Eŋɛnywiwema Matie Tɔ 9:1-38
9 Yesu ɖo tɔjihun mɛ yí trɔ so etɔ lɔ yí yi yiŋtɔ ju mɛ.
2 Wokɔ ŋsu ɖeka ci yí kplibɔ do ba ji va gbɔ. Ci Yesu kpɔ xɔse ci woɖoɔ, énu nɔ kplibɔtɔnɔ lɔ mɔ: “Vinyɛ, ŋgbevɔn o, wosɔ ao nuvɔnwo ke eo.”
3 Eyi esekplamɛtɔ ɖewo nunuɔ le wowoɖeɖewo mɛ mɔ: “Ŋsu cɛ nunuɔ enyɔkpotu do Mawu nu.”
4 Ci Yesu nya ŋci yí le susu mɛ nɔ woɔ, ébiɔ wo se mɔ: “Nyi yí jɔ mídrɔdrɔ enuvwinwo le míwo jiwo mɛɔ?
5 Nɔ woanu nɔ amɛ mɔ, ‘Wosɔ ao nuvɔnwo ke eo,’ alo ‘So je te keŋ atɔ zɔnlin zɔnzɔn ɖe,’ ci nunu yí ale fafɛɖe wuɔ?
6 Gan nɔ míanya mɔ Agbetɔvi lɔ ɖo acɛ le nyigban ji yí asɔ nuvɔnwo ke amɛɔ, . . .” énu nɔ kplibɔtɔnɔ lɔ mɔ: “So je te, sɔ ao ba yí ayi axomɛ.”
7 Eyi ŋsu ci yí kplibɔ lɔ so kpe yi xomɛ.
8 Ci amɛahwa lɔ kpɔ ŋci yí jɔɔ, jika so wo yí wokanfu Mawu ci yí na ŋsɛn gangan cɛ hanci amɛ.
9 Yi godu ci Yesu so le nɔ vayikɔɔ, ékpɔ ŋsu ɖeka ci yí tɔ mɔ Matie yí ele nyinɔnɔ le tagajɔxu. Énu ni mɔ: “Kplɔ ŋdo.” Eyi eso yí kplɔɛ do.
10 Yi godu ci Yesu vale nu ɖukɔ* le Matie xomɛɔ, tagajɔtɔ koɖo nuvɔnwatɔ sugbɔ va yí tɔ nu ɖuɖu* koɖo yɛ koɖo yi nukplaviwo.
11 Vɔ ci Farizitɔwo kpɔɛ ahan ɔ, wobiɔ yi nukplaviwo se mɔ: “Nyi yí taɖo míwo nukplamɛtɔ ɖuɖuɔ nu koɖo tagajɔtɔwo koɖo nuvɔnwatɔwoɔ?”
12 Ci Yesu se enyɔ ci wonuɔ, énu nɔ wo mɔ: “Mɛ ciwo nu agan le deʒan doto o, vɔ dɔ̀nɔwo yí ʒan doto.
13 Eyi taɖo míyi ayi mɔŋje enyɔ cɛ mɛ: ‘Ŋji mɔ míwo le kunɔ ŋshishi nɔ amɛ, denyi míawa vɔnsawo nɔŋ yɔ o.’ Ðo denyi amɛjɔjɔɛwo yɔgbe ŋva o, vɔ nuvɔnwatɔwo yɔ.”
14 Eyi Ʒan nukplaviwo va gbɔ yí biɔɛ se mɔ: “Mìwo koɖo Farizitɔwo blanɔ nu, nyi yí taɖo ao nukplaviwo deblanɔ nuɔ?”
15 Yesu ɖo ŋci nɔ wo mɔ: “Mɛ ci yí jikɔ aɖe nyɔnu xlɔwo ale ŋshishi mɛ hwenu ekpɔtɔ le wo gbɔa? Vɔ gbeɖekaɔ, woavakplɔ mɛ ci yí jikɔ aɖe nyɔnu lɔ so wo gbɔ yí woabla nu hɔntɔn.
16 Mɛɖe desɔ avɔn yoyu kankan sɔ tanɔ awu xoxwi o. Nɔ wowɛ ahan ɔ, avɔn yoyu lɔ anyɔ awu xoxwi lɔ yí fini edrɛn do agangan doji.
17 Ahanke wodesɔ vɛn yoyu kɔnɔ do elangbazagodu xoxwi mɛ nɛ. Nɔ wowɛ ahan ɔ, elangbazagodu lɔ awó yí vɛn lɔ akɔŋgbe. Eyi elangbazagodu lɔ adahɛn. Vɔ elangbazagodu yoyu mɛ wosɔ vɛn yoyu kɔnɔ do yí ŋɖe dewanɔ wo koɖo ve lɔ o.”
18 Hwenu enukɔ nyɔ cɛwoɔ, ega ɖeka gbosɔɛ yí na bubu yi* yí nu ni mɔ: “Anyi vi nyɔnuvi aku ɖaa vɔ, vɔ va keŋ asɔ alɔ̀ da do ji nɔ afɔn.”
19 Eyi Yesu so koɖo yi nukplaviwo yí wokplɔɛ do.
20 Nyɔnu ɖeka ci nu ehun ŋɛŋɛ do so exwe 12 ke to godu nɔ Yesu yí tɔ alɔ̀ yi wu toga.
21 Ðo énunuɔ le yiɖeki mɛ mɔ: “Nɔ ŋvlɛ yí tɔ alɔ̀ yi wuɔ, anyi dɔ̀ ami.”
22 Yesu trɔ kpɔ godu yí kpɔɛ yí nu ni mɔ: “Evinyɛ, ŋgbevɔn o! Xɔse ci èɖo na edɔ̀ mi nɔ eo.” Eyi edɔ̀ lɔ mi nɔ nyɔnu lɔ zeɖeka.
23 Ecɛyɛ ci Yesu vaɖo ega lɔ xwe mɛɔ, ékpɔ ekpɛnxutɔwo* koɖo amɛahwa ɖeka ci yí le ecɔ vin fankɔ yí axwa ɖyiɖyiɛ.
24 Yesu nu mɔ: “Míto, ɖo nyɔnuvihwɛ lɔ deku o, vɔ alɔn dɔnkɔ ele.” Eyi wotɔ kuikui.
25 Ci mɛ lɔwo to kakaɔ, Yesu ɖo xɔ ci mɛ nyɔnuvi lɔ le yí lé alɔ̀ ni, yí eso je te.
26 Enu ci yí jɔ lɔ ɖyi yí gban kpedo eju lɔ pleŋ mɛ.
27 Ci Yesu so le nɔɔ, ŋkuvitɔnnɔ amɛve ɖekawo kplɔɛ do yí dodoɔ axwa mɔ: “Davidi Viɛ, ku ŋshishi nɔ mì.”
28 Ci Yesu ɖo axwe ɖeka mɛɔ, ŋkuvitɔnnɔ lɔwo yi gbɔ. Eyi ebiɔ wo se mɔ: “Míkando ji mɔ natɛnŋ awa ŋcɛa?” Woɖo ŋci ni mɔ: “Aɛ, Axwetɔ.”
29 Yesu tɔ alɔ̀ ŋkuviwo nɔ wo yí nu mɔ: “Ci míkando jiɔ, le nyi ahan nɔ mí.”
30 Eyi ŋkuvi lɔwo hun nɔ wo. Yesu do se nɔ wo veviɖe mɔ: “Míŋgbena nɔ mɛɖe ase o.”
31 Vɔ ci wotoɔ, wonu yi nyɔ gban kpedo eju lɔ pleŋ mɛ.
32 Ci woɖedoɔ, wokplɔ ŋsu nuxumaxotɔ ɖeka ci gbɔngbɔnvɔn dokɔ aya nɔ va Yesu gbɔ.
33 Énya gbɔngbɔnvɔn lɔ ti yí ŋsu lɔ tɔ nuxu xoxo. Ékpaca amɛahwa lɔ yí wonu mɔ: “Ŋcɛ hanci ɖe dejɔ le Izraɛli kpɔ o.”
34 Vɔ Farizitɔwo nunuɔ mɔ: “Gbɔngbɔnvɔnwo ga yí na ŋsɛn yi yí esɔ nyakɔ gbɔngbɔnvɔnwo.”
35 Yesu dandan to jugan koɖo kɔxwi lɔwo pleŋ mɛ yí kplakpla nu amɛwo le Ʒuifuwo nukplaxuwo yí dradra Fyɔɖuxu ŋɛnywi lɔ yí gbedada edɔ̀ hamɛhamɛ nɔ amɛwo.
36 Ci ekpɔ amɛahwa lɔɔ, wowo nu sadɔnu ni keke, ɖo wotre fun nɔ wo yí gbe wo ɖɛ do tomɛ shigbe lɛngbɔ ciwo yí deɖo kplɔtɔ nɛ.
37 Eyi taɖo enu nɔ yi nukplaviwo mɔ: “Le nyɔnɔnwi mɛɔ, jinuku ci woaɖe lɔ sugbɔ, vɔ edɔwatɔwo denyi ŋɖe o.
38 Eyi taɖo míɖe kuku nɔ Botɔ lɔ nɔ aɖo edɔwatɔwo ɖaɖa.”
Gɔnmɛnuŋwlɛnŋwlɛn
^ Alo “nɔ kplɔn nu.”
^ Alo “nɔ kplɔn nu.”
^ Alo “bubɔ ni.”
^ Ekpɛn ci woxuxuɔ lɔ yí nyi flûte do Flansegbe mɛ.
