Le kwɛshilagbe 20 Novembre2022-ɔ, Jukɔnwo xoxoxu lɔ wa COP27 gbesɔ ɖeka kuso ayamɛ fɔkuwo nu, yí ɖegbɔ nɔ gbesɔ lɔ gbenɔgbe. Ci wosɔ gbeta mɔ yewoakpedo jukɔn ciwo yí ayamɛ nɔnɔmɛwo ɖekɔ fun nɔ veviɖe nu koɖo ehoɔ, amɛ sugbɔ dojeshi mɔ yɛdatɛnŋ akpɔ enyɔ lɔ gbɔ teŋ o.

•   António Guterres ci yí nyi wemaŋwlɛtɔ nɔ Jukɔnwo xoxoxu habɔbɔ lɔ nu le 19 Novembre 2022 mɔ, “ci wowa toto yí ɖo eho ɖɛ yí asɔ kpedo mɛ ciwo yí ayamɛ nɔnɔmɛwo wa nu koɖo nuɔ, ejɔ ji nɔŋ sugbɔ . Nɔ wowa enu ŋtɔ́ can ɔ, desun o. Ðo mìwo nyigban lɔ kpɔtɔ le ahɛn dokɔ yí nyinakɔ doji.”

•   “Ayamɛ nɔnɔmɛ ciwo yí trɔkɔ dɔ yí nyigban lɔ pleŋ le afɔku gangan ɖeka mɔ ji.”—Enyɔ ŋtɔ́ yí Mary Robinson nu le 20 Novembre 2022. Ényi Irlande jukplɔtɔ sa yí gbekpɔ acɛ ci agbetɔviwo ɖo nyɔwo gbɔ vayi le Jukɔwo xoxoxu gbɛbɔbɔ lɔ mɛ.

 Jajɛwo koŋ yí afɔku ci yí avajɔ do mìwo nyigban lɔ ji sosoɔ jika nɔ. Vɔ enyɔ lɔ yí mɔ jukɔwo akpe ji awa dɔ doju keŋ awa do egbe ci woɖo ji nɔ ayamɛ nɔnɔmɛ ciwo yí trɔkɔ lɔ gbɔ kpɔkpɔa? Enyɔ ci Bibla nuɔ?

 Bibla kpedo mì nu mìnya mɔ egbla ɖekpokpui ci ejukplɔtɔwo ado mɔ yewoasɔ kpɔ cukaɖa lɔ gbɔɔ, wodakpɔ ta ni vɛ keŋkeŋ o, kankin woawa le nu nɔ wodo ŋsɛn do ɖe can. Kpɔ susu amɛve ciwo yí taɖo ɖa:

•   “Enu ci yí zan ɔ, wodatɛnŋ ajɔɛ o.”—Ŋununyatɔ 1:15, NWT.

   Yi gɔnmɛ yí nyi mɔ : Sɛnxu li nɔ ejukplɔtowo, ɖo agbetɔ deɖo acɛ yí akplɔ yiɖeki o. (Ʒeremi 10:23) Nɔ jukɔn lɔwo xoxu can ɔ, agbɔnnu nɔ wo mɔ woakpɔ xexe lɔ mɛ cukaɖawo gbɔ nɔ wodo gbla do ɖekpokpuiɖe can.

•   ‘Amɛwo a lɔn wowoŋtɔwo ɖekɛ, yí agbelɔn eho ɖekɛ. . . . Amɛwo dalɔnnɔ do enyɔ ɖe ji o.’—2 Timɔte 3:2, 3.

   Yi gɔnmɛ yí nyi mɔ: Bibla nu ɖɛ koɖo Kankandoji mɔ le mìwo hwenuɔ, amɛ sugbɔtɔ ajikɔ wowoɖekɛwotɔ, yí wodalɔn awanɔ dɔ doju keŋ nɔ mɛshiamɛ akpɔ nyɔna so mɛ o.

 Nɔ mìwo nyigban lɔ avanyɔ le esɔ mɛɔ, denyi egbe ciwo agbetɔvi cɛkpakpawo ɖo gbɔ yí aso o. Mawu ɖo acɛkpatɔ bibi ɖeka, eyi nyi Yesu Kristo. Bibla nu so nu mɔ:

•   “Evi ŋsuvi lɔ a kpa nɔ amɛ kplɔtɔwo.Yi ŋkɔ á nyi Aɖaŋɖetɔ, Adodwitɔ, Mawu Ŋsɛntɔ, Eda ci Yí Li Sɔ Yì Mavɔ Mavɔ, Efyɔvi Ŋcifafanatɔ.”—Ezai 9:6.

 Yesu yí nyi Efyɔ nɔ Mawu Fyɔɖuxu, alo jeŋkwi mɛ cɛkpakpa lɔ. (Matie 6:10) Éɖo ŋsɛn, nunya, koɖo edro mɔ yeale bu nɔ nyigban lɔ koɖo ŋciwo pleŋ yí le ji. (Ehajiji Wema 72:12, 16) Le yi cɛkpakpa hwenuɔ, jeŋkwi mɛ cɛkpakpa yitɔ aɖo te mɛ ciwo yí ‘trɔntrɔn nyigban lɔ,’ eyi atrɔ adra nyigban lɔ ji do yí anyɔ shigbe lé ele sa le tɔtɔmɛ nɛ.—Enyɔdasɛ 11:18, Ezai 35:1, 7.

 Nɔ èji mɔ yeanya enu ci teŋ yí avakpɔ ayamɛ nɔnɔmɛ ciwo yí trɔkɔ cukaɖa lɔ gbɔ dojiɔ, hlɛn enyɔci ci yí nyi, “Ðe Yame Ƒe “Tɔtrɔwo Agblẽ Nu Le Mía Ŋu Ðikaa?—Nya Si Biblia Gblɔ.”