Eŋɛnywiwema Matie Tɔ 25:1-46
25 “Jeŋkwi mɛ Fyɔɖuxu lɔ le shigbe cugbejɛ lealɔji amɛ́wo ɖekawo ciwo yí sɔ wowo kaɖigbanwo yí ayi do go mɛ ci yí jikɔ aɖe nyɔnu nɛ.
2 Amatɔn nyi xlunɔwo yí amatɔn nyi ŋɖɛnyatɔwo.
3 Xlunɔ lɔwo sɔ wowo kaɖigbanwo, vɔ wodehɛn ami bɔdo wo nu o.
4 Ŋɖɛnyatɔ lɔwo hɛn ami do eguwo mɛ bɔdo wowo kaɖigbanwo nu.
5 Ci mɛ ci yí jikɔ aɖe nyɔnu lɔ devava kabaɔ, alɔn sɔ cugbejɛ lɔwo pleŋ yí wodɔn alɔn.
6 Le zandomɛɔ, axwa tɔ ɖyiɖyi mɔ: ‘Mɛ ci yí jikɔ aɖe nyɔnu lɔ vaɖo! Míto ado go yi.’
7 Eyi cugbejɛ lealɔji lɔwo pleŋ fɔn yí kpɔ wowo kaɖigbanwo gbɔ.
8 Xlunɔ lɔwo nu nɔ ŋɖɛnyatɔ lɔwo mɔ: ‘Mína ami kankin mì, ɖo mìwo kaɖigbanwo jikɔ aci.’
9 Ŋɖɛnyatɔ lɔwo nu do nu nɔ wo mɔ: ‘Taŋfuin davasun nɔ mìwo koɖo míwo o. Míyi amisatɔwo gbɔ yí ayi je.’
10 Ci woso yi ami jegbeɔ, mɛ ci yí jikɔ aɖe nyɔnu lɔ va. Eyi cugbejɛ ciwo yí le gbesɔsɔ lɔwo yi alɔlelezanɖuxu lɔ koɖi yí wocu hɔn lɔ.
11 Yɛ goduɔ, cugbejɛ kpɛtɛwo can vaɖo yí tɔ nunu mɔ: ‘Mɛgan, Mɛgan, hun hɔn lɔ nɔ mì!’
12 Énu do nu nɔ wo mɔ: ‘Manu nyɔnɔnwi nɔ mí, ŋdejeshi mí ɖɛ o.’
13 “Eyi taɖo mínɔ zanŋte, ɖo mídenya ŋkeke lɔ koɖo gaxoxo lɔ o.
14 “Jeŋkwi mɛ Fyɔɖuxu lɔ le shigbe ŋsu ɖeka ci yí jikɔ axɔ mɔ ayi jugodu nɛ. Éyɔ yi dɔwaviwo yí sɔ yi nuwo jo nɔ wo mɔ wo le kpɔkpɔ wo ji nɔ ye.
15 Ésɔ talanto* amatɔn nɔ amɛ ŋkɔtɔ, yí sɔ amɛve nɔ amɛ amɛvetɔ yí sɔ kuɖeka nɔ amɛ amɛtɔntɔ. Émi nɔ wo ahan, ɖo énya ŋci edɔwavi ɖekaɖeka atɛnŋ awa. Yi goduɔ, éxɔ mɔ.
16 Mɛ ci yí xɔ talanto amatɔn yi zeɖeka yí tɔ ajɔ dodo koɖo yitɔ yí kpɔ talanto amatɔn doji.
17 Ahanke mɛ ci yí xɔ amɛve kpɔ amɛve doji nɛ.
18 Vɔ dɔwavi ci yí xɔ kuɖeka kpaŋ yi ku dodu yí ɖyi yi xwetɔ ho* lɔ do mɛ.
19 “Le hwenu jinjin ɖe goduɔ, axwetɔ lɔ trɔgbɔ yí vawa kɔnŋta koɖo dɔwavi lɔwo.
20 Eyi dɔwavi ci yí xɔ talanto amatɔn va yí sɔ talanto amatɔn bu ni yí mɔ: ‘Axwetɔ, talanto amatɔn èsɔ nɔŋ; vɔ ŋkpɔ amatɔn bu doji.’
21 Yi xwetɔ nu ni mɔ: ‘Èwa ɖaŋ wɛ, dɔwavi nywi koɖo egbejinɔtɔ! Ènɔ gbeji le enu hwɛhwɛwo mɛ. Nasɔ eo ɖo nu nɔ enu sugbɔ. Kpɔ jijɔ koɖo ao xwetɔ.’
22 Mɛ ci yí xɔ talanto amɛve can va yí mɔ: ‘Axwetɔ, talanto amɛve èsɔ nɔŋ; vɔ ŋkpɔ amɛve bu doji.’
23 Yi xwetɔ nu ni mɔ: ‘Èwa ɖaŋ wɛ, dɔwavi nywi koɖo egbejinɔtɔ! Ènɔ gbeji le enu hwɛhwɛwo mɛ. Nasɔ eo ɖo nu nɔ enu sugbɔ. Kpɔ jijɔ koɖo ao xwetɔ.’
24 “Le vɔvɔnuɔ, mɛ ci yí xɔ talanto kuɖeka can va yí mɔ: ‘Axwetɔ, ŋnya mɔ ao nyɔ defanɔ o. Èɖenɔ jinuku le fini dèdo jinuku do o yí lɔnɔ jinuku le fini dèfu jinuku le o.
25 Eyi taɖo ŋvɔn yí ɖyi ao talanto lɔ do gu mɛ. Yi ke, xɔ ao nu.’
26 Yi xwetɔ lɔ nu do nu ni mɔ: ‘Dɔwavi vwin ɖyiɖɔnɔ. Ènya mɔ ŋɖenɔ jinuku le fini ŋdedo do o yí lɔnɔ jinuku le fini ŋdefu le o, abi?
27 Enyɔ, eyi àsɔ anyi ho* da do ehodadoxu nɔŋ yí nɔ ŋgbɔɔ, maxɔɛ koɖo ehovi lɔ sa.
28 “‘Eyi taɖo míxɔ talanto ci yí le shi asɔ jo nɔ mɛ ci yí ɖo talanto amɛ́wo.
29 Ðo mɛɖekpokpui ci shi enu leɔ, woasɔ sugbɔ kpi ni keke awugan. Vɔ mɛ ci shi enu deleɔ, woaxɔ ci yí le shi ŋtɔkpu hɛnnɛ.
30 Mísɔ dɔwavi manyɔ nɔ ŋɖe lɔ dɔŋkpe ɖaɖa vinvin mɛ le xexenu. Enɔ yí afan avin yí aɖu aɖukli le nɛ.’
31 “Hwenu Agbetɔvi lɔ ava le kanfukanfu yitɔ mɛ yí mawudɔlawo pleŋ abɔdo nuɔ, ánɔ fyɔʒinkpin gangan yitɔ lɔ ji.
32 Woabɔ jukɔnwo pleŋ do ŋkɔ ni yí ama amɛwo mɛ shigbe lé lɛngbɔkplɔtɔ manɔ lɛngbɔwo koɖo egbɔwo mɛ nɛ.
33 Ásɔ lɛngbɔwo ɖaɖa yi ɖushi mɛ yí asɔ egbɔwo ɖaɖa yi miɔ mɛ.
34 “Eyi Efyɔ lɔ anu nɔ mɛ ciwo yí le ɖushi mɛ ni mɔ: ‘Míva, míwo ciwo yí Danyɛ cu shi nɔ. Míɖu cinɔ nɔ Fyɔɖuxu ci wodra do ɖɛ nɔ mí so gɔnmɛjeje nɔ xexe lɔ.
35 Ðo shive ciŋ yí mína ŋɖuɖuŋ; shikɔ ciŋ yí mína eshiŋ. Ŋnyi mɛdru yí míwa ɖaŋ xɔŋ;
36 ŋle mama* yí mína awuŋ yí ŋdo. Ŋble yí míle bu nɔŋ. Ŋle gakpa mɛ yí mívajiŋ kpɔ.’
37 Eyi amɛjɔjɔɛ lɔwo anu do nu ni mɔ: ‘Axwetɔ gbin mìkpɔ eo yí shive ci eo yí mìna ŋɖuɖu eoɔ, alo shikɔ ci eo yí mìna eshi eoɔ?
38 Gbin mìkpɔ eo yí ènyi mɛdru yí mìxɔ eo nywiɖeɔ, alo èle mama yí mìna awu eo yí èdoɔ?
39 Gbin mìkpɔ eo yí èble alo le gakpa mɛ yí mìva yɔ eo kpɔɔ?’
40 Efyɔ lɔ aɖo ŋci nɔ wo mɔ: ‘Ŋnukɔ nɔ mí le nyɔnɔnwi mɛ mɔ, nɔ mívlɛ yí wɛ nɔ nɔvinyɛ hwɛhwɛtɔ cɛwo ɖeɔ, enyɛ yí míwɛ nɔ.’
41 “Yi goduɔ, Efyɔ lɔ anu nɔ mɛ ciwo yí le emiɔ mɛ ni mɔ: ‘Mígboteyi ɖaa, míwo ciwo wosɛn kpɛn nɔ. Míyi zomavɔ ci wodra do ɖɛ nɔ Legba koɖo yi dɔlawo mɛ.
42 Ðo shive ciŋ, vɔ mídena ŋɖuɖuŋ o; shikɔ ciŋ, vɔ mídena eshiŋ o.
43 Ŋnyi mɛdru, vɔ mídexɔŋ o; ŋle mama, vɔ mídena awuŋ yí ŋdo o; ŋble, ŋnɔ gakpa mɛ, vɔ mídele bu nɔŋ o.’
44 Eyi wowo can anu do nu ni mɔ: ‘Axwetɔ, gbin mìkpɔ eo yí shive ci eo alo shikɔ ci eo alo ènyi mɛdru alo èle mama alo èble alo èle gakpa mɛ yí mìdekpedo eo nuɔ?’
45 Eyi yɛ can aɖo ŋci nɔ wo mɔ: ‘Ŋnukɔ nɔ mí le nyɔnɔnwi mɛ mɔ, ci mídevlɛ yí wɛ nɔ nɔvinyɛ hwɛhwɛtɔ cɛwo ɖe vɔɔ, enyɛ yí mídewɛ nɔ o.’
46 Woagu* mɛ cɛwo swi gbijigbiji, vɔ amɛjɔjɔɛwo anɔ agbe mavɔ.”
Gɔnmɛnuŋwlɛnŋwlɛn
^ Grɛki talanto ɖeka kpɛnkpɛnmɛ nyi kilo 20,4. Kpɔ Enumɛɖeɖewo B14.
^ Yi gɔnmɛɖeɖe tiin: “egacuho.”
^ Yi gɔnmɛɖeɖe tiin: “egacuho.”
^ Alo “ŋdedo enu ɖota ɖe o.”
^ Edasɛ mɔ, wodagbenɔ agbe o. Yi gɔnmɛɖeɖe tiin: “woakpa wo si; woaxlɔ wo si.”
