Eŋɛnywiwema Matie Tɔ 3:1-17
3 Hweɖekanuɔ, Ʒan Amɛʒindoshimɛtɔ va drakɔ Mawu nyɔ le Ʒude zogbeji
2 yí nunuɔ mɔ: “Mítrɔ ji mɛ, ɖo jeŋkwi mɛ Fyɔɖuxu lɔ gogo.”
3 Yi nyɔ yí wonu ɖɛ to enyɔnuɖɛtɔ Ezai ji mɔ: “Mɛɖeka dodoɔ axwa le zogbeji yí nunuɔ mɔ: ‘Mídra Yehowa* mɔ do! Míwɛ nɔ yi mɔwo ajɔ.’”
4 Ʒan do awu ci wosɔ esɔkpotɔnɔfu sɔ wa yí sɔ elangbaza kpablanu bla do alin. Ejawo koɖo enyishi gbemɛtɔ yí nyi yi ŋɖuɖu.
5 Eyi amɛwo sonɔ le Ʒerusalɛmu koɖo Ʒude pleŋ sɔ kpe nɔ eju ciwo pleŋ yí le Ʒurdɛn kan mɛ yí vanɔ gbɔ
6 yí eʒinnɔ* wo do Ʒurdɛn Tɔsasa lɔ mɛ yí wohunnɔ wowo nuvɔnwo mɛ le jugbaja.
7 Ci ekpɔ Farizitɔ koɖo Sadusitɔ sugbɔ ciwo yí gbɔgbɔ mɔ woaʒin yewo do shi mɛɔ, énu nɔ wo mɔ: “Zakpata viwo, mi yí nu nɔ mí mɔ míwo le shi nɔ Mawu dɔmɛzi ci yí gbɔgbɔɔ?
8 Nɔ ahan yɔ nɛɔ, mísɛn ku ciwo yí dasɛ mɔ mítrɔ ji mɛ.
9 Míŋgbenukɔ nɔ míwoɖekiwo mɔ, ‘Abrahamu yí nyi mìwo da’ o. Ðo ŋnukɔ nɔ mí mɔ, Mawu atɛnŋ ana yí eviwo ato so ekpe cɛwo mɛ nɔ Abrahamu.
10 Efiɔ le aci lɔwo kewo ji vɔ. Eyi taɖo woaso aci ɖekpokpui ci yí desɛnnɔ ku nywi yí adɔɛ ɖaɖa zo mɛ.
11 Enyɛɔ, eshi mɛ yí ŋʒinkɔ mí do, ɖo mítrɔ ji mɛ, vɔ mɛ ci yí akplɔŋ do sɛnŋ wuŋ. Ŋdeje aɖe fɔkpawo ni o. Yɛazan gbɔngbɔn kɔkɔɛ koɖo ezo asɔ wa ʒinʒindoshimɛ nɔ mí.
12 Jinukufunu yitɔ le alɔ̀ mɛ ni yí akplɔ fini etonɔ yi jinuku le mɛmɛmɛ. Áɖo yi jinuku lɔ ɖɛ, vɔ átɔ zo akpa lɔ yɛ yí wodasɛnŋ aci zo lɔ o.”
13 Le yiyimɛɔ, Yesu so Galile yí va Ʒan gbɔ le Ʒurdɛn tɔ lɔ tu nɔ aʒin do shi mɛ.
14 Vɔ Ʒan yɛ tekpɔ mɔ yeagbe ni. Énu ni mɔ: “Eo yí aʒin nyɛ do shi mɛŋ, yí eɔ va nyɛ gbɔ mɔ nyɛ le ʒin ye do shi mɛa?”
15 Yesu ɖo ŋci ni mɔ: “Lɔn do ji nɔŋ ahan yɛ, ɖo ahan yí mìawɛ gbɔxwe awa ŋciwo pleŋ yí le jɔjɔɛɖe nɛ.” Eyi degbegbe ni o.
16 Ci woʒin Yesu do shi mɛ ɖegbɔɔ, éto le shi lɔ mɛ zeɖeka; eyi kpɔ ɖa! Jeŋkwi hun. Eyi Ʒan kpɔ Mawu gbɔngbɔn yí eɖyiɖyiɛ va Yesu ji shigbe hwanlin hannɛ.
17 Egbe ɖeka ɖyi so jeŋkwi mɛ hɛnnɛ yí mɔ: “Mɛ cɛ yí nyi anyi Vi ci kɔ ŋdelɔnnɔ nu le o, yi nu kpenɔ nɔŋ.”
