Apotru Pɔlu ŋwlɛ nɔ yi kpena hamɛmɛshinshin Timɔte mɔ: “Le Mawu, Yesu Kristo koɖo Mawu dɔdɔla [cancanwo] ŋkɔ mɛ ɔ, ŋ dɔ eo mɔ wo le wa enu lɔwo. Vɔ, ŋgbe dohwɛ amɛ ɖe gbɔxwe a nya nyɔnɔnwi o. Ŋgbe nɔ̀ amɛ ɖe ji le wana lɔwo mɛ o.”—1 Tim. 5:21.

Doŋkɔɔ, mìaxo nuxu so mɛ ciwo mawudɔla cɛwo atɛnŋ anyi nu. Eze gbajɛɛ mɔ, wodenyi amɛ 144000 lɔwo o. Hwenu Pɔlu ŋwlɛ nu nɔ Timɔteɔ, fɔnfɔnsoku amɛshiaminɔwo tɔ yi jeŋkwi mɛ dekpɔ tɔ ji o. Apotru lɔwo koɖo amɛshiaminɔ buwo dekpɔtrɔ gbɔngbɔn mɛ nuwawawo hɔɖo o, eyi taɖo de wowo yí nyi “dɔdɔla cancan” lɔwo o.—1 Kor. 15:50-54; 1 Tɛs. 4:13-17; 1 Ʒan 3:2.

Ahanke, “dɔdɔla cancan” lɔwo datɛnŋ anyi mawudɔla ciwo yí gbe to wo le eshiɖɔɖɔ lɔ hwenu o. Mawudɔla cɛwo vaci Satana kpaxwe yí wovanyi gbɔngbɔnvɔnwo yí nyi ketɔnɔ nɔ Yesu. (Gɔnm. 6:2; Luiki 8:30, 31; 2 Piɛ 2:4) Le esɔ mɛɔ, woavasɔ wo do edumaɖosɛnxu mɛ na nɔ exwe 1 000 yí le yi goduɔ, woavagu wo koɖo Legba gbijigbiji.—Ʒuda 6; Enyɔ. 20:1-3, 10.

“Dɔdɔla cancan” cɛwo ciwo nu Pɔlu xo nuxu so ɖo anyi mawudɔla ciwo yí le jeŋkwi mɛ yí kpekpeɛ do “Mawu koɖo Yesu Kristo nu,” wo amɛve lɔwo nu woxo nuxu so le kpukpui lɔ ke mɛ.

Mawudɔla egbejinɔtɔ kotokun nɛniɖe yí li. (Ebre. 12:22, 23) Mìdatɛnŋ abui kpɔ mɔ wowo pleŋ wanɔ edɔ kuɖeka ŋmɛ le gaxoxo ɖekɛ lɔ mɛ o. (Enyɔ. 14:17, 18) Ðo ŋwi mɔ woɖo dɔ nɔ mawudɔla ɖeka yí evayi wu amɛ 185000 le Asiritɔwo hwakɔn mɛ. (2 Efy. 19:35) Woatɛnŋ aɖo edɔ nɔ mawudɔla sugbɔ “yí woava lɔ amɛ afɔklɛnnutɔwo koɖo mɛ ciwo pleŋ yí wanɔ enu manyɔmanyɔwo le Fyɔju yì tɔ mɛ swi.” (Mt. 13:39-41) Yí ebuwo tɛnŋ “bɔ amɛ cancan yì tɔwo do ju” le jeŋkwi mɛ. (Mt. 24:31) wotɛnŋ gbedɔ buwo yí woaglɔn ta nɔ mì le enuwo pleŋ mɛ.’—Eha. 91:11; Mt. 18:10; sɔ sɔ koɖo Matie 4:11; Luiki 22:43.

“Dɔdɔla cancan” ciwo nu 1 Timɔte 5:21 xo nuxu so tɛnŋ nyi dɔdɔla ciwo woɖo dɔ vevi ɖeka nɔ, nɔ woakpedo Mawu mɛwo nu. Le kpukpui cɛwo mɛɔ, Pɔlu xo nuxu nywi so hamɛmɛshinshinwo nu, ciwo nu woɖo ado bubu le hamɛ lɔ mɛ. le hamɛmɛshinshinwo kpaxweɔ, woɖo awa edɔ ci woɖo nɔ wo nywiɖe “yí woda nɔ mɛɖe ji le wowo nuwanawo mɛ o” yí wodeɖo asɔ gbeta ɖe alo aɖo kojo nɔ mɛɖe tamɛmabukpɔtɔ o. Lé ecɛ le veviɖe do yí dɔ yí Pɔlu ŋwlɛ nukplamu cɛ ci yí so gbɔngbɔn mɛ nɔ wo yí mɔ wo le edɔ wakɔ “le ŋkɔ nɔ Mawu koɖo Yesu Kristo koɖo [mawudɔla] cancanwo.” Eyi taɖo éze petii mɔ, woɖo edɔ nɔ mawudɔla ɖewo nɔ woakpedo hamɛ lɔ nu, le kpɔwɛ mɛ aglɔn ta ni, akpe ŋkuvi do kunuɖeɖe dɔ lɔ nu, yí agbeɖo gbe nɔ Yehowa.—Mt. 18:10; Enyɔ. 14:6.