Eŋɛnywiwema Matie Tɔ 2:1-23
2 Ci woji Yesu le Bɛtɛlɛhɛmu ci yí le Ʒude le efyɔ Erodi* hwenuɔ, wlecivimɛfankantɔwo* so Wezexu va Ʒerusalɛmu
2 yí biɔ se mɔ: “Fini Ʒuifuwo fyɔ ci woji lɔ leɔ? Ðo mìkpɔ yi wlecivi hwenu mìle Wezexu yí mìva mɔ mìana bubu yi.”*
3 Ci Efyɔ Erodi se enyɔ lɔɔ, édan ta nɔ yiɖeki. Mɛ ciwo pleŋ yí le Ʒerusalɛmu can dan ta nɔ wowoɖekiwo.
4 Eyi ebɔ avɔnsatɔwo gawo koɖo esekplamɛtɔwo pleŋ yí biɔ wo se mɔ fini woaji Kristo* lɔ le ma.
5 Woɖo ŋci ni mɔ: “Bɛtɛlɛhɛmu ci yí le Ʒude yɔ. Ðo enyɔ cɛ yí woŋwlɛ ɖɛ to enyɔnuɖɛtɔ lɔ ji ke:
6 ‘Oo, eo Bɛtɛlɛhɛmu ci yí le Ʒuda nyigban ji. De eo yí nyi hwɛhwɛtɔ nɔ eju ciwo yí Ʒuda jujikpɔtɔwo kpakɔ nɔ o. Ðo eo mɛ yí acɛkpatɔ ci yí akplɔ anyi jukɔn Izraɛli aso.’”
7 Eyi Erodi yɔ wlecivimɛfankantɔ lɔwo le bebemɛ yí ji nu gɔnmɛ kpɔ le wo gbɔ kitokito so hwecinu teŋ wlecivi lɔ to nu.
8 Éɖo wo ɖaɖa Bɛtɛlɛhɛmu yí nu nɔ wo mɔ: “Míyi ayi ji ɖevi lɔ kpɔ nywiɖe; eyi nɔ míkpɔɛɔ, míatrɔgbɔ ava nu nɔŋ nɔ nyɛ can mayi na bubu yi.”
9 Ci wose efyɔ lɔ nyɔwo ɖegbɔɔ, woso ɖedo. Eyi kpoŋ vɔɔ, wlecivi ci wokpɔ hwenu wole Wezexu lɔ je ŋkɔ nɔ wo keke vayi ci te do tamɛ nɔ axwe ci mɛ ɖevi lɔ le.
10 Ci wokpɔ wlecivi lɔ ci teɔ, eji jɔ wo haan.
11 Ci woɖo axwe lɔ mɛɔ, wokpɔ ɖevi lɔ koɖo nɔlɔ Mari yí woje klo ji yí na bubu yi.* Wohun ŋciwo mɛ wowo dɔkunuwo le hɛnnɛ yí na shika, linfin koɖo ami ci woyɔnɔ mɔ miru yi.
12 Vɔ ci Mawu nu nɔ wo le drɔ mɛ mɔ, woŋgbetrɔyi Erodi gbɔɔ, woto emɔ bu yí yi axwe.
13 Ci wlecivimɛfankantɔ lɔwo so ɖegbɔɔ, Yehowa* dɔla ze nɔ Ʒozɛfu le drɔ mɛ yí nu ni mɔ: “So akplɔ ɖevi lɔ koɖo nɔlɔ yí ashi yi Eʒipti. Eyi nànɔ nɔ keke aje hwenu yí nanu nɔ eo mɔ eɔ le trɔgbɔ. Ðo Erodi avaji ɖevi lɔ kpɔ amɔ yeawui.”
14 Eyi taɖo Ʒozɛfu so yí kplɔ ɖevi lɔ koɖo nɔlɔ zanmɛ yí woshi yi Eʒipti.
15 Énɔ nɔ keke na nɔ hwenu Erodi ku. Ecɛ na yí enyɔ ci Yehowa* nu ɖɛ to yi nyɔnuɖɛtɔ ji vamɛ. Émɔ: “Ŋyɔ vinyɛ so Eʒipti.”
16 Ci Erodi kpɔ mɔ wlecivimɛfankantɔ lɔwo ble ye do mɛɔ, édo dɔmɛzi sugbɔ. Eyi eɖo amɛwo ɖaɖa yí wovayi wu ŋsuviwo pleŋ, so vifinwo ji keke je ciwo yí ɖo xwe amɛve ji le Bɛtɛlɛhɛmu koɖo eju ciwo pleŋ ekpa nɔ mɛ. Enyɔ ci ese so wlecivimɛfankantɔ lɔwo gbɔ yí dɔ ekan xwe lɔ ahan.
17 Eyi taɖo enyɔ ci wonu ɖɛ to enyɔnuɖɛtɔ Ʒeremi ji jɔ do ji. Émɔ:
18 “Axwa ɖeka ɖyiɖyiɛ le Rama. Avinfanfan koɖo vevisese sugbɔ xwa yɔ. Rashɛli yí fankɔ avin do eviɛwo ŋci yí gbé mɔ woŋgbefa kɔn nɔ ye o. Ðo wodegbeli o.”
19 Ci Erodi kuɔ, Yehowa* dɔla ze nɔ Ʒozɛfu le drɔ mɛ le Eʒipti.
20 Énu ni mɔ: “So akplɔ ɖevi lɔ koɖo nɔlɔ yi Izraɛli nyigban ji. Ðo mɛ ciwo yí jijiɛ ɖevi lɔ mɔ yewoawui ku.”
21 Eyi taɖo eso yí kplɔ ɖevi lɔ koɖo nɔlɔ yí woyi Izraɛli nyigban ji.
22 Ci ese mɔ Arkelawusi yí vakpakpa nɔ Ʒude do dumɛ nɔ dalɔ Erodi ɔ, évɔn nɔ hunnɔtɔxu yiyi. Ci Mawu kanxli le drɔ mɛ hɛnnɛɔ, éyi Galile kan mɛ.
23 Évaci eju ci woyɔnɔ mɔ Nazarɛti mɛ, nɔ enyɔ ci wonu ɖɛ to enyɔnuɖɛtɔwo ji avamɛ mɔ: “Woayɔɛ mɔ Nazarɛtitɔ.”*
Gɔnmɛnuŋwlɛnŋwlɛn
^ Kpɔ Enyɔgbe Veviwo mɛ Ðeɖe.
^ Alo “maʒikiwatɔwo.”
^ Alo “mìabubɔ ni.”
^ Alo “Mɛsia; Amɛshiaminɔ.”
^ Alo “bubɔ ni.”
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Taŋfuin Ebre nyɔgbe ci yí nyi “acilɔvi ci yí je” mɛ yí wosɔ nyɔgbe lɔ so.
