LÉ WOZAN EDRO NUNANA AO TƆWO DO
Kpekpedonunana mɛ ciwo ji jɔjɔmɛfɔkuwo jɔ do
1er FÉVRIER 2021
Le exwe 2020 mɛɔ, jɔjɔmɛfɔku ciwo yí dahɛn nu dehwe o yí COVID-19 dɔ̀bamɛ lɔ can tɔ nu gbangban le xexeɛ pleŋ mɛ. Lé Yehowa Kunuɖetɔwo wɛ yí kpedo mɛ ciwo ji aobi nu cɛwo jɔ doɔ?
Le sumɔsumɔxwe 2020 a lɔ mɛɔ, Totowo jikpɔtɔwo jikpɔgbɛ Edɔjikpɔha lɔ tɔ lɔn mɔ, wo le zan Amɛlikiho dɔla b miliɔn 28 alo miliya 15 miliɔn 120 FCFA han do jɔjɔmɛfɔku kpekpedonunana mɛ. Ecɛ wɛ mɔ wotɛnŋ kpedo mɛ ciwo yí jɔjɔmɛfɔku 200 nu le ji dahɛn nuwo nɔ nu. Jɔjɔmɛfɔku lɔwo ɖowo yí nyi COVID-19 xexeɛ mɛ pleŋ dɔ̀bamɛ lɔ, jihɔntwi blabla nabiɖe ciwo yí dahɛn nuwo nɔ mɛ ciwo yí le avesu nyigbanwo ji, eshigbanxwe ciwo yí dahɛn nu le Afrique, shive ciwo yí to le Vénézuéla koɖo efyɔ gangan ci yí ɖyi le Zimbabwe. Enu ciwo yí nɔviwo na dɔ wotɛnŋ xwle ŋɖuɖu, ekpɔ eshi, nɔxu, enudodowo, cike, enuvevi ciwo woasɔ dra ŋciwo yí dahɛn koɖo exɔ ciwo yí dahɛn do. Kpɔ jɔjɔmɛfɔku kpekpedonunanadɔ kleŋ ciwo yí gbɔgbɔ ɖa.
COVID-19. Toto xexeɛ pleŋ mɛɔ, edɔ̀bamɛ lɔ wa nu koɖo mìwo nɔviŋsu koɖo nɔvinyɔnuwo le ŋcilanmɛ, edɔ wodevo le wowoɖekiwo mɛ o yí ewɛ mɔ ehonyɔwo ɖeɖeɛ fun nɔ wo hɛnnɛ. Eyi dɔ woɖo Jɔjɔmɛfɔku kpekpedonunana jikpɔgbɛ 800 nu le ji le xexeɛ pleŋ mɛ keŋ asɔ kpedo nɔviwo nu. Kpekpedonunana jikpɔgbɛ cɛwo nɔnɔ zanŋte do mìwo nɔvi ciwo yí le ӡan mɛ nu keŋ yí tɛnŋ nunɔ lé nuwo yikɔ do nɔ wo ɖaɖa Totowo jikpɔtɔwo jikpɔgbɛ le afɔdumɛ nɔ yɛ anya lé awa ɖaŋ awa toto nɔ kpekpedonunanadɔ lɔ nywiɖe do.
Le xweɛ pleŋ mɛɔ, Kpekpedonunana jikɔgbɛ lɔwo kpedo amɛ sugbɔ nu yí wokpɔ ŋɖuɖu, eshi, ŋciwo woazan nɔ woŋgbeba dɔ̀ o koɖo cike vevi buwo yí xɔ. Le texwe ɖewoɔ, Kpekpedonunana jikpɔgbɛ lɔwo gbewa dɔ koɖo hamɛmɛshinshinwo yí wokpedo nɔviwo nu keŋ nɔ axɔsu ado alɔ wo.
Mɛ ciwo yí denyi Yehowa Kunuɖetɔ can kpɔ kpekpedonunanadɔ ci mìwa. Le kpɔwɛ mɛ, mɛgan Field Simwinga ci yí nyi kɔnmisɛ le Nakonde kanmɛ le Zambie nu nɔ mìwo nɔviwo mɔ: “Mìɖu fɛn do mí nɔ alɔdu ci mínana xomu ciwo yí le ӡan mɛ do hwenu nywitɔ ji.”
Shive ciwo yí to le Angola. Ci COVID-19 dɔ̀bamɛ lɔ to le Angolaɔ, ŋɖuɖu tɔ dɛndɛn yí gbevatɔ ho veve doji. Ŋɖuɖu xwlexwle vaɖeɖeɛ fun doji nɔ mìwo nɔviŋsu koɖo nɔvinyɔnu sugbɔtɔ.
Ŋɖuɖugban ciwo wosɔ so Brésil va Angola
Wona gbe Brésil lɔjedɔwaxu lɔ mɔ le sɔ ŋɖuɖuwo ɖaɖa nɔvi lɔwo keŋ asɔ kpedo wo nu. Nɔ woawa ɖaŋ azan kpekpedonunanadɔ lɔ howoɔ, wowa numɛkuku kpɔ nywiɖe keŋ yí kpɔ mɔ lé woawɛ keke axwle ŋɖuɖu lɔwo nywiɖe koɖo lé woasɔ wo ɖaɖa do ma; ŋci wogbewa yí nyi mɔ, woxa xwle ŋɖuɖu lɔwo do sugbɔ ji nɔ hozanzanwo aɖe kpɔtɔ. Eyi taɖo eho ci wozan yí sɔ xwle ŋɖuɖugban blabla ɖekaɖeka sɔ kpe nɔ yi hunɖoho ɖeɖeɛ Amɛlikiho dɔla 22 alo 11 880 FCFA han ci womi sɔsɔminasɔɛ. Vɔ nɔ wosɔ ŋɖuɖugban blabla ɖekaɔ, woakpɔ mɔlu, ayu, ami koɖo ŋɖuɖu buwo le mɛ yí kpɛnkpɛnmɛ yi tɔ gogo kilo 20. Keke vaje egbɛɔ, ŋɖuɖugban blabla 33 544 yí wosɔ ɖaɖa. Yí wo pleŋ nyinyiɛ tɔnu 654 (tɔnu Amɛliki tɔ 721). Agbetɔ 50 000 nu le ji blebu yí woma ŋɖuɖu ciwo yí Angola lɔjedɔwaxu lɔ xɔ koɖo ciwo yí wosɔ ɖaɖa nɔ.
Lé ewa nɔ nɔviwo ci wodo alɔ wo ahan ɔ? Alexandre ci yí nɔnɔ kɔxwi ɖeka ci yí jinjin le Angola jugan lɔ gbɔ mɛ nu mɔ: “Enuɔ ci wowa nɔ mì ahan nyi kpeɖoji nɔŋ mɔ Yehowa lɔnŋ yí amowo gbeli nɔŋ. Amɛ nɔnui ŋnyi nɔ Yehowa habɔbɔ lɔ!” Mariza ci yí hɛnhɛn viɛwo yiɖekɛ nu mɔ: “Yehowa se anyi gbedodoɖa. Ŋdodoɔ akpe nɔ yɛ koɖo yi habɔbɔ lɔ keke!”
Ŋɖuɖu ci wona Angola nɔviwo yí sɔ do alɔ wo jɔ ji nɔ wo
Kpekpedonu ci wona le Zimbabwe hwenu efyɔ gangan ɖeka ɖyi. Le sumɔsumɔxwe 2020 lɔ mɛɔ, efyɔ gangan ɖeka ɖyi le Zimbabwe. Ecɛ dɔ shive wa nu koɖo agbetɔ miliɔn nabiɖe le juɔ mɛ. Kunuɖetɔ kotokun nɛniɖe dekpɔ nu yí ɖunɔ esunnɔ wo o.
Woɖo Jɔjɔmɛfɔku kpekpedonunana jikpɔgbɛ amatɔn keŋ nɔ woakpedo nɔviwo nu nɔ ŋɖuɖu nyɔ lɔ. Eŋɛnywidratɔ sanŋdi nɛniɖe kpedo wo nu. Wobla ŋɖuɖugban lɔwo koɖo wo, do agban lɔwo koɖo wo yí sɔ wo yi nɔ amowo. Nɔvi ɖowo we wowo hunwo nɔ wo hɛnnɛ. c Le sumɔsumɔxwe 2020 lɔ mɛɔ, wozan Amɛlikiho dɔla 691 561 alo 373 442 940 FCFA han do ŋɖuɖu mɛ yí sɔ do alɔ agbetɔ 22 700 nu le ji yí wokpɔ nu yí ɖu!
Zimbabwe nɔviwo xɔxɔ ŋɖuɖu ciwo wosɔ do alɔ wo (doŋkɔ nɔ edɔ̀bamɛ lɔ)
Ejɔnɔ yí ŋɖuɖu vɔnɔ nɔ nɔvi ɖowo pɛɛ ahan yí alɔdu vanɔ nɔ wo. Nɔ ŋɖuɖuɔ vaɖoɔ, mìwo nɔviwo kannɔfu Yehowa. Mɛɖowo tɔnɔ Fyɔɖuxu hawo jiji.
Le fiɖekaɔ, Gbɛbɔbɔ ci yí denyi axɔsu tɔ o (ONG) ɖeka jikɔ asɔ ŋɖuɖuwo ɖaɖa juɔ mɛ tɔwo keŋ asɔ do alɔ wo. Juɔ mɛ tɔwo yɔ bɔbɔ ɖeka keŋ axo nuxu so ŋɖuɖuɔ nu. Eyi nɔvinyɔnu kposhu amɛve ɖekawo can yi bɔbɔ lɔ. Vɔ wovatɔ ejunyɔwo nunu le bɔbɔ lɔ keke etɔ gan wuwu. Eyi dɔ nɔvinyɔnu lɔwo gbe mɔ yewodasɛnŋ awa ŋci womɔ yewo le wa gbɔxwe axɔ ŋɖuɖu o. Ci woto le bɔbɔ lɔ mɛɔ, mɛ lɔwo ko wo yí nu nɔ wo mɔ, “Míŋgbeva mì gbɔ avamɔ yewoaxɔ ŋɖuɖu lo!” Le kwɛshila ve godu ahan vɔ, mìwo nɔviwo vaɖo juɔ mɛ yí hɛn ŋɖuɖuwo vɛ nɔ nɔvinyɔnu lɔwo gbɔxwe yí ONG lɔ vasɔ yi tɔ ɖaɖa!
Prisca nu mɔ, “Yehowa degbenɔ yi sɛntɔwo ɖɛ gbeɖe o
Jɔjɔmɛfɔku kpekpedonunanadɔ ci wowa le Zimbabwe gbenyi kunuɖeɖe nywi ɖeka hɛnnɛ. Le kpɔwɛ mɛ, kpɔ lé nuwo yi do nɔ Prisca ci yí nɔnɔ kɔxwi ɖeka mɛ ɖa. Ci efyɔ gangan lɔ ɖyi yí enuwo tɔ nu gbɔngbɔn can ɔ, Prisca sɔ zangagbewo koɖo xɔsuzangbewo pleŋ ɖɛ yí wanɔ kunuɖeɖedɔ lɔ, nɔ enyi agbledede hwenu yɔ can. Juɔ mɛ tɔwo kuini yí nunɔ ni mɔ: “Ànukɔ Mawu Nyɔ keke avasɔ shive ci ao xomu.” Prisca nunɔ do nu nɔ wo mɔ: “Yehowa degbenɔ yi sɛntɔwo ɖɛ gbeɖe o.” Dejinjin o yí mìwo habɔbɔ lɔ sɔ ŋɖuɖuwo ɖaɖɛ. Enu lɔ kpaca Prisca xwexatɔ ɖewo yí wonu ni mɔ: “Mawu degbe eo ɖɛ o, taɖo mìji mɔ mìajeshi ɖɛ doji.” Kakayɛɔ, yi xwexatɔ amadrɛ yí ɖo to yí senɔ hamɛ lɔ bɔbɔwo le hlajio ji.
Ci mìgogokɔ vɔvɔnu lɔɔ, jɔjɔmɛfɔkuwo akpɔtɔ ajɔjɔ. (Matie 24:3, 7) Mìdodoɔ akpe nɔ mí sugbɔ nɔ xomɛvunu ciwo mínakɔ to emɔ vovovo ciwo yí le donate.pr418.com ji. Wowa ɖaŋ zankɔ míwo nunana lɔwo yí sɔ kpekpeɛdo mɛ ciwo yí enuwo kpekpeɛ nu do amɛ gamɛ.
