“Ŋcɛ ŋle te kpɔ so xwe 19 blebu ke!” Nyi mìwo nɔvi ci yí nu nyɔ cɛ le te kpɔ ahan ɔ? Xexe Yeye Gɔmeɖeɖe Kristotɔwo Ƒe Hela Ŋɔŋlɔ̃awo le yiŋtɔ gbe Bengali-gbe mɛ yí ele te kpɔ. Amɛ sugbɔ nunɔ nyɔ ŋtɔ́ han nɔ woɖe Xexe Yeye Gɔmeɖeɖe Bibla ti nɔ wo. Vɔ èbiɔ eoɖeki se kpɔ mɔ, lé wowɛni do keke yí wanɔ Bibla cɛwo yí gbeɖenɔ gɔnmɛ nɔ wo do egbe buwo mɛ ma?

 Doŋkɔɔ, Wemaŋwlɛŋwlɛ jikpɔgbɛ Edɔjikpɔha lɔ tɔ nanɔ gbe yí wonunɔ nɔ egbegɔnmɛɖetɔwo gbɛbɔbɔ mɔ wo le ɖe Bibla gɔnmɛ. Nɔ gbegɔnmɛɖetɔwo gbɛbɔbɔ ɖe tɔ Bibla gɔnmɛ ɖeɖe ɖe, hwenu wovaɖenɔgbɔɔ? Nicholas Ahladis ci yí wakɔ dɔ koɖo Egbegɔnmɛɖeɖe dɔwaxu le Warwick, New York ɖe mɛ mɔ: “Enu sugbɔ yí dɔ woɖenɔgbɔ blaŋ abi wodeɖenɔgbɔ blaŋ o. Ðowo yí nyi egbegɔnmɛɖetɔ nɛni ci yí jikɔ awa dɔ lɔ, lé egbe lɔ gbɔnnu do koɖo lé mɛ ciwo yí hlɛnnɔ gbe lɔ mɔŋje lé amɛwo nɔnɔ agbe do le Bibla hwenuwo koɖo wowo kɔnuwo mɛ do. Nɔ wodonɔ gbe ɖekɛ lɔ to alɔkpa vovovo ji le texwe vovovowo abi denyinɔ ahan nɔ gbe lɔ can nyi nyɔ lɔ. Egbegɔnmɛɖeɖe gbɛbɔbɔ ɖaka wanɔ xwe ɖeka yi xwe tɔn han gbɔxwe aɖe gɔnmɛ nɔ Kristotɔwo Grɛki Nuŋwlɛŋwlɛ lɔwo kpaxwe vɛ. Blaŋblaŋ, wowanɔ xwe amɛnɛ alo ci yí wu ahan gbɔxwe aɖe Bibla lɔ pleŋ gɔnmɛ. Tokunɔwo Bibla gɔnmɛɖeɖe yɛ gbexɔnɔ xwe sugbɔ wu ahan.”

 Gbɔxwe woaɖe Bibla gɔnmɛɔ, de egbegɔnmɛɖetɔwo gbɛbɔbɔ lɔ ɖekɛ yí wanɔ dɔ o. Nɔvi bu ciwo yí denyi gbegɔnmɛɖetɔwo yí so texwe vovovo yí hweɖewonu wosonɔ akɔta vovovowo mɛ trɔ yí tonɔ edɔ ci egbegɔnmɛɖetɔwo wa mɛ. Wowa ɖaŋ wanɔ dɔ cɛ eho ɖe maxɔ. Nɔ wohlin ɖegbɔ yí kpɔ ɖe so nuɔ, wonuini ɖaɖa gbegɔnmɛɖetɔwo. Ecɛ kpenɔdo gbegɔnmɛɖetɔ lɔwo nu yí wowa ɖaŋ ɖenɔ Bibla lɔ gɔnmɛ esɔnɔgbe pɛpɛpɛ, mɛnɔ shi yí amɛwo gbesenɔ nyɔ lɔwo mɛ nywiɖe. Nɔvi ɖeka ci yí so Afrique du Sud yí nanɔ kpla amɛwo yí woɖenɔ Bibla gɔnmɛ nu mɔ, “egbegɔnmɛɖetɔ lɔwo kpɔɛni mɔ, yewo ji agban gangan lɔ le le Yehowa koɖo mɛ ciwo yí hlɛnnɔ yi Nyɔ lɔ gbɔ mɔ yewoawa dɔ ci yí mɛ shi.”

 Nɔ woɖe Bibla lɔ gɔnmɛ ɖegbɔɔ, woɖo aŋwli do wemawo ji yí avasɔ wema lɔwo ca do nɔnɔ nu pleŋ. Wemawaxu lɔwo zannɔ enu amɛwo cɛwo nɔ ehwe gbɔxwe awa dɔ lɔ: wema, wemacishi, enu ciwo wosɔ donɔ akpa nɔ wema, aŋɔ ci wosɔ trenɔ nu, enu ciwo wosɔ trenɔ do akpa lɔ ji, wema ciwo nu woshishinɔ gajun do yí wodanɔ zo, eka ciwo wosɔ donɔ Bibla lɔ mɛ, eka ciwo wosɔ tɔnnɔ wema lɔwo doju, enu ciwo yí na ŋsɛn nɔnɔ guinu nɔ Bibla lɔ koɖo enu ci yí trenɔ Bibla lɔ kpaxwe vovovo doju. Le xwe 2019 mɛɔ, eho ciwo pleŋ wozan do enu cɛwo ɖekɛ xwlexwle nu nyi Amɛlikiho dɔla miliɔn 20 nu le ji alo miliɔn 10 000 FCFA nu le ji. Mìwo nɔvi ciwo yí wanɔ dɔ le wemawaxu lɔwo zan gaxoxo ciwo yí wu 300 000 le xwe ŋtɔ́ mɛ keŋ yí sɔ wa Bibla lɔwo yí gbesɔ wo ɖaɖa hamɛwo.

 Nyi yí taɖo mìzannɔ gamɛ koɖo eho sugbɔ ahan do edɔ cɛwo nuɔ? Joel Blue wanɔ dɔ le mìwo wemawaxu gangantɔ, émɔ: “Bibla yí nyi wema vevitɔ le wema ciwo pleŋ mìwanɔ mɛ. Eyi dɔ mìjijiɛ mɔ, lé Bibla lɔ anɔ do le kanfu Mawu ci mìsɛnkɔ yí agbena amɛwo ayɔnɔ ŋɛdu ci mìdradra lɔ mɔ nunɔnwi.”

 To akpo nɔ Xexe Yeye Gɔmeɖeɖe ci mìwanɔ nɔ amɛ sugbɔtɔɔ, mìgbewanɔ ebuŋmɛ nɔ yi hlɛntɔ ɖewo koŋ. Le kpɔwɛ mɛ, Xexe Yeye Gɔmeɖeɖe ŋkuvitɔnnɔwo tɔ le egbe amɛwo mɛ. Gbɔxwe woaɖegbɔ nɔ ŋkuvitɔnnɔwo Bibla kuɖekaɔ, axɔ gaxoxo amɛnyi dru. Womanɔ wowo Bibla yɛ do akpaxwe vovovo mɛ yí akpaxwe lɔwo sunɔgbɔ yí gbegangannɔ. Nɔ ehweɔ, woaxɔ texwe asun mɛta 2 koɖo nu kankin 3. Mìgbewanɔ ebuŋmɛ nɔ mɛ ciwo yí le gakpamɛwo, ɖo wema ciwo akpa desɛnŋ nɔ ɖekɛ wolɔn mɔ wo le hɛnnɔ va gakpa lɔwo xɔwo mɛ.

 Xexe Yeye Gɔmeɖeɖe trɔnɔ yi hlɛntɔwo gbenɔnɔ. Le kpɔwɛ mɛ, le République Démocratique du Congoɔ, Kiluba-gbe hamɛ ɖeka le texwe ci woyɔnɔ mɔ Tombe. Tombe jinjin kpeci 1 700 nu le ji le eju gangantɔ ci yí le jukɔn lɔ mɛ gbɔ. Bibla kuɖeka kpaŋ yí le Kunuɖetɔ lɔwo pleŋ shi le nɔ yí egbenyi Kiluba-gbe xoxuitɔ mɛ yí woŋwli do. Wowenɔ Bibla kuɖeka lɔ nɔ nɔnɔ gbɔxwe atɛnŋ adra bɔbɔ lɔwo kpaxwe vovovo do. Vɔ so août 2018 mɛɔ, amɛshiamɛ ci yí le hamɛ lɔ mɛ kpɔ Xexe Yeye Gɔmeɖeɖe lɔ pleŋpleŋ le Kiluba-gbe ci wovadodoɔ yɛ mɛ yí xɔ.

 Ci wotrɔ ashi le Xexe Yeye Gɔmeɖeɖe nu le Allemagne-gbe mɛ ɖegbɔɔ, nɔvinyɔnu ɖeka ci yí so Allemagne nu mɔ: “Ŋdegbenunɔ mɔ, ele mɔ mahlɛn Bibla o. Vɔ ŋvabiɔnɔ nyɛɖeki se mɔ, ‘hwenu natɛnŋ ahlɛn sugbɔ dojiɔ?’” Gakpamɛnɔtɔ ɖeka ŋwlɛ mɔ: “Wona Xexe Yeye Gɔmeɖeɖe Bibla ɖekaŋ yí etrɔkɔ anyi gbenɔnɔ. So hwenu ŋtɔ Bibla gɔnmɛɖeɖe cɛ hlɛnhlɛn ɔ, ŋvase Mawu Nyɔ lɔ gɔnmɛ sɔwu, ŋdese mɛ ahan kpɔ o. Ŋji mɔ najeshi Yehowa Kunuɖetɔwo ɖɛ doji koɖo lé nawɛ anyi Kunuɖetɔ.”

 Mɛ ciwo pleŋ yí hlɛnnɔ Xexe Yeye Gɔmeɖeɖe dokɔ akpe sugbɔ nɔ mɛ ciwo pleŋ yí na nuwo yí wosɔ wɛwɛ. Wototoɔ emɔ vovovo ciwo yí le donate.pr418.com ji yí nana nu cɛwo nɔ woasɔ do alɔ xexeɛ pleŋ mɛ dɔ lɔ. Akpe nɔ mí nɔ míwo xomɛvu nunanawo.