Zozu ci yí wakɔ amɛwo le xexeɛ kpaxwe vovovowo sɛnŋ wu ɖekpokpui yí afɔkuwo jɔkɔ, ɖo ayamɛnɔnɔmɛ vasɛnŋ ɖoɖu. Kpɔ nyɔtakankan ciwo yí gbɔgbɔ:

•   “Juin cɛ yí nyi wleci ci yí xɔ zo wu le xexeɛ mɛ so hwenu wotɔ zozu xɔxɔ nɔ ayamɛ so exwe 174 ke.”​—Amɛliki Dɔwaxu Ci yí Lenɔ Ŋkuvi Do Axu koɖo Ayamɛ nu [NOAA], États-Unis, Ajɔwo Dɔwaxu, 13 Juillet 2023.

•   “Zozu sɛnŋ ɖɛyɛ le Italie, Espagne, France, Allemagne koɖo Pologne keke avaɖo 48 degrés Celsius le Sicile koɖo Sardaigne tɔdomɛnyigbanwo ji. Texwe hunnɔwo yí zozu lɔ jikɔ asɛnŋ wu le. Yí desɛnŋ ahan kpɔ le Europe o.”​—Agence spatiale européenne, 13 Juillet 2023.

•   “Nɔ nyigban lɔ xɔkɔ zoɔ, ŋci mìakpɔkɔ mɔ nɔ yí nyi mɔ eshi avajakɔ blaŋblaŋ yí agbesɛnkɔŋ doji wu sasa. Ecɛ adɔ yí eshi avaxɔkɔ axwewo yí agbedakahɛn nu doji wu sasa.”​—Stefan Uhlenbrook, directeur de l’hydrologie, de l’eau et de la cryosphère à l’Organisation météorologique mondiale, 17 Juillet 2023.

 Ci èvasekɔ mɔ ayamɛnɔnɔmɛwo sɛnkɔŋ ɖoɖu ɖe, édɔ èvɔnvɔn a? Kpɔ nyɔ ci Bibla nu so enyɔ vevi cɛ nu.

 Ɛɛ. Zozu koɖo ayamɛnɔnɔmɛ sɛnŋ ciwo yí vale xexeɛ mɛ gbɛ sɔgbe koɖo enyɔ ciwo Bibla nu ɖɛ mɔ woavajɔ le mìwo hwenu. Le kpɔwɛ mɛ, Yesu nu ɖɛ mɔ mìakpɔ “enujiŋwo ciwo yí a do vɔnvɔn nɔ amɛ a jɔjɔ.” (Luiki 21:11) Ci zozu vawukɔgan le xexeɛ mɛɔ, amɛ sugbɔ vatɔ vɔnvɔn mɔ agbetɔwo nuwanawo adɔ yí nyigban lɔ ji nɔnɔ aglo.

 Oo. Mawu wa nyigban lɔ mɔ yɛanyi agbetɔwo nɔxu tɛgbɛɛ; datashi agbetɔwo agu nyigban lɔ o. (Ehajiji Wema 115:16; Ŋununyatɔ 1:4) Éɖo gbe ɖɛ ŋtɔkpu can mɔ yea “trɔn amɛ ciwo yí [dadahɛn] nyigban lɔ.”​—Enyɔdasɛ 11:18.

 Enyɔ ci Bibla nu dasɛ mɔ Mawu ɖo ŋsɛn koɖo edro yí aglɔn ta nɔ nyigban lɔ yí jɔjɔmɛfɔkuwo dadahɛn nu le nu o.

•   “Mawu ɖote jihɔn lɔ. É ɖote axu blabla lɔwo.” (Ehajiji Wema 107:29) Mawu kpɔ ŋsɛn do enuwawawo ji. Átɛnŋ akpɔ ayamɛnyɔ ciwo yí dɔ jɔjɔmɛfɔkuwo jɔnɔ yí amɛwo kpenɔ fun gbɔ.

•   “E kpɔ nyigban ji, ewu eshi nyigban lɔ yí enuwo mi do ji.” (Ehajiji Wema 65:9) Mawu avayra nyigban lɔ yí atrɔ paradiso.

 Nɔ àkpɔ nubuwo kudo egbe ci Mawu ɖo le Bibla mɛ mɔ yeatrɔ adra nyigban lɔ ji doɔ, kpɔ nyɔta ci yí nyi “Mi yí ahwlɛn nyigban lɔ gan ɔ?”