Eŋɛnywiwema Matie Tɔ 21:1-46
-
Yesu ɖo Ʒerusalɛmu ju mɛ shigbe efyɔ nɛ (1-11)
-
Yesu nya enusatɔwo ti le gbedoxɔ lɔ mɛ (12-17)
-
Yesu sɛn kpɛn nɔ figici ɖeka (18-22)
-
Wodɔn nyɔ koɖo Yesu so acɛ ci eɖo nu (23-27)
-
Labalu ci Yesu do so evi ŋsuvi amɛve nu (28-32)
-
Labalu ci Yesu do so agbledetɔ amɛwutɔwo nu (33-46)
-
Wogbe zoguijikpe vevitɔ lɔ (42)
-
21 Ci wogogokɔ Ʒerusalɛmu yí vaɖo Bɛtifaʒe le Eto Olivuciwo tɔ jiɔ, Yesu dɔ yi nukplavi amɛve ɖaɖa.
2 Énu nɔ wo mɔ: “Míyi kɔxwi ci míkpɔkɔ ɖaa mɛ. Nɔ míɖo mɛ kakaɔ, míakpɔ esɔkɛtɛ ɖeka le ka mɛ yí esɔkɛtɛvi ɖeka le gbɔ. Mícu ka nɔ wo yí akplɔ wo vɛ nɔŋ.
3 Nɔ mɛɖe biɔ nyɔ ɖe mí seɔ, mínu ni mɔ: ‘Axwetɔ lɔ yí ʒan wo.’ Eyi atashi wo ɖaɖa zeɖeka.”
4 Enu cɛ jɔ keŋ nɔ enyɔ ci wonu ɖɛ to enyɔnuɖɛtɔ lɔ ji avamɛ. Énu mɔ:
5 “Mínu nɔ Siɔn cugbejɛvi lɔ mɔ: ‘Kpɔ ɖa! Ao fyɔ gbɔgbɔ eo gbɔ. Éfanɔ xomɛ, éde esɔkɛtɛ ji; ɛɛ, éde esɔkɛtɛvi ji. Elan ci wosɔ hɛnnɔ agban vi yí enyi.’”
6 Eyi taɖo enukplavi lɔwo yi yí wɛ pɛpɛpɛ shigbe lé Yesu nui do nɔ wo nɛ.
7 Wokplɔ esɔkɛtɛ koɖo esɔkɛtɛvi lɔ vɛ yí sɔ awu jitɔ wowotɔwo da do wo ji yí enɔ nyinɔnɔ do esɔkɛtɛvi lɔ ji.
8 Amɛahwa ɖeka le nɔ yí sugbɔ le wo mɛ sɔ awu jitɔ wowotɔwo ɖo do emɔ lɔ ji. Mɛbuwo can so acilɔ̀viwo yí ɖo wo do emɔ lɔ ji.
9 Gbesɔ kpe niɔ, amɛ sugbɔ le ŋkɔ ni yí buwo kplɔɛ do yí wododoɔ axwa mɔ: “Mìɖe kuku, hwlɛn Davidi Vi gan! Woacu shi nɔ mɛ ci yí gbɔgbɔ le Yehowa* ŋkɔ mɛ! Mìɖe kuku hwlin gan, eo ci yí le jeŋkwi mɛ ɖaa!”
10 Eyi ci eɖo Ʒerusalɛmu ɔ, eʒin tɔn le eju lɔ pleŋ mɛ yí amɛwo biɔbiɔ se mɔ: “Mi yí nyi mɛ cɛɔ?”
11 Amɛ sugbɔ lɔwo nunuɔ mɔ: “Mɛ cɛ yí nyi enyɔnuɖɛtɔ Yesu, ci yí so Nazarɛti le Galile!”
12 Yesu ɖo gbedoxɔ lɔ mɛ yí nya mɛ ciwo pleŋ yí sakɔ nu alo xwlekɔ nu le gbedoxɔ lɔ mɛ ti. Éfli mɛ ciwo yí ɖɔkɔli ehowo kplɔnwo koɖo mɛ ciwo yí sakɔ hwanlin ʒinkpinwo.
13 Énu nɔ wo mɔ: “Woŋwlɛ do Mawu Nyɔ lɔ mɛ ɖɛ mɔ, ‘Woayɔ anyi xwe mɔ gbedoɖawaxu,’ vɔ míwo sɔ trɔ flafiwo nɔxu.”
14 Ŋkuvitɔnnɔwo koɖo mɛ ciwo yí tɔnkɔ bu va gbɔ hɛnnɛ le gbedoxɔ lɔ mɛ yí eda dɔ̀ nɔ wo.
15 Dɔmɛzi wa avɔnsatɔwo gawo koɖo esekplamɛtɔwo ci wokpɔ enujiŋ ciwo ewa koɖo ŋsuvihwɛ ciwo yí le axwa dokɔ le gbedoxɔ lɔ mɛ mɔ, “Mìɖe kuku xɔ nɔ Davidi Vi.”
16 Eyi wonu ni mɔ: “Èse enyɔ ci wonukɔa?” Yesu ɖo ŋci nɔ wo mɔ: “Ɛɛ, mídehlɛn kpɔ mɔ, ‘Èwɛ yí ɖeviwo koɖo vifinwo kanfukɔ eo ba’?”
17 Eyi eso gbeɖe wo ɖɛ yí to le ju lɔ mɛ yí yi Betani yí dɔn nɔ.
18 Hwenu etrɔ yikɔ ju lɔ mɛ nyidin fɔnfɔnmɛɔ, shive ci.
19 Ékpɔ figici ɖeka le emɔ tu yí yi gbɔ, vɔ dekpɔ sɛnsɛn ɖekɛ le ji o; amawo ɖeɖe yí le ji. Eyi enu mɔ: “Dàgbesɛn kpɔ gbeɖe o.” Eyi figici lɔ xu do te zeɖeka.
20 Ci enukplavi lɔwo kpɔ ŋcɛɔ, ékpaca wo yí wonu mɔ: “Lé figici lɔ wɛ yí xu do te zeɖeka ahan ɔ?”
21 Yesu ɖo ŋci nɔ wo mɔ: “Ŋnukɔ nɔ mí le nyɔnɔnwi mɛ mɔ, nɔ xɔse le mí shi yí mídexo nu kpɔɔ, denyi ŋci ŋwa nɔ figici lɔ ɖekɛ míawa o. Vɔ nɔ mínu nɔ eto cɛ mɔ, ‘So ayi je axu mɛɔ,’ ájɔ ahan.
22 Yí nɔ míɖo xɔseɔ, míaxɔ enushianu ci míado gbe ɖaɖa abiɔ.”
23 Hwenu Yesu ɖo gbedoxɔ lɔ mɛ yí kplakɔ nu amɛwoɔ, avɔnsatɔwo gawo koɖo jumɛgawo va gbɔ. Wobiɔɛ se mɔ: “Acɛ ci èɖo yí wakɔ ŋcɛwoɔ? Yí mi yí na acɛ lɔ eoɔ?”
24 Yesu nu do nu nɔ wo mɔ: “Nyɛ can nabiɔ nyɔ ɖeka mí se. Nɔ mínui nɔŋ ɔ, nyɛ can nanu fini ŋkpɔ acɛ lɔ so yí sɔ wakɔ ŋcɛwo nɔ mí:
25 Fini Ʒan xɔ acɛ so yí ʒin amɛwo do shi mɛɔ? So jeŋkwi mɛa alo agbetɔwo gbɔ?” Vɔ wotɔ drɔɛdrɔɛ kpɔ le wowoɖeɖewo mɛ mɔ: “Nɔ mìmɔ, ‘Jeŋkwi mɛ exɔɛ soɔ,’ ábiɔ mì se mɔ, ‘Nyi yí taɖo mídekando jiɔ?’
26 Vɔ nɔ mìmɔ, ‘Éso agbetɔwo gbɔɔ,’ amɛahwa lɔ avafɔn do mì ji; ɖo wo pleŋ kpɔnɔ Ʒan mɔ yɛnyi enyɔnuɖɛtɔ.”
27 Eyi taɖo woɖo ŋci nɔ Yesu mɔ: “Mìdenya o.” Eyi yɛ can ɖo ŋci nɔ wo mɔ: “Nyɛ can ŋdanu fini ŋxɔ acɛ so yí wawa ŋcɛwo nɔ mí o.
28 “Lé míkpɔɛ doɔ? Evi amɛve le ŋsu ɖeka shi. Éyi ŋkɔtɔ gbɔ yí nu ni mɔ, ‘Vinyɛ, so yi wa dɔ le vɛngble lɔ mɛ gbɛ.’
29 Éɖo ŋci ni mɔ, ‘Nayi go,’ vɔ évave ni yí eyi.
30 Vida lɔ yi evi amɛvetɔ lɔ gbɔ yí nu enyɔ ɖekɛ lɔ ke ni. Yɛnu ni mɔ, ‘Nayi,’ vɔ devayi o.
31 Mi yí wa edalɔ dro le wo koɖo ve lɔ mɛɔ?” Woɖo ŋci ni mɔ: “Evi ŋkɔtɔ yɔ.” Yesu nu nɔ wo mɔ: “Ŋnukɔ nɔ mí le nyɔnɔnwi mɛ mɔ, tagajɔtɔwo koɖo sakabowo ayi Mawu Fyɔɖuxu lɔ mɛ doŋkɔ nɔ mí.
32 Ðo Ʒan va yí adasɛ enujɔjɔɛwawa mɔ nɔ mí, vɔ mídekando ji o. Gan tagajɔtɔwo koɖo sakabowo kando ji yí ci míkpɔɛ ahan can ɔ, dewa ɖe nɔ mí keke míatrɔ susu yí akando ji o.
33 “Míɖo to yí agbese labalu cɛ: Ŋsu ɖeka de vɛngble yí cu kpa trɔdi. Éwa vɛnfiɔnxu do mɛ yí cu exɔ yiji ɖeka ci mɛ woanɔ yí acɔ agble lɔ do mɛ. Ésɔ na agbledetɔwo nɔ woade dema keŋ yí xɔ mɔ yi eju bu mɛ.
34 Ci hwenu ɖo yí woagbɛn vɛnsɛnsɛn lɔwoɔ, édɔ yi hwashiwo ɖaɖa agbledetɔ lɔwo gbɔ mɔ wo le xɔ ye kpaxwe vɛ.
35 Vɔ agbledetɔ lɔwo je hwashi lɔwo ji, woxo ɖeka yí wu amɛvetɔ yí xo kpe amɛtɔntɔ yí eku.
36 Égbedɔ hwashi bu ciwo yí sugbɔ wu ŋkɔtɔwo ɖaɖa, vɔ wogbewa ŋɖekɛ lɔ koɖo wo.
37 Le vɔvɔnuɔ, évaɖo eviɛ ŋtɔ ɖaɖa wo yí nu mɔ, ‘Woashi ŋmɛ nɔ vinyɛ.’
38 Ci agbledetɔ lɔwo kpɔ eviɛ lɔɔ, wonu le wowoɖeɖewo mɛ mɔ, ‘Cinɔɖutɔ lɔ ke. Míva mìawui keŋ axɔ cinɔnu yitɔ lɔ!’
39 Eyi woli yí duin ti le vɛngble lɔ mɛ keŋ yí wui.
40 Ecɛyɛ nɔ botɔ lɔ va ɖe, nyi awa nɔ agbledetɔ lɔwoɔ?”
41 Avɔnsatɔwo gawo koɖo jumɛga lɔwo ɖo ŋci ni mɔ: “Ci enyi amɛvwinwo wonyiɔ, áwu wo yí asɔ vɛngble lɔ jo nɔ agbledetɔ bu ciwo yí ananɔ yi kpaxwe yi nɔ vɛnsɛnsɛn lɔ to.”
42 Yesu biɔ wo se mɔ: “Mídehlɛn nyɔ cɛ le Enuŋwlɛŋwlɛ lɔwo mɛ kpɔ ba? Womɔ: ‘Ekpe ci exɔcutɔwo gbeɔ, eyi vatrɔ zoguijikpe* vevitɔ. Yehowa* yí dɔ enyi ahan yí enyi enu gangan le ŋmɛ nɔ mì.’
43 Eyi taɖo ŋnukɔ nɔ mí mɔ woaxɔ Mawu Fyɔɖuxu lɔ le mí shi asɔ jo nɔ jukɔn ciwo yí sɛnkɔ yi kuwo.
44 Gbesɔ kpe niɔ, mɛ ci yí aje kpe cɛ ji aŋɛ kpeɖekpeɖe. Yí mɛɖekpokpui ci ji aje acuku hannyahannya.”
45 Ci avɔnsatɔwo gawo koɖo Farizitɔwo se labalu lɔwoɔ, wonya zeɖeka mɔ yewo nu exoxoɔ nuxu so.
46 Ci woji mɔ yewoali can ɔ, wovɔn nɔ amɛahwa lɔ. Ðo amɛahwa lɔ kpɔnɔ Yesu do enyɔnuɖɛtɔ ji.
