Yehowa Kunuɖewo wanɔ dɔ sugbɔ yí sɔ kpenɔdo amowo nu le ju ciwo yí wu 200 mɛ. Vɔ le eju ŋtɔ́wo mɛɔ, 35 han kpaŋ yí nanɔ ho yí esunɔ nɔ wowoŋtɔwo ӡanwo. Lé wowɛni yí kpɔnɔ eju ciwo yí deɖo ho sugbɔ ӡanwo gbɔɔ?

 Edɔjikpɔha lɔ gbenɔje ŋciwo yí wudo Yehowa Kunuɖetɔwo le xexeɛ pleŋ mɛ nɔ woakpɔtɔ asɛnkɔ Yehowa yí agbedrakɔ ŋɛnywi lɔ mɛ kpɔ. Wowanɔ toto so enu ciwo yí wudo wo lɔwo nu yí sɔnɔ eho ɖaɖa alɔjedɔwaxuwo yí wowo zinni shigbe lé eje do nɛ. Nɔ alɔjedɔwaxu ɖe xɔ ho wugan ci eӡan nɔ yi dɔwoɔ, ésɔnɔ ci yí kpɔtɔ lɔ ɖaɖa eju ciwo mɛ yí ehwedo le. Toto cɛ sɔ koɖo lé Kristotɔ ŋkɔtɔwo wanu do ci wokpedo wowo nɔnɔwo “nu nɔ etasɔsɔ pɛpɛpɛ [ani].” (2 Korɛntitɔwo 8:14) Wozan ci yí kpɔtɔ yí sɔ kpedo Kristotɔ ciwo yí deɖo sugbɔ nu.

 Nɔ alɔjedɔwaxuwo sɔ ci yí kpɔtɔ lɔ ɖaɖa nɔviwo ɖe, lé ewanɔ nɔ woɔ? Le kpɔwɛ mɛ le Tanzanie ɔ, eho dele mɛ ciwo hlɛnhlɛnmɛ wu jukɔn lɔ mamamɛ shi yí woakpɔ aɖunɔ ŋkeke ɖeka asunɔ kotokun ɖeka o. Ci alɔjedɔwaxu buwo sɔ eho ci yí kpɔtɔ ɖaɖa woɔ, wosɔ dra Fyɔɖuxuxɔ ci yí Mafinga hamɛ lɔ zannɔ do. Hamɛ lɔ ŋwlɛ mɔ: “So hwenu wodra xɔ lɔ doɔ, mɛ ciwo yí vanɔ mìwo bɔbɔwo hlɛnhlɛnmɛ sugbɔ doji haan! Mìdodoɔ akpe sugbɔ nɔ Yehowa habɔbɔ lɔ koɖo nɔvi ciwo pleŋ yí le xexeɛ mɛ, ɖo xomɛvu wowo tɔ yí dɔ mìtɛnŋ sɛnsɛn Mawu le texwe nyakpɔkpɔ cɛ.”

 COVID-19 dɔ̀bamɛ lɔ na yí shive ciciɛ mìwo nɔvi ɖewo le Sri Lanka yí wokpekpeɛ fun. Imara Fernando koɖo eviɛ ŋsuvihwɛ ci yí tɔ mɔ Enosh le mɛ ciwo shive cikɔ lɔwo mɛ. Mìdokɔ akpe mɔ wosɔ enuwo so eju buwo mɛ yi nɔ wo yí wokpɔ enu ciwo yí wudo wo. Wowa wemavi ɖeka yí ŋwlɛ do ji mɔ: “Mìdodoɔ akpe nɔ nɔvi ciwo yí dasɛ nɔ mì mɔ yewolɔn mì le hwenu sɛnŋsɛnŋ cɛwo mɛ. Jijɔ gangan enyi nɔ mì nyao mɔ mìle xomu cɛ mɛ yí kpɔtɔ dodoɔ gbe ɖaɖa mɔ, Yehowa akpedo mìwo nɔviwo pleŋ nu le ŋkeke vɔvɔɛ cɛwo mɛ.”

 Nɔ mìwo nɔviŋsu koɖo nɔvinyɔnuwo gbele fiɖekpokpui can ɔ, wojijiɛ veviɖe mɔ yewoama ŋciwo yí le yewo shi koɖo mɛbuwo. Le kpɔwɛ mɛ, Enosh wa dakavi ɖeka yí sɔ eho donɔ mɛ, nɔ yɛ can avasɔ na keŋ woasɔ kpedo xomu ciwo yí le ӡan mɛ nu. Guadalupe Álvarez can jinɔ mɔ yeawanɔ xomɛvu ŋtɔ́ han. Amɛ kankin yí wocunɔ fɛn nɔ wlecikuku le Mexique ju ci mɛ ele yí wodecunɔ fɛn nɔ meɖewo wleci ɖewo kpetii o. Gan éjɔnɔ ho ci atɛnŋ ajɔ. Éŋwlɛ mɔ: “Ŋdokɔ akpe nɔ Yehowa ɖo enyɔ yí gbelɔnnɔ mì gashiagamɛ. Ŋnya mɔ woasɔ enu ciwo ŋna asɔ kpedo mɛbuwo tɔwo nu nɔ nɔvi ciwo yí le ӡan mɛ aziin.”

 Alɔjedɔwaxu ciwo yí sɔnɔ eho ɖaɖa texwe ciwo yí ӡan le wɛni koɖo jijɔ. Anthony Carvalho nyi Brésil lɔjedɔwaxu jikpɔgbɛ mɛ tɔ. Énu mɔ: “Exwe sugbɔ yí nyi cɛ yɛ yí ele mɔ eju buwo akpedo mì nu koɖo eho gbɔxwe yí edɔ lɔ anyi wawa le mìwo ju mɛ. Kpekpedonu cɛ na yí lé amɛ sugbɔ vakɔ nyɔnɔnwi lɔ mɛ do yí mìkpɔkpɔ jijiɛŋ nɔ mì. Kakayɛɔ, ehonyɔwo degbeɖeɖeɛ fun nɔ mì o, yí emɔ hun nɔ mì yɛ mìkpekpeɛ do mɛbuwo nu. Nɔvi ciwo yí le Brésil kpɔ lé kunuɖeɖedɔ lɔ yiyiɛ ji do le xexeɛ pleŋ mɛ yí kpɔ kpedonu ci woana mɛbuwo shigbe lé Yesu nukplavi ciwo yí sɔ wowoɖekiwo sa vɔn wɛ nɛ.”

 Lé Yehowa Kunuɖetɔwo awɛ akpedo wowo nɔviŋsu koɖo nɔvinyɔnu ciwo yí le eӡan mɛ nu nywiɖe doɔ? De sɔ woasɔnɔ eho ɖaɖa alɔjedɔwaxu ciwo yí le eju buwo mɛ tiin o, vɔ woasɔnɔ eho ɖaɖa xexeɛ pleŋ mɛ dɔ lɔ. Woawa cɛ dru nɔ wosɔnɔ eho donɔ dakavi ci ji woŋwlɛ do mɔ, “Xexeɛ pleŋ mɛ dɔ lɔ” le hamɛ lɔ mɛ alo to donate.pr418.com. Mìdokɔ akpe nɔ mí sugbɔ nɔ enunana cɛwo pleŋ.