1. Nyi mìɖo awa keŋ ashin le gbɔngbɔn mɛɔ?

 LÉ VIHWƐ ɖe blɛ shinnɔ do nyi enu kpacamɛ ɖeka. Ele shigbe mɔ wodedonɔ egbla ɖe gbɔxwe yí shinnɔ hannɛ. Vɔ gbɔxwe Kristotɔ ɖe ashin le gbɔngbɔn mɛɔ, éɖo ado gbla. b (1 Kor. 13:11; Ebre. 6:1) Gbɔxwe mìasun jiɔ, ele mɔ mìawɛ nɔ ekacaca ci yí le mìwo koɖo Yehowa gblamɛ asɛnŋ. Ele mɔ gbɔngbɔn kɔkɔɛ yitɔ akpedo mì nu nɔ mìaɖo nɔnɔmɛ ciwo yí jɔnɔ ji ni, akpla enuŋtɔŋtɔ ɖewo wawa yí adra do ɖɛ nɔ agbanleamɛji ɖewo le esɔ mɛ.—Elo. 1:5.

2. Nyi mìkpla so Gɔnmɛjeje 1:27 mɛɔ, yí nyi nu mìaxo nuxu so le nyɔta cɛ mɛɔ?

² Yehowa wa agbetɔwo yí wonyi ŋsu alo nyɔnu. (Hlɛn Gɔnmɛjeje 1:27.) Eze gbawlɛ mɔ, ŋsu koɖo nyɔnu to akpo le gbaza mɛ, vɔ wogbeto akpo le nubuwo mɛ hɛnnɛ. Le kpɔwɛ mɛ, Yehowa wa ŋsu koɖo nyɔnu nɔ woawa edɔ ɖewo koŋ, eyi taɖo ele mɔ woaɖo nɔnɔmɛ koɖo enujikpekpe ɖewo gbɔxwe awa edɔ cɛwo. (Gɔnm. 2:18) Le nyɔta cɛ mɛɔ, mìakpɔ lé nɔvinyɔnu jajɛ ɖe atɛnŋ awɛ keke yí avanyi nyɔnu ci yí shin le gbɔngbɔn mɛ. Yí le nyɔta ci yí kplɔɛdo mɛɔ, mìakpɔ lé nɔviŋsu jajɛwo can atɛnŋ awɛ do.

3-4. Fini nɔvinyɔnu jajɛwo atɛnŋ akpɔ kpɔwɛ nywiwo le asran ɔ? (Kpɔ foto lɔ hɛnnɛ)

³ Bibla xo nuxu so nyɔnu nywi ɖewo ciwo yí lɔn Yehowa yí gbesin nu. (Kpɔ nyɔta ci yí nyi “Les femmes dans la Bible: que pouvons-nous apprendre d’elles?” le jw.org ji) Eyi shigbe lé nyɔta lɔ kpukpui vevi lɔ nui hannɛɔ, wowanɔ “enu do dredre nú” yí gbenyi ‘egbejinɔtɔwo le enushanu mɛ.’ Ahanke nɔvinyɔnuwo atɛnŋ akpɔ Kristotɔ nyɔnu ciwo yí shin le gbɔngbɔn mɛ le wowo hamɛwo mɛ ciwo yí woatɛnŋ aɖyi.

⁴ Nɔvinyɔnu jajɛwo, danyɔ mɔ míaji nyɔnu Kristotɔ ciwo yí shin le gbɔngbɔn mɛ ciwo yí ɖo kpɔwɛ nywi ciwo míatɛnŋ asran ba? Do jeshi wowo nɔnɔmɛ nywiwo, yi goduɔ, kpɔ lé àtɛnŋ adasɛ nɔnɔmɛ lɔwo do. Le mamamɛ ciwo yí gbɔkɔ mɛɔ, mìaxo nuxu so nɔnɔmɛ vevi amɛtɔn ciwo yí nɔvinyɔnuwo ɖo atekpɔ yí aɖo nu.

5. Nyi yí taɖo ele veviɖe mɔ nɔvinyɔnu Kristotɔ ci yí shin le gbɔngbɔn mɛ asɔ yiɖeki hwenɔɔ?

⁵ Amɛɖekisɔsɔhwe nyi nɔnɔmɛ vevi ɖeka ci yí Kristotɔ ciwo yí shin le gbɔngbɔn mɛ ɖo aɖo. Nɔ nyɔnu ɖe sɔ yiɖeki hwenɔɔ, ekacaca nywi anɔ yɛ koɖo Yehowa koɖo mɛbuwo gblamɛ. (Ʒaki 4:6) Le kpɔwɛ mɛ, nyɔnu ci yí lɔn Yehowa lɔnnɔ do etanyinyi toto ci Yehowa wa ji. (1 Kor. 11:3) Édre lé woawa do etanyinyi toto lɔ ji le hamɛ lɔ koɖo xomu lɔ mɛ. c

6. Nyi nɔvinyɔnu jajɛwo atɛnŋ akpla le lé Rebeka sɔ yiɖeki sɔ hwe do mɛɔ?

⁶ Mìasɔ Rebeka kpɔwɛ. Le yi gbe pleŋ mɛɔ, édasɛ mɔ yenya ŋɖɛ yí gbenyi edɔngbetɔ ci enyanɔ hwenu koɖo lé awa nu do. (Gɔnm. 24:58; 27:​5-17) Ele ahan gan, ébunɔ amɛ yí gbesɔ yiɖeki hwenɔ. (Gɔnm. 24:​17, 18, 65) Nɔ èsɔ eoɖeki hwenɔ yí lɔnnɔ do toto Yehowa tɔwo ji shigbe lé Rebeka wɛ nɛɔ, ànyi kpɔwɛ nywi nɔ ao xomu koɖo hamɛ lɔ.

7. Lé nɔvinyɔnu jajɛwo atɛnŋ asran Ɛstɛɛ do yí ajenɔshi sɛnxu nɔ wowoɖekiwoɔ?

 ⁷ Sɛnxujeshinamɛɖeki nyi nɔnɔmɛ ci yí mɛ ciwo pleŋ yí shin le gbɔngbɔn mɛ ɖo aɖo. Bibla nu mɔ “amɛ xomɛfatɔnɔwo alo mɛ ciwo yí jeshi sɛnxu nɔ wowoɖekiwo a gbe va trɔsun ŋununyatɔwo.” (Elo. 11:2) Ɛstɛɛ nyi nyɔnu ɖeka ci yí jeshi sɛnxu nɔ yiɖeki yí gbenyi Mawu sɛntɔ egbejinɔtɔ. Ci ejenɔshi sɛnxu nɔ yiɖekiɔ, edɔ dewa nu egoyiyitɔ hwenu evanyi efyɔshi o. Éɖo to nukplamu ci yí fofoɔ Madoshe ni yí wa do ji. (Ɛstɛɛ 2:​10, 20, 22) Nɔ èjinɔ nukplamu nywi le mɛbuwo gbɔ yí wanɔ do wo jiɔ, anyi eɔ can èdadasɛ mɔ yejeshi sɛnxu nɔ yeɖeki.—Titu 2:​3-5.

8. Sɔgbe koɖo 1 Timɔte 2:​9, 10 ɖe, lé sɛnxujeshinamɛɖeki atɛnŋ akpedo nɔvinyɔnu ɖe nu yí asɔ gbeta nywiwo so enudodo koɖo dradrado nuɔ?

⁸ Ɛstɛɛ gbejeshi sɛnxu nɔ yiɖeki le nubu mɛ. “Énya kpɔkpɔ yí nyɔ vi haan”; vɔ dedɔnnɔ amɛwo susu va yiɖeki ji o. (Ɛstɛɛ 2:​7, 15, NWT) Nyi yí Kristotɔ nyɔnuwo atɛnŋ akpla so Ɛstɛɛ kpɔwɛ lɔ mɛɔ? 1 Timɔte 2:​9, 10 xo nuxu so emɔ ɖeka ci ji woatɛnŋ asran yi kpɔwɛ le. (Hlin.) Apotru Pɔlu nu nɔ Kristotɔ nyɔnuwo mɔ wo le donɔ nuwo le bubu koɖo susu nywi mɛ. Grɛki nyɔgbe ciwo yí ezan le lɛ gɔnmɛ yí nyi mɔ nyɔnu ɖo awa ɖaŋ adonɔ nuwo asɔnɔgbe yí eɖo abunɔ lé enu ciwo yí edo awa nɔ mɛbuwo kpɔ. Nɔvinyɔnu veviwo, ci míwa ɖaŋ yí donɔ nuwo nywiɖeɔ, míwo nu jɔnɔ ji nɔ mì!

9. Nyi mìatɛnŋ akpla le Abigaili kpɔwɛ mɛɔ?

⁹ Enugɔnmɛsese nyi nɔnɔmɛ bu ci nɔvinyɔnu ciwo yí shin le gbɔngbɔn mɛ danasɛ. Nyi yí nyi enugɔnmɛseseɔ? Enyi enujikpekpe ci yí dɔ wojenɔshi enunywi koɖo enudɔndɔn yí woasɔ gbeta mɔ woawa enunywi lɔ. Mìasɔ Abigaili kpɔwɛ. Asuɔ sɔ gbeta dɔndɔn ɖeka ci yí adahɛn nu le yi xomɛtɔwo pleŋ nu. Abigaili wa nu le afɔdumɛ zeɖeka. Enugɔnmɛsese yitɔ na yí ehwlɛn agbe gan nɔ amɛwo. (1 Sam. 25:​14-23, 32-35) Enugɔnmɛsese kpenɔdo mìwo can nu mìnyanɔ hwenu mìaxo nuxu koɖo hwenu mìabɔ nu. Egbekpenɔdo mì nu yí mìdesɔnɔ ɖe le ji nɔ amɛwo ɖoɖu keke woavo le wowoɖekiwo mɛ aglo o.—1 Tɛs. 4:11.

10-11. Nɔ ènya enuhlɛnhlɛn ɖɛ yí gbenya enuŋwlɛŋwlɛ ɖɛ nywiɖe ɖe, lé atɛnŋ akpedo eoŋtɔ koɖo mɛbuwo nu doɔ? (Kpɔ foto lɔ hɛnnɛ)

¹⁰ Eʒan mɔ nyɔnu Kristotɔ ɖo anya ŋɖewo wawa. Enu ciwo yí nyɔnuvi ɖe kpla le yi vihwɛ mɛ akpɔtɔ akpekpeɛdo nu le yi gbe pleŋ mɛ. Mìakpɔ enu lɔ ɖewo.

¹¹ Kpla enuhlɛnhlɛn koɖo enuŋwlɛŋwlɛ nywiɖe. Le kɔta ɖewo mɛɔ, wodekpɔɛni mɔ yile veviɖe mɔ nyɔnushiwo akpla  enuhlɛnhlɛn koɖo enuŋwlɛŋwlɛ o. Vɔ etrɔ nyi enuvevi ɖeka ci Kristotɔ ɖeshiaɖe ɖo awa. d (1 Tim. 4:13) Eyi taɖo ŋgbelɔn nɔ ŋɖe axe emɔ nɔ eo yí nakpla enuhlɛnhlɛn koɖo enuŋwlɛŋwlɛ nywiɖe yí aglo o. Nyɔna ci àkpɔ nɔ ènya enuhlɛnhlɛn koɖo enuŋwlɛŋwlɛɔ? Ana yí àkpɔ dɔ awa. Agbena yí àkplanɔ Mawu Nyɔ lɔ nywiɖe eoŋtɔ yí agbekplɛni mɛbuwo. Ci yí gbenyɔ wu ŋnɔɔ, ana yí àte gogo Yehowa doji ci èhlɛnkɔ yi Nyɔ lɔ yí gbebukɔ tamɛ kpɔ so nu.—Ʒoz. 1:8; 1 Tim. 4:15.

12. Lé Elododo Wema 31:26 atɛnŋ akpedo eo nu nàxonɔ nuxu nywiɖeɔ?

¹² Kpla lé àxonɔ nuxu do koɖo amɛwo. Kristotɔwo ɖo anya lé woaxonɔ nuxu do koɖo amɛwo nywiɖe. Susu cɛ yí dɔ yí Ʒaki na enukplamu nywi cɛ mì ci emɔ: “Amɛshamɛ ɖogbe a le gbesɔsɔ a ɖonɔto blaŋ, kpɔ da xonɔ nuxu blaŋ o.” (Ʒaki 1:19) Nɔ mɛbuwo xokɔ nuxu nɔ eo yí èwa ɖaŋ yí ɖokɔ to wo nywiɖeɔ, anyi èsɔ ɖe le ji nɔ wo. (1 Piɛ 3:8) Nɔ mɛɖe xokɔ nuxu nɔ eo yí èkpɔɛ mɔ yedese enyɔ ci enukɔ mɛ o alo lé enu lɔ wakɔ ni do mɛɔ, biɔ enyɔwo yi se keŋ ase mɛ. Yi goduɔ, nabu tamɛ kpɔ gbɔxwe yí axo nuxu. (Elo. 15:28) Biɔ eoɖeki se mɔ: ‘Nyɔnɔnwi yí nyi enyɔ ci ŋjikɔ anua yí ado ŋsɛn amɛ lɔa? Bubu koɖo xomɛvuwawa aze le mɛa?’ Kpla nu so nɔvinyɔnu ciwo yí shin le gbɔngbɔn mɛ gbɔ ciwo yí nya lé woaxo nuxu koɖo amɛ nywiɖe do. (Hlɛn Elododo Wema 31:26.) Sɔ susu ɖo enyɔ ci wonukɔ koɖo lé wonuikɔ do ji. Nɔ èkpla lé àxonɔ nuxu koɖo amɛwo do nywiɖeɔ, ale fafɛɖe nɔ eo mɔ naɖo xlɔwo yí ale fafa mɛ koɖo wo.

13. Lé àtɛnŋ akpla yí anya axomɛdɔwo wawa ɖɛ nywiɖe doɔ? (Kpɔ foto lɔ hɛnnɛ)

¹³ Kpla lé àlenɔ bu nɔ axomɛ do. Le texwe sugbɔɔ, nyɔnuwo yí wanɔ edɔ sugbɔ le axomɛ. Enɔo alo nɔvinyɔnu bibi ɖe atɛnŋ akpedo eo nu nanya axomɛdɔ lɔwo wawa nywiɖe. Nɔvinyɔnu Cindy nu mɔ: “Enunywitɔ ɖeka ci nɔnyɛ kplaŋ yí nyi jijɔ ci wokpɔnɔ nɔ wowakɔ edɔ sɛnsin. Ci nɔnyɛ kplaŋ lé woɖanɔ nu do, klɔnɔ nu, cucunɔ nuwo, tɔnnɔ nu koɖo lé woxwlenɔ afi doɔ, ena agbe lɔ le fafɛɖe nɔŋ yí egbena yí ŋtɛnŋ wakɔ edɔ sugbɔ le Yehowa sɛnsɛn mɛ. Nɔnyɛ gbekplaŋ lé woxɔnɔ mɛdru do yí ecɛ na yí ŋdo go nɔviŋsu koɖo nɔvinyɔnu nywi ciwo kpɔwɛwo natɛnŋ asran.” (Elo. 31:​15, 21, 22) Nyɔnu ci yí binɔ do dɔ nu, xɔnɔ mɛdru yí gbenya lé wolenɔ bu nɔ axomɛ do nyi shicu nɔ yi xomu koɖo hamɛ lɔ.—Elo. 31:​13, 17, 27; Edɔ. 16:15.

14. Nyi èkpla so Crystal kpɔwɛ mɛɔ, yí nyi ji èɖo asɔ susu ɖoɔ?

¹⁴ Kpla lé àwanɔ enuwo do eoŋtɔ. Ecɛ le veviɖe nɔ Kristotɔwo pleŋ. (Fili. 4:11)  Nɔvinyɔnu Crystal nu mɔ: “Danyɛ koɖo nɔnyɛ do ŋsɛnŋ mɔ nyɛ le kpla enuŋtɔŋtɔ ɖewo wawa le suklu. Danyɛ do ŋsɛnŋ mɔ nyɛ le xɔ kpla le kɔnŋtawawa mɛ yí ecɛ vakpedo ŋnu sugbɔ.” Woanya lé woaji ho do ɖekɛ desun o, tekpɔ akpla lé wozannɔ eho do yí dazannɔ ho sɔwu ci yí le eo shi o. (Elo. 31:​16, 18) Nɔ ètekpɔ yí deɖunɔ efɛn gbali o yí nɔnɔ agbe kleŋ ɔ, akpedo eo nu yí nàwa dɔ sugbɔ nɔ Yehowa.—1 Tim. 6:8.

15-16. Lé nɔvinyɔnu trɛnnɔwo nyi nyɔnawo nɔ mɛbuwo doɔ? (Maki 10:​29, 30)

¹⁵ Nɔ ètekpɔ yí ɖo nɔnɔmɛ nywiwo yí gbenya ŋɖewo wawa ɖɛɔ, akpedo eo nu le esɔ mɛ. Mìakpɔ ŋɖewo ciwo àtɛnŋ awa kpɔwɛwo.

¹⁶ Àtɛnŋ aɖui mɔ yeanɔ trɛn mɛ na nɔ hwenu ɖe. Sɔgbe koɖo Yesu nyɔwoɔ, nyɔnu ɖewo tɛnŋ ɖui mɔ yewodaɖe asu o, nɔ amɛwo gbesɔ ŋkuvi vwin sɔ kpɔnɔ etrɛnmɛnɔnɔ le wowo tɔxu can. (Mt. 19:​10-12) Ŋɖewo yí dɔ taɖo mɛɖewo kpɔtɔ nɔnɔ etrɛn mɛ. Vɔ kando ji mɔ Yehowa koɖo Yesu degbalinɔ Kristotɔ etrɛnnɔwo o. Nɔvinyɔnu trɛnnɔwo nyi kpɔwɛ nywi le hamɛwo mɛ le xexe lɔ pleŋ mɛ. Lé wolɔnnɔ amɛ do yí gbesɔnɔ ɖe le ji nɔ amɛ nyɔnɔnwitɔ na yí wovale shigbe dada koɖo enɔ hannɛ nɔ amɛ sugbɔ le gbɔngbɔn mɛ.—Hlɛn Maki 10:​29, 30; 1 Tim. 5:2.

17. Lé nɔvinyɔnu jajɛ atɛnŋ adra do ɖɛ yɛ yí avawa gashiagamɛ sumɔsumɔdɔ lɔɔ?

¹⁷ Àtɛnŋ avanyi gashiagamɛ sumɔsumɔdɔwatɔ. Nɔvinyɔnuwo wakɔ sugbɔ le kunuɖeɖedɔ lɔ mɛ le xexeɛ pleŋ mɛ. (Eha. 68:11) Àtɛnŋ awa toto yɛ yí atɔ gashiagamɛ sumɔsumɔdɔ lɔ wawaa? Àtɛnŋ anyi emɔɖetɔ alo asɔ eoɖeki jo le xɔcucudɔwo mɛ alo awa dɔ le Betɛli. Do gbe ɖaɖa so ao tajinu lɔ nu. Kan seŋ koɖo mɛ ciwo yí wakɔ edɔ ŋtɔ́ hanwo vɔ yí akpɔ lé àwɛ atɔ gashiagamɛ sumɔsumɔdɔ lɔ ji. Yi goduɔ, wa toto ci yí atɛnŋ akpedo eo nu nawa do ao tajinu lɔ ji. Nɔ èwa do ao tajinu lɔ jiɔ, ahun emɔ buwo nɔ eo le Yehowa sɛnsɛn mɛ.

18. Lé nɔvinyɔnu acan mɛ ci avaɖe le nunya mɛ doɔ? (Kpɔ foto lɔ hɛnnɛ)

¹⁸ Àtɛnŋ asɔ gbeta mɔ yeaɖe asu. Nɔnɔmɛ koɖo enu ciwo yí ànya wawa ci nu mìxo nuxu so akpedo eo nu nàvanyi nyɔnu nywi. Vɔ nɔ èmɔ yeaɖe asuɔ,  ele mɔ nàcan mɛ ci àɖe lɔ nywiɖe. Gbeta vevi ɖeka ci dagbevasɔ gbeɖe yí enyi. Ðo ŋwi mɔ mɛ ci àɖe lɔ yí avakpa nɔ eo. (Rɔm. 7:2; Efe. 5:​23, 33) Eyi taɖo biɔ eoɖeki se mɔ: ‘Éshin le gbɔngbɔn mɛa? Gbɔngbɔn mɛ nuwo yí nyi enuvevitɔ ni le yi gbe mɛa? Ésɔnɔ gbeta nywiwoa? Nɔ ewa afɛn ɖe, élɔnnɔ do jia? Ébunɔ nyɔnuwoa? Átɛnŋ akpedo ŋnu le ŋcilan mɛ, gbɔngbɔn mɛ yí agbenyi exlɔ nywi nɔŋ a? Éwanɔ yi dɔwo nywiɖea? Le kpɔwɛ mɛ, edɔ ci hanwo yí woɖo ni le hamɛ lɔ mɛɔ, yí lé ewanɔ wo doɔ?’ (Luiki 16:10; 1 Tim. 5:8) Le nyɔnɔnwi mɛɔ, nɔ èji mɔ yeakpɔ asu nywiɔ, ele mɔ eɔŋtɔ aje agbla anyi nyɔnu nywi.

19. Nyi yí taɖo mìatɛnŋ anu mɔ wodo bubu nyɔnuwo nu ci womɔ wonyi “alɔdotɔ” ɔ?

¹⁹ Bibla nu mɔ nyɔnu nywi ‘donɔ alɔ’ asuɔ yí gbenyi ‘bɔdonutɔ’ ni. (Gɔnm. 2:18) Ecɛ dasɛ mɔ woɖe nyɔnuwo kpɔtɔ yɔa? Oo, bubu enyi wodo nyɔnuwo nu. Le Bibla mɛɔ, woyɔnɔ Yehowa hweɖewonu mɔ “alɔdotɔ.” (Eha. 54:4; Ebre. 13:6) Nyɔnu ci yí nyi kpedonutɔ nywi nɔ asuɔ donɔ alɔ yi yí kpenɔdo nu wowanɔ do gbeta ciwo yí esɔ ji le xomu lɔ mɛ. Eyi ci elɔn Yehowa ɔ, éjenɔ agbla sɛnsinɖe nɔ amɛwo akpɔ nɔnɔmɛ nywi ciwo yí le asuɔ shi. (Elo. 31:​11, 12; 1 Tim. 3:11) Àtɛnŋ adra do ɖɛ kakacɛ yí avanyi nyɔnu ŋtɔ́ han nɔ èna yí lɔnlɔn ci èɖo nɔ Yehowa sɛnkɔŋ doji yí èkpekɔdo mɛbuwo nu le axomɛ koɖo hamɛ lɔ mɛ.

20. Enunywi ci vinɔ ɖe atɛnŋ awa nɔ yi xomuɔ?

²⁰ Àtɛnŋ avanyi vinɔ. Nɔ èvaɖe asuɔ, eo koɖo asuo tɛnŋ ji eviwo. (Eha. 127:3) Eyi taɖo anyɔ mɔ nàbu tamɛ kpɔ so lé woawɛ anyi vinɔ nywi nu. Nɔnɔmɛ koɖo enujikpekpe ciwo nu mìxo nuxu so le nyɔta cɛ mɛ akpedo eo nu nɔ èvaɖe asu yí vanyi vinɔ. Nɔ èlɔnnɔ amɛ, wanɔ xomɛvu yí gbedonɔ ʒinxoɔ, adɔ yí jijɔ anɔ ao xomu mɛ yí ao viwo avoŋ.—Elo. 24:3.

21. Lé mìkpɔnɔ mìwo nɔvinyɔnuwo doɔ, yí nyi yí taɖoɔ? (Kpɔ foto ci yí le akpa lɔ ji.)

²¹ Mìlɔn mí nɔvinyɔnuwo, nɔ enu ciwo pleŋ míwakɔ nɔ Yehowa koɖo yi mɛwo. (Ebre. 6:10) Míje agbla yí ɖo nɔnɔmɛ nywiwo yí kpla ŋɖewo wawa ciwo yí na míwoŋtɔwo koɖo mɛ ciwo yí trɔdo mí akpɔnɔ jijɔ yí gbedra do ɖɛ nɔ edɔ bu ciwo yí míavawa le esɔ mɛ. Míve nɔ Yehowa habɔbɔ lɔ sugbɔ!