1. Nyi Kristotɔ ŋsu ɖo awa nɔ enuwo aje ji niɔ?

 EFYƆ Davidi kpla nu Salomɔ mɔ: “Sɛnŋ yí anyi ŋsu.” (1 Efy. 2:​1-3, NWT) Ele veviɖe mɔ Kristotɔ ŋsu ciwo pleŋ yí li gbɛ awa do enyɔ cɛ ji. Nɔ woasun ji awa do jiɔ, ele mɔ woɖo awanɔ do Mawu sewo ji yí agbewanɔ do Bibla gɔnmɛɖosewo ji le enu ciwo pleŋ wowanɔ mɛ. (Luiki 2:52) Nyi yí taɖo ele veviɖe ahan mɔ nɔviŋsu jajɛwo ɖo atrɔ ŋsu ciwo yí shin le gbɔngbɔn mɛɔ?

2-3. Nyi yí taɖo ele veviɖe mɔ nɔviŋsu jajɛ ɖe atrɔ Kristotɔ ci yí shin le gbɔngbɔn mɛɔ?

² Kristotɔ ŋsu wanɔ edɔ veviwo le xomu koɖo hamɛ lɔ mɛ. Nɔviŋsu jajɛwo, kankandoji li mɔ míbunɔ tamɛ kpɔ so edɔ ciwo míatɛnŋ avawa le esɔ mɛ nu. Mítɛnŋ ɖo tajinu mɔ yewoavanyi emɔɖetɔ, sumɔsumɔdɔwatɔ koɖo hamɛmɛshinshin le yiyimɛ. Etɛnŋ dro mí mɔ yewoavaɖe nyɔnu yí aji viwo le esɔ mɛ. (Efe. 6:4; 1 Tim. 3:1) Gbɔxwe míaɖo tajinu cɛwo gbɔ yí awa do wo ji nywiɖeɔ, ele mɔ míashin le gbɔngbɔn mɛ. b

³ Nyi yí akpedo eo nu nàshin le gbɔngbɔn mɛɔ? Enujikpekpe vevi ɖekawo li yí ele mɔ àɖo. Nyi yí atɛnŋ akpedo  eo nu nàdra do ɖɛ keŋ atɛnŋ avawa edɔ ciwo àxɔ nywiɖeɔ?

4. Fini àtɛnŋ akpɔ kpɔwɛwo le asran ɔ? (Kpɔ foto lɔ hɛnnɛ.)

⁴ Can kpɔwɛ nywi ciwo àtɛnŋ asran. Kpɔwɛ nywi ciwo ɖajɛwo atɛnŋ asran sugbɔ le Bibla mɛ. Ŋsu cɛ ciwo yí ni le blema mɛ lɔn Mawu yí le bu nɔ yi mɛwo le emɔ vovovowo ji. Àtɛnŋ agbekpɔ Kristotɔ ŋsu ciwo yí ɖo kpɔwɛ nywiwo le ao xomu mɛ koɖo hamɛ lɔ mɛ. (Ebre. 13:7) Yí Yesu Kristo can ɖo kpɔwɛ nywi ci nu afɛn dele o ɖɛ nɔ eo. (1 Piɛ 2:21) Nɔ èkplakpla nu so ŋsu cɛwo nuɔ, bu tamɛ kpɔ so nɔnɔmɛ nywi ciwo woɖo nu. (Ebre. 12:​1, 2) Yi goduɔ, nàkpɔ lé àtɛnŋ awa wowotɔ han do.

5. Lé àwɛ aɖo tamɛbubu nujikpekpeɔ, yí nyi yí taɖo ele veviɖeɔ? (Ehajiji Wema 119:9)

⁵ Tekpɔ aɖo ‘tamɛbubu nujikpekpe yí aglɔn ta ni.’ (Elo. 3:​21, NWT) Ŋsu ci yí ɖo tamɛbubu nujikpekpe bunɔ tamɛ kpɔ nywiɖe gbɔxwe yí wanɔ nu. Eyi dɔ tekpɔ aɖo enujikpekpe ŋtɔ́ yí azinni. Nyi yí taɖoɔ? Ðo ɖayɛvi sugbɔ li gbɛ yí enyi wowoŋtɔwo susuwo alo lé enu wakɔ nɔ wo do yí wokpɔnɔ keŋ sɔ sɔnɔ gbetawo. (Elo. 7:7; 29:11) Ahanke televiʒiɔn, fimuwo, ɛntɛnɛti koɖo jugbajahadoxuwo atɛnŋ akpɔ ŋsɛn do lé èwanɔ nu do ji. Vɔ lé àwɛ yí atɛnŋ aɖo tamɛbubu nujikpekpeɔ? Kpla Bibla gɔnmɛɖosewo yí abu tamɛ kpɔ so lé wawa do wo ji awa nywi nɔ eo nu. Yi goduɔ, zan Bibla gɔnmɛɖose lɔwo yí asɔ sɔ gbeta ciwo yí ajɔ ji nɔ Yehowa. (Hlɛn Ehajiji Wema 119:9.) Nɔ ètekpɔ yí ɖo tamɛbubu nujikpekpeɔ, akpedo eo nu nàvanyi Kristotɔ ci yí shin le gbɔngbɔn mɛ. (Elo. 2:​11, 12; Ebre. 5:14) Kpɔ lé tamɛbubu nujikpekpe akpedo eo nu le nɔnɔmɛ amɛve cɛwo mɛ ɖa: (1) le enuwawa ɖaɖa nɔvinyɔnuwo gbɔ mɛ yí (2) nɔ èsɔkɔ gbeta so lé àdranɔ do nu.

6. Lé tamɛbubu nujikpekpe akpedo nɔviŋsu jajɛ ɖe nu yí abunɔ nɔvinyɔnuwo doɔ?

⁶ Tamɛbubu nujikpekpe akpedo eo nu  nàbunɔ nyɔnuwo. Esɔgbe yí ŋɖe dedɔn le nu mɔ nɔviŋsu jajɛ ɖe aji mɔ yeajeshi nɔvinyɔnu ɖe ɖɛ nywiɖe o. Nɔ ɖajɛvi lɔ ɖo tamɛbubu nujikpekpeɔ, danu enyɔ ɖe, aŋwlɛ nu ɖe alo awa ŋɖe ci yí adasɛ nɔ nɔvinyɔnu lɔ mɔ yi nu jɔkɔ ji nɔ ye, nɔ deɖo susu mɔ yeavaɖi ɖɛ o. (1 Tim. 5:​1, 2) Nɔ ézɔnzɔn koɖo nɔvinyɔnu ɖeɔ, deɖo anɔnɔ koɖi yiɖekɛ nɔ mɛɖe dele wo gbɔ o keŋ nɔ ŋkɔ nywi akpɔtɔ anɔ nɔvinyɔnu lɔ nu.—1 Kor. 6:18.

7. Lé tamɛbubu nujikpekpe akpedo nɔviŋsu nu nɔ ewakɔ cancan so lé ado nu do koɖo lé akpa ɖa doɔ?

⁷ Emɔ bu ci ji nɔviŋsu lɔ adasɛ le mɔ yeɖo tamɛbubu nujikpekpe yí nyi nɔ esɔsɔ gbeta so enu ci ado koɖo lé akpa eɖa do nu. Amɛ ciwo yí ɖenɔ awu yoyu ciwo wodonɔ ti debunɔ Yehowa o yí wogbenyi mɛ ciwo yí nɔnɔ agbe dɔndɔn. Susu dɔndɔn ciwo yí le wo shi lɔwo zenɔ le lé wowanɔ awu lɔwo do yí wobɔnɔ amɛ ɖoɖu alo ana yí ŋsuwo aze shigbe nyɔnuwo hannɛ. Nɔ nɔviŋsu ci yí shinshin ɛ le gbɔngbɔn mɛ sɔsɔ gbeta so enu ci ado nuɔ, éɖo azan Bibla gɔnmɛɖosewo yí agbesran kpɔwɛ nywi ciwo yí le hamɛ lɔ mɛ. Átɛnŋ abiɔ yiɖeki se mɔ: ‘Ŋciwo ŋdonɔ dasɛ mɔ ŋle nywiɖe le susu mɛ yí bunɔ mɛbuwo tɔ kpɔa? Lé ŋdonɔ nu do atɛnŋ ana yí mɛbuwo akpɔɛ mɔ ŋsɛnsɛn Mawu nyaoa?’ (1 Kor. 10:​31-33; Titu 2:6) Nɔ nɔviŋsu jajɛ ɖe ɖo tamɛbubu nujikpekpeɔ, adɔ nɔviŋsu koɖo nɔvinyɔnuwo abuini yí Edalɔ ci yí le jeŋkwi mɛ can agbebuini.

8. Lé nɔviŋsu jajɛ ɖe atɛnŋ awɛ yí avanyi mɛ ci ji woatɛnŋ akandoɔ?

⁸ Nyi mɛ ci ji woatɛnŋ akando. Nɔviŋsu jajɛ ci yí wanɔ edɔ ciwo pleŋ woɖo ni nywiɖe nyi mɛ ci ji woatɛnŋ akando. (Luiki 16:10) Mìasɔ Yesu kpɔwɛ ci nu afɛn dele o. Yesu denyi mɛ ci yí debinɔ do edɔ nu alo ɖyiɖɔnɔ o. Ewaɖeɔ, éwa edɔ ciwo Yehowa ɖo ni, nɔ egbɔnnu ni hweɖewonu mɔ awa wo can. Élɔn amɛwo, vevitɔ yi dokplɔtɔwo yí le gbesɔsɔ yí sɔ yi gbe na do eta nɔ wo. (Ʒan 13:1) Wa Yesu tɔ han yí awanɔ edɔ ciwo pleŋ woɖo nɔ eo. Nɔ dènya lé àwa edɔ ɖe doɔ, sɔ eoɖeki hwe keŋ abiɔ kpekpedonu nɔviŋsu ciwo yí shin le gbɔngbɔn mɛ. Tekpɔ awa wu ci wokpɔkpɔ emɔ mɔ eɔ le wa. (Rɔm. 12:11) Wa edɔ lɔwo shigbe “Axwetɔ yí [è] le edɔ wakɔ nɔ ɛnɛ, de agbetɔwo yí [è] wawa edɔ nɔ o.” (Kol. 3:23) Nyɔnɔnwi enyi mɔ amɛmakpekpe ènyi, eyi taɖo sɔ eoɖeki hwe yí alɔnnɔ do afɛn ciwo èwanɔ ji.—Elo. 11:2.

9. Nyi yí taɖo nɔviŋsu jajɛ ɖe ɖo akpla ŋɖe wawa koŋ ɔ?

⁹ Gbɔxwe ànyi Kristotɔ ci yí shin le gbɔngbɔn mɛɔ, èɖo akpla enuŋtɔŋtɔ ɖewo wawa. Ecɛ akpedo eo nu nàtɛnŋ awanɔ edɔwo le hamɛ lɔ mɛ, awa dɔ asɔ kpɔnɔ eoɖeki ji alo ao xomu ji yí anɔ ekacaca nywi mɛ koɖo mɛbuwo. Mìakpɔ enu lɔ ɖewo.

10-11. Nɔ nɔviŋsu jajɛ ɖe nya enuŋwlɛŋwlɛ yí gbenya enuhlɛnhlɛn ɖɛ ɖe, lé ahɛn nyɔna va nɔ yiŋtɔ koɖo hamɛ lɔ doɔ? (Ehajiji Wema 1:​1-3) (Kpɔ foto lɔ hɛnnɛ.)

 ¹⁰ Kpla enuŋwlɛŋwlɛ koɖo enuhlɛnhlɛn nywiɖe. Bibla nu mɔ ŋsu ci yí kpɔnɔ jijɔ yí enuwo yinɔ ni nywiɖe zannɔ gamɛ ŋkeke ɖeka duu yí hlɛnnɔ Mawu Nyɔ lɔ yí bunɔ tamɛ kpɔ so nu. (Hlɛn Ehajiji Wema 1:​1-3.) Nɔ éhlɛnnɔ Bibla gbeɖeka duuɔ, ájeshi lé Yehowa bunɔ enuwo kpɔ do yí akpedo nu abunɔ tamɛ kpɔ nywiɖe yí akpɔ lé awɛ awanɔ do Enuŋwlɛŋwlɛ lɔwo ji nywiɖe. (Elo. 1:​3, 4) Woʒan ŋsu cɛ hanwo le hamɛ lɔ mɛ. Nyi yí taɖoɔ?

¹¹ Mìwo nɔviŋsu koɖo nɔvinyɔnuwo ʒan ŋsu ciwo yí akpe ji yí asɔ Bibla na ekpla wo. (Titu 1:9) Nɔ ènya enuhlɛnhlɛn yí gbenya enuŋwlɛŋwlɛ ɖɛ nywiɖeɔ, àtɛnŋ adra nuxu koɖo ɖoŋci ciwo yí ado ŋsɛn mɛbuwo do. Akpedo eo nu nàsun ji aŋwlɛnɔ enuwo ɖɛ nɔ èkplakɔ nu, nɔ èseseɛ nuxuwo le bɔbɔwo, takpekpe koɖo takpekpeganwo mɛ. Enu ciwo èŋwlɛ ɖɛ akpedo eo nu yí ao xɔse asɛnŋ doji yí nagbedo ŋsɛn mɛbuwo.

12. Nyi yí akpedo eo nu naxonɔ nuxu koɖo mɛbuwo nywiɖeɔ?

¹² Kpla lé àxonɔ nuxu do koɖo amɛwo. Kristotɔ ŋsu ɖo akpla lé axonɔ nuxu do koɖo amɛwo nywiɖe. Edasɛ mɔ aɖonɔ to amɛwo nywiɖe yí amɔnɔŋje wowo susu koɖo lé enu wakɔ nɔ wo do mɛ. (Elo. 20:5) Átɛnŋ anya lé enu wakɔ nɔ mɛɖe do nɔ ése yi gbe mɛ, lé ewakɔ ŋmɛ do koɖo lé ehwanhwan do. Dàtɛnŋ awa cɛ nɔ dezannɔ gamɛ yí nɔnɔ ju koɖo amɛwo o. Nɔ eka ji ɖekɛ yí èxonɔ nuxu koɖo amɛwo le shigbe enuŋwlɛɖaɖa amɛwoɔ, nuxuxoxo koɖo amɛwo ŋmɛŋmɛ avatɔ enu gbɔngbɔn nɔ eo. Eyi taɖo tekpɔ yí akannɔ seŋ koɖo amɛwo ŋmɛŋmɛ.—2 Ʒan 12.

13. Nubu ci yí nɔviŋsu jajɛ ɖo akplaɔ? (1 Timɔte 5:8) (Kpɔ foto lɔ hɛnnɛ.)

¹³ Kpla lé àhɛnnɔ eoɖeki do. Ŋsu Kristotɔ ci yí shin le gbɔngbɔn mɛ ɖo asun ji yí alenɔ bu nɔ yiɖeki yí agbelenɔ bu nɔ yi xomu. (Hlɛn 1 Timɔte 5:8.) Le eju ɖewo mɛɔ, nɔviŋsu jajɛwo tɛnŋ kpla edɔ le wowo da alo wowo xomumɛtɔ bu ɖe gbɔ. Ðajɛvi ɖe tɛnŋ kpla ajɔdodo alo edɔ bu hwenu yí eyikɔ suklu. Ðekpokpuiɖe ci egbenyi can ɔ, enyɔ mɔ woakpla ŋɖe ci yí akpedo amɛ nu woakpɔ edɔ awa. (Edɔ. 18:​2, 3; 20:34; Efe. 4:28) Wɛ nɔ woajeshi eo ɖɛ mɔ ènyi mɛɖeka ci yí wanɔ edɔ sɛnsinɖe yí nɔ ètɔ edɔ ɖe wawaɔ, èɖenɔ gbɔ ni. Nɔ èwɛ ahan ɔ, ètɛnŋ vakpɔ edɔ ɖe awa yí anɔ eo shi jinjinɖe. Ele veviɖe mɔ Kristotɔ ŋsu  ɖo aɖo nɔnɔmɛ koɖo enujikpekpe ciwo nu mìxo nuxu so yɛ keŋ atɛnŋ avawa dɔ ciwo yí le te kpɔɛ le esɔ mɛ. Mìaxo nuxu so edɔ lɔ ɖewo nu.

14. Lé nɔviŋsu jajɛ ɖe atɛnŋ adra do yí avanyi gashiagamɛ sumɔsumɔdɔwatɔɔ?

¹⁴ Gashiagamɛ sumɔsumɔdɔ lɔ. Ŋsu Kristotɔ ciwo yí shin le gbɔngbɔn mɛ sugbɔtɔ tɔ gashiagamɛ sumɔsumɔdɔ lɔ wawa hwenu wonyi jajɛ. Emɔɖeɖedɔ lɔ kpenɔdo ɖajɛvi nu yí akpla lé awɛ awanɔ edɔ koɖo amɛ vovovowo do. Egbekpenɔdo nu yí ezannɔ eho ci ekpɔ le nunya mɛ, yí dezinni yakayaka o. (Fili. 4:​11-13) Emɔ ɖeka ci ji woato yí atɔ gashiagamɛ mɔɖeɖedɔ lɔ wawa yí nyi mɔ woatɔɛ ji koɖo kpekpedonu mɔɖeɖedɔ. Amɛ sugbɔ wa kpekpedonu mɔɖeɖedɔ lɔ na nɔ hwenu ɖe yí ekpedo wo nu wovale gbesɔsɔ yí tɔ gbeshiagbe mɔɖeɖedɔ lɔ ji. Gbeshiagbe mɔɖeɖedɔ lɔ hunnɔ emɔ nɔ gashiagamɛ sumɔsumɔdɔ buwo shigbe exɔcucudɔ alo edɔwawa le Betɛli ɛnɛ.

15-16. Lé nɔviŋsu jajɛ ɖe awɛ aje yí asumɔ hamɛ lɔ doɔ?

¹⁵ Sumɔsumɔdɔwatɔ alo hamɛmɛshinshin. Kristotɔ ŋsuwo ɖo aɖo tajinu mɔ yewoavanyi hamɛmɛshinshinwo keŋ asumɔ yewo nɔviŋsu koɖo nɔvinyɔnuwo le hamɛ lɔ mɛ. Bibla mɔ ŋsu ciwo yí ji mɔ yewoasumɔ le hamɛ lɔ mɛ “le edɔ nywi drokɔ.” (1 Tim. 3:1) Gbɔxwe nɔviŋsu ɖe anyi hamɛmɛshinshin ɔ, éɖo aje agbla anyi sumɔsumɔdɔwatɔ keŋ gbɔxwe. Sumɔsumɔdɔwatɔwo kpenɔdo hamɛmɛshinshinwo nu le edɔ ɖewo koŋ wawa mɛ. Hamɛmɛshinshinwo koɖo sumɔsumɔdɔwatɔwo sɔ wowoɖeki hwenɔ yí sumɔnɔ nɔviŋsu koɖo nɔvinyɔnuwo yí gbewanɔ kunuɖeɖedɔ lɔ koɖo ezolelanmɛ. Nɔviŋsu jajɛwo atɛnŋ aje asumɔ shigbe sumɔsumɔdɔwatɔ hannɛ nɔ wole exwe 17 yi 19 gblamɛ can. Eyi nɔ sumɔsumɔdɔwatɔ ɖe ci yí ɖo exwe 20 koɖo ŋɖe han wa ɖaŋ wakɔ yi dɔ yí jeɔ, wohɛn woada shi do ji nɔ anyi hamɛmɛshinshin.

¹⁶ Lé àwɛ aje axɔ edɔ hunnɔwoɔ? Bibla nu nɔnɔmɛ ciwo yí àɖo keŋ gbɔxwe axɔ edɔ lɔwo. Lɔnlɔn ci èɖo nɔ Yehowa, ao xomu koɖo hamɛ lɔ yí ana àji mɔ yeaɖo nɔnɔmɛ lɔwo. (1 Tim. 3:​1-13; Titu 1:​6-9; 1 Piɛ 5:​2, 3) Tekpɔ yí amɔŋje nɔnɔmɛ ci woaɖo ɖeka ɖeka mɛ. Do gbe ɖaɖa nɔ Yehowa nɔ akpedo eo nu nɔ nàɖo nɔnɔmɛ ŋtɔ́wo. c

17. Lé nɔviŋsu jajɛ ɖe atɛnŋ adra do yí avanyi asu koɖo xomutatɔ doɔ? (Kpɔ foto lɔ hɛnnɛ.)

 ¹⁷ Asu koɖo xomutatɔ. Shigbe lé Yesu nui nɛɔ, Kristotɔ ŋsu ciwo yí shin le gbɔngbɔn mɛ ɖewo kpɔtɔ nɔnɔ trɛn mɛ. (Mt. 19:12) Vɔ nɔ èji mɔ yeaɖe nyɔnuɔ, àgbexɔ edɔ buwo kpi yí anyi asu koɖo xomutatɔ. (1 Kor. 11:3) Yehowa ji mɔ ŋsu le lɔn ashiɛ yí ale be ni le ŋcilan mɛ, yí anyi xlɔ nywi ni yí agbele bu ni le gbɔngbɔn mɛ. (Efe. 5:​28, 29) Nɔnɔmɛ nywi koɖo enujikpekpe ciwo nu mìxo nuxu so le nyɔta cɛ mɛ shigbe woaɖo tamɛbubu nujikpekpe, abunɔ nyɔnuwo yí agbenyi mɛ ci ji woakando akpedo eo nu nàvanyi asu nywi. Eyi nàdra do ɖɛ nywiɖe keŋ awa ɖaŋ avawa asu koɖo xomutatɔdɔ lɔ.

18. Lé nɔviŋsu jajɛ ɖe atɛnŋ adra do yí avanyi evida doɔ?

¹⁸ Vida. Nɔ èɖe nyɔnuɔ, àtɛnŋ avatrɔ vida. Nyi àtɛnŋ akpla le Yehowa gbɔ so vida nywi nyinyi nuɔ? Enu ci àkpla sugbɔ. (Efe. 6:4) Yehowa nu nɔ Eviɛ Yesu so ji mɛ mɔ yeluin yí yi nu jɔnɔ ji nɔ ye. (Mt. 3:17) Nɔ èvanyi vidaɔ, tekpɔ yí ana kankandoji viowo mɔ yelɔn wo. Kannɔfu wo nɔ edɔ nywi ciwo wowakɔ. Vida ciwo yí wanɔ Yehowa tɔ han kpenɔdo wowo viwo nu yí wovanyinɔ Kristotɔ ŋsu koɖo nyɔnu ciwo yí shin le gbɔngbɔn mɛ. Àdra do ɖɛ nɔ edɔ ŋtɔ́wo nɔ èsɔ lɔnlɔn yí sɔ lenɔ bu nɔ mɛbuwo le ao xomu mɛ koɖo le hamɛ lɔ mɛ yí nunɔ nɔ wo mɔ yelɔn wo yí wowo nu gbejɔnɔ ji nɔ ye. (Ʒan 15:9) Ecɛ akpedo eo nu nɔ èvanyi asu koɖo vidaɔ, natɛnŋ awa ao dɔ lɔ nywiɖe. Yí le ga ɖekɛ lɔ mɛ keɔ, àve nɔ Yehowa yí agbenyi kpedonu nywi nɔ ao xomu koɖo hamɛ lɔ.

19-20. Lé nɔviŋsu jajɛwo awɛ anyi Kristotɔ ŋsu ciwo yí shin le gbɔngbɔn mɛ doɔ? (Kpɔ foto ci yí le akpa lɔ ji.)

¹⁹ Nɔviŋsu jajɛwo, mídatɛnŋ anyi Kristotɔ ciwo yí shin le gbɔngbɔn mɛ gbeɖeka koɖo zan o. Ele mɔ míɖo acan kpɔwɛ nywi ciwo míasran, aɖo tamɛbubu nujikpekpe, anyi mɛ ciwo ji woatɛnŋ akando, akpla ŋɖewo yí agbedra do ɖɛ nɔ edɔ ciwo yí míavawa le esɔ mɛ.

²⁰ Nɔ èbu edɔ ciwo pleŋ yí le kɔ nɔ eo kpɔɔ, ètɛnŋ vɔn hwɛɖeka yí abu mɔ wowugan ye. Vɔ àtɛnŋ awa wo dru. Ðo ŋwi mɔ Yehowa le gbesɔsɔ yí akpedo eo nu. (Ezai 41:​10, 13) Ahanke nɔviŋsu koɖo nɔvinyɔnuwo akpedo eo nu le hamɛ lɔ mɛ nɛ. Nɔ èvanyi Kristotɔ ci yí shin le gbɔngbɔn mɛɔ, àvo le agbe mɛ yí akpɔnɔ jijɔ. Nɔviŋsu jajɛwo, mìlɔn mí veviɖe! Yehowa le cu shi nɔ mí sugbɔ ci míle agbla jekɔ mɔ yewoanyi Kristotɔ ŋsu ciwo yí shin le gbɔngbɔn mɛ.—Elo. 22:4.