1-2. Lé jilawo ɖo awa nu do nɔ wowo vi ɖe biɔbiɔ enyɔ se so mìwo jixɔsewo nuɔ?

 AMƐ sugbɔ alɔn do ji mɔ woanyi jila biɔ edɔ sugbɔ. Nɔ jila enyi yí evio nyi jajɛɔ, mìkanfu eo sugbɔ nɔ edɔ sɛnsin ci èwakɔ keŋ nɔ evio lɔ ákpɔtɔ aɖo xɔse sɛnŋ. (2 Ese. 6:​6, 7) Nɔ evio shinkɔɔ, étɛnŋ vatɔ enyɔ vevi ɖewo biɔbiɔse kuso mìwo Bibla mɛ jixɔsewo koɖo agbenywinɔnɔse Bibla tɔwo nu.

² Le tɔtɔmɛɔ, evio nyɔbiɔse lɔwo tɛnŋ do vɔnvɔn nɔ eo. Ètɛnŋ kpɔ evio nyɔbiɔse lɔwo shigbe éyikɔ godu le xɔse mɛ nɛ. Vɔ le nyɔnɔnwi mɛɔ, nɔ ɖeviwo shinshin ɛɔ, woɖo abiɔnɔ enyɔwo se keŋ asɔ do ŋsɛn wowo xɔse. (1 Kor. 13:11) Eyi taɖo susu ɖe deli ci yí adɔ navɔn o. Nɔ ɖevi lɔwo biɔ enyɔ eo se so mìwo jixɔsewo nuɔ, àtɛnŋ azan gamɛ ŋtɔ́ asɔ kpedo wo nu nɔ woabu tamɛ sugbɔ keŋ asɔ do ŋsɛn xɔse ci woɖo do Mawu koɖo Bibla nu.

3. Nyi nu mìaxo nuxu so le nyɔta cɛ mɛɔ?

³ Le nyɔta cɛ mɛɔ, mìaxo nuxu so lé jilawo awɛ akpedo wowo vi alo wowo viwo nu (1) nɔ wowoŋtɔwo aɖo kandoji sɛnŋ do Mawu koɖo Bibla lɔ nu, (2) nɔ woado ŋsɛn gbeta ci wosɔ mɔ yewoawa do agbenywinɔnɔse ciwo yí le Bibla mɛ ji, koɖo (3) ahwlɛn ta nɔ wowo jixɔsewo. Mìagbekpɔ enu ci yí taɖo enyɔ mɔ ɖevi lɔwo abiɔnɔ enyɔ se koɖo enuŋtɔŋtɔ ɖewo ciwo jilawo awa le xomu lɔ mɛ yí asɔ kpedo wowo viwo nu nɔ woadre wowo jixɔsewo mɛ nɔ amɛwo.

KPEDO VIO NU NƆ AÐO KANDOJI SƐNŊ DO MAWU KOÐO BIBLA NU

4. Nyɔ ciwo yí ɖevi ɖe avabiɔkɔ se druɔ, yí nyi yí taɖoɔ?

⁴ Jila Kristotɔwo ɖo anya mɔ xɔse ɖoɖo do Mawu nu denyi cinɔnu yí ɖevi ɖe axɔ o. Wodeji mí koɖo xɔse ɖoɖo do Yehowa nu o. Yí nɛnɛke ele nɔ míwo vi nɛ. Nɔ hwenuwo vayikɔɔ,  ɖevi ɖe tɛnŋ vatɔ nyɔ cɛwo biɔbiɔ se: ‘Lé nawɛ anya mɔ Mawu ɖe liɔ? Natɛnŋ akando nyɔ ci Bibla nu ji nyaoa?’ Nyɔnɔnwi enyi mɔ Bibla do ŋsɛn mì mɔ mìwo le zan “tamɛbubu ŋsɛn” mìwotɔ yí “ado enushanu kpɔ.” (Rɔm. 12:​1, NWT; 1 Tɛs. 5:21) Vɔ lé míawɛ akpedo míwo vi nu nɔ ado ŋsɛn yi xɔseɔ?

5. Nyi jilawo atɛnŋ awa akpedo wowo vi nu yí xɔse ci eɖo do Bibla nu akpɔtɔ asɛnsɛnŋ ɔ? (Rɔmatɔwo 12:2)

⁵ Do ŋsɛn ao vi nɔ akando nyɔnɔnwi lɔ ji yiŋtɔ. (Hlɛn Rɔmatɔwo 12:2.) Nɔ vio biɔbiɔ nyɔwo seɔ, zan mɔnukpɔkpɔ ŋtɔ́ yí adasɛ ni lé awɛ akpɔ ɖoŋciwo le enugɔnmɛjijikpɔ dɔwanu mìwotɔwo mɛ shigbe mɔ Index des publications des Témoins de Jéhovah alo Numekuku Ŋuti Mɔfiagbalẽ Na Yehowa Ðasefowo. Le dɔwanu cɛ mɛɔ, àkpɔ “Etso Mawu ƒe gbɔgbɔ me” le gɔnmɛ nɔ nyɔta “Bibla,” átɛnŋ akpɔ kpeɖoji ɖe ci yí dasɛ mɔ Bibla denyi wema nywi ci agbetɔwo ŋwlɛ kpoŋ o. Ewaɖeɔ, “Mawu Nyɔ enyi.” (1 Tɛs. 2:13) Le kpɔwɛ mɛ, étɛnŋ ji Asiri jugan xoxwi Ninivu kpɔ. Vayi saɔ, Bibla nuŋwlɛtɔ ɖewo nu mɔ Ninivu jugan lɔ deni kpɔ o. Vɔ le exwe 1850 wo mɛɔ, wovayi kpɔ jugan lɔ gligbangbanwo le gu mɛ, ci yí dasɛ mɔ Bibla mɛ xolɔlɔ lɔ nyi nyɔnɔnwi yí sɔgbe pɛpɛpɛ. (Zef. 2:​13-15) Étɛnŋ kpɔ nyɔta “Mínyaa?” le Jutakpɔxɔ Novembre 2021 tɔ mɛ keŋ akpɔ nyɔ buwo kuso lé Ninivu jugan lɔ gugu na yí enyɔnuɖɛ Bibla mɛ tɔwo vamɛ do. Nɔ evio lɔ sɔ enu ciwo yí ekpla le mìwo Bibla nukplawemawo mɛ sɔ sɔ koɖo enu ciwo yí ekpla le enugɔnmɛjijikpɔ wemawo koɖo wema bu ciwo ji kankandoji le mɛɔ, ákpɔ susu nywi sugbɔ ciwo yí adɔ xɔse ci eɖo do Bibla nu agbesɛnŋ doji.

6. Lé jilawo atɛnŋ akpedo wowo vi nu yí abu tamɛ yí akpɔɛ mɔ enyɔ ciwo Bibla nu nyi nyɔnɔnwi yí kankandoji le wo nuɔ? Na kpɔwɛ ɖeka. (Kpɔ foto lɔ hɛnnɛ.)

⁶ Kpedo vio nu nɔ akpɔ ŋci yi taɖo enyɔ ci Bibla nu nyi nyɔnɔnwi. Mɔnukpɔkpɔ hamɛhamɛ le jilawo shi nɔ woatɔ seŋ nywiwo kankan koɖo wowo vi so Bibla alo xɔse ɖoɖo do Mawu nu. Mɔnukpɔkpɔ cɛwo tɛnŋ hun nɔ wo nɔ wokplɔ wowo viwo yi blema mɛ nuwo ɖoxu, ekpa ɖe ci mɛ wodo flawa koɖo egbewo do, alo enuwo ɖoxu alɔjedɔwaxu Yehowa Kunuɖetɔwo tɔ ɖe mɛ. Le kpɔwɛ mɛ, nɔ ekplɔ vio yi blema mɛ nuwo ɖoxu ɖe alo èdasɛ ni le ekajiɔ, ètɛnŋ hɛn susu yitɔ yi exolɔlɔ ɖewo ciwo yí jɔ vayi ji alo ŋɖewo ciwo yí atɛnŋ ado ŋsɛn kankandoji ci éɖo do Bibla nu mɔ yɛnyi nyɔnɔnwi. Evio nya mɔ woŋwlɛ Mawu ŋkɔ do ekpe ɖeka ci yí  ɖo exwe 3.000 ji ci woyɔnɔ mɔ Moabutɔwo Kpea? Wosɔ Moabutɔwo Kpe ŋtɔŋtɔ lɔ sɔ daɖo blema mɛ nuwo ɖoxu ci yí le Louvre le Paris, le France. Wogbesɔ kɔpi ɖeka nɔ Moabutɔwo Kpe lɔ daɖo “Bibla koɖo Mawu Ŋkɔ nuwo ɖoxu” ci yí le Xexeɛ keŋkeŋ dɔwaxu Yehowa Kunuɖetɔwo tɔ le Warwick, New York. Moabutɔwo Kpe lɔ dasɛ mɔ Moabu Fyɔ Mesha fɔn gu do Izraɛli ji. Yí nyɔ ŋtɔ́ sɔgbe koɖo enyɔ ci Bibla nu. (2 Efy. 3:​4, 5) Nɔ vio kpɔkpɔ kpeɖoji ciwo yí dasɛ mɔ Bibla nyi nyɔnɔnwi yí kankandoji le wo nuɔ, xɔse ci éɖo agbesɛnŋ doji.—sɔ sɔ koɖo 2 Kronika 9:6.

7-8. (a) Nyi mìatɛnŋ akpla le enuwawa nyakpɔkpɔ ciwo yí mìkpɔkpɔ le agbeɛ mɛ mɛɔ? Na kpɔwɛ ɖeka. (Kpɔ foto lɔ hɛnnɛ.) (b) Nyɔbiɔse ciwo yí atɛnŋ akpedo ao vi nu yí ado ŋsɛn kankandoji ci eɖo do Enuwowatɔ lɔ nuɔ?

⁷ Do ŋsɛn vio nɔ abu tamɛ kpɔ so jɔjɔmɛnu ciwo yí le xexe lɔ mɛ nu. Nɔ èɖyiɖyiɛsa koɖo evio le eju lɔ mɛ alo le ekpa ɖe mɛɔ, hɛn yi susu yi enuwawa jiŋ ciwo yí le agbeɛ mɛ ji. Nyi yí taɖoɔ? Enu ŋtɔ́wo ciwo yí akpɔ dasɛ mɔ mɛ ci yí wa wo nya ŋɖɛ sugbɔ. Na nɔ exwe sugbɔɔ, jɔjɔmɛnunyatɔwo kpla nu so enu ciwo yí ɖo caxu ɖeka, keŋ yí trɔnɔ do nɔnɔ yí vakekenɔ nu. Jɔjɔmɛnunyatɔ ɖeka ci yí tɔ mɔ Nicola Fameli ɖemɛ mɔ le agbeɛ mɛɔ, enu sugbɔ li yí xlado nɔnɔ nu eɖekplɔɖedo, nɔ wosɔ ɖekaɔ, akpɔ xlaxla lɔ hanci nɛniɖe le mɛ. Wowo yí woyɔnɔ mɔ Fibonacci hlɛnhlɛnmɛ. Mìatɛnŋ akpɔ enu ciwo yí xlado nɔnɔ nu eɖekplɔɖedo sugbɔ le agbeɛ mɛ. Eɖewo yí nyi lé wleciviwo gbɛbɔbɔ ɖewo xlanɔ do nɔnɔ mɛ do, bɔŋgogo axu mɛ tɔ kpa, makpa ciwo yí nɔnɔ aciwo ji, koɖo flawa ci woyɔnɔ mɔ tournesol tamɛ. a

⁸ Nɔ vio kplakɔ nu so jɔjɔmɛnunya nu le sukluɔ, ávakpɔɛ mɔ esewo yí kplɔkɔ enu sugbɔ ciwo yí le agbeɛ mɛ. Le kpɔwɛ mɛ, nɛʒikpe hwɛhwɛ ciwo yí janɔ xonɔ do nɔnɔ nu yí eɖonɔ nɔnɔmɛtata ɖe ci woyɔnɔ mɔ fractals. Wogbekpɔnɔ fractal alɔkpa ŋtɔ́wo le enu sugbɔ buwo nu le agbeɛ mɛ. Vɔ mi yí do ese nɔ wo mɔ wo le nɔ toto nu yí wonyanɔ kpɔkpɔ ahan ɔ? Mi yí wa enu nyakpɔkpɔ cɛwoɔ? Lé vio bukɔ tamɛ kpɔ sugbɔ so nyɔbiɔse cɛwo nu doɔ, ahan lɔ ke yí kankandoji ci eɖo mɔ Mawu yí wa enuwo agbesɛnsɛnŋ doji nɛ. (Ebre. 3:4) Hweɖewonuɔ, àtɛnŋ abiɔ enyɔ cɛ vio se: “Nɔ nyi Mawu yí wa mì ɖe, desɔgbe mɔ mìakpɔɛ mɔ éɖo agbena mì agbenywinɔnɔse ciwo ji mìazɔn do keŋ akpɔ jijɔ le agbe mɛ ba?” Àtɛnŋ awɛ nɔ akpɔɛ mɔ Bibla mɛ yí woatɛnŋ akpɔ emɔdasɛnamɛ nywi ŋtɔ́wo le.

 WƐ NƆ AGBENYWINƆNƆSE BIBLA MƐ TƆWO AJƆNƆ EJI NƆ VIO

9. Nyi yí atɛnŋ ana yí ɖevi ɖe atɔ enyɔ biɔbiɔ se so enu ci yí taɖo ele veviɖe mɔ woawa do agbenywinɔnɔse Bibla mɛ tɔwo jiɔ?

⁹ Nɔ ao vi biɔ nyɔwo eo se so ŋci yí taɖo ele veviɖe mɔ woazɔn do agbenywinɔnɔse ciwo yí le Bibla mɛ nu maɔ, tekpɔ anya enu ciwo koŋ yí dɔ ebiɔbiɔ nyɔ lɔwo se. Agbenywinɔnɔse ciwo yí le Bibla mɛ dejɔnɔ ji nɔ ni koŋ yɔa, alo cukaɖa lɔ kpoŋ yí nyi mɔ nɔ éjikɔ axo nuxu nɔ mɛbuwoɔ, denya lé awɛ ahwlɛn ta nɔ ŋciwo ji exɔ se yɔa? Ðekpokpuiɖe ci anyiɔ, míatɛnŋ akpedo míwo vi nu yí agbenywinɔnɔse ciwo yí le Bibla mɛ ajɔnɔ ji nɔ ni nɔ míkplakpla Se Vivi Nɔ Agbe lɔ Sɔyi Mavɔ! wema lɔ yi. b

10. Lé atɛnŋ akpedo vio nu yí abu tamɛ kpɔ so ekacaca ci yí le wo koɖo Yehowa gblamɛ nuɔ?

¹⁰ Do ŋsɛn vio nɔ ekacaca ci yiŋtɔ ɖo koɖo Yehowa ale veviɖe ni. Nɔ èkplakɔ Bibla koɖo vioɔ, tekpɔ yí azannɔ nyɔbiɔse koɖo enutata ciwo yí le Se Vivi Nɔ Agbe lɔ Sɔyi Mavɔ! wema lɔ mɛ keŋ nɔ anu yi susuwo. (Elo. 20:5) Le kpɔwɛ mɛ, enukplakpla 8 tɔ lɔ sɔ Yehowa sɔ sɔ koɖo exlɔ ci yí lenɔ bu nɔ amɛ yí ɖonɔ ŋwi nɔ mì enu ciwo yí aglɔn ta nɔ mì yí agbehɛn nyɔna vɛ nɔ mì. Nɔ míkan seŋ so 1 Ʒan 5:3 nu ɖegbɔ ɖe, ètɛnŋ biɔ se mɔ, “Ci mìnya mɔ Yehowa nyi exlɔ nywi ŋtɔ́ han ɖe, lé mìɖo akpɔnɔ enu ciwo emɔ mìwo le wa doɔ?” Nyɔbiɔse ŋtɔ́ tɛnŋ ze shigbe nyɔbiɔse gbali ɖe kpoŋ hannɛ, vɔ yi biɔbiɔ se atɛnŋ akpedo vio nu yí akpɔɛ mɔ lɔnlɔn yí dɔ yí Mawu donɔ sewo nɔ mì.—Ezai 48:​17, 18.

11. Lé awɛ akpedo vio nu nɔ Bibla gɔnmɛɖosewo anyinɔ enuvevi niɔ? (Elododo Wema 2:​10, 11)

¹¹ Míkan seŋ so lé wawa do Bibla gɔnmɛɖosewo ji hɛnnɔ nyɔnawo vɛ nɔ mì do. Nɔ míhlɛnkɔ Bibla alo wakɔ sɛnsɛn nyidintɔ dojuɔ, míxo nuxu so lé wawa do Bibla gɔnmɛɖosewo ji kpedo míwo xomu nu do. Le kpɔwɛ mɛ, evio kpɔɛni mɔ nɔ wonyi edɔwatɔ bibi yí gbetonɔ nyɔnɔnwi ɖe, nyɔnawo tonɔ so mɛa? (Ebre. 13:18) Àtɛnŋ agbetɛ gbe do lé wawa do Bibla gɔnmɛɖosewo ji glɔnnɔ ta nɔ mì le ŋcilan mɛ koɖo le susu mɛ yí wogbekpɔnɔ jijɔ. (Elo. 14:​29, 30) Seŋkankan so gɔnmɛɖose ŋtɔ́ hanwo nu atɛnŋ akpedo vio nu yí nukplamu ciwo yí le Bibla mɛ agbejɔnɔ ji ni sɔwu sugbɔ doji.—Hlɛn Elododo Wema 2:​10, 11.

12. Lé vida ɖeka kpedo eviɛ ŋsuvi nu yí ekpɔɛ mɔ Bibla gɔnmɛɖosewo le veviɖe doɔ?

¹² Steve, ci yí nyi vida ɖeka le France, dre lé yi koɖo ashiɛ kpedo wowo vi ŋsuvihwɛ Ethan nu nɔ akpɔ mɔ lɔnlɔn yí dɔ yí Yehowa donɔ sewo nɔ mì. Énu mɔ: “Mìbiɔnɔ nyɔ cɛ hanwo yi se: ‘Nyi yí taɖo Yehowa ji mɔ mìwo le zɔn do gɔnmɛɖose cɛ jiɔ? Lé edasɛ do mɔ élɔn mìɔ? Nyi ajɔ nɔ dewa do gɔnmɛɖose cɛ jiɔ?’” Seŋkankan ŋtɔ́wo kpedo Ethan nu yí esɔ agbenywinɔnɔse Yehowa tɔwo sɔ wa yitɔ. Steve nu kpi mɔ: “Mìwo tajinu yí nyi mɔ mìakpedo Ethan nu nɔ akpɔɛ mɔ ŋɖɛnyanya ci yí le Bibla mɛ yi eji boo sɔwu agbetɔwo ŋɖɛnyanya.”

13. Lé jilawo atɛnŋ ana kpla wowo vi nɔ woawa do Bibla gɔnmɛɖosewo ji doɔ? Nà kpɔwɛ ɖeka.

¹³ Nà ekpla vio nɔ awa do Bibla gɔnmɛɖosewo ji. Emɔ ɖeka ci ji àto awɛ yí nyi mɔ nɔ woɖo dɔ nɔ vio le suklu mɔ yɛ le hlɛn wema ɖe. Wema lɔ tɛnŋ dasɛ mɔ mɛ ciwo yí wanɔ gbɔdɔndɔn masɔkoɖose nuwo koɖo mɛ ciwo yí wanɔ dɔmɛzi sugbɔ nyi mɛ ciwo yí ele mɔ woasran hannɛ. Àtɛnŋ ado ŋsɛn vio nɔ azan Bibla gɔnmɛɖosewo keŋ asɔ bu tamɛ kpɔ so mɛ ciwo nu wema lɔ xo nuxu so nuwanawo nu.  (Elo. 22:​24, 25; 1 Kor. 15:33; Fili. 4:8) Ŋtɔ́ tɛnŋ na yí ale gbesɔsɔ yí aɖe kunu nɔ yí cica koɖo yi suklukpenawo hwenu yí woale seŋ kankɔ so edɔ ci woɖo nɔ wo nu le suklu xɔ mɛ.

DRA AO VI DO DAÐƐ NƆ AHWLƐN TA NƆ YI JIXƆSEWO

14. Enukplakpla ci yí atɛnŋ ado vɔnvɔn nɔ Kristotɔ jajɛ ɖeɔ, yí nyi yí taɖoɔ?

¹⁴ Hweɖewonuɔ, Kristotɔ jajɛwo detɛnŋ gbenɔ dɔn yí ahwlɛn ta nɔ wowo jixɔsewo o. Wotɛnŋ vɔn nɔ woxoxoɔ nuxu so jɔ nuwo jɔ wowoŋtɔwo nu le suklu. Nyi yí taɖoɔ? Wowo cicawo tɛnŋ xo nuxu so jɔ nuwo jɔ wowoŋtɔwo nukplakpla lɔ nu shigbe ŋci yí sɔgbe hannɛ. Nɔ ènyi jila ɖe, lé àtɛnŋ akpedo ao vi nu nɔ aɖo kandoji sɛnŋ do yi jixɔsewo nuɔ?

15. Nyi yí akpedo Kristotɔ jajɛ ɖe nu nɔ agbekando yi jixɔsewo ji sɔwuɔ?

¹⁵ Kpedo vio nu nɔ agbeɖo kandoji do yi jixɔsewo nu sɔwu. Nɔ vio nya nu so nyɔnɔnwi ci yí kuso enuwawawo nuɔ, ŋkpɛn deɖo awɛ o. (2 Tim. 1:8) Nyi yí taɖo deɖo awa ahan niɔ? Jɔjɔmɛnunyatɔ sugbɔ can mɔŋje mɛ mɔ agbe lɔ deva le yiɖeki shi o, alo va le avomɛ o. Wokpɔnɔ kpeɖoji ci yí dasɛ mɔ amɛ nya ŋɖɛ ɖeka yí ɖo awa enujiŋ cɛwo le agbe mɛ. Ecɛ yí dɔ yí wodexɔnɔ gbe do jɔ nuwo jɔ wowoŋtɔwo nukplakpla lɔ ci wokplanɔ amɛwo le sukluwo pleŋpleŋ le nyigban lɔ ji o. Ecɛ ado ŋsɛn ao vi xɔse, nɔ ébu tamɛ kpɔ so susu ciwo yí dɔ taɖo yí nɔviŋsu koɖo nɔvinyɔnu buwo kando ji mɔ wa wowa agbe lɔ. c

16. Lé jilawo atɛnŋ akpedo wowo vi nu nɔ ahwlɛn ta nɔ xɔse ci eɖo mɔ Enuwowatɔ ɖeka liɔ? (1 Piɛ 3:15) (Kpɔ foto lɔ hɛnnɛ.)

¹⁶ Dra evio do nɔ ahwlɛn ta nɔ xɔse ci eɖo mɔ Enuwowatɔ ɖeka li. (Hlɛn 1 Piɛ 3:15.) Míatɛnŋ ato nyɔta eɖekplɔɖedo ci yí nyi “Sɔhɛwo Biana Be—Ðe Xexea Dzɔ Le Eɖokui Sia?” le jw.org ji yí akpedo mí nu. Eyi nakpedo evio nu nɔ asɔ enu ci yí awa dɔ do amɛwo ji sɔwu le nyɔ lɔwo mɛ keŋ nɔ akpedo wo nu nɔ woamɔŋje mɛ mɔ Enuwowatɔ ɖeka li. Ðo ŋwi ni mɔ deɖo ahwlɛn aɖe koɖo yi suklu kpenawo o. Do ŋsɛn yi mɔ nɔ mɛɖe ji mɔ yeaxo nuxu so nyɔta ŋtɔ́ han nuɔ, le ɖe nyɔ lɔwo mɛ kleŋkleŋ yí susu anɔ mɛ. Le kpɔwɛ mɛ, yi suklu kpena ɖe tɛnŋ nu mɔ: “Ŋci ŋkpɔ ɖekɛ ji nakando, yí  ŋdekpɔ Mawu kpɔ o.” Kristotɔ jajɛ lɔ atɛnŋ aɖo ŋci mɔ: “Sɔɛ mɔ èzɔnzɔn avesu ɖeka mɛ yí mɛɖekɛ dele enɔ o, eyi èyikɔ keke yí vakpɔ yí woku dotɔ ɖeka. À mɔ dotɔ lɔ vaje nɔ yiŋtɔ yɔa? Amɛ nyaŋɖɛ ɖe yí aku dotɔ lɔ kokoko, mìatɛnŋ anu mɔ xexegbɛ lɔ va le yiŋtɔ shia? Amɛ ɖe yí awɛ dandandan!”

17. Lé jilawo atɛnŋ awɛ akpedo wowo vi nu nɔ woaji emɔ ciwo ji woato keŋ anunɔ Bibla mɛ nyɔnɔnwi lɔ nɔ mɛbuwoɔ? Na kpɔwɛ ɖeka.

¹⁷ Do ŋsɛn vio nɔ anunɔ Bibla mɛ nyɔnɔnwi lɔ nɔ mɛbuwo nɔ emɔ ɖe vlɛ yí hun ni. (Rɔm. 10:10) Àtɛnŋ asɔ agbla ciwo yí aje yí asɔ xo nuxu so yi jixɔsewo nu asɔ sɔ koɖo agbla ci mɛɖe aje gbɔxwe axo mizikixonu ɖe. Doŋkɔɔ, miziki kplatɔ lɔ atɛnŋ asɔ eha ciwo yí atɛnŋ axo fafɛɖe. Le yiyimeɔ, mizikixoxo avale fafɛɖe ni. Ahanke, Kristotɔ jajɛ ɖe átɛnŋ azan nyɔgbe fafɛwo nɔ exokɔ nuxu so yi jixɔsewo nu nɔ mɛbuwo. Le kpɔwɛ mɛ, étɛnŋ biɔ yi suklu kpena se mɔ: “Ènya mɔ blaŋblaŋ ɔ, jɔjɔmɛnunyatɔwo kpɔnɔ do enu ciwo wowa do agbeɛ mɛ nu keŋ sɔ ɖenɔ enuɖewo tia? Na mìakpɔ video dojijɔnɔamɛ cɛ ɖa.” Nɔ édasɛ video eɖekplɔɖedo ciwo yí nyi Wowɛ yɔa? ɖegbɔɔ, étɛnŋ nu mɔ: “Nɔ wokanfu jɔjɔmɛnunyatɔwo ci wosran enu ciwo yí le agbeɛ mɛ yí sɔ ɖe enuwo ti ɖe, lé woavanu nɔ mɛ ci yí wa enu ciwo yí le xexegbɛ lɔ mɛɔ?” Enyɔ kleŋ ŋnɔwo sun keke kpɛtɛ cwin yí akpedo yí suklu kpena lɔ nu nɔ aji mɔ yeakpla nu so Yehowa nu.

KPƆTƆ AKPEKPEƐDO VIO NU NƆ ADO ŊSƐN YÍ XƆSE

18. Lé jilawo atɛnŋ akpɔtɔ adodoɔ ŋsɛn xɔse ci wowo vi ɖo do Mawu nuɔ?

¹⁸ Mìle xexe ci mɛ yí amɛ sugbɔ deɖo xɔse do Yehowa nu o. (2 Piɛ 3:3) Eyi taɖo jilawo, nɔ míkplakpla nu koɖo míwo viɔ, mído ŋsɛn yi nɔ akpla nyɔta ciwo yí akpedo nu nɔ adonɔ bubu Mawu Nyɔ lɔ koɖo agbenywinɔnɔse yitɔwo nu sɔwu. Kpedo nu nɔ enu nyakpɔkpɔ vovovo ciwo Yehowa wawo ana yí tamɛbubu enujikpekpe yitɔ ashinshin ɛ doji. Kpedo nu nɔ amɔŋje Bibla mɛ nyɔnuɖɛ ciwo yí vamɛ nywiɖe vɔ. Yí ci yí gbewu hunnɔwo pleŋ ɔ, do gbe ɖaɖa koɖo ao vi yí agbedo gbe ɖaɖa do ta ni. Nɔ èwɛ ahan ɔ, àtɛnŋ akando ji mɔ Yehowa acushi do agbla ciwo yí àje ji yí akpedo ao vi nu nɔ ado ŋsɛn yi xɔse.—2 Kro. 15:7.