Le exwe 2023 mɛɔ, dotowo do jeshi mɔ akogocici vanyi lanmɛsɛn cukaɖa sɛnŋsɛnŋ nɔ agbetɔwo yí woɖo awa ŋɖe so nu. Woatɛnŋ akpɔ akogocici cukaɖa lɔ gbɔa?

•   Doto amɛkótɔ gangan Vivek Murthy le États-Unis nu mɔ: “Akogocici koɖo azɔgenɔnɔ atɛnŋ adahɛn nu le mìwo lanmɛsɛn koɖo mìwo jijɔkpɔkpɔ nu veviɖe.” Vɔ énu kpi mɔ: “Ŋɖeka li mìatɛnŋ awa so nu.” Nyi yɔɔ? “Eyi nyi mɔ mìawanɔ enu kleŋkleŋwo gbeɖeka duu asɔ donɔ ŋsɛn ekacaca ci yíle mìwo koɖo mɛbuwo gblamɛ.” a

 Denyi azɔgenɔnɔ ɖekɛ yí adɔ mɛɖe aci akogo o. Mɛɖewo nɔnɔ amɛwo mɛ, gan yí akpɔɛ mɔ yewoci akogo. Nɔ egbenyi ŋɖeŋɖe yí dɔ mìci akogo can ɔ, Bibla atɛnŋ akpedo mì nu. Énu enu ŋtɔŋtɔ ɖewo ciwo yí akpedo mì nu mìaɖo exlɔwo keŋ asɔ ɖu akogocici ji.

 Kannɔ seŋ ciwo yí nyɔ. Denyi lé enu wanɔ do nɔ eo ɖekɛ yí anunɔ nɔ amɛwo le seŋkankan mɛ o. Vɔ, èɖo anyi etoɖoamɛtɔ nywi hɛnnɛ. Nɔ èdadasɛ nɔ mɛɖe mɔ yeluin teŋ ɔ, eo koɖo amɛ lɔ kacaca agbe sɛnŋ doji.

•   Bibla gɔnmɛɖose: “Amɛ ɖe ŋgbe ji mɔ yetɔ ɖekɛ yí a nyɔ o, vɔ amɛ ɖeka ɖeka le bu tamɛ kpɔ so yi kpena tɔwo nu.”​—Filipitɔwo 2:4.

 Ðo exlɔ vovovowo. Le egbesɔsɔ anyi exlɔ koɖo mɛ ciwo yí shin wu eo alo mɛ ciwo yí deshin sɔ koɖo eo. Gbenyi exlɔ koɖo mɛ ciwo yí ɖo konu vovovowo alo mɛ ciwo yí so eju buwo mɛ hɛnnɛ.

•   Bibla gɔnmɛɖose: “Mí hun míwo jiwo mɛ fafɛɖe.”​—2 Korɛntitɔwo 6:13.

 Nɔ akpɔ lé atɛnŋ awɛ yí ado ŋsɛn exlɔ ci ènyi koɖo mɛbuwoɔ, hlɛn nyɔci ci yí nyi “Comment combler notre besoin d’amitié.”