1. Susu ɖeka ci yí dɔ taɖo Yehowa ɖo alɔlele toto ɖɛɔ?

 YEHOWA nyi “jijɔ Mawu” yí eji mɔ mìwo can akpɔnɔ jijɔ. (1 Tim. 1:​11, NWT) Éna nu sugbɔ mì ciwo yí akpedo mì nu mìakpɔ jijɔ le agbeɛ mɛ. (Ʒaki 1:17) Ðeka le enunana cɛwo mɛ yí nyi alɔlele. Nɔ ŋsu ɖe koɖo nyɔnu ɖe lé alɔɔ, woɖo gbe nɔ wowonɔnɔwo mɔ yewoalɔn yewonɔnɔwo yí ado bubu yewonɔnɔwo nu yí agbedo vivi do yewonɔnɔwo nu. Nɔ lɔnlɔn ci woɖo nɔ wowonɔnɔwo kpɔtɔ sɛnsɛnŋ ɔ, atɛnŋ ahɛn jijɔ ŋtɔŋtɔ va.—Elo. 5:18.

 2. Nyi yí jɔnɔ le alɔlele sugbɔ mɛ gbɛɔ?

² Ewa ŋshishi mɔ, le xexeɛmɛ gbɛɔ, asu koɖo ashi sugbɔ ŋlɔbe egbe ci woɖo nɔ wowonɔnɔwo le alɔlele zangbe. Ecɛ na yí wodegbekpɔnɔ jijɔ o. Dejinjin yɛ o, Habɔbɔ ci yí Kpɔnɔ Lanmɛsɛn Nyɔwo gbɔ le Xexe lɔ mɛ nu mɔ ŋsu sugbɔ xonɔ wowo shiwo, nunɔ enyɔ manyɔmanyɔwo do wo nu yí sɛnnɔ tamɛ do wo nu. Ŋsu ci yí wanɔ ahan tɛnŋ wanɔ nu nywiɖe do ashiɛ nu koɖo bubu le amɛwo ŋmɛ, vɔ hwenu ele axo mɛɔ, avenɔ xomɛ di. Ŋsu sugbɔ kpɔnɔ mamaɖeɖenuwo, ecɛ dɔ yí wowo shiwo kpɔɛni mɔ wodelɔn yewo o yí woxanɔ le wowoɖekiwo mɛ.

 3. Nyiwo yí atɛnŋ adɔ yí ŋsu ɖe ave xomɛ do ashiɛ nuɔ?

³ Nyi yí tɛnŋ nanɔ yí ŋsu ɖewo wanɔ tamɛsɛnnuwo do wowo shiwo nuɔ? Taŋfuin wowo da ci yí hɛn wo venɔ xomɛ, eyi taɖo wokpɔɛni mɔ tamɛsɛnnuwawa denyi enudɔndɔn ɖe o. Mɛɖewo sɛnnɔ tamɛ do wowo shiwo nu, ɖo wokpɔnɔ ŋsu sugbɔtɔ wanɔ ahan le wowo kɔta mɛ. Ŋsu ŋtɔ́wo kpɔɛni mɔ yewoɖo ave xomɛ do yewo shiwo nu gbɔxwe woanya mɔ yewonyi “ŋsu agbo.” Ŋsu ɖewo detɛnŋ ɖunɔ wowoɖekiwo ji le enu sugbɔ mɛ o, dɔmɛzidodo can le mɛ hɛnnɛ. Ci ŋsu ɖewo kpɔnɔ mamaɖeɖenuwoɔ, edɔ yí wodegbevakpɔnɔ nyɔnuwo koɖo gbɔdɔndɔn do ŋɖe ji o. Gbesɔ kpe niɔ, nyɔtakankanwo dasɛ mɔ COVID-19 dɔ̀bamɛ lɔ  can dɔ yí cukaɖa ŋtɔ́wo gbevasɛnŋ kpi. Vɔ le nyɔnɔnwi mɛɔ, susu ɖekɛ deli ci yí adɔ yí ŋsu ɖe asɛn tamɛ do ashiɛ nu o.

 4. Nyi mɛ yí Kristotɔ ŋsuwo ɖo akpɔ wowoɖekiwo ji leɔ, yí nyi yí taɖoɔ?

⁴ Kristotɔ ŋsuwo ɖo akpɔnɔ wowoɖekiwo ji nɔ woŋgbevatɔ susu dɔndɔnwo ɖoɖo do nyɔnuwo nu o. a Nyi yí taɖoɔ? Susu ɖeka yí nyi mɔ enu ci wobubuɔ kpɔɔ, eyi vatonɔ le nuwanawo mɛ. Apotru Pɔlu kanxle Kristotɔ amɛshiaminɔ ciwo yí le Rɔma mɔ “[wo] ŋgbe sɔ xexe cɛ a sɔ wa kpɔwɛ o.” (Rɔm. 12:​1, 2) Hwenu Pɔlu ŋwlɛkɔ nu ɖaɖa Rɔmatɔwoɔ, ewa mɔ woɖo hamɛ lɔ exwe ɖewo ke. Vɔ, Pɔlu nyɔ lɔwo dasɛ mɔ mɛɖewo le hamɛ lɔ mɛ tashi wowoɖekiwo yí xexe lɔ trɔ wowo susuwo koɖo wowo nuwanawo. Ecɛ yí dɔ taɖo Pɔlu do ŋsɛn wo mɔ wo le trɔ wowo susuwo koɖo wowo nuwanawo. Kankandojitɔɔ, nukplamu cɛwo yikɔ nɔ Kristotɔ ŋsuwo gbɛ. Ewa ŋshishi mɔ, mɛɖewo le wo mɛ yí xexe lɔ trɔ wowo susu yí wosɛnnɔ tamɛ do wowo shiwo nu ŋtɔkpu. b Lé Yehowa kpɔkpɔ emɔ mɔ ŋsu ɖe awa nu ɖaɖa ashiɛ gbɔ doɔ? Mìkpɔ ɖoŋci lɔ le nyɔta cɛ kpukpui vevi mɛ.

 5. Sɔ koɖo 1 Piɛ 3:7 ɖe, lé ŋsu ɖe ɖo awa nu do ashiɛ nu doɔ?

⁵ Hlɛn 1 Piɛ 3:7. Yehowa nu nɔ ŋsuwo mɔ wo le do vivi do wowo shiwo nu. Vividodoamɛnu le lɛ yí nyi mɔ mìawa nu ɖaɖa amɛ ɖe gbɔ koɖo bubu. Ŋsu ci yí donɔ vivi do ashiɛ nu sɔ xomɛfafa koɖo lɔnlɔn wanɔ nu ɖaɖa gbɔ. Le nyɔta cɛ mɛɔ, mìakpɔ lé ŋsu ɖe adasɛ nɔ ashiɛ do mɔ yebuini yí gbeluinni. Vɔ doŋkɔɔ, mìakpɔ enuwana dɔndɔn ciwo yí denyɔ gbeɖe mɔ woawa ɖaɖa nyɔnuwo gbɔ o.

GBE ENUWANA DƆNDƆN CIWO YÍ DADO BUBU ASHIO NU O

 6. Lé ŋsu ciwo yí xonɔ wowo shiwo nu wanɔ nɔ Yehowaɔ? (Kolosetɔwo 3:19)

⁶ Amɛ shi xoxo. Yehowa gbe mɛɖekpokpui ci yí wanɔ tamɛsɛnnu. (Eha. 11:5) Ŋsu ciwo yí sɛnnɔ tamɛ do wowo shiwo nu venɔ Yehowa nu koŋ. (Mal. 2:16; hlɛn Kolosetɔwo 3:19.) Sɔ koɖo nyɔta lɔ kpukpui vevi ci yí nyi 1 Piɛ 3:7 ɔ, nɔ ŋsu ɖe dewanɔ nu ɖaɖa ashiɛ gbɔ nywiɖeɔ, ádahɛn ekacaca ci yí le wo koɖo Mawu gblamɛ. Taŋfuin Yehowa dagbeɖo to yi gbedodoɖawo ŋtɔkpu o. 

 7. Sɔ koɖo Efezitɔwo 4:​31, 32 ɖe, enyɔ ci hanwo yí datonɔ le aglan mɛ nɔ ŋsuwoɔ? (Gbekpɔ “Enyɔgbe Gɔnmɛɖeɖe.”)

⁷ Enyɔ veamɛwo nunu. Ŋsu ɖewo nunɔ enyɔ veamɛwo koɖo enyɔ dovevisesenamɛwo nɔ wowo shiwo keŋ yí sɔ sɛnnɔ tamɛ do wo nu. Vɔ Yehowa delɔnnɔ “dɔmɛzi dodowo, koɖo axwa dodowo koɖo evu wawawo koɖo xomɛ vevewo” o. c (Hlɛn Efezitɔwo 4:​31, 32.) Enyɔwo pleŋ Yehowa senɔ. Yehowa lénɔ ŋkuvi do lé ŋsu ɖe xonɔ nuxu nɔ ashiɛ do le wlawla mɛ le wowo xomɛ ŋtɔkpu can. Ŋsu ɖe ci yí xokɔ nuxu nɔ ashiɛ xomɛvevetɔɔ, denyi alɔlele yitɔ ɖekɛ nu edadahɛn nu le o, vɔ égbedadahɛn nu le ekacaca ci yí le wowo koɖo Yehowa gblamɛ nu hɛnnɛ.—Ʒaki 1:26.

 8. Lé ewanɔ nɔ Yehowa nɔ wokpɔkpɔ mamaɖeɖenuwoɔ, yí nyi yí taɖoɔ?

⁸ Mamaɖeɖenuwo kpɔkpɔ. Lé mamaɖeɖenuwo (alo pɔrno) kpɔkpɔ wanɔ nɔ Yehowaɔ? Evenɔ nu. Eyi taɖo, ŋsu ci yí kpɔkpɔ foto dɔndɔnwo dadahɛn ekacaca ci yí le wo koɖo Yehowa gblamɛ yí dedodoɔ bubu ashiɛ nu  hɛnnɛ o. d Yehowa kpɔkpɔ emɔ mɔ ŋsuwo le nɔ gbeji nɔ wowo shiwo le nuwana koɖo le susu mɛ can. Yesu nu mɔ ŋsu ci yí glogloɔ nyɔnu bu ɖe kpɔ keke yí edruiɔ, éwa hashi koɖi le “eji yitɔ mɛ” xoxoxo. e—Mt. 5:​28, 29.

 9. Nyi yí taɖo dejɔnɔ ji nɔ Yehowa nɔ ŋsu ɖe dodoɔ ŋkpɛn ashiɛ le gbɔdɔndɔn nyɔwo mɛɔ?

⁹ Amɛjiʒinʒin le gbɔdɔndɔn nyɔwo mɛ. Asu ɖewo ʒinnɔ wowo shiwo ji nɔ woawa gbɔdɔndɔn nu doŋkpɛn-amɛ ciwo yí ana yí wowo shiwo akpɔɛ mɔ yewodegbele mɛmiɖe o alo wodegbelɔn yewo o. Yehowa gbe amɛɖekɛtɔjiji koɖo tamɛmabu nuwana ŋtɔ́wo. Ékpɔkpɔ emɔ mɔ asu alɔn ashiɛ yí ado vivi yi nu yí ado bubu lé enuwo wanɔ ni do. (Efe. 5:​28, 29) Nɔ asu Kristotɔ ɖe donɔ ŋkpɛn ashiɛ le gbɔdɔndɔn nyɔwo mɛ alo sɛnnɔ tamɛ do nu alo kpɔnɔ mamaɖeɖenuwo vɔ ɖe? Lé atɛnŋ atrɔ yi susu koɖo yi nuwanawo doɔ?

LÉ WOAÐU NUWANA DOŊKPƐN-AMƐWO JI DO

10. Lé asuwo atɛnŋ akpɔ nyɔna so Yesu kpɔwɛ lɔ mɛ doɔ?

¹⁰ Nyi yí atɛnŋ akpedo asu ɖe nu yí ami tamɛsɛnnu koɖo ŋkpɛndoamu nuwo wawaɔ? Átɛnŋ aɖui mɔ yeasran Yesu. Ci Yesu yɛ deɖe nyɔnu kpɔ can ɔ, lé ewa nu ɖaɖa yi dokplɔtɔwo gbɔ do nyi kpɔwɛ nɔ lé asu ɖe awa nu ɖaɖa ashiɛ gbɔ do. (Efe. 5:25) Le kpɔwɛ mɛ, kpɔ ŋci asuwo atɛnŋ akpla so lé Yesu wa nu ɖaɖa apotru yitɔwo gbɔ do koɖo lé exonɔ nuxu nɔ wo do.

11. Lé Yesu wa nu do apotru yitɔwo nu doɔ?

¹¹ Yesu wanɔ nu ɖaɖa apotru yitɔwo gbɔ nywiɖe yí gbedonɔ bubu wo nu. Deve xomɛ do wo nu alo kpa acɛ do wo ji gbeɖe o. Ci Yesu nyi wowo Xwetɔ yí gbenyi Enukplamɛtɔ nɔ wo can ɔ, dezannɔ yi ŋsɛn yí asɔ kpakpa acɛ do wo ji yí woavɔnvɔn ni o. Ewaɖeɔ, ésɔ yiɖeki hwenɔ yí gbewanɔ edɔwo nɔ wo. (Ʒan 13:​12-17) Énu nɔ yi nukplaviwo mɔ: “[Míakpla] nu so ŋgbɔ, ɖo ŋfa xomɛ yí hwe nyɛɖeki kpɔtɔ le ji mɛ; eyi míakpɔ gbɔndomɛ.” (Mt. 11:​28-30, NWT) Ðo ŋwi mɔ Yesu hwenɔ yiɖeki kpɔtɔ. Mɛ ci yí hwenɔ yiɖeki kpɔtɔ denyi mɛ ci yí gbɔjɔ yɔ o. Ewaɖeɔ, ŋsɛn le shi yí esɔ ɖunɔ yiɖeki ji. Nɔ wodo dɔmɛzi ni can ɔ, ékpɔtɔ nɔnɔ kpuu yí dunɔ yiɖeki ji.

12. Lé Yesu xonɔ nuxu nɔ mɛbuwo doɔ?

¹² Yesu zannɔ nyɔgbe ciwo yí fanɔ akɔn nɔ amɛwo yí wogbekpɔnɔ gbɔndomɛ. Dexonɔ nuxu nɔ yi dokplɔtɔwo xomɛvevetɔ o. (Luiki 8:​47, 48) Hwecinu yi ketɔnɔwo zuizuiɛ yí teteɛkpɔ mɔ yewoado dɔmɛzi ni can ɔ, “dé ɖó zuzu lɔ nú o.” (1 Piɛ 2:​21-23, Ezoɖuɖu Yoyu Wema) Gaɖewomɛ ŋtɔkpu can ɔ, éɖuini mɔ yedaɖo nyɔ ŋci sɛnŋsɛnŋɖe o, keŋ bɔnɔ nu kpli. (Mt. 27:​12-14) Kpɔwɛ adodwi teŋ yí enyi nɔ Kristotɔ ŋsuwo!

13. Shigbe lé Matie 19:​4-6 nui nɛ ɖe, lé asu ɖe asɔ yiɖeki “axoca koɖo ashiɛ” doɔ? (Kpɔ foto lɔ hɛnnɛ.)

¹³ Yesu nu nɔ ŋsuwo mɔ wo le nɔ gbeji nɔ wowo shiwo. Étrɔ yí nu nyɔ ciwo Dalɔ nu ci yí nu mɔ, ŋsu ɖo “axoca koɖo ashiɛ.” (Hlɛn Matie 19:​4-6.) Grɛki nyɔgbe ci yí ze le akpaxwe cɛ ci yí nyi mɔ “axoca” tɛnŋ gbenyi mɔ “atre do nu”. Eyi taɖo, ekacaca ci yí le gblamɛ nɔ asu koɖo ashi ɖo asɛnŋ keke ale shigbe mɔ wotre wo do nɔnɔ nu hannɛ. Nɔ mɛɖe le wo mɛ do vevisese nɔ yi kpenaɔ, woamɛve lɔ akpefun. Asu ɖe ci yí tekpɔ yí ekacaca sɛnŋ ŋtɔ́ le gblamɛ nɔ wo koɖo ashiɛ ɖo atekpɔ agbe mamaɖeɖenu ɖekpokpui kpɔkpɔ. Éɖo aɖenɔ kɔ blaŋ nɔ “[ŋgbevakpɔ] enu gbaliwo” o. (Eha. 119:37) Nɔ mìanuiɔ, éwa nublabla koɖo yi ŋkuviwo mɔ yedasɔ gbɔdɔndɔn dro ɖe sɔ kpɔnɔ nyɔnu ɖe sɔwu mɔ ye shiye o.—Job 31:1.

14. Afɔ ciwo yí ŋsu ci yí venɔ xomɛ do ashiɛ ɖo aɖe keŋ adra ekacaca ci yí le wo koɖo Yehowa koɖo ashiɛ gblamɛ doɔ?

 ¹⁴ Asu ci yí xonɔ ashiɛ alo nunɔ enyɔveamɛwo keŋ asɔ vexomɛ do ashiɛ ɖo agbeɖe afɔ ɖewo keŋ adra ekacaca ci yí le wo koɖo Yehowa gblamɛ do. Afɔ ciwo eɖo aɖeɔ? Ŋkɔtɔɔ, éɖo anya mɔ yele cukaɖa sɛnŋsɛnŋ ɖeka mɛ. Ŋɖe dele wlawlamɛ nɔ Yehowa o. (Eha. 44:21; Ŋun. 12:14; Ebre. 4:13) Amɛvetɔ, ámi xomɛ veve do ashiɛ yí atrɔ yi dɛnwo. (Elo. 28:13) Amɛtɔntɔ, áɖe kuku nɔ Yehowa koɖo ashiɛ yí abiɔ wo sɔsɔke. (Edɔ 3:19) Éɖo agbeɖe kuku nɔ Yehowa mɔ, yɛ le na ye edro lɔ nɔ yeawa trɔtrɔ yí agbekpedo ye nu nɔ yeaɖunɔ yeɖeki ji le tamɛbubu, nuxuxoxo koɖo enuwana ye tɔyewo mɛ. (Eha. 51:​10-12; 2 Kor. 10:5; Fili. 2:13) Amɛnɛtɔ, áwa nu asɔgbe koɖo yi gbedoɖawo yí akpla lé awɛ agbe tamɛsɛnnuwawa alɔkpa ɖekpokpui koɖo nuxu veamɛwo xoxo. (Eha. 97:10) Amatɔntɔ, áɖeblɛ aji kpekpedonu so hamɛmɛshinshin amɛlɔntɔwo gbɔ le hamɛ lɔ mɛ nɔ woakpedo nu. (Ʒaki 5:​14-16) Amadɛntɔ, ábu tamɛ kpɔ so ŋciwo pleŋ yí azenɔ nɔ ŋgbevawu adɛn dɔndɔn ŋtɔ́ hanci ɖe le esɔ mɛ o. Ŋsu ci yí kpɔkpɔ mamaɖeɖenuwo ɖo aɖe afɔ ŋtɔ́wo hɛnnɛ. Yehowa acu shi do agbla ciwo yí aje ji yí atrɔ yi dɛn lɔwo. (Eha. 37:5) Vɔ, adɛn dɔndɔnwo tatashi ɖekɛ desun nɔ ŋsu ci yí ɖe nyɔnu o. Éɖo agbekpla lé ado vivi do ashiɛ nu do. Lé atɛnŋ awa cɛ doɔ?

LÉ ÀDO VIVI DO ASHIO NU DO

15. Lé asu ɖe atɛnŋ adasɛ do mɔ yelɔn ye shiyeɔ?

¹⁵ Dasɛ ni mɔ yeluin. Enumamɛ enyi nɔ ŋsu ɖewo ciwo yí ɖe nyɔnu mɔ woawa ŋɖe ŋkeke ɖeka duu keŋ asɔ dasɛ nɔ wowo shiwo lé yewolɔn wo sugbɔ do. (1 Ʒan 3:18) Asu ɖe tɛnŋ dasɛ nɔ ashiɛ mɔ yeluin le enu hwɛhwɛwo mɛ shigbe mɔ, ahɛn alɔ nɔ ashiɛ alo asɔ jijɔ afan ashiɛ. Étɛnŋ ŋwlɛ nu ɖɛɖɛ keŋ anu ni mɔ “Ao kpɔkpɔ drodroɔŋ” alo abiɛ se mɔ “Lé ŋkekeɛ yi do gbɛɔ?” Nɔ gamɛwo vayikɔɔ, átɛnŋ aŋwlɛ lɔnlɔn nyɔ ɖewo do wema ɖe ji keŋ asɔ dasɛ ni mɔ yeluin. Nɔ ŋsu ɖe wanɔ ŋcɛwoɔ, ádo vivi do ashiɛ nu yí alɔlele wowotɔ akpɔtɔ asɛnsɛnŋ.

16. Nyi yí taɖo asu ɖe ɖo akanfu ashiɛɔ?

¹⁶ Dasɛ ni mɔ yɛle veviɖe nɔ ye. Asu ɖe ci yí donɔ vivi do ashiɛ nu danasɛ ni mɔ yɛle veviɖe nɔ ye yí gbena evonɔ le yiɖeki  mɛ. Emɔ ɖeka ci ji ato awɛ yí nyi mɔ aɖonɔ ŋwi yí adanasɛ ni mɔ, ŋciwo pleŋ yɛwanɔ yí sɔ kpenɔdo ye nu jenɔŋ nɔ ye. (Kol. 3:15) Nɔ asu ɖe kannɔfu ashiɛ so eji mɛɔ, eji ajɔɛni. Ékpɔnɔ mɔ ye le vofamɛ, wolɔn ye yí gbedokɔ vivi do ye nu.—Elo. 31:28.

17. Lé asu ɖe atɛnŋ ado bubu ashiɛ nu doɔ?

¹⁷ Wanɔ xomɛvu yí adonɔ bubu yi nu. Asu ci yí lɔn ashiɛ kpɔɛni mɔ yi le veviɖe yí donɔ vivi do nu. Ékpɔɛni mɔ yɛnyi enunana vevi ɖeka so Yehowa gbɔ nɔ ye. (Elo. 18:22; 31:10) Ecɛ dɔ yí ewanɔ xomɛvu ni yí gbeluinni nywiɖe nɔ wole wowo ɖekɛ koɖo le gbɔdɔndɔn nyɔwo mɛ can. Daʒin ashiɛ ji nɔ woawa gbɔdɔndɔn nu ɖe ci yí adɔ davo le yiɖeki mɛ yí ado ŋkpɛn yi alo ayexa yitɔ avadokɔ hwɛ yi o. f Ŋsu lɔ can áje agbla nɔ ayexa yitɔ akpɔtɔ anɔ mɛmiɖe le Yehowa ŋmɛ.—Edɔ. 24:16.

18. Nyi asuwo ɖo aɖui koŋ yí awaɔ? (Kpɔ dakavi ci yí nyi “ Enu Amɛnɛ Ciwo mɛ yí Ànyi Asu ci yí Bunɔ Ashio le”)

¹⁸ Asuwo, míatɛnŋ akando ji mɔ Yehowa kpɔkɔ agbla ciwo míjekɔ yí ado vivi do míwo shiwo nu le akpaxwe ɖeshiaɖe nɔ míwo gbe yí ejekɔŋ ni. Ðui koŋ yí adonɔ vivi do nu yí aze nɔ enuwana dɔndɔnwo keŋ afanɔ xomɛ yí adonɔ bubu yi nu yí agbeluinni. Nɔ èwɛni ahan ɔ, àdasɛ ni mɔ yeluin yí yɛ le veviɖe nɔ ye. Do vivi do ashio nu, eyi àglɔn ta nɔ ekacaca vevitɔ ci yí nyi exlɔnyinyi ci yí le míwo koɖo Yehowa gblamɛ.—Eha. 25:14.