Eŋɛnywiwema Matie Tɔ 20:1-34
20 “Ðo jeŋkwi mɛ Fyɔɖuxu lɔ le shigbe axwetɔ ɖeka ci yí fɔn nyidin kucukucu yí ayi ji apadɔwatɔwo nɔ woawa dɔ le yi vɛngble mɛ nɛ.
2 Éxo koɖo dɔwatɔ lɔwo mɔ, yeacu denari* ɖeka nɔ wo nɔ ŋkeke ɖeka dɔwawa. Yi goduɔ, éɖo wo ɖaɖa vɛngble lɔ mɛ.
3 Égbeto nyidin gashiɖekɛ* mɛ han yí kpɔ mɛbuwo le te le afi mɛ yí wodewakɔ dɔ ɖe o.
4 Énu nɔ wo mɔ, ‘Míwo can míyi vɛngble lɔ mɛ nɔ macu edɔho ci yí sɔgbe nɔ mí.’
5 Eyi woyi. Gawive* mɛ koɖo wetrɔ gatɔ̀n* mɛ han ɔ, axwetɔ lɔ gbeto yí wa ahan ke.
6 Le vɔvɔnuɔ, éto fiɛfi gatɔ́n* mɛ han yí kpɔ mɛbuwo le te. Ébiɔ wo se mɔ, ‘Nyi yí taɖo míle te le lɛ ŋkeke lɔ pleŋ mɛ edɔ ɖe mawaɔ?’
7 Woɖo ŋci mɔ, ‘Mɛɖe deyɔ mì nɔ apadɔ ɖe o.’ Énu nɔ wo mɔ, ‘Míwo can míyi vɛngble lɔ mɛ.’
8 “Fiɛfimɛɔ, vɛngble xwetɔ lɔ nu nɔ yi dɔwatɔwo ga mɔ, ‘Yɔ dɔwatɔ lɔwo yí acu fɛn nɔ wo. Tɔɛ so amɛ godutɔwo ji yí avaɖegbɔ do amɛ ŋkɔtɔwo ji.’
9 Wocu denari* ɖekaɖeka nɔ mɛ ciwo yí va gatɔ́n mɛ.
10 Eyi taɖo ci amɛ ŋkɔtɔwo vaɔ, wobui mɔ yewoaxɔ wu ahan; vɔ denari* ɖekaɖeka lɔ ke yí wocu nɔ wowo hɛnnɛ.
11 Ci woxɔ ho lɔ ɖegbɔɔ, wotɔ nyɔ toto do axwetɔ lɔ nu
12 yí mɔ, ‘Mɛ cɛwo vava cudu yí wa dɔ gaxoxo ɖeka kpaŋ; gan yí èvacu efɛn ŋmɛ ɖekɛ lɔ nɔ wowo koɖo mìwo ciwo yí wa dɔ sɛnsinɖe le nyidɔnŋgbe le ŋkekeɛ pleŋ mɛ!’
13 Vɔ énu nɔ ɖeka le wo mɛ mɔ, ‘Ðayɛ, ŋwa fɛn wa ŋɖe koɖo eo ba. Denari* ɖeka ji nyɛ koɖo eo xo do, alo?
14 Xɔ ao ho aso yi. Nyɛŋtɔ yí mɔ nacu fɛn ɖekɛ ŋmɛ lɔ nɔ eo koɖo mɛ ciwo yí va cudu.
15 Ŋdeɖogbe azan anyi nuwo lé edroŋ do ba? Abi xomɛvu* ci ŋwa lɔ yí dɔ èhwankɔŋ* a?’
16 Ahan yí amɛ godutɔwo avanyi ŋkɔtɔwo yí amɛ ŋkɔtɔwo avanyi godutɔwo nɛ.”
17 Ci woyikɔ Ʒerusalɛmu ɔ, Yesu yɔ yi nukplavi 12 lɔwo do akpo yí nu nɔ wo le emɔ lɔ ji mɔ:
18 “Míkpɔa? Mìyikɔ Ʒerusalɛmu yí woasɔ Agbetɔvi lɔ do alɔ̀ mɛ nɔ avɔnsatɔwo gawo koɖo esekplamɛtɔwo. Woaso eku kojo ni.
19 Woasɔ do alɔ̀ mɛ nɔ jukɔn bu mɛ tɔwo keŋ nɔ woakui yí ayɛ koɖo lanŋba yí akin do aci nu; vɔ woafuin do agbe le ŋkeke amɛtɔntɔ lɔ gbe.”
20 Yi goduɔ, Zebede viwo koɖo wowo nɔ vaje klo ji ni yí biɔkɔ ŋɖeka yi.
21 Ébiɔ nyɔnu lɔ se mɔ: “Nyi jikɔ èleɔ?” Nyɔnu lɔ nu ni mɔ: “Nà gbe keŋ nɔ vinyɛ ŋsuvi amɛve cɛwo anɔ axa nɔ eo. Ðeka anɔ ɖushi mɛ nɔ eo yí yi kpena anɔ emiɔ mɛ nɔ eo le ao Fyɔɖuxu lɔ mɛ.”
22 Yesu ɖo ŋci mɔ: “Mídenya ŋci biɔkɔ míle o. Míakpe ji anu ŋci ŋjikɔ anua?” Woɖo ŋci mɔ: “Ɛɛ, mìakpe ji.”
23 Énu nɔ wo mɔ: “Míanu ŋci ŋjikɔ anu lɔ pɛɛ, vɔ ŋdeɖo acɛ ana gbe mɛɖe mɔ yɛ le nɔ ɖushi mɛ alo emiɔ mɛ nɔŋ o. Mɛ ciwo Danyɛ dra texwe lɔwo do ɖɛ nɔ tɔwo yí wonyi.”
24 Ci amɛ amɛ́wo kpɛtɛwo se nyɔ lɔɔ, wodo dɔmɛzi do nɔjinɔ amɛve lɔwo.
25 Vɔ Yesu yɔ wo va yiɖeki gbɔ yí nu mɔ: “Mínya mɔ egawo ɖunɔ axwetɔ do jukɔnwo ji yí mɛ ciwo yí gangan wu kpanɔ nɔ wo.
26 Deɖo anyi ahan le míwo mɛ o; vɔ mɛɖekpokpui ci yí ji mɔ, yeanyi amɛ gangan le mí mɛ ɖo anyi dɔwavi nɔ mɛkpɛtɛwo.
27 Yí mɛɖekpokpui ci yí ji mɔ, yeanyi amɛ ŋkɔtɔ le mí mɛ ɖo anyi hwashi nɔ mɛkpɛtɛwo.
28 Shigbe lé Agbetɔvi lɔ deva mɔ woasumɔ ye o, vɔ éva mɔ yeasumɔ amɛwo yí asɔ ye gbe* cu tafɛn do ta nɔ amɛ sugbɔ nɛ.”
29 Ci woso kpe Ʒeriko ɔ, amɛ sugbɔ ɖekawo kplɔɛ do.
30 Ŋsu ŋkuvitɔnnɔ amɛve ɖekawo le nyinɔnɔ le mɔ tu; ci wose mɔ Yesu vayikɔɔ, wodo axwa yí nu mɔ: “Axwetɔ, Davidi Viɛ, ku ŋshishi nɔ mì.”
31 Amɛ lɔwo wa adan do wo mɔ wo le bɔ nu; vɔ wogbedo axwa doji yí mɔ: “Axwetɔ, Davidi Viɛ, ku ŋshishi nɔ mì!”
32 Eyi Yesu nɔ te yí yɔ wo. Ébiɔ wo se mɔ: “Nyi míji mɔ mawa nɔ míɔ?”
33 Woɖo ŋci ni mɔ: “Axwetɔ, mìji mɔ mìwo ŋkuviwo le hun.”
34 Wowo nu ku lanmɛ nɔ Yesu yí etɔ alɔ̀ wowo ŋkuviwo. Ŋkuvi lɔwo hun zeɖeka yí wotɔ nu kpɔkpɔ yí kplɔɛ do.
Gɔnmɛnuŋwlɛnŋwlɛn
^ Kpɔ Enumɛɖeɖewo B14.
^ Yi gɔnmɛɖeɖe tiin: “gaxoxo amɛtɔntɔ lɔ.”
^ Yi gɔnmɛɖeɖe tiin: “gaxoxo amadɛntɔ lɔ.”
^ Yi gɔnmɛɖeɖe tiin: “gaxoxo amashiɖekɛtɔ lɔ.”
^ Yi gɔnmɛɖeɖe tiin: “gaxoxo wiɖekatɔ lɔ.”
^ Kpɔ Enumɛɖeɖewo B14.
^ Kpɔ Enumɛɖeɖewo B14.
^ Kpɔ Enumɛɖeɖewo B14.
^ Alo “enywi.”
^ Yi gɔnmɛɖeɖe tiin: “èɖo ŋkuvi vwin.”
^ Alo “ese.”
