Exolɔlɔ teŋ yí takpekpegan exwe 2020 tɔ nyi. Ðo eyi nyi mìwo takpekpegan ŋkɔtɔ ci wolé ɖɛ yí gbesɔ da do ɛntɛnɛti ji. Ele ahan gan, le Malawi koɖo Mozambiqueɔ, mìwo nɔvi sugbɔtɔ sɛnŋ kpɔ takpekpegan lɔ wanawo ɛntɛnɛti mazan. Lé eyi doɔ?

 Totowo jikpɔtɔwo koɖo Enukplakpla jikpɔgbɛ Edɔjikpɔha lɔ tɔ na gbe mɔ, wo le dasɛ takpekpegan lɔ ɖekɛ le televiӡiɔn yí agbexui le radio ji le Malawi koɖo Mozambique. Nyi yí taɖo eӡan mɔ woawɛ ahan nɔ yɛ ɖekɛɔ? Malawi yí kɔnnɛshiɔn ve ho le sɔwu le xexeɛ mɛ, eyi taɖo enyi Kunuɖetɔ kakin ɖowo kpoŋ yí yinɔ ɛntɛnɛti ji le juɔ mɛ. Shigbe lé William Chumbi ci yí nyi Alɔjedɔwaxu jikpɔgbɛ mɛ tɔ le Malawi nui nɛ mɔ: “Televiӡiɔn koɖo radio ɖekɛ yí nyi emɔ ciwo ji nɔviŋsu koɖo nɔvinyɔnuwo ato yí ase vivi nɔ takpekpegan lɔ wanawo.” Luka Sibeko ci yí sumɔkɔ hɛnnɛ le Alɔjedɔwaxu jikpɔgbɛ Malawi tɔ mɛ nu kpe ni mɔ: “Nɔ mìdetɛnŋ kpɔ wana lɔwo le televiӡiɔn alo se wo le radio jiɔ, nɔvi ɖekaɖeka ɖowo kpoŋ yí akpɔ wo le Alɔjedɔwaxu lɔ nyigbanmamawo mɛ.” Le Mozambique hɛnnɛɔ, nɔvi kankin ɖowo kpoŋ yí atɛnŋ akpɔ takpekpegan lɔ le telefonu alo tablɛti ji yí ɛntɛnɛti nyɔ ɖe daɖe fun nɔ wo o.

 Ci COVID-19 dɔ̀bamɛ lɔ kpɔtɔ liɔ, televiӡiɔn dɔwaxu ɖewo dadasɛ mìwo bɔbɔwo sa xoxo vɔ yí radio dɔwaxu ɖowo can xoxoɔ wo yí amɛwo seseɛ. a Mìwo nɔviwo vayi kpɔ televiӡiɔn koɖo radio dɔwaxu lɔwo yí biɔ wo mɔ wo le na gamɛ kankin yewo kpi keŋ nɔ woasɔ dasɛ takpekpegan lɔ wanawo yí agbexo wo le radio ji nɔ amɛwo ase.

 Le Malawiɔ, mìwo nɔviwo do go nɔnɔmɛ sɛnŋ ɖeka. Blaŋblaŋ ɔ, gaxoxo kuɖeka yí enyɔjɔjɔdɔwaxuwo nanɔ wowo fishinɔwo. Ci nɔvi lɔwo hɛn takpekpegan nyɔ lɔ yi nɔ woɔ, wovɔn mɔ ci wana lɔ jinjin ɔ, yi kpɔkpɔ koɖo yi sese avawa ŋmɛya nɔ amɛwo. Vɔ mìwo nɔvi lɔwo ɖe mɛ nɔ wo mɔ, mɛshiamɛ nu yí mìwo dɔ lɔ kpenɔdo. Le amɛxoxodoxɔ hwenu can ɔ, mìma Bibla mɛ ŋɛnywi fakɔnnamɛ nɔ amɛ sugbɔ ci yí atɛnŋ akpedo wo nu woanyi jumɛvi nywiwo yí xomu gbenɔnɔ wowo tɔ agbenyɔ doji. Ci wose nɔvi lɔwo nu ahan ɔ, wolɔn mɔ yewoana gamɛ wo kpi nɔ woasɔ dasɛ takpekpegan wana lɔwo.

 Le Malawiɔ, wodasɛ takpekpegan lɔ le televiӡiɔn dɔwaxu ɖeka yí gbexui le radio dɔwaxu ɖeka. Televiӡiɔn koɖo radio dɔwaxu cɛwo nyi juɔ mɛ tɔwo koŋ ci amɛ miliɔn nɛniɖe hɛn alé le fiɖekpokpui nɔ ju lɔ. Le Mozambiqueɔ, wodasɛ takpekpegan lɔ le televiӡiɔn dɔwaxu kuɖeka yí gbexui le radio dɔwaxu 85 yí amɛwo se.

 Le ju lɔwo koɖo ve mɛɔ, dɔla 28 227 b (dɔla ɖeka anyi 577 fcfa han) yí nyi eho ci pleŋ wozan yí sɔ dasɛ takpekpegan lɔ le televiӡiɔn ji. Ci wozan yí sɔ xo takpekpegan wana lɔwo le radio ji yí amɛwo se ayi dɔla 20 000. Dɔla 15 yi dalɔ 2 777 yí radio dɔwaxu hwɛhwɛwo keke je radio dɔwaxu gangan ejuɔ mɛ tɔwo ji can xɔnɔ gbɔxwe adra nyɔ ɖe.

 Mìwo nɔviwo do gbla sɛnsinɖe keŋ awa ɖaŋ azan enunana ho lɔwo nywiɖe. Le kpɔwɛ mɛ le Malawiɔ, wodo afi yí woɖe ho kpɔtɔ nɔ wo nywiɖe. Ecɛ wɛ mɔ nɔ woma eho ci woacu sa do sanŋdi ɖekaɔ, radio dɔwaxu lɔwo vana 30 nɔvi lɔwo le ho lɔ mɛ. Ci woɖe ho lɔ kpɔtɔ nɔ nɔvi lɔwo ahan ɔ, ewɛ mɔ dɔla 1 711 cuin nɔ wo yí woagbesɔ yɛ wa nubuwo. Ci mìtonɔ nyɔnɔnwi yí gbecunɔ ho do gamɛ jiɔ, eyi nu yí enyɔjɔjɔdɔwaxu ɖewo kpɔ do le Mozambique yí le gbesɔsɔ mɔ yewoaɖe ho kpɔtɔ nɔ nɔviwo.

 Eji jɔ nɔviwo sugbɔ mɔ yewotɛnŋ ɖo to takpekpegan lɔ le yewo xwe radio ji yí gbekpɔɛ le televiӡiɔn ji. Patrick ci yí nyi hamɛmɛshinshin le Malawi nu mɔ: “Mìdokɔ akpe sugbɔ nɔ nɔviŋsu ciwo yí le Edɔjikpɔha lɔ mɛ nɔ ŋciwo pleŋ wowa nɔ mì le edɔ̀bamɛ cɛ hwenu.” Isaac ci yí so Malawi can nu mɔ: “Mìdeɖo nubuɖe yí akpɔ takpekpe lɔ le ji sa o, mìdokɔ akpe sugbɔ nɔ habɔbɔ lɔ mɔ mìse takpekpe lɔ le radio ji. Toto cɛ wɛ mɔ, nyɛ koɖo anyi xomu sɔ kpe nɔ ashinyɛnɔ tɛnŋ se takpekpegan lɔ wanawo. Edɔ mìkpɔɛ mɔ Yehowa lɔn yi mɛwo haan.”

 Exwe 2020 takpekpegan lɔ nyi takpekpegan ŋkɔtɔ nɔ eŋɛnywidratɔ ɖeka le Mozambique. Énu mɔ: “Toto ci wowa mɔ mìakpɔ takpekpegan lɔ le televiӡiɔn ji ɖo ŋwi nɔŋ mɔ Ŋsɛnwopleŋtɔ yí Yehowa nyi nyao. Edɔ̀bamɛ lɔ dexe mɔ nɔ Yehowa yí ana gbɔngbɔnmɛŋɖuɖu mì eglo o, keke wosɔ kinyɛ vɛ nɔŋ le nyɛŋtɔ xɔ mɛ hɛnnɛ. Ŋkpɔ mɔ lɔnlɔn ŋtɔŋtɔ le Yehowa mɛwo mɛ. Edɔ ŋkando ji mɔ sɛnsɛn adodwitɔ lɔ ke.”

 Wyson ci yí nyi hamɛmɛshinshin nu mɔ: “Ŋdo akpe sugbɔ nɔ hwashi egbejinɔtɔ lɔ nɔ ebu gangan ci ele nɔ mì le edɔ̀bamɛ cɛ hwenu. Toto ci wowa mɔ woaxo takpekpegan lɔ le radio yí adasɛ yi le televiӡiɔn ji kpedo mìwo sugbɔtɔ nu yí mìkpɔ takpekpegan lɔ wanawo ci ehonyɔwo wawa aya nɔ mì le lɛ nɔ xexe lɔ can.”

 Totowo jikpɔtɔwo koɖo Enukplakpla jikpɔgbɛ gbetrɔ yí wa toto vevi lɔ nɔ exwe 2021 takpekpegan lɔ nɔ woadasɛ yi le televiӡiɔn yí agbexui le radio ji le ju ɖowo mɛ. Lé mìwɛ yí kpɔ ho yí sɔ wakɔ cɛwo pleŋ ɔ? Xexeɛ pleŋ mɛ nunana ci amɛ sugbɔ nana to mɔnu vovovowo ji le donate.pr418.com ji yí dɔ mìkpe ji yí wɛwɛ. Akpe nɔ mí nɔ xomɛvu nunana míwo tɔwo.