Eŋɛnywiwema Matie Tɔ 6:1-34
6 “Míkpɔ nywiɖe nɔ míŋgbewakɔ nujɔjɔɛ le ŋmɛ nɔ agbetɔwo mɔ wo le kpɔ o; nɔ denyi ahan ɔ, mídakpɔ fɛncu ɖekɛ axɔ le míwo Da ci yí le jeŋkwi mɛ gbɔ o.
2 Eyi taɖo nɔ ènana nu wamɛnɔwoɔ,* ŋgbelɔn nɔ ekpɛn aɖyi le ŋkɔ nɔ eo shigbe lé ayemɛnuwatɔwo wɛni le Ʒuifuwo nukplaxuwo koɖo emɔwo ji nɛ o. Ðo wowo wɛni ahan keŋ nɔ amɛwo akanfu wo. Ŋnukɔ nɔ mí le nyɔnɔnwi mɛ mɔ, woxɔ wowo fɛncu pleŋ vɔ.
3 Vɔ nɔ èku ŋshishi nɔ amɛwo yí na nu woɔ, ŋgbelɔn nɔ ao miɔ lɔ̀ anya ŋci ao ɖushi lɔ̀ wakɔ o,
4 keŋ nɔ ŋci èna lɔ anɔ wlawla mɛ. Eyi Dao ci yí kpɔnɔ nu le wlawla mɛ acu yi fɛn nɔ eo.
5 “Ahanke nɔ mídokɔ gbe ɖaɖaɔ, míŋgbewakɔ nu shigbe ayemɛnuwatɔwo nɛ o, ɖo ejɔnɔ ji nɔ wo mɔ yewoanɔ te le Ʒuifuwo nukplaxuwo koɖo mɔtɔnkpliwo nu keŋ ado gbe ɖaɖa nɔ amɛwo akpɔ. Ŋnukɔ nɔ mí le nyɔnɔnwi mɛ mɔ, woxɔ wowo fɛncu pleŋ vɔ.
6 Vɔ nɔ èjikɔ ado gbe ɖaɖaɔ, yi ao xɔ mɛ. Eyi nɔ ècu hɔn lɔ ɖegbɔɔ, do gbe ɖaɖa nɔ Dao ci wodekpɔnɔ* o. Eyi Dao ci yí kpɔnɔ nu le wlawla mɛ acu yi fɛn nɔ eo.
7 Nɔ mídokɔ gbe ɖaɖaɔ, míŋgbetrɔ anunɔ enyɔ ɖekɛ ŋmɛ lɔwo gbɛmɛgbɛmɛ shigbe lé jukɔn bu mɛ tɔwo wɛni do nɛ o, ɖo wobuini mɔ woaɖo to yewo nɔ yewoxoxoɔ nuxu sugbɔ.
8 Míŋgbewa wowotɔ han o, ɖo míwo Da nyanɔ ŋci yí ʒan mí gbɔxwe mívabiɔɛni ŋtɔkpu.
9 “Eyi taɖo lé míɖo adonɔ gbe ɖaɖa do ke:
“‘Mìwo Da ci yí le jeŋkwi mɛ, ao ŋkɔ le mɛ́.*
10 Ao Fyɔɖuxu le va. Ao dro le nyi wawa le nyigban ji shigbe lé enyi wawa le jeŋkwi mɛ nɛ.
11 Nà ŋɖuɖu* egbɛ tɔ mì.
12 Sɔ mìwo gɔjejewo ke mì* shigbe lé mìwo can sɔ kenɔ mɛ ciwo yí je agɔ do mì* nɛ.
13 Ŋgbelɔn nɔ mìaje tetekpɔ mɛ o, vɔ hwlɛn* mì gan le enuvwinwatɔ lɔ shi.’
14 “Ðo nɔ mísɔ amɛwo nuvɔnwo kenɔ woɔ, míwo Da ci yí le jeŋkwi mɛ asɔ ke míwo can;
15 vɔ nɔ mídesɔ amɛwo nuvɔnwo kenɔ woɔ, míwo Da dasɔ míwotɔwo can ke mí o.
16 “Nɔ míbla nuɔ, míŋgbeci ŋshishi mɛ shigbe lé ayemɛnuwatɔwo wɛni nɛ o, ɖo wonyinanɔ ŋmɛ* keŋ nɔ amɛwo akpɔ mɔ wobla nu. Ŋnukɔ nɔ mí le nyɔnɔnwi mɛ mɔ, woxɔ wowo fɛncu pleŋ vɔ.
17 Vɔ nɔ èblakɔ nuɔ, shi ami do ta yí afun ŋmɛ
18 nɔ amɛwo ŋgbenya mɔ èblakɔ nu o; vɔ Dao ci wodekpɔnɔ ɖekɛ yí anya. Eyi Dao ci yí kpɔnɔ nu le wlawla mɛ acu yi fɛn nɔ eo.
19 “Mími dɔkunuwo bɔbɔ nɔ míwoɖekiwo do nyigban ji, fini yí kɔnsubabawo koɖo ehwiwo danahɛn nu le yí flafinɔwo gbannɔ hɔn yí finɔ nu le.
20 Vɔ míbɔ dɔkunuwo do jeŋkwi mɛ, fini kɔnsubabawo koɖo ehwi dedanahɛn nu le o yí flafinɔwo dele nɔ o.
21 Ðo fini yí ao dɔkunuwo leɔ, nɔtɔxu ao ji anɔ hɛnnɛ nɛ.
22 “Ŋkuvi yí nyi kaɖigban nɔ agbetɔ lankpu. Eyi taɖo nɔ ao ŋkuvi le enu kuɖeka jiɔ,* ao lankpu lɔ pleŋ mɛ aklɛn.
23 Vɔ nɔ ŋkuvi vwin* le eo shiɔ, ao lankpu lɔ pleŋ mɛ ado vinvin. Yí nɔ klɛnklɛn ci yí le eo mɛ do vinvin ɔ, kpɔ lé vinvin lɔ awugan do ɖa!
24 “Mɛɖe datɛnŋ anyi hwashi nɔ axwetɔ amɛve o; ɖo ágbe ɖeka yí alɔn amɛvetɔ, alo áku do ɖeka nu yí agbali amɛvetɔ. Mídatɛnŋ anyi hwashi nɔ Mawu koɖo Dɔkunuwo o.
25 “Eyi taɖo ŋnukɔ nɔ mí mɔ: Mími lolo nɔ míwo gbewo* nɔ ŋci míaɖu alo ŋci míanu alo nɔ míwo gbazawo nɔ ŋci míado. Agbe* dele veviɖe wu ŋci míaɖu yí gbaza dele veviɖe wu ŋci míado ba?
26 Míglo xeviwo kpɔ nywiɖe; wodedonɔ jinuku alo ɖenɔ jinuku abi ɖonɔ wo ɖɛ do avawo mɛ o. Vɔ míwo Da ci yí le jeŋkwi mɛ nanɔ ŋɖuɖu wo. Mídele veviɖe sugbɔ sɔwu wo ba?
27 Mi yí le mí mɛ nɔ éloloɔ nu kpɔɔ, atɛnŋ ada kankin* kpetii do yi gbezan jiɔ?
28 Yí nyi yí taɖo míloloɔ nɔ ŋci míadoɔ? Míglo lé gbemɛsesewo shinnɔ do kpɔ; wodewanɔ dɔ o yí wodelɔnnɔ avɔn hɛnnɛ o.
29 Vɔ ŋnunuɔ nɔ mí mɔ le Salomɔ dradrado gangan lɔ pleŋpleŋ mɛ can ɔ, deje acɔ shigbe wowo ɖe nɛ o.
30 Nɔ Mawu ɖo acɔ nɔ egbe ciwo yí le gbemɛ gbɛ ahan yí esɔ woasɔ wo kɔ do zo mɛ ɖe, daɖo acɔ nɔ míwo sɔwu ahan ba? Nyi yí taɖo yí míwo xɔse hwe ahan ɔ?
31 Eyi taɖo míŋgbelo nu kpɔ gbeɖe anu mɔ, ‘Nyi mìaɖuɔ?’ alo ‘Nyi mìanuɔ?’ alo ‘Nyi mìadoɔ?’
32 Ðo ŋcɛwo pleŋ yí xanɔ jukɔn bu mɛ tɔwo veviɖe. Míwo Da ci yí le jeŋkwi mɛ nya mɔ míʒan ŋcɛwo pleŋ.
33 “Eyi taɖo míkpɔtɔ ajijiɛ Fyɔɖuxu lɔ koɖo ŋci yí le jɔjɔɛɖe le ŋmɛ nɔ Mawu kpɔ doŋkɔ, eyi woasɔ enu kpɛtɛ cɛwo pleŋ kpi nɔ mí.
34 Eyi dɔ míŋgbelo nu kpɔ gbeɖe nɔ esɔ ci yí gbɔgbɔ o, ɖo esɔ ci yí gbɔgbɔ can ɖo enulolokpɔ yitɔwo. Ŋkeke ɖekaɖeka ɖo yiŋtɔ cukaɖawo.
Gɔnmɛnuŋwlɛnŋwlɛn
^ Yi gɔnmɛɖeɖe tiin: “nɔ èku ŋshishi nɔ amɛwo yí na nu wo.” Kpɔ Enyɔgbe Veviwo mɛ Ðeɖe.
^ Alo “Dao ci yí le wlawla mɛ.”
^ Alo “amɛwo le kpɔɛni mɔ yɛnyi ŋkɔ mɛmi yí abuini.”
^ Yi gɔnmɛɖeɖe tiin: “kpɔnnɔ.”
^ Yi g̱ɔnmɛɖeɖe tiin: “Sɔ mìwo fɛnwo ke mì.”
^ Yi gɔnmɛɖeɖe tiin: “mɛ ciwo yí ɖu fɛn do mì.”
^ Alo “xɔ.”
^ Alo “wogbenɔ ebu male nɔ wowoɖekiwo.”
^ Alo “kpɔnɔ nu nywiɖe.”
^ Alo “ci yí bianɔŋ.”
^ Yi gɔnmɛɖeɖe tiin: “sewo.”
^ Yi gɔnmɛɖeɖe tiin: “ese.”
^ Yi g̱ɔnmɛɖeɖe tiin: “alɔ̀kpu ɖeka.” Kpɔ Enumɛɖeɖewo B14.
