Le xexeɛ pleŋ mɛɔ, egawo ɖe azɔgenɔnɔnamɛ sewo ti yí gbedo se mɔ amɛwo dagbebɔ do fiɖe o. Yehowa Kunuɖetɔwo kpɔɛ mɔ yewoawa do ese cɛwo ji gan yí akpɔtɔ awakɔ yewo bɔbɔwo nywiɖe. Ci enyɔ vale ahan ɔ, hamɛwo tɔ videokacaca dɔwanuwo zanzan nɔ bɔbɔ lɔwo wawa. Ðeka yí nyi Zoom dɔwanu lɔ.

 Nɔ hamɛwo asun ji awakɔ bɔbɔ lɔwo pleŋ yí bɔbɔ lɔwo agbeyinɔ nywiɖeɔ, Edɔjikpɔha lɔ na gbe mɔ wo le sɔ ho le edro nunanawo mɛ keŋ asɔ xwle Zoom kɔnŋtuwo nɔ hamɛwo. Susu cɛ ci woɖe kpedo hamɛ ɖewo ciwo yí desɛnŋ yí xwlexwleɛ videokacaca dɔwanu hwɛhwɛ kɔnŋtuwo nu sugbɔ. Kɔnŋtu cɛwo ho ayi Amɛliki ho $15-$20 (8 300-13 100 franc CFA) han alo ci yí wu ahan. Gbɛsasaɔ, hamɛ lɔwo zannɔ videokacaca dɔwanu ciwo yí wodecunɔ eho ɖe nɔ gbɔxwe azan o. Ecɛ wɛ mɔ gamɛ ci woazin na nɔ ɖo sɛnxu, mɛ ciwo yí awa bɔbɔ lɔ can ɖo anyi amɛ hlɛnhlɛnmɛ ɖe, wodeɖo awugan o. Kandoji keke ɖe dele edɔwanu lɔwo nu hɛnnɛ o. Hamɛ ciwo pleŋ yí zanzan Zoom kɔnŋtu ciwo habɔbɔ lɔ xwle ɖuɖuɔ le ni. Wodedonɔ gbla sugbɔ ɖe gbɔxwe axɔɛ keŋ atɔ zanzan o, mɛ ciwo yí aɖo kaa mɛ keŋ awa bɔbɔ le ji dehwe o. Nɔ bɔbɔ lɔ yikɔ jiɔ, Zoom dɔwanu lɔ deɖonɔ te yí anyi hɔntɔn ke woagbevatrɔ ahuin o. Keke vaɖo hweyɛnuɔ, hamɛ ciwo yí wu 65 000 yí zanzan Zoom kɔnŋtu cɛwo le eju ciwo yí wu 170 mɛ.

 Kairagi hamɛ ci yí le Manado (Sulawesi du Nord) le Indonésie tashi videokacaca dɔwanu ɖeka ci wodacu ho nɔ gbɔxwe azan keŋ vatɔ Zoom kɔnŋtu ci habɔbɔ lɔ xwle zanzan. Nɔviŋsu Hadi Santoso nu mɔ: “Ðɛyɛɔ, nɔviŋsu koɖo nɔvinyɔnu ciwo yí mashinni zanzan demado ahan can vaseseɛ vivi nɔ bɔbɔ lɔwo, ɖo ŋci yí nyɔ le mɛ sugbɔ yí nyi mɔ Zoom lɔ devaɖonɔ te le bɔbɔ hwenu yí anyi hɔnnɔ xwe woagbevatɔ huinhuin ke o.”

 Le Guayaquil le Equateur-ɔ, nɔviŋsu Lester Jijón, Jr. ci yí nyi hamɛmɛshinshin le Guayacanes-Est hamɛ lɔ mɛ nu mɔ: “Ci enu dedo nɔviŋsu koɖo nɔvinyɔnu sugbɔ jiɔ, hamɛ ɖewo desun ji yí xwle Zoom kɔnŋtu dɔwanu ci ji hamɛ lɔ pleŋ awanɔ bɔbɔwo le o. Ecɛyɛɔ, amɛ sugbɔ hɛn azan Zoom kɔnŋtu ci habɔbɔ lɔ xwle nɔ mì yí asɔ wakɔ bɔbɔwo. Ecɛ wɛ mɔ, mìatɛnŋ ayɔ amɛ sugbɔ nɔ bɔbɔ lɔwo lé edro mì do yí mìdagbeloloɔ mɔ amɛ avawugan le ji o.”

 Le Lusaka, le Zambie juɔ mɛɔ, nɔviŋsu Johnson Mwanza ci yí nyi hamɛmɛshinshin le Ngwerere-Nord hamɛ lɔ mɛ ŋwlɛ mɔ: “Nɔviŋsu koɖo nɔvinyɔnu sugbɔ nu mɔ, ‘Zoom kɔnŋtu lɔ susu ci habɔbɔ lɔ ɖe yí xwle nɔ mì ahan dɔ mìvate gogo mìwo nɔviŋsu koɖo nɔvinyɔnuwo doji. Gbesɔ kpe niɔ, egbedɔ yí mìkpɔɛ mɔ Yehowa lɔn mì yí gbeleleɛ bu nɔ mì.’”

 Jɔjɔmɛfɔku kpekpedonunana kɔnŋta mɛ yí wosɔ eho le keŋ yí xwle Zoom kɔnŋtu cɛwo. Xomɛvunu ciwo wonana yí sɔ dodoɔ alɔ xexeɛ pleŋ mɛ dɔ lɔ yí dɔ wokpɔ eho cɛ. Sugbɔtɔ le enunana cɛwo mɛ nyi ciwo wonana to donate.pr418.com ji. Akpe nɔ mí nɔ xomɛvununana míwo tɔ lɔwo. Enunana cɛwo dɔ wokpɔkpɔ jɔjɔmɛfɔku kpekpedonunana kpɛtɛ nyɔwo gbɔ le xexeɛ pleŋ mɛ.—2 Korɛntitɔwo 8:14.