1-2. (a) Lé eŋɛdu ci yí le Ezai 41:10 mɛ kpɔ ŋsɛn do nɔvinyɔnu ci yí tɔ mɔ Yoshiko ji doɔ? (b) Miwo yí atɛnŋ akpɔ nyɔna so eŋɛdu ci yí Yehowa na yí woŋwlɛn do Ezai 41:10 lɔ mɛɔ?

NƆVINYƆNU egbejinɔtɔ Yoshiko xɔ eŋɛvwinwo so yi doto gbɔ. Doto lɔ nu ni mɔ, wleci kankin yí kpɔtɔ ni yí aku. Lé nɔvinyɔnu lɔ wa nu doɔ? Yoshiko ɖo ŋwi Bibla kpukpui vevi ci yí nyi: Ezai 41:10. (Hliin.) Eyi esɔ egbe fafa yí nu nɔ doto lɔ mɔ, yedevɔn o, ɖo Yehowa le ye lɔ̀. * Enyɔ fakɔnnamɛ ciwo yí le kpukpui cɛ mɛ kpedo mìwo nɔvinyɔnu lɔ nu yí ekando Yehowa ji keŋkeŋ. Kpukpui ŋtɔ́ atɛnŋ akpedo mìwo can nu nɔ mìdo go cukaɖawo. Nɔ mìamɔŋje lé atɛnŋ akpedo mì nu doɔ, na nɔ mìagbeje susu ci yí taɖo Yehowa nu ŋɛdu ŋtɔ́ nɔ Ezai mɛ doŋkɔ.

² Le gɔnmɛjeje mɛɔ, Yehowa to Ezai ji yí nu enyɔ fakɔnnamɛwo nɔ Ʒuifu ciwo yí woakplɔ yi hwashigbemɛ le Babiloni. Ele ahan gan, denyi Ʒuifu ciwo yí yi hwashigbemɛ ɖekɛ yí akpɔ nyɔna so Yehowa ŋɛdu lɔ mɛ o, yi sɛntɔ ciwo yí li keke vaɖo egbɛ can akpɔ nyɔna so mɛ. (Ezai 40:8; Rɔm. 15:4) Egbɛɔ, mìle agbe le hwenu ci yí “cukaɖa sugbɔ” li mɛ, yí mìʒan ŋsɛndoamu nyɔ ci yí le Ezai wema mɛ sugbɔ wu.​—2 Tim. 3:1.

3. (a) Gbeɖu ciwo yí le Ezai 41:​10, ci yí nyi exwe 2019 mawunyɔkpukpui mɛ nɔ mìɔ? (b) Nyi yí taɖo mìʒan kankandoji nyɔ ciwo yí le gbeɖu cɛwo mɛɔ?

³ Le enyɔta cɛ mɛɔ, mìaxo nuxu so Yehowa gbeɖu amɛtɔn ciwo yí ado ŋsɛn mìwo xɔse, ciwo yí ena woŋwlɛn  do Ezai 41:10 mɛ nu: (1) Yehowa anɔ koɖo mì, (2) eyi nyi mìwo Mawu, koɖo (3) ákpedo mì nu. Mìʒan kankandoji nyɔ * cɛwo, ɖo shigbe Yoshiko hannɛɔ, mìdokɔ go cukaɖawo le agbe mɛ. Enubaɖa ciwo yí jɔkɔ le xexeɛ mɛ na yí mìle fun kpekɔ hɛnnɛ. Gbesɔ kpe niɔ, acɛkpakpa sɛnŋwo cikɔ yumɛ nɔ mɛɖewo le mì mɛ. Na nɔ mìagbeje kankandoji nyɔ amɛtɔn cɛwo mɛ ɖekaɖeka.

4. (a) Kankandoji nyɔ ŋkɔtɔ ci mɛ yí mìagbejeɔ? (Kpɔ gɔnmɛnuŋwlɛnŋwlɛn lɔ hɛnnɛ.) (b) Lé Yehowa senɔ le yiɖeki mɛ do mì nuɔ? (c) Lé enyɔ ci Mawu nu na èse le eoɖeki mɛɔ?

⁴ Doŋkɔɔ, Yehowa na kankandoji mì koɖo enyɔ cɛwo: “Ŋgbevɔn o, ɖo ŋle koɖo eo.” * Yehowa dasɛ mɔ yele koɖo mì sɔ to eɖesɔlemɛ koɖo lɔnlɔn yi tɔ ji. Do jeshi lé edasɛ yi lɔnlɔn koɖo seselelanmɛ citocito yi tɔ do nɔ mì ɖa. Yehowa nu mɔ: “È nyi amɛ vevi nɔ ŋ, eyi Na kɔ eo yì eji. Ŋ lɔn eo.” (Ezai 43:4) Ŋɖekpokpui dele xexegbɛ cɛ mɛ ana yí Yehowa ami yi sɛntɔwo lɔnlɔn o; ŋɖe deli axe mɔ ni yí ami egbeji nɔnɔ nɔ mì o. (Ezai 54:10) Lɔnlɔn koɖo exlɔnyinyi yi tɔ na edɔngbegbe sugbɔ mì. Átɛnŋ aglɔn ta nɔ mì le egbɛ, shigbe lé eglɔn ta nɔ yi xlɔ Abram (Abraxamu) do hannɛ. Yehowa nu ni mɔ: “Abram, ŋgbe vɔn o. Na nyi akpoxɔnu nɔ eo.”​—Gɔnm. 15:1.

5-6. (a) Lé mìwɛ yí nya mɔ Yehowa ji mɔ yeakpedo mì nu, nɔ mìdo go tetekpɔwoɔ? (b) Nyi yí mìatɛnŋ akpla so kpɔwɛ Yoshiko tɔ mɛɔ?

⁵ Mìnya mɔ Yehowa ji mɔ yeakpedo mì nu le mìwo cukadawo mɛ, ɖo éɖo gbe nɔ yi jukɔn mɔ: “Hwecinu cukaɖawo le eo ji ɔ, Ŋ le koɖo eo. Hwecinu a so etɔsasawo ɔ, da se vevi o. Hwecinu a ɖo afɔ ezo ji ɔ, dase vevi o. Ezoɖewo da wlɔ eo o.” (Ezai 43:2) Enyɔ cɛwo gɔnmɛ ɖe?

⁶ Yehowa deɖo gbe mɔ yeaɖe cukaɖa ciwo yí na agbe lɔ sɛnkɔŋ si o, vɔ datashi cukaɖa ciwo yí le shigbe “etɔsasawo” hannɛ alo tetekpɔ ciwo yí le shigbe “ezo” hannɛ yí woagble nu le mì nu  gbijigbiji o. Éna mì kankandoji mɔ yeanɔ koɖo mì yí akpedo mì nu mìato cukaɖa lɔwo mɛ. Nyi yí Yehowa awaɔ? Ána yí mìdavɔn o keŋ anɔ gbe ji ni, nɔ mìkpanŋkɔ eku can. (Ezai 41:13) Yoshiko ci nu mìxo nuxu so vayi, kpɔɛ mɔ nyɔnɔnwi yí enyɔ cɛ nyi. Eviɛ nyɔnuvi mɔ: “Lé nɔnyɛ gbe dɔn do, kpɔ ŋsɛn do mì ji sugbɔ. Mìdo jeshi mɔ Yehowa na ekpɔ fafa le yiɖeki mɛ nyao. Mama xokɔ nuxu nɔ doto lɔwo koɖo dɔnɔ buwo, so Yehowa koɖo gbeɖu yi tɔwo nu keke sɔyi yi ku gbe.” Nyi yí mìkpla so kpɔwɛ Yoshiko tɔ mɛɔ? Nɔ mìkando gbeɖu Mawu tɔ ci yí nyi mɔ “Ŋle koɖo eo” jiɔ, mìwo can mìagbe dɔn yí asɛnŋ nɔ mìtokɔ tetekpɔwo mɛ.

7-8. (a) Kankandoji nyɔ amɛvetɔ ci mɛ mìagbejeɔ, yí lé mìase gɔnmɛ ni doɔ? (b) Nyi yí taɖo Yehowa nu nɔ Ʒuifu ciwo yi le hwashigbemɛ mɔ: “Ŋgbelo nu kpɔ oɔ”? (c) Enyɔ ciwo yí le Ezai 46:​3, 4 mɛ yí kpedo Mawu jukɔn nu yí devɔn ɔ?

⁷ Do jeshi kankandoji nyɔ evetɔ ci yí Ezai ŋwlɛn ɖa: “Ŋgbelo nu kpɔ o, ɖo enyɛ yí nyi ao Mawu.” Gɔnmɛsese ci yí le enyɔ cɛ ci yí kudo enulolokpɔ nuɔ? Enyɔgbe ci wozan le Ebregbe mɛ yí sɔ xo nuxu so “lo nu kpɔ” nu le kpukpui cɛ mɛ, gɔnmɛsese yí nyi “àkpɔkɔ godu ɖo èvɔnkɔ mɔ enuɖe alo mɛɖe ado afɔku ye” alo “àkpɔkɔ nu shigbe mɛ ci yí vɔnkɔ mɔ afɔku ɖe ajɔ do ye ji hannɛ.”

⁸ Nyi yí taɖo Yehowa nu nɔ Ʒuifu ciwo woakplɔ yi hwashigbemɛ le Babiloni mɔ ‘woŋgbe lo nu kpɔ oɔ’? Ðo énya mɔ mɛ ciwo yí ayi eju lɔ mɛ avɔn dru. Nyi yí taɖo woavɔn ɔ? Le vɔvɔnu nɔ exwe 70 ciwo Ʒuifuwo awa le hwashigbemɛɔ, Meditɔwo koɖo Pɛsitɔwo hwakɔn sɛnŋwo aje Babiloni ji. Yehowa azan ahwakɔn cɛ yí ana ablɔɖe yi jukɔn so Babiloni shi. (Ezai 41:​2-4) Ci yí Babilonitɔwo koɖo jukɔn bu mɛ tɔ, ciwo yí li hwenɔnu do jeshi mɔ yewo ketɔnɔ gogo yewoɔ, wote kpɔ mɔ yewoakpɔtɔ agbe dɔn to nunu nɔ wowonɔnɔwo ji mɔ: “Sɛnŋ.” Wogbewa voju sugbɔ ciwo ji wokando mɔ woaglɔn ta nɔ yewo. (Ezai 41:​5-7) Le hwenɔnuɔ, Yehowa fa akɔn nɔ Ʒuifu ciwo yí le hwashigbemɛ to enyɔ cɛ nunu nɔ wo ji: “Eo, Izraɛli ye, anyi dɔwavi ènyi . . . Ŋgbelo nu kpɔ o, ɖo enyɛ yí nyi ao Mawu.” (Ezai 41:​8-10, nwt) Do jeshi mɔ, Yehowa nu mɔ: “Enyɛ yí nyi ao Mawu.” Yehowa kpedo yi sɛntɔ egbejinɔtɔwo nu mɔ wo le mi vɔnvɔn, to nunu nɔ wo mɛ mɔ yedaŋlɔbe wo o; ékpɔtɔ nyi wowo Mawu, yí wokpɔtɔ nyi yi jukɔn. Énu nɔ wo mɔ: “Na kpɔtɔ a hɛn mí yi a hwlɛn mí gan.” Le nyɔnɔnwi mɛɔ, kankandoji nyɔ cɛwo do ŋsɛn Ʒuifu ciwo yí le hwashigbemɛ.​—Hlɛn Ezai 46:​3, 4.

9-10. Nyi yí taɖo mìdeɖo avɔn ɔ? Na yi kpɔwɛ ɖeka.

⁹ Egbɛɔ, mɛ ciwo trɔdo mì lokɔ nu kpɔ sugbɔ sɔwu sa, ɖo xexeɛ mɛ nɔnɔmɛwo sɛnkɔŋ doji. Nyɔnɔnwi enyi mɔ mìwo can mìtotoɔ cukaɖa ɖekɛ lɔwo mɛ. Vɔ dele mɔ mìavɔn o. Yehowa nukɔ nɔ mì mɔ: “Enyɛ yí nyi ao Mawu.” Nyi yí taɖo enyɔ cɛwo nyi kankandoji nyɔ sɛnŋ ciwo yí ana mìdavɔnnɔɔ?

¹⁰ Sɔɛ mɔ Jim koɖo Ben ɖo yamɛhun ɖeka yí yamɛhun lɔ do go jihɔntwi gangan ɖeka. Hwecinu yí yamɛhun lɔ tokɔ jihuntwi lɔ mɛɔ, ehun lɔ kutɔ nu nɔ mɛ ciwo yí le mɛ mɔ: “Míbla míwo kpablanuwo. Mìakpɔtɔ atokɔ jihɔntwi lɔ mɛ na nɔ hwenu ɖe.” Jim tɔ vɔnvɔn sugbɔsugbɔ. Vɔɔ, ehunkutɔ lɔ gbenu mɔ: “Míŋgbelo nu kpɔ o. Míwo yamɛhunkutɔ lɔ  yí nui.” Hwenɔnuɔ, Jim hunhun ta yí mɔ, “Lé yɛwɛ yí nakɔ kankandoji ŋtɔ́ mìɔ?” Vɔ édo jeshi mɔ Ben yɛ devɔnkɔ kpetii o. Jim biɔɛ se mɔ: “Nyi yí taɖo devɔnkɔɔ?” Ben ko nukui yí mɔ: “Ðo ŋjeshi mɛ ci yí kukɔ yamɛhun lɔ ɖɛ nywiɖe. Danyɛ yɔ!” Ben nu ni hɔnnɔ mɔ: “Maxo nuxu so danyɛ nu nɔ eo. Ŋnya mɔ nɔ èjeshii, yí gbenya lé ebi le yamɛhun kuku mɛɔ, eo can davɔn o.”

11. Nyi mìatɛnŋ akpla so kpɔwɛ ci yí kudo amɛ amɛve ciwo yí ɖo yamɛhun lɔ gbɔɔ?

¹¹ Nyi yí mìatɛnŋ akpla so kpɔwɛ cɛ mɛɔ? Shigbe Ben hannɛɔ, mìdevɔnkɔ o ɖo mìjeshi Yehowa, mìwo Da ci yí le jeŋkwimɛ ɖɛ nywiɖe. Mìnya mɔ, ákpedo mì nu yí mìato cukaɖa sɛnŋsɛnŋ ɖekpokpui ci ava mì ji mɛ, le azan kpɛtɛkpɛtɛwo mɛ nɔ xexe cɛ. (Ezai 35:4) Ci mìkando Yehowa ji taɖo mìdevɔnnɔ o, nɔ xexeɛ mɛ tɔwo le vɔnvɔn mɛ gashiagamɛ can. (Ezai 30:15) Mìgbewanɔ nu shigbe Ben hannɛ, nɔ mìnunuɔ susu ciwo yí taɖo mìkando Mawu ji nɔ mìwo kpenawo. Ána yí wowo can akando ji mɔ nɔ yewodo go cukaɖa ɖekpokpuiɔ, Yehowa akpedo yewo nu.

12. (a) Kankandoji nyɔ amɛtɔntɔ ci mɛ mìagbejeɔ? (b) Ci woxo nuxu so Yehowa “ŋsɛn” nu ɖe, nyi eɖo ŋwi nɔ mìɔ?

¹² Do jeshi kankandoji nyɔ amɛtɔntɔ ci Ezai ŋwlɛn: “Nado ŋsɛn eo; nakpedo eo nu.” Doŋkɔɔ, Ezai dre lé Yehowa ado ŋsɛn yi jukɔn lɔ do ci enu mɔ: “[Yehowa], anyi Xwetɔ gbɔgbɔ koɖo ŋsɛn. Ázan Yi ŋsɛn yí akpa cɛ nɔ amɛwo plɛŋ.” (Ezai 40:10) Enyɔ cɛ na yí mìɖo ŋwi mɔ Yehowa nyi Efyɔ ŋsɛntɔnɔ. Ézan yi ŋsɛn ci ji mɛɖe datɛnŋ aɖu o, sɔ kpedo yi sɛntɔwo nu yí hwlɛn wo gan le blema; ahanke egbekpɔtɔ yí dokɔ ŋsɛn mɛ ciwo yí ɖo  ŋdo nu le egbɛmɛ yí gbeglɔnnɔ ta nɔ wo nɛ.​—2 Ese. 1:​30, 31; Ezai 43:10.

13. (a) Hwecinu yí Yehowa wanɔ do yi gbeɖu ci yí nyi mɔ, yeado ŋsɛn mì ji wuɔ? (b) Gbeɖu ci yí nanɔ ŋsɛn koɖo kankandoji mìɔ?

¹³ Nɔ ketɔnɔwo cikɔ yumɛ nɔ mì yí Yehowa wanɔ do yi gbeɖu cɛ ji wu: “Nado ŋsɛn eo.” Le eju ɖewo mɛ gbɛɔ, mìwo ketɔnɔwo teteɛ kpɔ veviɖe mɔ yewoaɖo te mìwo kunuɖeɖedɔ alo mìwo habɔbɔ lɔ. Ele ahan gan, mìdelonɔ nu kpɔ sugbɔ kudo amɛjijeje ŋtɔ́wo nu o. Yehowa ɖo gbe ɖeka, ci yí na ŋsɛn koɖo kankandoji sun mì shi. Éɖo gbe ɖɛ nɔ mì mɔ: “Ahwawanu ɖekpokpui ci yí woacu do eo nu daje ji o.” (Ezai 54:​17, nwt) Enyɔ cɛ na yí mìɖo ŋwi enu vevi amɛtɔn ji.

14. Nyi yí taɖo dekpaca mì mɔ Mawu ketɔnɔwo cikɔ yumɛ nɔ mìɔ?

¹⁴ Ŋkɔtɔ, shigbe Kristo dokplɔtɔwo nɛɔ, mìnya mɔ amɛwo axa mì. (Mt. 10:22) Yesu nu daɖɛ mɔ, woaci yumɛ nɔ ye dokplɔtɔwo veviɖe le ŋkeke kpɛtɛkpɛtɛwo mɛ. (Mt. 24:9; Ʒan 15:20) Amɛvetɔ, Ezai nyɔnuɖɛ lɔ kanxle mì mɔ, mìwo ketɔnɔwo awa nu wu amɛxaxa ɖekɛ; woazan ahwawanu hamɛhamɛ do mì nu. Ahwawanu lɔ ɖewo yí nyi: wotrɔnɔ ashi so ŋsukankan nyɔwo nu yí ale shigbe nyɔnɔnwi hannɛ, wokannɔ ŋsu so mì nu tiin alo wocinɔ yumɛ nɔ mì tamɛsɛnsɛntɔ. (Mt. 5:11) Yehowa dana yí ketɔnɔ lɔwo ami ahwawanu cɛwo zanzan do mì nu o. (Efe. 6:12; Enyɔ. 12:17) Vɔ dele mɔ mìavɔn o. Nyi yí taɖoɔ?

15-16. (a) Enu amɛtɔntɔ ci mìdeɖo aŋlɔbeɔ, yí lé Ezai 25:​4, 5 dasɛ yi doɔ? (b) Lé Ezai 41:​11, 12 dre enu ci yí avajɔ do mɛ ciwo yí fɔnkɔ ahwa do mì ji doɔ?

¹⁵ Do jeshi enu amɛtɔntɔ ci ele mɔ mìaɖo ŋwi. Yehowa nu mɔ “ahwawanu ɖekpokpui” ci woazan do mì nu “daje ji o.” Shigbe lé egli glɔnnɔ ta nɔ mì so jihɔnshi sɛnŋ shiɔ, ahanke Yehowa glɔnnɔ ta nɔ mì so “gbɔngbɔn funfun tamɛsɛntɔwo tɔ” shi nɛ. (Hlɛn Ezai 25:​4, 5, nwt.)  Mìwo ketɔnɔwo dasun ji adahɛn ŋɖe le mì nu, ci wodatɛnŋ adra do o.​—Ezai 65:17.

¹⁶ Yehowa gbedo ŋsɛn mì nɔ mìakando ji, ci edre enu ci yí avajɔ do mɛ ciwo yí “do dɔmɛzi do” mì nu ji. (Hlɛn Ezai 41:​11, 12.) Nɔ mìwo ketɔnɔwo fɔn ahwa ɖekpokpui do mì ji alo nɔ ahwa lɔ vasɛnŋ ɖekpokpuiɖe can ɔ, enu kuɖeka lɔ yí ato so mɛ. Eyi nyi mɔ: Mawu ketɔnɔwo pleŋ “a gu gbijigbiji.”

17-18. (a) Lé Bibla hlɛnhlɛn atɛnŋ ado ŋsɛn kankando Mawu ji mìwo tɔ doɔ? Na kpɔwɛ ɖeka. (b) Lé tamɛbubukpɔ so exwe 2019 mawunyɔkpukpui ci wocan nu, átɛnŋ akpedo mì nu doɔ?

¹⁷ Nɔ mìjeshi Yehowa ɖɛ nywiɖeɔ, mìagbekando ji sɔwu. Le nyɔnɔnwi mɛɔ, emɔ kuɖeka ci ji mìato ajeshi Mawu ɖɛ nywiɖe yí nyi mɔ, mìahlɛnnɔ Bibla nywiɖe yí abunɔ tamɛ kpɔ so enu ci mìhlɛn nu. Enujɔjɔ ŋtɔŋtɔ ciwo yí kudo lé Yehowa glɔn ta nɔ yi jukɔn do le blema, sugbɔ le Bibla mɛ. Enujɔjɔ ŋtɔ́wo na yí mìkando ji mɔ Mawu ale be nɔ mì le egbɛmɛ.

¹⁸ Do jeshi enyɔgbe wadɔdamɛji ci yí Ezai zan yí sɔ dasɛ lé Yehowa glɔnnɔ ta nɔ mì do le kpɔwɛnyɔnunu mɛ. Éxo nuxu so Yehowa nu shigbe lɛngbɔkplɔtɔ hannɛ yí yi sɛntɔwo nyi lɛngbɔwo. Ezai nu so Yehowa nu mɔ: ‘Yehowa azan yi lɔ̀ (ŋsɛn) yí abɔ yi lɛngbɔwo doju. Yehowa akɔ́ lɛngbɔviwo yí asɔ wo do yi lɔ̀wo mɛ.’ (Ezai 40:11) Nɔ mìkpɔɛ le susu mɛ mɔ Yehowa zan yi lɔ̀ sɛnŋwo sɔ trɔdo mìɔ, éna mìsenɔ le mìwoɖekiwo mɛ mɔ ékpɔkpɔ mì ji yí mìdegbevɔnnɔ o. Hwashi ŋɖɛnyatɔ koɖo egbejinɔtɔ lɔ sɔ Ezai 41:​10, nɔ anyi exwe 2019 mawunyɔkpukpui keŋ akpedo mì nu nɔ mìŋgbevɔn, nɔ mìdokɔ go cukaɖawo o. Eyi nyi: “Ŋgbelo nu kpɔ o, ɖo enyɛ yí nyi ao Mawu.” Bunɔ tamɛ kpɔ so kankandoji nyɔ cɛwo nu. Woado ŋsɛn eo nɔ ètokɔ cukaɖa ciwo yí ava le esɔmɛ mɛ.