ENUKPLAKPLA NYƆTA 35
EHAJIJI 123 Ðokuibɔbɔ Nuteƒewɔwɔtɔe Ðe Teokrasiɖoɖowo Te
Kpekpedonu Ci Woana Mɛ Ciwo Woɖe Ti Le Hamɛ Lɔ Mɛ
“Nɔ agɔjetɔ ɖeka trɔ eji mɛ ɔ, jijɔ lɔ a wugan le jeŋkwimɛ wu amɛ ɖekatolekavehowi ciwo yí le jɔjwɛ ɖe yí wo de ʒan jimɛtrɔtrɔ o.”—LUIKI 15:7.
SUSU VEVI LƆ
Mìakpɔ enu ci yí taɖo woɖo aɖe mɛɖewo ti le hamɛ lɔ mɛ, yí lé hamɛmɛshinshinwo atɛnŋ akpedo mɛ ŋtɔ́wo nu do nɔ woatrɔ ji mɛ keŋ agbetrɔ gbɔ va Yehowa gbɔ.
1-2. (a) Lé Yehowa kpɔnɔ nuvɔn ci woxaɖo yí wakɔɔ? (b) Mɔkpɔkpɔ ci Yehowa na nuvɔnwatɔwoɔ?
YEHOWA nyi Mawu ci yí deɖenɔ emɔ do enuwo pleŋ nu o; delɔnnɔ nuvɔn nyɔ gbɔ o. (Eha. 5:4-6) Éji mɔ mìwo le wa do agbenywinɔnɔse jɔjɔɛ ye tɔye ciwo ena mì le yi Nyɔ lɔ mɛ ji. Le nyɔnɔnwi mɛɔ, Yehowa dekpɔkɔ emɔ mɔ mìwo ciwo yí nyi amɛ makpemakpewo le wa nu afɛnmalenu o. (Eha. 130:3, 4) Le gaɖekɛ lɔ ke mɛɔ, dexɔnɔ gbe nɔ “amɛ ciwo yí fɔnnɔgu do Mawu ji. [Yí] zannɔ adɔnusoswi Mawutɔ le emɔ baɖabaɖa ji nɔ agɔjeje nuwo wawa” o. (Ʒuda 4) Ewaɖeɔ, Bibla nu mɔ “a vá trɔn . . . . enuvɔnwatɔwo” le Mawu hwa Armagedɔn hwenu.—2 Piɛ 3:7; Enyɔ. 16:16.
2 Vɔ, Yehowa deji mɔ mɛɖe agu o. Shigbe lé mìkpɔɛ vayi le enyɔta eɖekplɔɖedo cɛwo mɛɔ, Bibla nui yi mɛ kɔ petii mɔ, “É jiji mɔ amɛshamɛ a trɔjimɛ.” (2 Piɛ 3:9) Kristotɔ hamɛmɛshinshinwo srannɔ Yehowa yí donɔ ʒinxo hwenu wojejeɛ agbla akpedo nuvɔnwatɔ lɔ nu nɔ atrɔ yi dɛn yí agbetrɔ ava nɔ ekacaca nywi mɛ koɖo Yehowa. Vɔ denyi nuvɔnwatɔwo pleŋ yí lɔn trɔnɔ ji mɛ o. (Ezai 6:9) Ci hamɛmɛshinshinwo ale agbla jekɔ gbɛmɛgbɛmɛ mɔ yewoakpedo nuvɔnwatɔwo nu nɔ woatrɔ ji mɛ can ɔ, mɛɖewo le wo mɛ gbenɔ yí kpɔtɔ wanɔ enudɔndɔn. Nyi woawa le nɔnɔmɛ ŋtɔ́ mɛɔ?
“MÍ [ÐE] XOMƐVETƆNƆ TÍ LE MÍWO DOMƐ”
3. (a) Nyi Bibla mɔ wo le wa nɔ nuvɔnwatɔ ciwo yí gbe mɔ yewodatrɔ ji mɛɔ? (b) Nyi yí taɖo mìatɛnŋ anu mɔ nuvɔnwatɔ lɔ ŋtɔ yí dɔ woɖi ti le hamɛ lɔ mɛɔ?
3 Nɔ nuvɔnwatɔ ɖe gbe mɔ yedatrɔ ji mɛɔ, hamɛmɛshinshinwo ɖo awa do emɔdasɛnamɛ ci yí le 1 Korɛntitɔwo 5:13 mɛ ji. Énu mɔ: “Mí [ɖe] xomɛvetɔnɔ tí le míwo domɛ.” Nɔ mìanuiɔ, nuvɔnwatɔ lɔ ŋtɔ yí lɔn keŋ vale alɔzu ŋtɔ́ kpɔkɔ; enu ci edo a sɔkɔ yí ele. (Gal. 6:7) Nyi yí taɖo mìatɛnŋ anu ahan ɔ? Ðo ci hamɛmɛshinshinwo je agbla yí kpedo nu zenɛniɖe nɔ atrɔ ji mɛɔ, égbe. (2 Efy. 17:12-15) To yi nuwanawo jiɔ, édasɛ mɔ yeŋtɔ yí cin mɔ yedawa do Yehowa sewo ji o.—2 Ese. 30:19, 20.
4. Nyi yí taɖo woawa nunɔwoase ɖeka nɔ woɖe nuvɔnwatɔ matrɔjimɛ ɖe ti le hamɛ lɔ mɛɔ?
4 Nɔ woɖe nuvɔnwatɔ matrɔjimɛ ɖe ti le hamɛ lɔ mɛɔ, woawa nunɔwoase ɖeka nɔ hamɛ lɔ yí amɔ degbenyi Yehowa Kunuɖetɔ o. b Susu ci yí dɔ wowa nunɔwoase ŋtɔ́ denyi mɔ woaɖe nuvɔnwatɔ lɔ kpɔtɔ yɔ o. Vɔ wowɛ keŋ nɔ hamɛ lɔ azɔn do enyɔ ci yí Enuŋwlɛŋwlɛ lɔ nu ji, ci yí mɔ “[wowo] ŋgbe do ha koɖo” mɛ ŋtɔ́ o yí “[wo] de ɖo aɖu nu koɖo nɛnɛ mɛ kpetii o.” (1 Kor. 5:9-11) Susu nywi ŋci yí wona emɔdasɛnamɛ ŋtɔ́. Apotru Pɔlu ŋwlɛ mɔ: “Kpɔnnɔ-hwanhwan cike hwɛɖeka honɔ kpɔnnɔɣɔ lɔ pleŋ.” (1 Kor. 5:6) Nuvɔnwatɔ matrɔjimɛwo atɛnŋ agbɔjɔ mɛ ciwo yí le agbla jekɔ mɔ yewoanɔ agbe asɔ koɖo Yehowa se jɔjɔɛwo.—Elo. 13:20; 1 Kor. 15:33.
5. Lé mìɖo awanɔ nu ɖaɖa mɛɖe ci woɖe ti le hamɛ lɔ mɛ gbɔɔ, yí nyi yí taɖoɔ?
5 Vɔ lé mìawanɔ nu ɖaɖa mìwo kpena xɔsetɔ ɖe ci woɖe ti le hamɛ lɔ mɛ gbɔɔ? Ci mìdegbedonɔ eha koɖi can ɔ, mìɖo akpɔɛni shigbe lɛngbɔ ci yí bu nɛ, yí denyi ɖewaxu degbeli ni yɔ o. Nɔ lɛngbɔ ɖe to le lɛngbɔha lɔ mɛɔ, ágbetrɔ agbɔ. Ðo ŋwi mɔ, lɛngbɔ ci yí bu lɔ sɔ yiɖeki na Yehowa. Esadɔnu mɔ le kakacɛ mɛɔ, denɔkɔ agbe yí esɔ koɖo amɛɖekisɔsɔna gbe ci eɖo o, yí sɔ yiɖeki sɔ do afɔku mɛ. (Ezekiɛli 18:31) Ele ahan gan, ci Yehowa vlɛ yí kunɔ ŋshishi nɔ amɛ tɛgbɛɛɔ, mɔkpɔkpɔ li mɔ mɛ lɔ átrɔgbɔ. Lé hamɛmɛshinshinwo srannɔ Yehowa keŋ kpɔnɔ emɔ mɔ mɛ ci woɖe ti le hamɛ lɔ mɛ ágbetrɔ agbɔɔ?
LÉ HAMƐMƐSHINSHINWO KPENƆDO MƐ CIWO WOÐE TI LE HAMƐ LƆ MƐ NU DO
6. Afɔ ciwo hamɛmɛshinshinwo aɖe keŋ akpedo mɛ ci woɖe ti le hamɛ lɔ mɛ nuɔ?
6 Nɔ wode mɛɖe ti le hamɛ lɔ mɛ ɖe, hamɛmɛshinshinwo ami kpekpedo nu keŋkeŋ yí anyi yiŋtɔ ɖekɛ yí aje agbla atrɔ gbɔ va Yehowa gbɔa? Oo wodawɛ ahan o! Hwenu yí hamɛmɛshinshinwo-gbɛ lɔ nukɔ nɔ nuvɔnwatɔ lɔ mɔ woaɖi ti le hamɛ lɔ mɛɔ, woadre afɔ ciwo aɖe keŋ atrɔ gbɔ va hamɛ lɔ mɛ ni. Vɔ hamɛmɛshinshinwo awa nu wu ahan. Le nɔnɔmɛ sugbɔ mɛɔ, wonunɔ nɔ nuvɔnwatɔ lɔ mɔ yewoagbevado go koɖi le wleci kankin ɖewo godu yí akpɔ mɔ yi trɔ ji mɛ ma. Nɔ nuvɔnwatɔ lɔ le gbesɔsɔ yí ado go koɖo wo keɔ, hamɛmɛshinshin lɔwo asɔ jijɔ ado ŋsɛn yi le egododo ŋtɔ́ mɛ nɔ atrɔ ji mɛ keŋ atrɔ gbɔ. Nɔ detrɔ ji mɛ le egododo ŋtɔ́ mɛ can ɔ, hamɛmɛshinshin lɔwo aje agbla mɔ yewoado go koɖi ke le ŋkɔ mɛ.
7. Lé hamɛmɛshinshinwo srannɔ lé Yehowa senɔ vevi do amɛ nu do nɔ wowakɔ nu ɖaɖa mɛ ci woɖe ti le hamɛ lɔ mɛ gbɔɔ? (Ʒeremi 3:12)
7 Hamɛmɛshinshinwo aje gbla mɔ yewoasran lé Yehowa senɔ vevi do amɛ nu do nɔ wowakɔ nu ɖaɖa mɛɖe ci woɖe ti le hamɛ lɔ mɛ gbɔ. Le kpɔwɛ mɛ, Yehowa dele te kpɔ yi jukɔn Izraɛli tonumasetɔ sasatɔ lɔ mɔ le ɖe afɔ ŋkɔtɔ o. Ewaɖeɔ, yiŋtɔ ɖe afɔ ŋkɔtɔ keŋ kpedo wo nu doŋkɔ gbɔxwe yí wowoŋtɔwo vadasɛ mɔ yewotrɔ ji mɛ. Shigbe lé nyɔta amɛvetɔ nɔ enyɔta eɖekplɔeɖedo cɛwo dasɛ yi nɛɔ, Yehowa dasɛ lé esenɔ vevi do amɛ nu do ci enu nɔ enyɔnuɖɛtɔ Oze mɔ lé trɔ xɔ ashiɛ, ci ekpɔtɔ le nuvɔn wakɔ can. (Oze 3:1; Mal. 3:7) Ci Kristotɔ hamɛmɛshinshinwo srankɔ Yehowaɔ, woji veviɖe mɔ nuvɔnwatɔ lɔ le trɔgbɔ yí wodana yí trɔtrɔgbɔ lɔ agbɔnnu ni o.—Hlɛn Ʒeremi 3:12.
8. Lé evi bubu labalu Yesu tɔ lɔ na yí mìgbevamɔŋje vevisesedoamɛnu koɖo ŋshishikuku Yehowa tɔ doji doɔ? (Luiki 15:7)
8 Ðo ŋwi evi bubu labalu Yesu tɔ ci nu mìxo nuxu so le nyɔta amɛvetɔ nɔ enyɔta eɖekplɔeɖedo cɛwo mɛ. Hwenu yi vida lɔ kpɔ eviɛ yí egbɔgbɔ va axomɛɔ, “élɔ ju yi evi lɔ gbɔ yí kpla ashi ekɔ ni yí kishi ni.” (Luiki 15:20) Do jeshi mɔ vida lɔ dele tekpɔ eviɛ nɔ avaɖe kuku ni o. Ewaɖeɔ, éɖe afɔ ŋkɔtɔ ci vida amɛlɔntɔ ɖekpokpui atɛnŋ aɖe. Hamɛmɛshinshinwo can jenɔ agbla yí wanɔ nu shigbe vida lɔ ke nɛ nɔ wowakɔ nu ɖaɖa mɛ ciwo yí wa nuvɔn gbɔ. Woji mɔ lɛngbɔ bubu cɛwo “le trɔ gbɔ va axomɛ.” (Luiki 15:22-24, 32, NWT) Jijɔ nɔnɔ jeŋkwi mɛ nɔ nuvɔnwatɔ ɖe trɔ gbɔ, ahanke jijɔ nɔnɔ nyigban ji hɛnnɛ!—Hlɛn Luiki 15:7.
9. Lé Yehowa sɔ jijɔ yí yɔkɔ nuvɔnwatɔwo doɔ?
9 Sɔ koɖo enu ciwo mìkpɔ keke vaje elɛɔ, eze petii mɔ, Yehowa dekpɔnɔ jijɔ nɔ nuvɔnwatɔ ɖe gbe mɔ yedatrɔ ji mɛ o. Vɔ detrɔnɔ le ŋgbe nɔ nuvɔnwatɔ lɔwo o. Éji mɔ wo le trɔ gbɔ. Oze 14:4 dasɛ lé nuvɔnwatɔwo nu wanɔ nɔ Yehowa do. Énu mɔ: “Na sɔke wo nɔ ci yí wo té le Ŋ nu. Na lɔn wo do vofamɛtɔ ji, ɖo Ŋ ɖote dɔmɛzi dodo.” Ecɛ nyi ŋsɛndoamu sɛnŋsɛnŋ ɖeka nɔ hamɛmɛshinshinwo nɔ woalénɔ ŋkuvi do jimɛtrɔtrɔ jeshidu ɖekpokpui ci mɛɖe adasɛ nu. Yí ecɛ denyi ŋsɛndoamu sɛnŋsɛnŋ ɖeka nɔ mɛ ciwo yí so gbeɖe Yehowa ɖɛ nɔ woaɖeblɛ atrɔ gbɔ ba?
10-11. Lé hamɛmɛshinshinwo jenɔ agbla yí kpenɔdo mɛ ciwo yí woɖe ti vayi le hamɛ lɔ mɛ nuɔ?
10 Lé woawɛ nɔ mɛ ciwo woɖe ti le hamɛ lɔ mɛ taŋfuin ewa exwe sugbɔwo vayiɔ? Taŋfuin mɛ ŋtɔ́wo tɛnŋ mi nuvɔn ci yí dɔ woɖe wo ti wawa xoxoxo. Le nɔnɔmɛ ɖewo mɛɔ, mɛ ciwo woɖe ti le hamɛ lɔ mɛ detɛnŋ gbevaɖonɔ ŋwi enu ci yí taɖo woɖe wo ti o. Nɔ egbenyi do ɖe can ɔ, hamɛmɛshinshinwo aje agbla aji fini mɛ ŋtɔ́wo le yí aji wo kpɔ. Le amɛjijikpɔ ŋtɔ́wo hwenuɔ, hamɛmɛshinshinwo ado gbe ɖaɖa koɖo wo yí asɔ jijɔ yí ado ŋsɛn wo mɔ wo le trɔ gbɔ va hamɛ lɔ mɛ. Nɔ amɛ lɔ so le hamɛ lɔ mɛ na nɔ hwenu jinjin ɖeɔ, kankandoji li mɔ agbɔjɔ le gbɔngbɔn mɛ sugbɔ. Eyi taɖo nɔ mɛ lɔ lɔn ɔ, hamɛmɛshinshinwo awa toto keŋ nɔ mɛɖeka akpla Bibla koɖi nɔ wodekpɔ xɔɛ do hamɛ lɔ mɛ hɔɖo can. Le nɔnɔmɛ lɔwo pleŋ mɛɔ, hamɛmɛshinshinwo yí nyi mɛ ciwo yí awanɔ toto nɔ Bibla nukplakpla ŋtɔ́wo gashiagamɛ.
11 Hamɛmɛshinshinwo jenɔ agbla yí srannɔ vevisesedoamɛnu Yehowa tɔ yí wanɔ ci ji wokpe yí kpenɔdo mɛ ciwo woɖe ti nu nɔ woanya mɔ Yehowa le gbesɔsɔ gashiagamɛ axɔ yewo nɔ yewotrɔ gbɔ. Nɔ nuvɔnwatɔ lɔ dasɛ jimɛtrɔtrɔ yí tashi yi nuvɔn lɔ wawaɔ, dajinjin gbɔxwe woaxɔɛ do hamɛ lɔ mɛ o.—2 Kor. 2:6-8.
12. (a) Nɔnɔmɛ ciwo mɛ yí ele veviɖe mɔ hamɛmɛshinshinwo anɔ zanŋte leɔ? (b) Nyi yí taɖo mìdeɖo akpɔɛ mɔ Yehowa daku ŋshishi nɔ nuvɔnwatɔ ɖekatɔwo gbeɖeɔ? (Kpɔ gɔmɛnuŋwlɛŋwlɛ lɔ hɛnnɛ.)
12 Le nɔnɔmɛ ɖewo mɛɔ, hamɛmɛshinshinwo ɖo anɔ zanŋte nɔ wojikɔ atrɔxɔ mɛɖekatɔwo do hamɛ lɔ mɛ. Le kpɔwɛ mɛ, nɔ mɛ lɔ dɔn ɖeviwo gbɔ vayi, nyi xɔsegbetɔ alo mɛ lɔ wa ayemɛnu yí so ka nɔ yi lɔleleɔ, hamɛmɛshinshinwo aji mɔ yewoakando ji mɔ yɛtrɔ ji mɛ nyɔnɔnwi teŋ ma. (Mal. 2:14; 2 Tim. 3:6) Woɖo aglɔn ta nɔ lɛngbɔha lɔ. Le ga ɖekɛ lɔ ke mɛɔ, mìɖo anya mɔ Yehowa axɔ nuvɔnwatɔ ɖekpokpui ci yí dasɛ jimɛtrɔtrɔ ŋtɔŋtɔ yí mi yi nudɔndɔn lɔ wawa. Ci hamɛmɛshinshinwo ɖo anɔ zanŋte do mɛ ciwo yí wa xomɛveve nu koɖo mɛbuwo can ɔ, wodeɖo akpɔ nu lɔ ɖoɖu keke amɔ Yehowa daku ŋshishi nɔ nuvɔnwatɔ ɖekatɔwo gbeɖe o. c—1 Piɛ 2:10.
ENU CI HAMƐ LƆ ATƐNŊ AWA
13. Vovototo ci yí le lé mìawa nu do mɛɖe ci hamɛmɛshinshinwo gbe nyɔ nɔ sɛnŋsɛnŋɖe koɖo lé mìawa nu do mɛɖe ci woɖe ti le hamɛ lɔ mɛ nu mɛɔ?
13 Shigbe lé mìkan seŋ so nu le nyɔta ci yí vayi mɛ nɛɔ, wowanɔ nunɔwoase nɔ hamɛ lɔ hweɖewonu mɔ wogbe nyɔ nɔ mɛɖe sɛnŋsɛnŋɖe. Nɔ ejɔ ahan ɔ, mìatɛnŋ akpɔtɔ adodoɔ eha koɖo amɛ lɔ yí anya mɔ yi trɔ ji mɛ yí mi yi nu kpotu lɔ wawa. (1 Tim. 5:20) Ékpɔtɔ nyi hamɛ lɔ mɛ tɔ yí ʒan ŋsɛndoamu so yi kpena xɔsetɔwo gbɔ. (Ebre. 10:24, 25) Vɔ, mɛ ci woɖe ti le hamɛ lɔ mɛ yɛ to akpo xesexese. Mìminɔ ‘ehadodo koɖo’ mɛ ŋtɔ́ yí “[mì] de ɖo aɖu nu koɖo nɛnɛ mɛ kpetii o.”—1 Kor. 5:11, Ezoɖuɖu Yoyu Wema.
14. Lé Kristotɔwo atɛnŋ zan ayexa wowotɔ ci wosɔ Bibla na kpla nɔ mɛɖe ci woɖe ti le hamɛ lɔ mɛ va bɔbɔɔ? (Kpɔ foto lɔ hɛnnɛ.)
14 Enu ciwo mìkpɔ dasɛ mɔ mìaŋlɔbe mɛɖe ci woɖe ti le hamɛ lɔ mɛ gbijigbiji yɔa? Deʒan ahan kokoko o. Kankandoji li mɔ, mìdado eha koɖi o. Vɔ Kristotɔwo atɛnŋ azan ayexadohwɛnamɛnu wowotɔ ci wosɔ Bibla na kpla yí asɔ gbeta nɔ ayɔ mɛɖe ci woɖe ti le hamɛ lɔ mɛ alo wodawɛ o, taŋfuin xomumɛtɔ ɖe alo mɛ ci wonyi exlɔ koɖo sa nɔ ava hamɛ lɔ bɔbɔwo. Vɔ nɔ éva ɖe? Sasaɔ, mìdedonɔ gbe nɔ mɛ ŋtɔ́ o. Le elɛ can ɔ, Kristotɔ ɖekaɖeka azan ayexa yitɔ ci esɔ Bibla na kpla le nɔnɔmɛ cɛ mɛ. Mɛɖewo tɛnŋ vo ado gbe nɔ mɛ lɔ alo ado wozɔn ni nɔ éva bɔbɔ. Vɔ mìdeɖo atɔ seŋ kankan koɖi sugbɔ alo atɔ eha dodo koɖo mɛ lɔ o.
Kristotɔwo atɛnŋ sɔ gbeta mɔ yewoayɔ mɛ ci woɖe ti le hamɛ lɔ mɛ va bɔbɔ alo ado egbe kleŋ ɖe ni, nɔ ayexa wowotɔ ci wosɔ Bibla na kpla ɖe emɔ nɔ wo alo wotɛnŋ sɔ gbeta mɔ yewodawa ahan o (Kpɔ mamamɛ 14)
15. Nuvɔnwatɔ ci hanwo yí nyɔ nukɔ wole le 2 Ʒan 9-11 mɛɔ? (Gbekpɔ dakavi ci yí nyi “ Nuvɔn Ðekɛŋmɛ Nu Yí Ʒan Koɖo Pɔlu Xokɔ Nuxu Soa?”)
15 Mɛɖewo tɛnŋ biɔ se mɔ: ‘Bibla denu mɔ Kristotɔ ci yí do gbe nɔ mɛ ŋtɔ́ le enudɔndɔn yitɔ lɔ wakɔ koɖi ba?’ (Hlɛn 2 Ʒan 9-11.) Kpukpui ciwo yí trɔdo Bibla kpaxwe cɛ dasɛ mɔ, emɔdasɛnamɛ cɛ xokɔ nuxu so xɔsegbetɔwo koɖo mɛ ciwo yí ɖo adɛn dɔndɔnwo yí gbesɔ ayexa blebleɛ mɛbuwo alo nunuɔ nɔ wo mɔ wo le wa enuvɔn. (Enyɔ. 2:20) Eyi taɖo nɔ mɛɖe xaɖui yí kakakɔ xɔsegbetɔwo nukplamuwo alo wakɔ enudɔndɔn buwoɔ, hamɛmɛshinshinwo davayi ji wo kpɔ o. Vɔ emɔkpɔkpɔ li mɔ woavanyɔ̀ le wowoɖekiwo mɛ gbeɖeka. Gbɔxwe avanyi ahan ɔ, mìdeɖo ado gbe nɔ mɛ ŋtɔ́wo alo ayɔ wo va Kristotɔwo bɔbɔwo o.
MÌASRANNƆ VEVISESEDOAMƐNU KOÐO ŊSHISHIKUKU YEHOWA TƆ
16-17. (a) Nyi Yehowa jijiɛ mɔ nuvɔnwatɔwo le waɔ? (Ezekiɛli 18:32) (b) Lé hamɛmɛshinshinwo atɛnŋ adasɛ mɔ yewole edɔ wakɔ doju koɖo Yehowa hwenu wojejeɛ agbla yí kpekpeɛdo nuvɔnwatɔwo nuɔ?
16 Nyi mìakpla le nyɔta eɖekplɔɖedo amatɔn cɛwo mɛɔ? Yehowa deji mɔ mɛɖe aku o! (Hlɛn Ezekiɛli 18:32.) Éji mɔ nuvɔnwatɔwo agbetrɔ adra ekacaca ci yí le wo koɖo ye gblamɛ do. (2 Kor. 5:20) Ecɛ yí dɔ yí le agbetɔwo xolɔlɔ mɛɔ, Yehowa donɔ ŋsɛn yi jukɔn tonumasetɔ koɖo mɛɖewo gbɛmɛgbɛmɛ mɔ wo le trɔ ji mɛ yí atrɔ va ye gbɔ. Mɔnukpɔkpɔ enyi nɔ hamɛmɛshinshinwo mɔ woawa edɔ koɖo Yehowa yí aje agbla akpedo nuvɔnwatɔwo nu nɔ woatrɔ ji mɛ.—Rɔm. 2:4; 1 Kor. 3:9.
17 Kpɔ eji ci yí ajɔ mɛ ciwo yí le jeŋkwi mɛ, nɔ nuvɔnwatɔ ɖe trɔ ji mɛ ɖa! Mìwo Da ci yí le jeŋkwi mɛ, Yehowa, kpɔnɔ jijɔ ŋtɔ́ gashiagamɛ nɔ yí lɛngbɔ ɖe bu yí trɔ gbɔ va hamɛ lɔ mɛ. Nɔ mìbu tamɛ kpɔ so vevisesedoamɛnu, ŋshishikuku koɖo xomɛvu Yehowa tɔ nuɔ, lɔnlɔn ci mìɖo ni akpɔtɔ asɛnsɛnŋ doji.—Luiki 1:78.
EHAJIJI 111 Nu Si Ta Míekpɔa Dzidzɔ Ðo
a Ŋsu ɖe ci yí wa nuvɔn nu yí mìxo nuxu so le nyɔta cɛ mɛ. Vɔ enyɔ cɛwo yikɔ nɔ nyɔnuwo hɛnnɛ.
b Mìdagbezan nyɔgbe mɛ ci wogbe eha nɔ ci egbe ɖewo zannɔ sa o. Sɔ koɖo Pɔlu nyɔwo ciwo yí ze le 1 Korɛntitɔwo 5:13 mɛɔ, ecɛyɛ mìavayɔyɔ wo mɔ mɛ ci woɖe ti le hamɛ lɔ mɛ shigbe lé ele le mìwo gbe mɛ vɔ nɛ.
c Sɔ koɖo Biblaɔ, mɛɖekatɔwo li yí wodasɔ nuvɔn sɔ ke wo o. Mɛ ŋtɔ́wo dui koŋ yí fɔn gu do Mawu ji. Yehowa koɖo Yesu ɖekɛwo yí atɛnŋ aɖo kojo nɔ mɛ ŋtɔ́wo mɔ wodasɔ enu ke wo o.—Maki 3:29; Ebre. 10:26, 27.
