:1-35
18 Yesu nukplaviwo va gbɔ hwenɔnu yí biɔɛ se mɔ: “Mi yí nyi amɛ gangantɔ le jeŋkwi mɛ Fyɔɖuxu lɔ mɛɔ?”
2 Eyi taɖo Yesu yɔ ɖevihwɛ ɖeka va yiɖeki gbɔ yí sɔ ɖo dodomɛ nɔ wo
3 yí nu mɔ: “Ŋnukɔ nɔ mí le nyɔnɔnwi mɛ mɔ, nɔ mídetrɔ yí vale shigbe ɖevihwɛwo nɛɔ, mídaɖo jeŋkwi mɛ Fyɔɖuxu lɔ mɛ kpɔ gbeɖe o.
4 Eyi taɖo mɛɖekpokpui ci yí asɔ yiɖeki hwe shigbe ɖevihwɛ cɛ nɛ yí anyi amɛ gangantɔ le jeŋkwi mɛ Fyɔɖuxu lɔ mɛ;
5 eyi mɛɖekpokpui ci yí xɔ ɖevi cɛ hanci do anyi ŋkɔ ŋciɔ, éxɔ nyɛ can.
6 Vɔ mɛɖekpokpui ci yí ado afɔbli ɖevi cɛwo ɖe ciwo yí xɔŋ ji seɔ, anyɔ ni sɔwu nɔ wobla ekpecunu ci esɔkɛtɛ tronɔ do kɔ ni yí sɔ dɔ ɖaɖa axu mɛ.
7 “Babɛ nɔ mɛ ciwo yí le xexe lɔ mɛ yí dɔnnɔ amɛwo do nuvɔn mɛ! Le nyɔnɔnwi mɛɔ, amɛ ani yí adɔn yi kpena do nuvɔn mɛ, vɔ babɛ nɔ mɛ ŋtɔ́!
8 Eyi taɖo nɔ ao lɔ̀ alo ao fɔ dɔnkɔ eo do nuvɔn mɛɔ, swi si asɔ dɔŋkpe ɖaɖa azɔge. Ðo anyɔ nɔ eo mɔ alɔ̀ kuɖeka alo afɔ kuɖeka ale eo shi gan yí nàkpɔ agbe sɔwu mɔ alɔ̀ amɛve alo afɔ amɛve ale eo shi vɔ yí woasɔ eo dɔŋkpe do zomavɔ mɛ.
9 Ahanke nɔ enyi ao ŋkuvi yí dɔnkɔ eo do nuvɔn mɛɔ, ɖi swi yí asɔ dɔŋkpe ɖaɖa azɔge. Ðo anyɔ nɔ eo mɔ ŋkuvi kuɖeka ale eo shi gan yí nàkpɔ agbe sɔwu mɔ ŋkuvi amɛve lɔwo ale eo shi vɔ yí woasɔ eo dɔŋkpe do Gehena* zo mɛ.
10 Míkpɔ nywiɖe nɔ míŋgbegbali ɖevihwɛ cɛwo ɖe o, ɖo ŋnukɔ nɔ mí mɔ mawudɔla wowotɔ ciwo yí le jeŋkwi mɛ kpɔnɔ ŋmɛ nɔ Edanyɛ ci yí le jeŋkwi mɛ gashiagamɛ.
11 * ——
12 “Lé míkpɔɛ doɔ? Nɔ lɛngbɔ 100 le mɛɖe shi yí ɖeka bu le mɛ ɖe, datashi 99 kpɛtɛwo do eto ji yí ayi ji kuɖeka ci yí bu lɔ kpɔ ba?
13 Ŋnukɔ nɔ mí le nyɔnɔnwi mɛ mɔ, nɔ ékpɔɛɔ, ákpɔ jijɔ do nu sɔwu 99 ciwo yí debu o.
14 Ahanke denyinɔ jijɔ nɔ Edanyɛ* ci yí le jeŋkwi mɛ mɔ, ɖevihwɛ cɛwo ɖeka kpetii abu nɛ.
15 “Nɛnɛke nɔ nɔvio je agɔ do eoɔ, yi nu agɔ* ci eje do eo lɔ ni le míwoɖeɖewo mɛ. Nɔ ése ao nyɔɔ, anyi èhwlɛn nɔvio gan.
16 Vɔ nɔ desiɔ, kplɔ mɛɖeka alo amɛ amɛve bɔdo eoɖeki nu, nɔ míaxo enyɔ lɔ le kunuɖetɔ amɛve alo amɛtɔn ŋmɛ yí asɔ ɖo kpe enyɔ ɖeshiaɖe ji.
17 Nɔ dese wowo nyɔɔ, nui nɔ hamɛ lɔ. Nɔ dese hamɛ lɔ tɔ hɛnnɛɔ, kpɔɛ shigbe maxɔsetɔ* alo tagajɔtɔ nɛ.
18 “Ŋnukɔ nɔ mí le nyɔnɔnwi mɛ mɔ, ŋɖekpokpui ci míabla le nyigban jiɔ, anyi ŋci wobla xoxo le jeŋkwi mɛ yí ŋɖekpokpui ci míacu le nyigban jiɔ, anyi ŋci wocu xoxo le jeŋkwi mɛ.
19 Le nyɔnɔnwi mɛɔ, ŋgbenukɔ nɔ mí mɔ nɔ amɛ amɛve le mí mɛ le nyigban lɔ ji sɔ gbe ɖo ju yí biɔ ŋɖe ci yí le veviɖeɔ, Danyɛ ci yí le jeŋkwi mɛ awɛ nɔ wo.
20 Ðo fini amɛ amɛve alo amɛtɔn bɔ doju le le anyi ŋkɔ mɛɔ, ŋle gblamɛ nɔ wo.”
21 Yi goduɔ, Piɛ va yí biɔɛ se mɔ: “Axwetɔ, zenɛni yí nɔvinyɛ aje agɔ doŋ yí nasɔ kiɔ? Zeadrɛ yɔa?”
22 Yesu ɖo ŋci ni mɔ: “Ŋdenu nɔ eo mɔ zeadrɛ o, vɔ 77 yɔ.
23 “Eyi taɖo wosɔ jeŋkwi mɛ Fyɔɖuxu lɔ sɔ koɖo efyɔ ɖeka ci yí jikɔ awa kɔnŋta koɖo yi dɔwaviwo.
24 Ci etɔ kɔnŋta lɔ wawaɔ, wokplɔ dɔwavi ɖeka ci yí ɖu talanto* 10 000 di vɛ ni.
25 Vɔ ci ŋɖe dele shi asɔ cu fɛn lɔɔ, efyɔ lɔ ɖe gbe mɔ wo le sa yɛŋtɔ, ashiɛ, eviɛwo koɖo ŋciwo pleŋ yí le shi asɔ cu fɛn lɔ.
26 Eyi dɔwavi lɔ je klo ji ni yí mɔ, ‘Ŋɖe kuku, gbɔn ji ɖɛ nɔŋ. Nacu fɛn lɔwo pleŋ nɔ eo.’
27 Edɔwavi lɔ nu sadɔnu nɔ efyɔ lɔ yí esɔ fɛn lɔ ki yí tashi eyi.
28 Vɔ ci dɔwavi ŋtɔ́ to yí kpɔ yi kpena dɔwavi bu ci yí ɖu denari* 100 diɔ, éli yí je ehlo ji ni yí mɔ, ‘Cu anyi fɛnwo pleŋ nɔŋ.’
29 Eyi taɖo yi kpena dɔwavi lɔ je klo ji yí tɔ kuku ɖeɖe ni mɔ, ‘Gbɔn ji ɖɛ nɔŋ, nacu ao ho nɔ eo.’
30 Gan delɔn o. Éna wocui do gakpa mɛ nɔ anɔ nɔ keke ana nɔ hwenu acu yi fɛn ni.
31 Ci yi kpena dɔwavi buwo kpɔ ŋci yí jɔɔ, éku lanmɛ nɔ wo sugbɔ yí wovayi nu ŋciwo pleŋ yí jɔ nɔ efyɔ lɔ.
32 Eyi taɖo efyɔ lɔ dɔ woyɔɛ vɛ ni yí enu ni mɔ: ‘Dɔwavi vwin, ci èɖe kuku nɔŋ ɔ, ŋsɔ ao fɛnwo pleŋ ke eo.
33 Eɔ can deɖo aku ŋshishi nɔ ao kpena shigbe lé ŋku ŋshishi nɔ eo nɛ ba?’
34 Dɔmɛzi wa efyɔ lɔ yí esɔ do alɔ̀ mɛ nɔ gakpajikpɔtɔwo nɔ woasɔ do gakpa mɛ yí anɔ nɔ keke ana nɔ hwenu acu fɛn lɔwo pleŋ ni.
35 Ŋci pɛɛ yí Danyɛ ci yí le jeŋkwi mɛ awa koɖo mí hɛnnɛ nɛ, nɔ míwo ɖekaɖeka desɔ nu kenɔ nɔviɛ so ji mɛ o.”
Gɔnmɛnuŋwlɛnŋwlɛn
^ Kpɔ Enyɔgbe Veviwo mɛ Ðeɖe.
^ Kpɔ Enumɛɖeɖewo A3.
^ Alo taŋfuin, “míwo Da.”
^ Yi gɔnmɛɖeɖe tiin: “gbe nyɔ ni.”
^ Yi gɔnmɛɖeɖe tiin: “jukɔn bu mɛ tɔ.”
^ Gacuho talanto 10 000 nyi denari 60 000 000. Kpɔ Enumɛɖeɖewo B14.
^ Kpɔ Enumɛɖeɖewo B14.
