Le juillet wleci mɛ le xwe 2022 mɛɔ, xomɛvetɔwo sɔ cu wu amɛwo le texwe vovovowo le xexe konu amɛnɛ lɔ mɛ :

•   “Le Japon ju mɛɔ, woda cu politikiwatɔ gangan ɖeka ci wojeshi ɖɛ nywiɖe yí sɔ wu. Woyɔɛni mɔ Shinzo Abe, yí enyi canmi ŋkɔtɔ nɔ juga lɔ vayi sa. Enu lɔ ci yí jɔ ahan hunhun eju lɔ koɖo xexe lɔ keŋkeŋ. Ðo enu ŋtɔ́wo dejɔnɔ le Japon ju mɛ ahan o, yí eju lɔ mɛ se ciwo yí kudo ecu zanzan nu sɛnŋ keke.”—10 juillet 2022, The Japan Times.

•   “Le Danemarque ju mɛɔ, ŋsu ɖeka ɖe cu do amɛwo ji yí wu amɛ amɛtɔn le ajɔxwe gangan ɖeka.”—4 juillet 2022, Reuters.

•   “Afrique du Sud: Ŋsu ɖekawo da cu amɛwo le ahanuxu ɖeka le Soweto jugan mɛ yí wu agbetɔ 15.”—10 juillet 2022, The Guardian.

•   “Le eju lɔ zan ɖuɖu ɖeka hwenu le 4 juillet kwɛshila vɔvɔnuɔ, wosɔ cu wu amɛ 220 blebu le Etats Unis.”—5 juillet 2022, CBS News.

 Danuwawa avavɔ kpɔa? Lé Bibla nu so nuɔ?

 Bibla yɔ mìwo hwenu lɔ mɔ “ŋkeke vɔvɔwo.” Le ŋkeke vɔvɔ cɛ lɔwo mɛɔ, amɛwo anyi hlɔnmunɔwo, xomɛvetɔwo, kuzumasonamɛtɔwo koɖo danuwatɔwo. (2 Timɔte 3:1, 3) Xomɛveve nuwana lɔwo dɔ yí agbetɔwo le jikaswi ji. (Luiki 21:11) Ele ahan gan, Bibla nu mɔ ega lɔ avaxo yí ɖa avaɖo nɔ xomɛveve. Eyi hwenɔnuɔ, amɛwo “a nɔ́ agble nyakpɔkpɔ mɛ koɖo ŋcifafa. . . . Wo a nɔ́ afi ɖoɖa koɖo ŋcifafa tɔxuwo.” (Ezai 32:18) Lé xomɛveve avagu doɔ?

 Mawu agu amɛ vwinwo koɖo ahwawanuwo xwiaŋ.

•   “Amɛ vɔnwo a bu wowo nyigban. Wo a nyá ŋsukantɔwo koɖo amɛtrɔtomɛtɔwo swi le nyigban lɔ ji.”—Elododo Wema 2:22.

•   “[Mawu] . . . a ɖote ahwawo le afi ɖekpokpwi le nyigban ji. [Áŋɛ] ahwawaviwo anŋguwo, yi a zɛn wowo vlɔwo, yí a tɔzo wowo kpoxɔnuwo.”—Ehajiji Wema 46:9.

 Mawu akpla amɛwo lé woanɔ fafa mɛ do yí asɔ ɖo te enu ciwo yí dɔ amɛwo venɔ xomɛ.

•   “Wana hunnɔwo pleŋ a dasɛ mɔ ŋcifafa a ni. Amɛ ɖekpokpwi da do vevisese nɔ amɛ bu o. Amɛ ciwo yí le anyi to kɔkwɛ ji da dro a trɔn enuwo o. Nyi yí taɖo ɔ? Ðo ɔ, amɛwo a jeshi Tɔhonɔ ɖɛ nyɔnɔnwitɔ. Wo a ɖɔ koɖo ŋununyanya so Tɔhonɔ nu shigbe le axu ɖɔ koɖo eshi ɛnɛ.”—Ezai 11:9.

•   Kakacɛ yɛ can ɔ, Mawu kplakpla nu amɛwo le xexe konu amɛnɛ lɔ mɛ mɔ, wo le mi xomɛ veve keŋ asɔ wowo hwawanuwo “cu agblede nuwo] . . . . Yi, wo a zan wowo anŋguwo nɔ aci sosonu zanzan.”—Mishe 4:3.

 Bibla ɖo gbe mɔ, mìavanɔ xexe ci mɛ jikaswi ɖekɛ dagbele o. Nɔ èji mɔ yeanya nu sugbɔ so egbe cɛ ci Bibla ɖo nuɔ, hlɛn enyɔci ci yí nyi “Affranchis de la peur: Est-ce possible?”

 Nɔ èji mɔ yeanya nu sugbɔ so lé xomɛveve avagu gbijigbiji nuɔ, hlɛn enyɔci ci yí nyi “Enfin la paix sur la terre!”