Xweshiaxweɔ, woyɔnɔ gashiagamɛ sumɔsumɔdɔwatɔ ɖewo so texwe vovovowo le xexeɛ mɛ pleŋ yí woyinɔ Gilead Jutakpɔxɔ Bibla kplakpla suklu. Jutakpɔxɔ kplanaxu gangantɔ ci yí le Patterson le New York yí woyinɔ suklu cɛ le. a Le suklu lɔɔ, sukluvi lɔwo kplanɔ lé woawɛ agbewa wowo dɔ vovovo ciwo yí wosɔnɔ nɔ wo le Yehowa habɔbɔ lɔ mɛ nywiɖe doji. Ekpla cɛ ci woxɔnɔ kpenɔdo wo nu wodonɔ ŋsɛn hamɛwo koɖo alɔjedɔwaxu ciwo yí le xexeɛ keŋkeŋ mɛ yí gbena wolonɔ do goguiɖe. Edɔ ciwo wowanɔ gbedɔ yí enuwo waɖaŋ sɔnɔ afɔ nywiɖe le hamɛwo koɖo alɔjedɔwaxu lɔwo mɛ.

 Xexeɛ mɛ pleŋ suklu yí Gilead nyi nyao. Le kpɔwɛ mɛ, suklu 147 tɔ lɔ ci woyi le exwe 2019 mɛɔ, sukluvi 56 ciwo yí so eju 29 mɛ yí va. Sukluvi ciwo yí yinɔ Gilead suklu lɔ nyinɔ gashiagamɛ sumɔsumɔdɔwatɔwo shigbe mɔ Betɛlidɔwatɔwo, ekán lɔ mɛ hamɛwo jikpɔtɔwo, eŋɛnywidratɔ ejugodutɔwo abi emɔɖetɔ veviwo.

 Wowanɔ dradradowo nɔ suklu lɔ doŋkɔ xoxoxo nɔ azan ci gbe woatɔɛ ji. Le kpɔwɛ mɛ, nɔvi ciwo yí kpɔnɔ emɔzɔnzɔn nyɔwo gbɔ le mìwo Dɔwaxu gangantɔ lɔ xwlenɔ yamɛhun ɖoɖo wemavi nɔ mɛ ciwo yí woyɔ nɔ suklu lɔ. Ci woma emɔzɔnzɔnho ciwo pleŋ wozan do sukluvi lɔwo nu sɔsɔminasɔɛ hwenu wowa Gilead suklu 147 tɔ lɔ vayiɔ, wokpɔ mɔ Amɛlikiho dɔla 1 075 alo 550 000 FCFA han yi wozan do sukluvi ɖeka nu nɔ Patterson lɔ yiyi koɖo gbɔgbɔ. Ele mɔ sukluvi ciwo yí so Salomon Xudomɛnyigbanjiwo aɖo yamɛhun zenɛ gbɔxwe avaɖo Patterson lɔ, eyi nɔ woagbetrɔ yi axweɔ, woaɖo yamɛhun zetɔn xwe ayi ɖo. Wowo mɔzɔnzɔn lɔ pleŋ nyinɔ kpeci 35 400 nu le ji! Wozan Amɛlikiho dɔla 2 300 alo 1 240 000 FCFA han do sukluvi ɖekaɖeka nu nɔ yamɛhun lɔwo ɖoɖo. Nɔ hozanzanwo ŋgbevawugan ɖoɖuɔ, nɔvi ciwo yí kpɔnɔ mɔzɔnzɔn nyɔwo gbɔ le Dɔwaxu gangantɔ lɔ zannɔ ɔdinatɛɛ dɔwanu ɖeka yí sɔ jinɔ yamɛhun ɖoɖo wemavi ciwo yí kpɔn ho hwɛɖeka. Eyi nɔ wolé texwewo daɖɛ ɖegbɔ can ɔ, ɔdinatɛɛ dɔwanu lɔ kpɔtɔ jinɔ ciwo yí eho kpɔn nɔ sɔwu kpɔ na nɔ kwɛshilawo alo wleci ɖewo ŋtɔkpu. Emɔnzɔnzɔn dɔwaxu ci yí le mìwo Dɔwaxu gangantɔ lɔ gbezannɔ yamɛhunzɔnzɔn nunana ciwo yí yamɛhun dɔwaxuwo nanɔ amɛ keŋ yí sɔ xɔnɔ yamɛhun ɖoɖo wemaviwo.

 Ele mɔ sukluvi sugbɔtɔ aɖo Visa gbɔxwe ayi États-Unis. Ecɛ wɛ mɔ, Esenyɔwo Jikpɔgbɛ ci yí le Edɔwaxu gangantɔ lɔ kpedo sukluvi lɔwo nu yí mɛɖekaɖeka ɖo yi Visa. Amɛlikiho dɔla 510 alo 280 000 FCFA han yí wosɔ wa Visa koɖo wema klikli ciwo yí bɔdo nu nɔ sukluvi ɖeka ci womi sɔsɔminasɔɛ.

 Lé mìɖunɔ le nɔ ekpla ci Gilead sukluvi lɔwo xɔnɔ doɔ? Hendra Gunawan nyi hamɛmɛshinshin le Asie Fɔdewezexu hamɛ ɖeka mɛ. Asu koɖo ashi ɖeka ci yí gbɔ so Gilead suklu lɔ can le hamɛ lɔ mɛ. Nɔviŋsu Hendra nu mɔ: “sabaɖe vayi yɛɔ, gbeshiagbe mɔɖetɔ ɖekpokpui dele mìwo hamɛ lɔ mɛ o. Vɔ ci nɔvi ciwo yí yi Gilead suklu lɔ vaɖo hamɛ lɔ mɛɔ, ezo ci yí le wo mɛ nɔ dɔ lɔ koɖo amɛɖekisɔsɔsavɔn gbɔngbɔn ci woɖo do ŋsɛn mɛbuwo yí wotɔ emɔɖeɖedɔ lɔ ji. Keke le yiyimɛɔ, nɔvinyɔnu ɖeka can le mìwo hamɛ lɔ mɛ vayi Fyɔɖuxu ŋɛnywidratɔwo suklu!”

 Nɔviŋsu Sergio Panjaitan ci yí wanɔ dɔ koɖo nɔvi sugbɔ ciwo yí gbɔ so Gilead suklu lɔ le Asie Fɔdewezexu Betɛli ɖeka nu mɔ: “De wowo ɖekɛ yí ɖuɖuɔ le nɔ ekpla lɔ ci woxɔ o, mìwo ciwo yí deyi xɔ kpla lɔ can vaɖuɖuɔ yi le. Wokpla nu sugbɔ! Vɔ wodejinɔ gbeɖe mɔ, yewoawa nu nɔ amɛwo akpɔ nɔ anyi wowo yí le veviɖe sɔwu mɛkpɛtɛwo o. Ŋci wowanɔ yí nyi mɔ, womanɔ wowo susuwo koɖo mɛbuwo. Ecɛ donɔ ŋsɛn mì yí mìwo can gbevasɔ donɔ ŋsɛn mɛbuwo.”

 Shini habɔbɔ lɔ kpɔnɔ ho le yí sɔ wanɔ toto nɔ Gilead suklu cɛɔ? Enu ciwo wonana mɔ wo le sɔ do alɔ xexeɛ mɛ pleŋ dɔ lɔ mɛ wokpɔnɔ ho lɔ le, yí sugbɔtɔ nyinɔ ciwo yí wona to donate.pr418.com ji. Akpe nɔ mí keke nɔ xomɛvu nu ciwo mínakɔ yí wosɔ dodoɔ alɔ suklu cɛ ci nɔviwo sosoɔ le xexeɛ mɛ pleŋ yí vakɔ.