1. Nyi Yehowa jijiɛ nɔ amɛwo pleŋ ɔ?

 YEHOWA wa agbetɔ koɖo amɛɖekishinɔnɔblɔɖe. Blaŋblaŋ ɔ, nɔ mìjikɔ asɔ gbetaɔ, mìzannɔ enunana ŋtɔ́. Gbeta vevitɔ ci mɛɖe asɔ yí nyi mɔ asɔ yiɖeki na Yehowa yí avanyi ɖeka le yi sɛntɔwo xomu lɔ mɛ. Yehowa ji mɔ mɛshiamɛ le wɛ ahan. Nyi yí taɖoɔ? Ðo Yehowa lɔn amɛwo yí jinɔ enu ci yí anyɔ nɔ wo sɔwu. Éji mɔ woanɔ ekacaca nywi mɛ koɖo ye yí anɔ agbe tɛgbɛɛ.—2 Ese. 30:​19, 20; Gal. 6:​7, 8.

2. Lé Yehowa kpɔnɔ nuvɔnwatɔ matrɔ ji mɛwo doɔ? (1 Ʒan 2:1)

² Vɔ, Yehowa deʒinʒin ɛ mɛɖe ji mɔ yi le sɛn ye o. Étashi mɛɖekaɖeka nɔ asɔ gbeta so enu ci awa nu. Nɔ Kristotɔ waʒinʒindoshimɛ da le Mawu se ji yí wa nuvɔn gangan ɖe ɖe, nyi eɖo awaɔ? Nɔ detrɔ ji mɛɔ, woɖo aɖi ti le hamɛ lɔ mɛ. (1 Kor. 5:13) Vɔ ci ele ahan can ɔ, Yehowa kpɔkɔ emɔ veviɖe mɔ nuvɔnwatɔ lɔ agbevatrɔ gbɔ va Ye gbɔ. Le nyɔnɔnwi mɛɔ, eyi nyi susu vevitɔ ci yí dɔ taɖo ecu tafɛn keŋ asɔ enu ke nuvɔnwatɔ ciwo yí trɔ ji mɛ.  (Hlɛn 1 Ʒan 2:1.) Mìwo Mawu amɛlɔntɔ lɔ sɔ jijɔ yí yɔkɔ nuvɔnwatɔwo yí dodoɔ ŋsɛn wo mɔ wo le trɔ ji mɛ.—Zak. 1:3; Rɔm. 2:4; Ʒaki 4:8.

3. Nyi nu mìaxo nuxu so le nyɔta cɛ mɛɔ?

³ Yehowa ji mɔ mìwo le kpɔ nuvɔnwawa koɖo nuvɔnwatɔwo shigbe lé yekpɔnɔ wo do nɛ. Nyɔta cɛ axo nuxu so lé mìatɛnŋ awɛ do nu. Nɔ èhlɛnkɔ nyɔta lɔɔ, kpɔ (1) lé wokpɔ nuvɔn gangan ɖeka gbɔ do le Korɛnti hamɛ lɔ mɛ le exwe sanŋdi ŋkɔtɔ mɛ, (2) emɔdasɛnamɛ ci apotru Pɔlu na hwenu nuvɔnwatɔ lɔ trɔ ji mɛ, yí (3) enu ci Bibla mɛ xolɔlɔ cɛ kpla mì so lé Yehowa kpɔnɔ Kristotɔ ciwo yí wa nuvɔn gangan ɖe do.

LÉ WOKPƆ NUVƆN GANGAN ÐEKA GBƆ DO LE EXWE SANŊDI ŊKƆTƆ MƐ

4. Nyi yí vatɔ jɔjɔ le Korɛnti hamɛ lɔ mɛ le exwe sanŋdi ŋkɔtɔ mɛɔ? (1 Korɛntitɔwo 5:​1, 2)

⁴ Hlɛn 1 Korɛntitɔwo 5:​1, 2. Le ejugodu ŋɛnywidradradɔ mɔzɔnzɔn amɛtɔntɔ ci Pɔlu wa mɛɔ, ése enyɔɖefunnamɛ ɖeka so Korɛnti hamɛ ci woɖo yoyu lɔ nu. Nɔviŋsu ɖeka le hamɛ lɔ mɛ dɔnnɔ edalɔ shi gbɔ. Enuwana nyɔŋ “hunnɔtɔ hanci ɖekɛ kpeti de le maxɔsetɔwo domɛ o”! Ci ewa nudɔndɔn ŋtɔ́ can ɔ, dewa ɖe nɔ hamɛ lɔ o, yí ekpɔtɔ le hamɛ lɔ mɛ. Taŋfuin mɛɖewo tɛnŋ kpɔɛ le hamɛ lɔ mɛ mɔ yewosrankɔ Mawu ci yí kunɔ ŋshishi nɔ agbetɔ nuvɔnwatɔwo. Vɔ Yehowa dekpɔnɔ jijɔ do nuvɔnwawa nu le yi mɛwo mɛ o. Kankandojitɔɔ, adɛnvwin ci yí ŋsu ŋtɔ́ wu xoɖyi ŋkɔ nywi ci yí le hamɛ lɔ nu. Étɛnŋ dɔ yí Kristotɔ bu ciwo yí donɔ eha koɖi wo akpɔ do yi nuwana lɔ nu yí atɔ wawa hɛnnɛ. Ci enyi ahan ɖe, nyi Pɔlu mɔ hamɛ lɔ le waɔ?

5. Nyi Pɔlu mɔ hamɛ lɔ le waɔ, yí enyɔ ci enunuɔ nɔ wo teŋ ɔ? (1 Korɛntitɔwo 5:13) (Kpɔ foto lɔ hɛnnɛ.)

⁵ Hlɛn 1 Korɛntitɔwo 5:13. Gbɔngbɔn kɔkɔɛ na yí Pɔlu ŋwlɛ wema ɖaɖa wo mɔ wo le ɖe nuvɔnwatɔ matrɔ ji mɛ lɔ ti le hamɛ lɔ mɛ. Lé Kristotɔ egbejinɔtɔwo awa nu ɖaɖa gbɔ doɔ? Pɔlu nu nɔ wo mɔ “[wowo] ŋgbe do ha [koɖi]” o. Enyɔ cɛ gɔnmɛ ɖe? Pɔlu ɖe mɛ mɔ ese lɔ gbe hɛnnɛ mɔ “[wo] de ɖo aɖu nu koɖo nɛnɛ mɛ kpetii o.” (1 Kor. 5:11) Anɔ nyinɔnɔ aɖu ŋɖuɖu doju koɖo amɛ lɔ tɛnŋ dɔ yí woatɔ eha dodo koɖo amɛ lɔ fafɛɖe. Enyɔ ci Pɔlu jikɔ anu yí nyi mɔ hamɛ lɔ deɖo agbedodoɔ eha koɖo ŋsu ŋtɔ́ o. Ecɛ aglɔn ta nɔ hamɛ lɔ nɔ amɛwo ŋgbekpɔ do yi nuwana dɔndɔn lɔ nu yí  atɔ wawa o. (1 Kor. 5:​5-7) Gbesɔ kpe niɔ, nɔ womi zɔnzɔn koɖo ŋsu ŋtɔ́ɔ, étɛnŋ vakpɔɛ dojeshi mɔ yedegbele Yehowa mɔ ji ɖeeɖe, eyi ŋkpɛn tɛnŋ wɛ yí atrɔ ji mɛ.

6. Lé hamɛ lɔ wa nu do ci woxɔ Pɔlu wema lɔɔ, yí nyi nuvɔnwatɔ lɔ vawaɔ?

⁶ Ci Pɔlu sɔ wema ɖaɖa Kristotɔ ciwo yí le Korɛnti ɖegbɔɔ, étɔ tamɛ bubu kpɔ so lé hamɛ lɔ awa nu do wema lɔ nu do. Le yiyimɛɔ, Titu xɔ eŋɛnywi ɖeka ci yí do jijɔ ni sugbɔ. Hamɛ lɔ xɔgbe do enyɔ ciwo Pɔlu nu do wema lɔ mɛ ji nywiɖe. (2 Kor. 7:​6, 7) Wowa do emɔdasɛnamɛ lɔ ji. Gbesɔ kpe niɔ, ci Pɔlu sɔ wema ɖaɖa wo yí ewa wleci ɖewo goduɔ, nuvɔnwatɔ lɔ mi enudɔndɔn lɔ wawa yí trɔ ji mɛ! Étrɔ yi dɛn dɔndɔn lɔ koɖo yi susu keŋ tɔ zɔnzɔn do Yehowa se jɔjɔɛwo ji. (2 Kor. 7:​8-11) Ecɛyɛɔ, nyi Pɔlu amɔ hamɛ lɔ le waɔ?

 LÉ HAMƐ LƆ ÐO AWA NU ÐAÐA NUVƆNWATƆ CI YÍ TRƆ JI MƐ GBƆ DO

7. Enunywi ci yí tonɔ le nuvɔnwatɔ ɖeɖe ti le hamɛ lɔ mɛɔ? (2 Korɛntitɔwo 2:​5-8)

⁷ Hlɛn 2 Korɛntitɔwo 2:​5-8. Pɔlu nu nɔ wo mɔ: “Etodɔndɔn ci yí amɛ sugbɔtɔ ciwo yí [le] míwo hamɛ ni ɔ, sun ni.” Yi gɔnmɛ yí nyi mɔ, ci woɖe nuvɔnwatɔ lɔ ti le hamɛ lɔ mɛɔ, ékpɔɛ mɔ yeɖo atrɔ ji mɛ. Yí ci etrɔ ji mɛ ɖegbɔɔ, degbeʒan mɔ woakpɔtɔ adɔndɔn eto ni o.—Ebre. 12:11.

8. Nyi Pɔlu trɔvanu nɔ hamɛ lɔ mɔ yi le waɔ?

⁸ Pɔlu nu nɔ hamɛ lɔ mɔ: “Mí ɖogbe yí a sɔɛ sɔki yí a fa kɔn” nɔ nɔvi ci yí bu emɔ lɔ yí “[a]dasɛ ni mɔ mí lwin.” Dojeshi mɔ denyi Pɔlu jijiɛ mɔ wo le xɔ ŋsu lɔ va Yehowa mɛwo mɛ kpoŋ yɔ o. Éji mɔ wo le wa nu wu ahan. Pɔlu ji mɔ wo le to enyɔ ciwo wonunɔ koɖo wowo nuwanawo ji yí ana kankandoji ŋsu ci yí trɔ ji mɛ lɔ mɔ yewosɔ nu ki nyɔnɔnwitɔ. Nɔ wowɛ ahan ɔ, woadasɛ nɔ ŋsu lɔ petii mɔ yewotrɔxɔɛ do hamɛ lɔ mɛ.

9. Nyi yí taɖo egbɔnnu nɔ mɛɖewo mɔ woasɔ nu sɔ ke nuvɔnwatɔ ci yí trɔ ji mɛ lɔɔ?

⁹ Egbɔnnu nɔ mɛɖewo le hamɛ lɔ mɛ mɔ woaxɔ nuvɔnwatɔ ci yí trɔva wo mɛ lɔa? Exolɔlɔ lɔ denui nɔ mì o, vɔ atɛnŋ anyi ahan. Yi nuwana lɔ hɛn cakacaka va hamɛ lɔ pleŋ mɛ yí taŋfuin egbenyi ŋkpɛnnu nɔ mɛɖewo. Mɛɖewo tɛnŋ kpɔɛ mɔ desɔgbe mɔ yewoasɔ jijɔ axɔ ŋsu lɔ o, ɖo egbla yewoŋtɔwo do sugbɔ gbɔxwe yí kpɔtɔ nɔ mɛmiɖe. (Sɔ sɔ koɖo Luiki 15:​28-30.) Vɔ nyi yí taɖo ele veviɖe mɔ hamɛ lɔ adasɛ lɔnlɔn akun-akun nɔ wowo nɔvi ci yí trɔgbɔ lɔɔ?

10-11. Nyi yí atɛnŋ ajɔ nɔ hamɛmɛshinshinwo gbe mɔ yewodasɔ enu ke nuvɔnwatɔ ci yí trɔ ji mɛɔ?

¹⁰ Kpɔ enu ci yí ajɔ nɔ hamɛmɛshinshinwo gbe mɔ yewodaxɔ nɔvi ci yí trɔ ji mɛ nyɔnɔnwitɔ lɔ va hamɛ lɔ mɛ o alo ci etrɔgbɔ can ɔ, hamɛ lɔ gbe mɔ yewodadasɛ lɔnlɔn ni o. Étɛnŋ gbɔjɔ yí “á vá cí ŋshishi mɛ ɖoɖu.” Étɛnŋ kpɔɛ fafɛɖe mɔ ɖewaxu degbeli nɔ ye nɔnɔmɛ lɔ o. Ŋtɔkpu can ɔ, étɛnŋ mi agblajeje mɔ yeadra ekacaca ci yí le ye koɖo Mawu gblamɛ do.

¹¹ Ci gbenyina wuɔ, nɔ nɔviŋsu koɖo nɔvinyɔnu ciwo yí le hamɛ lɔ mɛ gbe mɔ yewodasɔ enu sɔ ke nuvɔnwatɔ ci yí trɔ ji mɛ lɔɔ, woasɔ ekacaca ci yí le wo koɖo Yehowa gblamɛ sɔ do afɔku mɛ. Nyi yí taɖoɔ? Ðo wodegbesrankɔ lé Yehowa kpɔnɔ nuvɔnwatɔ ciwo yí trɔ ji mɛ do o, vɔ wovasrankɔ lé Satana nyinashu do yí dekunɔ ŋshishi nɔ amɛ do. Wovanyi dɔwanu ci Satana atɛnŋ azan yí asɔ dahɛn nu le ŋsu lɔ nu le gbɔngbɔn mɛ.—2 Kor. 2:​10, 11; Efe. 4:27.

12. Lé hamɛ lɔ atɛnŋ asran Yehowa doɔ?

¹² Lé hamɛ ci yí le Korɛnti atɛnŋ asran Yehowa yí danyi Satana doɔ? Nɔ wowa do Yehowa mɔdasɛnamɛwo ji yí wa nu ɖaɖa nuvɔnwatɔ ciwo yí trɔ ji mɛ gbɔ shigbe Yehowa nɛ. Dojeshi enyɔ ci Bibla ŋwlɛtɔ ɖewo nu so Yehowa nu. Davidi nu mɔ: “Axwetɔ, È nyɔ yí nyi ŋshishikunɔamɛtɔ.” (Eha. 86:5) Mishe ŋwlɛ mɔ: “Mawu, mi yí le shigbe eo nɛ yí sɔnɔ enu kenɔ amɛ yí ŋwlanɔ ŋkuvi do agɔjejewo jiɔ?” (Mishe 7:​18, NWT) Yí Ezai nu mɔ: “Amɛ vɔnwo ɖo a ɖote agbe vɔnwo mɛ nɔ̀nɔ. Wo ɖo a ɖote susu vɔnwo ɖeɖe. Eyi, Tɔhonɔ a do akɔnfa lanmɛ nɔ wo. Amɛ hunnɔwo ɖo a va Tɔhonɔ gbɔ, ɖo mìwo Mawu sɔkenɔ amɛ.”—Ezai 55:7.

13. Nyi yí taɖo esɔgbe mɔ woatrɔ axɔ nuvɔnwatɔ ci yí trɔ ji mɛ lɔ va hamɛ lɔ mɛɔ? (Kpɔ dakavi ci yí nyi “ Hwenu yí Woxɔ Ŋsu ci yí le Korɛnti do Hamɛ lɔ Mɛɔ?”)

 ¹³ Hamɛ ci yí le Korɛnti asran Yehowa yí axɔ ŋsu ci yí trɔ ji mɛ lɔ yí ana kankandoji yi mɔ yewoluin. Nɔ mɛ ciwo yí le hamɛ lɔ mɛ wa do Pɔlu mɔdasɛnamɛwo ji yí xɔ nuvɔnwatɔ trɔ ji mɛ lɔ nywiɖeɔ, woadasɛ mɔ “[yewo]wanɔ do ese ji le enushanu mɛ.” (2 Kor 2:9) Nyɔnɔnwi enyi mɔ, ci enyi wleci ɖewo kpoŋ yí woɖe mɛ lɔ ti le hamɛ lɔ mɛ can ɔ, étrɔ ji mɛ. Eyi taɖo susu ɖe deli ci yí adɔ yí woasɔ amɛ lɔ xɔxɔ va hamɛ lɔ mɛ sɔ ɖoɖoɔ esɔesɔ o.

LÉ MÌAWƐ ASRAN JƆJƆƐNYINYI KOÐO ŊSHISHIKUKU YEHOWA TƆ DO

14-15. Nyi mìkpla so lé Korɛnti sasatɔ kpɔ enyɔ ɖeka gbɔ do mɛɔ? (2 Piɛ 3:9) (Kpɔ foto lɔ hɛnnɛ.)

¹⁴ Woŋwlɛ exolɔlɔ ci yí kuso lé Korɛnti sasatɔ kpɔ enyɔ ɖeka gbɔ nu daɖɛ keŋ “a sɔ kpla enu mì.” (Rɔm. 15:4) Le exolɔlɔ lɔ mɛɔ, mìkpla mɔ Yehowa delɔnnɔ yí woawakɔ nuvɔn ganganwo le yi mɛwo mɛ o. Meɖewo kpɔɛni mɔ ci Yehowa “kunɔ ŋshishi” nɔ amɛɔ, átashi nuvɔnwatɔ matrɔjimɛ ɖe yí akpɔtɔ anɔ yi sɛntɔ egbejinɔtɔwo mɛ, vɔ de ahan yɔ nɛ o. Yehowa kunɔ ŋshishi nɔ amɛ, vɔ deɖenɔ emɔ nɔ adɛndɔndɔn ɖekpokpui alo aɖe eka kpɔtɔ nɔ agbenywinɔnɔse  yitɔwo o. (Ʒuda 4) Nɔ Yehowa tashi nuvɔnwatɔ matrɔjimɛ do hamɛ lɔ mɛɔ, denyi ekukɔ ŋshishi nɔ hamɛ lɔ yɔ o, vɔ atɛnŋ adɔ yí hamɛ lɔ mɛ tɔwo pleŋ aɖo afɔku mɛ.—Elo. 13:20; 1 Kor. 15:33.

¹⁵ Mìkpla mɔ Yehowa deji mɔ mɛɖekpokpui atrɔn o. Éji mɔ yeawa ŋɖekpokpui yí ahwlɛn amɛwo gan. Édanasɛ ŋshishikuku nɔ mɛ ciwo yí ji mɔ yewoatrɔ ji mɛ yí adra ekacaca ci yí le wo koɖo ye gblamɛ do. (Ezek. 33:11; hlɛn 2 Piɛ 3:9.) Eyi taɖo ci Korɛnti ŋsu lɔ trɔ ji mɛ so yi nuvɔnwo mɛɔ, Yehowa zan Pɔlu yí edre mɛ nɔ hamɛ lɔ mɔ woɖo asɔ enu ke ŋsu lɔ yí atrɔxɔɛ do hamɛ lɔ mɛ.

16. Lé ewa nɔ eo kuso lé wokpɔ enyɔ ɖeka gbɔ do le Korɛntiɔ?

¹⁶ Ci mìtrɔ yí gbeje lé wokpɔ nyɔ ɖeka gbɔ le Korɛntiɔ, ekpedo mì nu mìkpɔ mɔ lɔnlɔn, enujɔjɔɛwawa koɖo jɔjɔɛnyinyi le Yehowa nuwanawo mɛ. (Eha. 33:5) Ecɛ dedɔ yí àgbekanfu mìwo Mawu lɔ doji ba? Nyɔnɔnwi yɔ, mìwo pleŋ nyi nuvɔnmɛ yí eʒan mɔ Yehowa asɔ enu ke mì. Mìwo ɖekaɖeka ɖo susu ci yí dɔ yí mìado akpe nɔ Yehowa do tafɛn lɔ ŋci, ɖo eyi na yí woatɛnŋ asɔ mìwo nuvɔnwo ke mì. Efa akɔn nɔ mì yí gbena mì kankandoji ci mìnya mɔ Yehowa lɔn yi mɛwo nyɔnɔnwitɔ yí jijiɛ enu ci yí anyɔ nɔ wo sɔwu!

17. Nyiwo nu mìaxo nuxu so le nyɔta ci yí gbɔgbɔ mɛɔ?

¹⁷ Vɔ egbɛ ɖe, lé wokpɔnɔ nuvɔn gangan wawa nyɔwo gbɔ doɔ? Lé hamɛmɛshinshinwo atɛnŋ awa Yehowa tɔ han, ci yí ji mɔ woakpedo nuvɔnwatɔ ɖe nu nɔ atrɔ ji mɛɔ? Lé hamɛ lɔ ɖo awa nu do nɔ hamɛmɛshinshinwo sɔ gbeta mɔ woaɖe mɛɖe ti le hamɛ lɔ mɛ alo woatrɔ axɔɛɔ? Nyɔta ci yí gbɔgbɔ ana ɖoŋci nɔ nyɔbiɔse cɛwo.