1-2. (a) Nyi yí Yehowa kpɔnɔ nɔ amɛ linlɔn nɛniɖe bɔ yí awa Axwetɔ Fiɛfiŋɖuɖu lɔɔ? (Kpɔ foto ci yí le akpa lɔ ji.) (b) Nyi mɛ mìagbeje le enyɔta cɛ mɛɔ?

BU ENU ci Yehowa kpɔnɔ, hwecinu amɛ linlɔn nɛniɖe bɔ le xexe lɔ pleŋ mɛ yí awa Axwetɔ Fiɛfiŋɖuɖu lɔ kpɔ. Denyi lé amɛwo sugbɔ do ɖekɛ yí ekpɔnɔ o, égbedonɔ jeshi mɛ ciwo yí va domɛtɔ ɖekaɖeka. Le kpɔwɛ mɛ ékpɔnɔ egbejinɔtɔ ciwo yí vanɔ exweshiaxwe. Mɛɖewo le wo mɛ yí dokɔ go yumɛcici, gan yí vanɔ. Mɛbuwo devanɔ mìwo bɔbɔ kpɛtɛwo kabakaba o, vɔ wokpɔnɔ mɔ Eŋwiɖoɖo yɛ le veviɖe yewoava. Yehowa gbedonɔ jeshi mɛ ciwo yí va Eŋwiɖoɖo lɔ ŋkɔtɔ, ɖo wojikɔ akpɔ tritri.

² Kankandoji li mɔ ejɔnɔ ji nɔ Yehowa nɔ ékpɔ amɛ sugbɔ va Eŋwiɖoɖo lɔ. (Luiki 22:19) Ele ahan gan, denyi lé amɛwo va sugbɔ do yí nyi enu ŋkɔtɔ ci yí le veviɖe nɔ Yehowa o. Susu ci yí cucu wo yí wova, le veviɖe nɔ Yehowa wu. Le nyɔta cɛ mɛɔ, mìagbeje nyɔbiɔse vevi cɛ mɛ: Nyi yí taɖo mìyinɔ Eŋwiɖoɖo wana lɔ xweshiaxwe, yí gbeyinɔ kwɛshila ɖeshiaɖe bɔbɔ ciwo yí Yehowa ɖo ɖɛ nɔ mɛ ciwo yí luin ɔ?

3-4. (a) Nyi yí taɖo mìyinɔ bɔbɔwoɔ? (b) Nyi yí bɔbɔwo yiyi danasɛ so mì nuɔ? (c) Sɔ koɖo enyɔ ciwo yí le 1 Korɛntitɔwo 11:​23-26 mɛ ɖe, nyi yí taɖo mìdeɖo agɔn Eŋwiɖoɖo lɔɔ?

³ Susu vevi ŋkɔtɔ ci yí na mìyinɔ bɔbɔwo yí nyi mɔ, wonyi mìwo sɛnsɛn kpaxwe ɖeka. Mìgbeyinɔ bɔbɔwo nɔ Yehowa akpla nu mì. Egoyitɔwo dexɔɛ se mɔ, mɛɖe akpla ŋɖe yewo o. (3 Ʒan 9) To vo nɔ mɛ ŋtɔ́woɔ, mìjinɔ veviɖe  mɔ Yehowa koɖo yi habɔbɔ lɔ le kpla nu mì.​—Ezai 30:20; Ʒan 6:45.

⁴ Nɔ mìyinɔ bɔbɔwoɔ, mìdadasɛ mɔ mìsɔ mìwoɖekiwo hwe yí le gbesɔsɔ nɔ woakpla nu mì. Denyi ʒin woʒin mì ji taɖo mìyinɔ Eŋwiɖoɖo Yesu ku ji wana vevi lɔ o, amɛɖekisɔsɔhwe yí na mìwanɔ do Yesu se cɛ ji: “Mí [yi ji awɛni] nɛnɛ asɔ ɖonɔŋwi Ŋ.” (Hlɛn 1 Korɛntitɔwo 11:​23-26.) Bɔbɔ cɛ donɔ ŋsɛn esɔmɛ mɔkpɔkpɔ mìwo tɔ yí gbena mìɖonɔ ŋwi lé Yehowa lɔn mì do. Vɔ Yehowa nya mɔ denyi zeɖeka yí mìʒan akɔnfafa koɖo ŋsɛndoamu le exwe ɖeka mɛ o. Eyi taɖo eɖo bɔbɔ buwo nɔ mì le kwɛshila ɖeshiaɖe mɛ, yí biɔ so mì shi mɔ mìwo le yinɔ wo. Amɛɖekisɔsɔhwe na yí mìwanɔ do ji. Mìzannɔ gamɛ sugbɔ yí dranɔ bɔbɔ lɔwo do yí yinɔ wo kwɛshila ɖeshiaɖe.

5. Nyi yí taɖo mɛ ciwo sɔ wowoɖekiwo hwe wanɔ do Yehowa mɛyɔyɔ jiɔ?

⁵ Exweshiaxweɔ, Yehowa yɔnɔ amɛwo mɔ yeakpla nu wo, amɛ sugbɔ ciwo yí sɔ wowoɖekiwo hwe, lɔnnɔ do amɛyɔyɔ cɛ ji. (Ezai 50:4) Wosɔ jijɔ yinɔ Eŋwiɖoɖo lɔ, yí gbetɔnɔ bɔbɔ kpɛtɛwo yiyi. (Zak. 8:​20-23) Eji jɔnɔ mìwo koɖo amɛ yoyuwo, mɔ Yehowa, mɛ ci yí ‘donɔ alɔ̀ mì yí hwlɛnnɔ mì gan,’ le kpla nu mì yí adasɛ mɔ nɔ mì. (Eha. 40:17) Le nyɔnɔnwi mɛ ɖe, ŋɖe li ado jijɔ nɔ amɛ sɔwu mɔ, woalɔn do Yehowa koɖo Eviɛ Yesu ci elɔn sugbɔ mɛyɔyɔ jia?​—Mt. 17:5; 18:20; 28:20.

6. Lé amɛɖekisɔsɔhwe kpedo ŋsu ɖeka nu yí eva Eŋwiɖoɖo bɔbɔ lɔɔ?

⁶ Exweshiaxweɔ, mìjenɔ agbla yí yɔnɔ amɛ sugbɔ lé mìakpe ji do, nɔ woava Eŋwiɖoɖo Yesu ku wana lɔ. Amɛ sugbɔ ciwo yí sɔ wowoɖekiwo hwe lɔnnɔ do amɛyɔyɔ cɛ ji yí kpɔnɔ nyɔna so mɛ. Mìasɔ kpɔwɛ ɖeka. Exwe sugbɔ vayi yɛ yí nɔviŋsu ɖeka na Eŋwiɖoɖo mɛyɔwemavi ŋsu ɖeka, vɔ ŋsu lɔ nu ni mɔ yedatɛnŋ ava o. Ganŋkeɔ, ekpaca nɔvi lɔ ci ekpɔɛ fiɛfi lɔ yí eɖo Fyɔɖuxuxɔ mɛ, le Eŋwiɖoɖo lɔ hwenu. Lé nɔviwo xɔ ŋsu lɔ do, wa dɔ do ji sugbɔ keke etɔ bɔbɔwo vava kwɛshila ɖeshiaɖe. Le nyɔnɔnwi mɛɔ, bɔbɔ amɛtɔn pɛɛ yí deva o le exwe ci yí kplɔɛdo pleŋ mɛ. Nyi yí kpedo nu yí esɔ gbeta yí vanɔ bɔbɔ lɔwo pleŋ ɔ? Amɛɖekisɔsɔhwe na yí etrɔ yi susu. Nɔviŋsu ci yí yɔɛ va bɔbɔ lɔ vanu mɔ, “Ényi amɛ ci yí sɔ yiɖeki hwe sugbɔ.” Kankandoji li mɔ Yehowa yí duin va nɔ asiin. Evyɛɔ, ényi nɔviŋsu ci yí wa ʒinʒindoshimɛ.​—2 Sam. 22:28; Ʒan 6:44.

7. Lé enu ciwo yí mìkplanɔ le bɔbɔwo koɖo ciwo yí mìhlɛnnɔ le Bibla mɛ, kpenɔdo mì nu yí mìsɔnɔ mìwoɖekiwo hwe doɔ?

⁷ Enu ciwo mìkplanɔ le bɔbɔwo mɛ, koɖo ciwo mìhlɛnnɔ le Bibla mɛ, atɛnŋ akpedo mì nu yí mìasɔ mìwoɖekiwo hwe. Yesu kpɔwɛ koɖo amɛɖekisɔsɔhwe yi tɔ, ci edasɛ hwecinu esɔ yi gbe na koŋ nu yí mìwo bɔbɔwo xonɔ nuxu so le kwɛshila ciwo yí ado ŋkɔ nɔ Eŋwiɖoɖo lɔ mɛ. Gbesɔ kpe niɔ, anyɔ mɔ mìahlɛn Bibla mɛ nujɔjɔ ciwo yí trɔdo eku koɖo fɔnfɔnsoku Yesu tɔ, le ŋkeke ciwo yí ado ŋkɔ nɔ Eŋwiɖoɖo lɔ mɛ. Enu ci yí mìkplanɔ le bɔbɔ cɛwo mɛ koɖo ciwo yí mìhlɛnnɔ le Bibla nujɔjɔ cɛwo mɛ, na yí vɔnsa ci Yesu wa do ta nɔ mì jenɔŋ nɔ mì sugbɔ sɔwu. Ecɛ cucunɔ mì yí mìsrannɔ amɛɖekisɔsɔhwe nɔnɔmɛ yi tɔ yí gbewanɔ Yehowa dro, nɔ esɛnkɔŋ nɔ mì can.​—Luiki 22:​41, 42.

8. Lé Yesu dasɛ edɔngbegbe doɔ?

⁸ Mìgbejenɔ agbla mɔ mìadasɛ edɔngbegbe shigbe Yesu hannɛ. Bu tamɛ kpɔ  so edɔngbegbe ci edasɛ le ŋkeke ciwo yí do ŋkɔ nɔ yi ku nu. Énya nywiɖe mɔ dajinjin o, ye ketɔnɔwo ado ŋkpɛn ye, axo ye yí awu ye. (Mt. 20:​17-19) Ganŋke élɔn faa yí kpanŋkɔ ku. Ci ega lɔ xoɔ, énu nɔ apostolo egbejinɔtɔ ciwo yí le gbɔ le Gɛtisemani kpa lɔ mɛ mɔ: “Mí fɔn jete. Mì a soyì. Amɛ ci yí sa Ŋ gbɔgbɔ.” (Mt. 26:​36, 46) Ci yí amɛwo sɔ ahwawanuwo va mɔ yewoaliɔ, éxɔ ŋkɔ, yí nu nɔ sɔja lɔwo mɔ ye ke, vɔ wo le tashi apostolo ye tɔwo nɔ woayi. (Ʒan 18:​3-8) Edɔngbegbe gangan yí Yesu dasɛ! Egbɛɔ, Kristotɔ amɛshiaminɔwo koɖo lɛngbɔ bu lɔ mɛ tɔwo dokɔ agbla mɔ yewoadasɛ edɔngbegbe shigbe Yesu hannɛ. Léɔ?

9. (a) Taŋfuin, nyi yí taɖo mìɖo agbe dɔn gbɔxwe ayinɔ bɔbɔwo kabakabaɔ? (b) Ŋsɛn ci yí mìwo kpɔwɛ atɛnŋ akpɔ do mìwo nɔvi ciwo wocu do gakpamɛ do wowo xɔse ŋci jiɔ?

⁹ Nɔ mìtokɔ nɔnɔmɛ sɛnŋsɛnŋwo mɛɔ, taŋfuin aʒan mɔ mìagbe dɔn gbɔxwe ayinɔ bɔbɔwo kabakaba. Mìwo nɔviŋsu koɖo nɔvinyɔnu ɖewo sekɔ vevi, gbɔjɔ alo le dɔ̀, gan wokpɔtɔ vanɔ bɔbɔwo. Nɔvi buwo sɔ edɔngbegbe vanɔ bɔbɔwo, ci wowo xomumɛtɔ alo jumɛgawo cikɔ yumɛ nɔ wo can. Bu tamɛ kpɔ so lé mìwo kpɔwɛ kpɔnɔ ŋsɛn do mìwo nɔvi ciwo yí wocu do gakpamɛ, do wowo xɔse ŋci nu ji. (Ebre 13:3) Nɔ wose mɔ mìtokɔ tetekpɔwo mɛ, gan yí kpɔtɔ sɛnkɔ Yehowaɔ, édonɔ ŋsɛn xɔse, edɔngbegbe koɖo egbejinɔnɔ wowo tɔ. Apostolo Pɔlu to nɔnɔmɛ cɛ hanci mɛ. Hwecinu wocui do gakpamɛ le Rɔmaɔ, ejɔnɔ ji ni hweɖekpokpuinu, ci ese mɔ nɔviwo yi ji yí sɛnkɔ Mawu le egbejinɔnɔ mɛ. (Fili. 1:​3-5, 12-14) Ci ekpɔtɔ hwɛɖeka yí woaɖe Pɔlu ti alo ci woɖi ti zeɖekaɔ, éŋwlɛn lɛta nɔ Ebretɔwo. Le lɛta ŋtɔ́ mɛɔ, édo ŋsɛn Kristotɔ egbejinɔtɔwo mɔ, wo le “kpɔtɔ a lɔnlɔn [wowo]nɔnɔwo” yí woŋgbetashi wowo bɔbɔwo yiyi o.​—Ebre 10:​24, 25; 13:1.

10-11. (a) Miwo ele mɔ mìayɔ va Eŋwiɖoɖo lɔɔ? (b) Susu ci yí le Efezitɔwo 1:7 mɛ ci yí taɖo mìɖo awɛ ahan ɔ?

¹⁰ Mìdadasɛ edɔngbegbe nɔ mì yɔ mìwo xomumɛtɔwo, dɔmɛkpenawo koɖo mìwo kɔmɛtɔwo nɔ woava Eŋwiɖoɖo lɔ. Nyi yí taɖo mìyɔnɔ mɛ cɛwoɔ? Enu ci Yehowa koɖo Yesu wa nɔ mì, jeŋ nɔ mì sugbɔ keke mìdagɔn mɛbuwo yɔyɔ va Eŋwiɖoɖo lɔ o. Mìji mɔ wowo can le kpla nu so lé woawɛ atɛnŋ akpɔ nyɔna so “dɔnusoswi vevi” Yehowa tɔ to tafɛn lɔ mɛ nu.​—Hlɛn Efezitɔwo 1:7; Enyɔ. 22:17.

¹¹ Nɔ mìyikɔ bɔbɔwo koɖo edɔngbegbeɔ, mìgbedadasɛ nɔnɔmɛ vevi bu ci yí Mawu koɖo Eviɛ dasɛ wu kpɛtɛwo.

12. (a) Lé bɔbɔwo nanɔ yí mìwo lɔnlɔn nɔ Yehowa kodo Yesu gangannɔ doji doɔ? b) Nyi yí 2 Korɛntitɔwo 5:​14, 15 dodoɔ ŋsɛn mì mɔ mìwo le wa asɔ sran Yesuɔ?

¹² Lɔnlɔn ci mìɖo nɔ Yehowa koɖo Yesu, ʒinnɔ mì ji yí mìyinɔ bɔbɔwo. Enu  ciwo mìkplanɔ le bɔbɔwo gbenanɔ yí lɔnlɔn ci mìɖo nɔ Yehowa koɖo Eviɛ gangannɔ doji. Woɖonɔ ŋwi enu ciwo wowa nɔ mì le bɔbɔwo kabakaba. (Rɔm. 5:8) Lé lɔnlɔn ci woɖo nɔ mìwo koɖo mɛ ciwo denya lé tafɛn lɔ le veviɖe do o, gangan do yí Eŋwiɖoɖo lɔ yɛ ɖonɔ ŋwi nɔ mì koŋ. Mìjenɔ agbla yí srannɔ Yesu le mìwo gbeshiagbe gbenɔnɔ mɛ, yí sɔ danasɛ lé enu ci ewa jeŋ nɔ mì do. (Hlɛn 2 Korɛntitɔwo 5:​14, 15.) Gbesɔ kpe niɔ, mìwo jiwo cucunɔ mì yí mìkannɔfu Yehowa do tafɛn ci ena mì ŋci. Enyɔnuɖoɖo le bɔbɔwo mɛ nyi emɔ ɖeka ci ji mìatɛnŋ ato akanfui so ji mɛ.

13. Lé mìatɛnŋ adasɛ do mɔ lɔnlɔn ci mìɖo nɔ Yehowa koɖo Eviɛ gangan doɔ? Ðe mɛ.

¹³ Nɔ mìlɔn faa yí wa vɔnsa ɖekpokpui nɔ Yehowa koɖo Eviɛɔ, ádasɛ lé mìwo lɔnlɔn nɔ wo gangan do. Kabakabaɔ, mìwanɔ vɔnsa vovovowo gbɔxwe yí yinɔ mìwo bɔbɔwo. Hamɛ sugbɔtɔ wanɔ bɔbɔ ɖeka le edɔwagbe fiɛfi le kweshila lɔ mɛ, nɔ enu cikɔ nɔ amɛ sugbɔ can. Wogbewanɔ bɔbɔ bu le kwɛshila lɔ vɔvɔnu hwecinu yí amɛwo gbɔnkɔ domɛ. Vɔ Yehowa donɔ jeshi mɔ mìvanɔ bɔbɔwo, ci yí enu cikɔ nɔ mì can a? Kankandoji li mɔ édonɔ jeshi yi! Nyɔnɔnwi lɔ yí nyi mɔ, lé hanci yí mìdokɔ gbla sugbɔ doɔ, ahanke Yehowa donɔ afixɔxɔ sugbɔ lɔnlɔn ci mìɖo ni nu nɛ.​—Maki 12:​41-44.

14. Lé Yesu ɖo kpɔwɛ nywi do hwecinu edasɛ lɔnlɔn amɛɖekisɔsɔ savɔntɔɔ?

¹⁴ Yesu ɖo kpɔwɛ nywi nɔ mì, ci edasɛ lɔnlɔn amɛɖekisɔsɔ savɔntɔ. Denyi lɔn elɔn faa yí ku do ta nɔ yi nukplaviwo ɖekɛ yɔ o, égbesɔ ɖe le wowo nyɔna mɛ sɔwu yiŋtɔ tɔ, le lé enɔnɔ agbe do mɛ. Le kpɔwɛ mɛ, hwecinu enu cikɔ ni koɖo ci ele ŋshishi mɛ can ɔ, élɔn yí wa bɔbɔ koɖo yi dokplɔtɔwo. (Luiki 22:​39-46) Yi susu le enu ci ana amɛwo ji, denyi enu ci axɔ so amɛwo gbɔ ji ele o. (Mt. 20:28) Nɔ lɔnlɔn ci mìɖo nɔ Yehowa koɖo mìwo nɔviwo sɛnŋ sugbɔɔ, mìawa ŋɖekpokpui ci ji mìakpe ayinɔ Axwetɔ Fiɛfiŋɖuɖu lɔ koɖo bɔbɔ kpɛtɛwo pleŋ.

15. Miwo nu ele veviɖe mɔ mìakpedoɔ?

¹⁵ Mìle nɔvi Kristotɔwo habɔbɔ adodwitɔ ɖeka ci yí li mɛ, yí mìsɔ jijɔ zannɔ mìwo gamɛ lé mìakpe ji do yí yɔnɔ  amɛ yoyuwo nɔ woava. Ele ahan gan, kpekpedonu nana “hamɛvi xɔsetɔ” ciwo degbeɖenɔ kunu alo vanɔ bɔbɔwo o, le veviɖe nɔ mì wu. (Gal. 6:10) Mìdanasɛ nɔ wo mɔ mìlɔn wo, nɔ mìyɔnɔ wo va mìwo bɔbɔwo, vevitɔ nɔ Eŋwiɖoɖo wana lɔ. Shigbe Yehowa koɖo Yesu hannɛɔ, eji jɔnɔ mì sugbɔ nɔ mɛ ci yí gbɔjɔ le gbɔngbɔn mɛ trɔva Yehowa, mìwo lɛngbɔkplɔtɔ koɖo mìwo Da ci yí lɔn mì gbɔ.​—Mt. 18:14.

16. (a) Lé mìatɛnŋ ado ŋsɛn mìwo nɔnɔwo doɔ, yí nyi yí mìwo bɔbɔwo yiyi awa nɔ mìɔ? (b) Nyi yí taɖo esɔgbe mɔ mìaɖo ŋwi Yesu nyɔ ciwo yí le Ʒan 3:16 mɛ ji hwecɛnu le exwe lɔ mɛɔ?

¹⁶ Le kwɛshila ciwo yí gbɔkɔ mɛɔ, yɔ amɛwo lé àkpe ji do nɔ woava Eŋwiɖoɖo wana lɔ, le Vendredi 19 avril 2019 fiɛfi. (Kpɔ dakavi ci yí nyi “ Àji mɔ yeayɔ woa?”) Le exwe ci yí gbɔkɔ mɛɔ, mìji mɔ mìawa nushianu yí ado ŋsɛn mìwo nɔnɔwo, to bɔbɔ ciwo pleŋ Yehowa na mì yiyi kabakaba ji. Ci yí xexe cɛ vɔvɔnu gogokɔɔ, eʒan mɔ mìayinɔ mìwo bɔbɔ ciwo akpedo mì nu yí mìakpɔtɔ anyi mɛ ciwo yí sɔ wowoɖekiwo hwe, mɛ ciwo yí nyi edɔngbetɔwo koɖo mɛ ciwo yí lɔnnɔ amɛ. (1 Tɛs. 5:​8-11) Mína mìadasɛ seselelanmɛ ci mìɖo do lɔnlɔn gangan ci Yehowa koɖo Eviɛ ɖo nɔ mì nu, so mìwo ji pleŋ mɛ!​—Hlɛn Ʒan 3:16.