Eŋɛnywiwema Matie Tɔ 24:1-51
24 Ci Yesu so le gbedoxɔ lɔ mɛ yí ɖedoɔ, yi nukplaviwo va gbɔ mɔ yewoadasɛ gbedoxɔ lɔ mɛ xɔ vovovowo ni.
2 Eyi enu nɔ wo mɔ: “Míkpɔkɔ ŋcɛwo pleŋ a? Ŋnukɔ nɔ mí le nyɔnɔnwi mɛ mɔ, woagban ekpe ciwo pleŋ yí le lɛ yí ekpe ɖe dagbele yi kpena ji o.”
3 Ci enɔ nyinɔnɔ do Eto Olivuciwo tɔ jiɔ, yi nukplaviwo va gbɔ wowoɖekɛwo yí biɔɛ se mɔ: “Nui nɔ mì: Hwenu ŋcɛwo ajɔɔ, yí nyi yí anyi jeshidu nɔ ao trɔtrɔgbɔ* koɖo xexe lɔ vɔvɔnuɔ?”*
4 Yesu ɖo ŋci nɔ wo mɔ: “Míkpɔ nywiɖe nɔ mɛɖe ŋgbeble mí o,
5 ɖo amɛ sugbɔ ava asɔ anyi ŋkɔ anukɔ mɔ, ‘Enyɛ yí nyi Kristo lɔ’ yí akplɔ amɛ sugbɔ bu mɔ.
6 Míase mɔ wowawa ahwa le texwe ciwo yí sɔ mí gbɔ koɖo texwe ciwo yí jinjin le mí gbɔ. Vɔ jika ŋgbeso mí o, ɖo ŋcɛwo ajɔ dandan, gan vɔvɔnu lɔ deva hɔɖo o.
7 “Ðo jukɔn atɔ ahwa koɖo jukɔn bu yí fyɔɖuxu atɔ ahwa koɖo fyɔɖuxu bu. Eju ato le afi vovovo yí nyigban ahunhun le texwe vovovo.
8 Ŋcɛwo pleŋ le shigbe lé nyɔnu funɔ senɔ gbazavi nɔ evidɔmɛ tɔ ɖuɖui nɛ.
9 “Eyi amɛwo aci yumɛ nɔ mí yí awu mí yí jukɔnwo pleŋ agbe ŋwa nɔ mí do anyi ŋkɔ ŋci.
10 Ahanke yí amɛ sugbɔ agbe xɔse yí asa wowonɔnɔwo yí agbexa wowonɔnɔwo nɛ.
11 Enyɔnuɖɛtɔ ŋsukantɔ sugbɔ ava yí akplɔ amɛ sugbɔ bu mɔ.
12 Eyi ci esejimawamawa asukɔgbɔ dojiɔ, amɛ sugbɔ dagbelɔnnɔ amɛ o.
13 Vɔ mɛ ci yí ado ji* keke ayi vɔvɔnuɔ, woahwlin gan.
14 Eyi woadra Fyɔɖuxu ŋɛnywi lɔ le nyigban lɔ pleŋ ji yí anyi kunuɖeɖe nɔ jukɔnwo pleŋ. Yi goduɔ, vɔvɔnu lɔ ava.
15 “Eyi taɖo nɔ míkpɔ enunyɔŋ ci yí gbannɔ nu le kɔkɔɛtɔxu lɔ shigbe lé enyɔnuɖɛtɔ Daniɛli nui nɛɔ, (mɛ ci yí hlɛnkɔ nu lɔ le bu tamɛ kpɔ)
16 mɛ ciwo yí le Ʒude le shi yi etowo ji.
17 Mɛ ci yí le xɔ ta ŋgbeɖyi mɔ yealɔ ye nuwo so xɔ lɔ mɛ o.
18 Ahanke mɛ ci yí le boji ŋgbetrɔgbɔ mɔ yeasɔ awu jitɔ yetɔ o.
19 Babɛ nɔ nyɔnu funɔwo koɖo mɛ ciwo yí dodoɔ anɔ nɔ evi le ŋkeke ŋtɔ́wo ji!
20 Mídodoɔ gbe ɖaɖa nɔ hwenu míashi ŋgbevanyi vuvɔ hwenu alo Sabatigbe o;
21 ɖo hwenɔnuɔ, efunkpekpe gangan ava. Yi hanci deva kpɔ so gɔnmɛjeje nɔ xexe lɔ keke va kɔdo evyɛ o, yí yi hanci dagbevava kpɔ gbeɖe o.
22 Le nyɔnɔnwi mɛ nɔ wodeɖe ŋkeke lɔwo kpɔtɔɔ, mɛɖekɛ* daci agbe o; vɔ amɛcancanwo ŋci yí woaɖe ŋkeke lɔwo kpɔtɔ.
23 “Eyi nɔ mɛɖe nu nɔ mí mɔ, ‘Kpɔ ɖa! Kristo lɔ le lɛ’ alo ‘Éle hunɖaɔ,’ míŋgbekando ji o.
24 Ðo ŋsukankan Kristowo koɖo enyɔnuɖɛtɔ ŋsukantɔwo ava yí awa enujiŋ gangan hamɛhamɛ asɔ ble amɛwo. Eyi nɔ woasun jiɔ, woable amɛcancanwo ŋtɔkpu.
25 Míkpɔ ɖa! Ŋkankanxle mí ɖɛ.
26 Taɖo nɔ wonu nɔ mí mɔ, ‘Míkpɔ ɖa! Éle zogbejiɔ,’ míŋgbeyi o; ‘Míkpɔ ɖa! Éle xɔgan mɛɔ,’ míŋgbekando ji o.
27 Ðo shigbe lé jeŋkwi ɖenɔ zo le wezexu yí klɛnklɛn yitɔ vayinɔ weɖoxɔxu nɛɔ, ahanke Agbetɔvi lɔ trɔtrɔgbɔ* can ale nɛ.
28 Fini enukuku leɔ, hunnɔtɔxu yí ehɔnwo bɔnɔ do nɛ.
29 “Le efunkpekpe gangan ŋkeke lɔwo godu zeɖekaɔ, ewe ado vinvin yí wleci dagbeklɛn o. Wleciviwo ajuin so jeŋkwi mɛ yí woahunhun ŋsɛn ciwo yí le jeŋkwi mɛ.
30 Hwenɔnuɔ, Agbetɔvi lɔ jeshidu aze le jeŋkwi mɛ yí akɔta ciwo pleŋ yí le nyigban lɔ ji aci ŋshishi mɛ yí afan kwi yí woakpɔ Agbetɔvi lɔ agbɔgbɔ le azɔwo mɛ le jeŋkwi mɛ koɖo ŋsɛn koɖo kanfukanfu gangan.
31 Eyi adɔ yi dɔlawo ɖaɖa koɖo ekpɛn gbeɖyiɖyi gangan ɖeka yí woabɔ yi mɛcancanwo so zogui amɛnɛ lɔwo ji nɔ xexe* lɔ, so akpaxwe ɖeka ji nɔ jeŋkwi lɔ vɔvɔnu yi akpaxwe ɖetɔ nɔ jeŋkwi lɔ vɔvɔnu.
32 “Ecɛyɛ míkpla nu so figici labalu cɛ mɛ: Nɔ ézɛn lɔ̀vi yoyuwo yí wodɔn amaɔ, mínyanɔ mɔ fyɔta hwenu gogo.
33 Ahanke míwo can nɔ míkpɔ ŋcɛwo pleŋ ɔ, mínya mɔ Agbetɔvi lɔ gogo yí le hɔn ji.
34 Ŋnukɔ nɔ mí le nyɔnɔnwi mɛ mɔ, jijimɛ cɛ davayi kpɔ gbeɖe gbɔxwe ŋcɛwo pleŋ ajɔ o.
35 Jeŋkwi koɖo nyigban avayi, vɔ anyi nyɔwo davayi kpɔ gbeɖe o.
36 “Mɛɖekɛ dejeshi ŋkeke hunnɔ koɖo gaxoxo hunnɔ o, mawudɔla ciwo yí le jeŋkwi mɛ dejeshi o. Evi lɔ can dejeshi o, vɔ Eda ɖekɛ yí jeshi.
37 Ðo Agbetɔvi lɔ trɔtrɔgbɔ* ale shigbe lé enuwo nɔ do le Nowe hwenu nɛ.
38 Ðo doŋkɔ nɔ Eshiɖɔɖɔ lɔɔ, amɛwo ɖuɖuɔ yí nunuɔ. Ŋsuwo ɖekɔ nyɔnu yí wosɔ nyɔnuwo nakɔ asu keke je hwenu yí Nowe ɖo tɔjihun daka lɔ mɛ.
39 Yí wodenyanya ɖe o, keke je hwenu yí Eshiɖɔɖɔ lɔ va yí kplɔ wo keŋkeŋ hɛn yi. Ahanke Agbetɔvi lɔ trɔtrɔgbɔ anɔ nɛ.
40 Ŋsu amɛve ale boji yí woakplɔ ɖeka yí agbe xlɔtɔ ɖɛ.
41 Nyɔnu amɛve ale eɣɔ cukɔ le ete ji yí woakplɔ ɖeka yí agbe xlɔtɔ ɖɛ.
42 Eyi taɖo mínɔ zanŋte, ɖo mídenya hwenu yí míwo Xwetɔ ava o.
43 “Vɔ mímɔŋje nyɔ cɛ mɛ: Nɔ axwetɔ nya gaxoxo* ci mɛ yí flafinɔ avaɔ, ánɔ zanŋte yí dalɔn woagban axwe ni o.
44 Eyi taɖo míwo can míle gbesɔsɔ, ɖo Agbetɔvi lɔ ava le gaxoxo ci mɛ mídeɖoŋ do o.
45 “Mi cucucu yí nyi hwashi egbejinɔtɔ koɖo ŋɖɛnyatɔ ci yi xwetɔ sɔ ɖo nu nɔ edɔwavi ciwo yí le yi xwe mɛ nɔ ananɔ wowo ŋɖuɖu wo do gamɛ nywitɔ jiɔ?
46 Hwashi ŋtɔ́ akpɔ jijɔ nɔ yi xwetɔ va kpɔɛ yí ele dɔ ji ahan!
47 Ŋnukɔ nɔ mí le nyɔnɔnwi mɛ mɔ, ásɔ ɖo nu nɔ yi nuwo pleŋ.
48 “Vɔ nɔ hwashi ŋtɔ́ wa nuvwin yí nu le yi ji mɛ mɔ, ‘Anyi xwetɔ degbɔgbɔ kaba o’
49 yí tɔ yi kpena hwashiwo xoxo yí le nu ɖukɔ yí gbele aha nukɔ koɖo ahanumutɔnɔwoɔ,
50 yi xwetɔ ava le ŋkeke ci ji deɖoŋ do o koɖo gaxoxo ci denya mɛ.
51 Eyi yi xwetɔ adɔn to ni sɛnŋsɛnŋɖe yí ahlin do ayemɛnuwatɔwo mɛ. Enɔ yí afan vin yí aɖu aɖukli le nɛ.
Gɔnmɛnuŋwlɛnŋwlɛn
^ Kpɔ Enyɔgbe Veviwo mɛ Ðeɖe.
^ Kpɔ Enyɔgbe Veviwo mɛ Ðeɖe.
^ Alo “akpɔtɔ adodoɔ ji.”
^ Yi gɔnmɛɖeɖe tiin: “ŋcilan ɖekɛ.”
^ Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “so aya amɛnɛ lɔwo ji.”
^ Kpɔ Enyɔgbe Veviwo mɛ Ðeɖe.
^ Alo “hwenu ci yí flafinɔ ava zanmɛ.”
