Video ciwo wowanɔ do mìwo takpekpeganwo mɛ ɖonɔ lanmɛ nɔ mì yí gbekpenɔdo mì nu mìmɔnɔŋje Bibla nukplamuwo mɛ nywiɖe doji. Video 114 yí le exwe 2020 “Eji le jɔnɔ mí hweshahwenu”! takpekpegan wana lɔ pleŋ mɛ. Nuxu 43 ciwo yí edɔjikpɔha mɛ tɔwo koɖo wowo kpedonutɔwo xo can le mɛ. Èbiɔ eoɖeki se kpɔ mɔ, lé nɔviwo donɔ gbla do xwe yí wanɔ video cɛwo ma? Èbiɔ eoɖeki se kpɔ mɔ, eho nɛni wozannɔ gbɔxwe yí wanɔ wo ma?

 Nɔviŋsu koɖo nɔvinyɔnu 900 han le xexeɛ pleŋ mɛ zan wowo gamɛ koɖo wowo nujikpekpewo do video lɔwo wawa mɛ. Nɔ mìadrɔɛɔ, wozan gaxoxo 100 000 han le xwe ve gblamɛ nɔ dɔ lɔ wawa. Miniti 76 Bibla mɛ xolɔlɔ fimu ci yí nyi Nexemi: ‘Jijɔkpɔkpɔ do Yehowa nu ado ŋsɛn mí’ lɔ wawa xɔ gaxoxo 70 000 le mɛ.

 Nɔ èbui kpɔɔ, àkpɔ mɔ eho ci wozan do nɔvi xomɛvudɔwatɔ cɛwo nu koɖo ci wozan yí sɔ xwle edɔwanuwo, ci wozan yí sɔ kpɔ finiwo woawa dɔ lɔwo le gbɔ sɔ kpe nɔ ci wosɔ xwle mashinniwo nɔ wo nɔ dɔ cɛ wawa danyi ho hwɛ ɖe o.

 Nɔviŋsu Jared Gossman ci yí wakɔ dɔ koɖo Odio/Video dɔwaxu lɔ nu mɔ, “Enukplakpla jikpɔgbɛ Edɔjikpɔha lɔ tɔ ji veviɖe mɔ, woasɔ akɔta koɖo texwe vovovo mɛ tɔwo sɔ wa mìwo video lɔwo. Ðo nɔ wowɛ ahan ɔ, adasɛ mɔ xexeɛ pleŋ mɛ nɔviwo habɔbɔ mɛ tɔwo yí mìnyi nyao. Gbɔxwe anyi ahan ɔ, woɖo Odio/Video dɔwaxu 24 do eju vovovo 11 mɛ yí wowa dɔ alɔlealɔmɛ. Eho sugbɔ wozan gbɔxwe yí sun ji yí kpɔ edɔ cɛ ci wowa toto nɔ le xexeɛ pleŋ mɛ nyɔwo gbɔ yí eyi nywiɖe.”

 Nɔ mìasun ji awa mìwo video sugbɔtɔɔ, ele mɔ mìakpɔ edɔwanu vevi ɖewo koŋ koɖo mashinni sɛnŋsɛnŋwo. Le kpɔwɛ mɛ, videowaxu Mount Ebo tɔ ci yí gogo Patterson, le New York, États-Unis yí wowa Nexemi: ‘Jijɔkpɔkpɔ do Yehowa nu ado ŋsɛn mí’ fimu lɔ le. Wotrɔ lé texwe lɔ le do yí eɖyi blema tɔxu. Nɔ woasun ji azan enunana lɔwo nywiɖe gan yí awa Nexemi fimu lɔ yí asɔgbe pɛpɛpɛ koɖo exolɔlɔ lɔɔ, nɔvi lɔwo wa kpako gbaja gbaja ciwo yí foɖa yí jinjin mɛta amadɛn han yí tre enu dɛnfudɛnfu ciwo yí nyi shifɔn han do wo nu keŋ vashi aŋɔ nɔ wo yí woɖyi blema Ӡerusalɛmu gliwo. Ci wowɛ ahan ɔ, wohɛn woaɖɔkɔli texwewo nɔ “egli” cɛwo yí woazezeɛ le akpaxwe vovovowo nɔ fimu lɔ. Ecɛ wɛ mɔ, enu ciwo yí woɖo azan nɔ fimu lɔ wawa sa ɖe kpɔtɔ nywiɖe. Ele ahan gan, Amɛliki ho dɔla 100 000 yí wozan gbɔxwe yí tɛnŋ wa Nexemi fimu lɔ ɖekɛ. a

 Ci wodre lé wowɛ yí wa video lɔwo mɛ nɔ mìɔ, edɔ yí exwe cɛ mɛ takpekpegan wana lɔ pleŋ gbejeŋ nɔ mì doji. Mìkando ji mɔ egbla ciwo pleŋ nɔviwo do yí takpekpegan lɔ nyi wawa anyi kanfukanfu gangan ɖeka nɔ Yehowa le xexeɛ pleŋ mɛ. Akpe nɔ mí keke nɔ xomɛvunu ciwo mína to donate.pr418.com koɖo to emɔ buwo ji yí sɔ do alɔ xexeɛ pleŋ mɛ dɔ lɔ.