1. Nyi mìatɛnŋ awa yí ado jijɔ nɔ Yehowaɔ?

 SƆƐ mɔ èna enuzanzan vevi ɖeka ci yí nyakpɔkpɔ mɛɖe ci èlɔn. Ave nɔ eo sugbɔ nɔ mɛ lɔ sɔ enu lɔ sɔ yi wla ɖɛ yí degbeɖokɔ ŋwi yi kpetii o! Le emɔ bu nuɔ, kankandoji li mɔ, ajɔ eji nɔ eo sugbɔ nɔ amɛ lɔ waɖaŋ zanzan enu lɔ yí dasɛ mɔ yɛjeŋ nɔ ye. Susu lɔ ɖe? Yehowa sɔ Eviɛ na dota nɔ mì. Kpɔ lé ajɔ eji nɔ Yehowa do nɔ mìdasɛ mɔ lɔnlɔn ci eɖo nɔ mì yí cu tafɛn ci yí nyi enunana vevi jeŋ nɔ mì ɖa!—Ʒan 3:16; Rɔm. 5:​7, 8.

 2. Nyi nu mìaxo nuxu so le nyɔta cɛ mɛɔ?

² Nɔ exwewo vayikɔɔ, mìtɛnŋ vatɔ kpɔkpɔɛ shigbe mɔ tafɛnvɔnsa lɔ degbenyi enunana vevi hannɛ. Avale shigbe mɔ mìsɔ enunana Mawu tɔ sɔ wla do ŋɖe mɛ hannɛ. Ejɔ eji nɔ mì ci wona mì, vɔ mìvasɔ do texwe ɖe ci mìdagbekpɔkpɔɛ alo abu tamɛ kpɔ so nu kpetii o. Nɔ enu cɛ ŋgbevajɔ do mì jiɔ, mìɖo abunɔ tamɛ gashiagamɛ so enu ci Mawu koɖo Kristo wa nɔ mì nu. Enyɔta cɛ atɛnŋ akpedo mì nu mìawɛ ahan. Mìaxo nuxu so lé mìatɛnŋ akpɔ nyɔna so tafɛnvɔnsa lɔ mɛ le kakacɛ mɛ koɖo lé mìawɛ akpɔ nyɔna so mɛ le esɔ mɛ. Mìagbekpɔ lé mìatɛnŋ adasɛ mɔ lɔnlɔn Yehowa tɔ jeŋ nɔ mì, vevitɔ le Eŋwiɖoɖo hwenu cɛ mɛ.

LÉ MÌKPƆKƆ NYƆNA DO LE KAKACƐ MƐ

 3. Emɔ ɖeka ci ji mìato yí aɖu ele nɔ tafɛn lɔ kakacɛɔ?

³ Mìɖuɖuɔ ele nɔ Kristo tafɛnvɔnsa lɔ vɔ. Le kpɔwɛ mɛ, to tafɛn lɔ jiɔ, Yehowa sɔ mìwo nuvɔnwo kenɔ mì. Denyi dandanmɛ yí eɖo asɔ mìwo nuvɔnwo ke mì o. Vɔ yiŋtɔ yí ji mɔ yeasɔ enu ke mì. Ehakpatɔ lɔ dasɛ enujeŋnamɛ yitɔ ci eji eha mɔ: “[Oo Yehowa,] È nyɔ yí nyi ŋshishikunɔamɛtɔ.”—Eha. 86:5; 103:​3, 10-13.

 4. Miwo yí Yehowa cu tafɛn lɔ nɔɔ? (Luiki 5:32; 1 Timɔte 1:15)

 ⁴ Etɛnŋ wa nɔ mɛɖewo shigbe mɔ yewodeje nɔ Yehowa asɔ enu ke yewo hannɛ. Nyɔnɔnwi enyi mɔ mì pleŋ mìdeje o. Apotru Pɔlu mɔŋje mɛ mɔ yenyi “amɛ ci yí de je mɔ woayɔ mɔ amɛdɔdɔ o.” Ele ahan gan, énu kpi mɔ: “Sɔ to Mawu dɔnusoswi mɛ yí ŋ va trɔsun enu ci ŋ nyi.” (1 Kor. 15:​9, 10) Nɔ mìtrɔ ji mɛ so mìwo nuvɔnwo mɛɔ, Yehowa sɔ nu kenɔ mì. Nyi yí taɖoɔ? Ðo denyi ci mìje ni taɖo yɔ o, vɔ lɔnlɔn ci eɖo nɔ mì yí dɔ. Nɔ èkpɔɛni gbɛmɛgbɛmɛ mɔ yedenyi ŋɖewanuɔ, ɖo ŋwi mɔ Yehowa decu tafɛn lɔ nɔ agbetɔ maɖonuvɔnwo o, vɔ nuvɔnwatɔ ciwo yí trɔ ji mɛwo yí ecui nɔ.—Hlɛn Luiki 5:32; 1 Timɔte 1:15.

 5. Mɛɖe le mì mɛ yí akpɔ mɔ yeje yí axɔ ŋshishikunamɛ Yehowa tɔa? Ðe mɛ.

⁵ Amɛ ɖekɛ deɖo akpɔɛ le mì mɛ mɔ yeje yí axɔ ŋshishikuku Yehowa tɔ o, nɔ mìgbewa exwe sugbɔ le yi sɛnsɛn mɛ can. Le nyɔnɔnwi mɛɔ, ejɔnɔ eji nɔ Yehowa nɔ mìsɔ exwe sugbɔ sɔ sin le egbejinɔnɔ mɛ. (Ebre. 6:10) Ésɔ Eviɛ sɔ na mì faa, denyi edɔ ciwo mìwa ni fɛn yí esɔ cu nɔ mì o. Eyi taɖo denyɔ mɔ mìabuini mɔ ci mìwa exwe sugbɔ le Yehowa sɛnsɛn mɛɔ, mìje nɔ sɔsɔke Yehowa tɔ o. Nɔ mìbubuiɛ ahan ɔ, ele shigbe mìnunuɔ mɔ Yesu ku lɔ denyi ŋɖe hannɛ.—Sɔ sɔ koɖo Galatitɔwo 2:21.

 6. Nyi yí taɖo Pɔlu wa edɔ sɛnsinɖe le Yehowa sɛnsɛn mɛɔ?

⁶ Pɔlu nya mɔ nɔ yewa edɔ sugbɔ nɔ Yehowa can ɔ, yedeje yí axɔ sɔsɔke Yehowa tɔ o. Vɔ nyi yí taɖo ewa edɔ sugbɔ le Yehowa sɛnsɛn mɛɔ? Dewɛkɔ ahan keŋ aje yɔ o, vɔ èwɛkɔ ahan keŋ adasɛ mɔ adɔnusoswi Yehowa tɔ jeŋ nɔ ye. (Efe. 3:7) Shigbe Pɔlu nɛɔ, denyi kpɔ mɔ mìje yí axɔ ŋshishikunamɛ Yehowa tɔ taɖo yí mìkpɔtɔ yí mìsinsin ɛ koɖo ezolelanmɛ o, vɔ mìwɛkɔ ahan keŋ adasɛ mɔ yi jeŋ nɔ mì.

 7. Emɔ bu ci nu mìkpɔkpɔ nyɔna so tafɛnvɔnsa lɔ mɛ le kakacɛ mɛɔ? (Rɔmatɔwo 5:1; Ʒaki 2:23)

⁷ Emɔ bu ci mɛ mìkpɔnɔ nyɔna so tafɛnvɔnsa mɛ le kakacɛ mɛ yí nyi mìatɛnŋ anɔ ekacaca nywi mɛ koɖo Yehowa. a Shigbe lé hanci mìkpɔɛ le nyɔta ci yí vayi mɛ nɛɔ, hwenu woji mìɔ, mìdele ekacaca nywi mɛ koɖo Mawu o. Vɔ sɔ to tafɛn lɔ jiɔ, “fafa le mìwo koɖo Mawu gblamɛ” yí mìatɛnŋ ate gogui le kakacɛ mɛ.—Hlɛn Rɔmatɔwo 5:1; Ʒaki 2:23.

 8. Nyi yí taɖo mìɖo ado akpe nɔ Yehowa nɔ mɔnukpɔkpɔ ci ena mì, ci yí nyi gbedodoɖaɔ?

⁸ Bu tamɛ kpɔ so akpaxwe ɖeka nɔ ekacaca ci yí le mìwo koɖo Yehowa gblamɛ ci yí nyi gbedodoɖa. Denyi gbedoɖa ciwo yí Yehowa mɛwo bɔnɔ doju yí wanɔ ni ɖekɛ yí esenɔ o, vɔ égbesenɔ gbedoɖa ci mìwo ɖekaɖeka wanɔ ni. Gbedoɖa atɛnŋ afa eji nɔ mì yí ana yí mìavo le susu mɛ, vɔ denyi enunywi ŋtɔ́ kpoŋ ɖekɛ yí ewanɔ nɔ mì o. Atɛnŋ ado ŋsɛn ekacaca ci yí le mìwo koɖo Mawu gblamɛ. (Eha. 65:2; Ʒaki 4:8; 1 Ʒan 5:14) Hwenu Yesu le nyigban jiɔ, édonɔ egbe ɖaɖa blaŋblaŋ ɖo énya mɔ Yehowa ɖonɔ eto ye, yí ana yí ekacaca ci yí le wo koɖo Edalɔ gblamɛ asɛnŋ doji. (Luiki 5:16) Jijɔ gangan enyi nɔ mì mɔ to Yesu tafɛnvɔnsa lɔ jiɔ, mìatɛnŋ anyi Yehowa xlɔwo yí agbexonɔ nuxu Ni ŋtɔkpu to gbedodoɖa mɛ!

LÉ MÌATƐNŊ AKPƆ NYƆNA DO LE ESƆ MƐ

 9. Lé Yehowa sɛntɔ egbejinɔtɔwo avaɖu ele nɔ tafɛn lɔ do le esɔ mɛɔ?

⁹ Lé Yehowa sɛntɔ egbejinɔtɔwo avakpɔ nyɔna so tafɛnvɔnsa lɔ mɛ le esɔ mɛɔ? Yehowa avana wo agbe mavɔ. Amɛ sugbɔ kpɔɛni mɔ yi datɛnŋ anyi ahan o, ɖo  agbetɔ sugbɔ ku so exwe kotokun nɛniɖe ke. Vɔ enu ci Yehowa drɔ nɔ agbetɔwo le gɔnmɛjejeɛ mɛ yí nyi mɔ woanɔ agbe tɛgbɛɛ. Nɔ Adamu dewa nuvɔn saɔ, mɛɖe dakpɔɛ mɔ agbe tɛgbɛɛ nɔnɔ nyi edrɔxwe nyɔ ɖe o. Ci agbe tɛgbɛɛ nɔnɔ nyi enugangan do nu nɔ mì le kakacɛ mɛ can ɔ, mìatɛnŋ akando ji mɔ anyi ahan, ɖo Yehowa cu efɛn vevi ɖeka ci yí nyi Eviɛ vevi ci esɔ na mì.—Rɔm. 8:32.

10. Nyi amɛshiaminɔwo koɖo lɛngbɔ bu mɛ tɔwo kpɔkɔ emɔ nɔɔ?

¹⁰ Ci agbe tɛgbɛɛ nɔnɔ nyi nyɔna ci mìavakpɔ le esɔ mɛ can ɔ, Yehowa jijiɛ mɔ mìabubuɔ tamɛ kpɔ so lé ale do le kakacɛ mɛ. Amɛshiaminɔwo kpɔkɔ emɔ nɔ agbe tɛgbɛɛ nɔnɔ le jeŋkwi mɛ yí woaɖu efyɔ do nyigban ji koɖo Kristo. (Enyɔ. 20:6) Lɛngbɔ bu mɛ tɔwo kpɔkɔ emɔ mɔ yewoavanɔ agbe le Paradiso mɛ le nyigban ji yí avavo so vevisese koɖo enulolokpɔwo mɛ. (Enyɔ. 21:​3, 4) Ènyi ɖeka le lɛngbɔ bu mɛ tɔwo mɛ yí kpɔkpɔ emɔ nɔ agbe tɛgbɛɛ nɔnɔ le nyigban jia? Shicu cɛ dehwe wu ci woakpɔ le jeŋkwi mɛ o! Yehowa wa agbetɔwo nɔ woanɔ agbe le nyigban ji. Eyi taɖo agbe tɛgbɛɛ nɔnɔ le nyigban ji ana mìakpɔ jijɔ sugbɔ haan.

11-12. Shicu ɖewo ciwo yí mìavakpɔ le Paradiso mɛ ciwo nu mìatɛnŋ abu tamɛ kpɔ soɔ? (Kpɔ foto lɔwo hɛnnɛ.)

¹¹ Kpɔ lé agbe lɔ anɔ do le Paradiso mɛ le nyigban ji. Davɔn mɔ yealé edɔ̀ alo aku o. (Ezai 25:8; 33:24) Yehowa akpɔ ao ʒan veviwo gbɔ keŋkeŋ. Nyiwo yí èji mɔ yeakplaɔ? Le kpɔwɛ mɛ, èji mɔ yeakpla nu so elanwo nua? Èji mɔ yeakpla mizikixoxoa? Lé wotanɔ enuwo doa? Kankandoji li mɔ, woavaʒan exɔxɔcucuɖaŋɖetɔwo, exɔcutɔwo koɖo agbledetɔwo. Agbevaʒan mɔ mɛɖewo ali yí awanɔ dɔwanuwo, adranɔ wo do, aɖanɔ enu yí agbelé bu nɔ ʒardɛn nyakpɔkpɔwo mɛ. (Ezai 35:1; 65:21) Ci agbe tɛgbɛɛ nɔnɔ le ŋkɔ nɔ mìɔ, mìakpɔ gamɛ yí abi le enu ciwo yí dronɔ mì wo wawa mɛ.

¹² Jijɔ gangan yí anyi nɔ mì mɔ mìadokɔ wezɔn nɔ mɛ ciwo yí woafɔn so  eku wo! (Edɔ. 24:15) Kpɔɛ le susu mɛ ɖa, gbekpɔ jijɔ ci àkpɔ nɔ èkpɔkpɔ enuwawa domahlɛn Yehowa tɔwo yí kplakpla enu sugbɔ so Yehowa nu. (Eha. 104:24; Ezai 11:9) Ci yí gbenyɔ wu enu hunnɔwo pleŋ ɔ, àkpɔ jijɔ sugbɔ nɔ èsɛnkɔ Yehowa yí degbedokɔ ehwɛ eoɖeki hwɛɖeka kpetii o! Àsɔ “jijɔ ci yí le enuvɔnwawa mɛ sɔnanɔ hwenu kleŋ ɖé” sɔ ɖɔli shicu sugbɔ cɛwo ciwo yí àvakpɔ le esɔ mɛa? (Ebre. 11:25) Mìkando ji mɔ dawɛ ahan o! Shicu cɛwo le veviɖe sɔwu vɔnsa ɖekpokpui ci mìɖo awa le kakacɛ mɛ. Ðo ŋwi mɔ Paradiso le nyigban ji danyinyiɛ esɔ mɛ mɔkpɔkpɔ tɛgbɛɛ o. Enyi enuŋtɔŋtɔ ci yí avajɔ le nyigban ji. Nɔ Yehowa delɔn mì keke yí sɔ Eviɛ sɔ na mì saɔ, enu cɛwo ɖekɛ danyi wawa o!

DASƐ MƆ LƆNLƆN YEHOWA TƆ JEŊ NƆ YE

13. Lé mìawɛ adasɛ mɔ lɔnlɔn Yehowa tɔ jeŋ nɔ mìɔ? (2 Korɛntitɔwo 6:1)

¹³ Lé mìawɛ adasɛ mɔ tafɛn lɔ ci Yehowa na mì jeŋ nɔ mìɔ? Mìawa ahan nɔ mìsɔ yi dɔwo sɔ ɖo texwe ŋkɔtɔ le mìwo gbe mɛ. (Mt. 6:33) Nɔ mìanuiɔ, Yesu ku dota “nɔ amɛshamɛ nɔ amɛleagbuwo da gbe nɔ̀nɔ agbe nɔ wowoɖekiwo o. Vɔ wo a nɔ̀ agbe nɔ amɛ ci yí ku yí gbe fɔnjete dota nɔ wo.” (2 Kor. 5:15) Kankandojitɔɔ, ci Yehowa wa xomɛvu nɔ mìɔ, mìji mɔ mìawa ci ji mìkpe yí asin keŋ adasɛ ni mɔ enu ciwo pleŋ ewa nɔ mì jeŋ nɔ mì.—Hlɛn 2 Korɛntitɔwo 6:1.

14. Lé mìawɛ aɖo xɔse do emɔdasɛnamɛ Yehowa tɔ nuɔ?

¹⁴ Mìatɛnŋ agbedasɛ mɔ lɔnlɔn Yehowa tɔ jeŋ nɔ mì nɔ mìɖo xɔse do nu yí zɔnnɔ do yi mɔdasɛnamɛwo ji. Léɔ? Nɔ mìjikɔ asɔ gbetawo shigbe fini mìayi suklu asɛn han alo edɔ ci han mìalɔn awaɔ, mìɖo aji enu ci Yehowa jijiɛ mɔ mìwo le wa kpɔ. (1 Kor. 10:31; 2 Kor. 5:7) Nɔ mìwanɔ enu koɖo xɔseɔ, enunywi ciwo yí ajɔ yí nyi mɔ xɔse ci mìɖo do Yehowa nu koɖo exlɔ ci mìnyi koɖi asɛnsɛnŋ doji. Emɔkpɔkpɔ mìwotɔ agbevasɛnŋ doji.—Rɔm. 5:​3-5; Ʒaki 2:​21, 22.

15. Lé mìatɛnŋ adasɛ enujeŋnamɛ mìwotɔ le Eŋwiɖoɖo lɔ hwenuɔ?

¹⁵ Enubu li ci mɛ mìagbedasɛ le mɔ lɔnlɔn Yehowa tɔ jeŋ nɔ mì. Eyi nyi mɔ mìazan Eŋwiɖoɖo hwenu lɔ keŋ asɔ dasɛ nɔ Yehowa lé tafɛn lɔ jeŋ nɔ mì do. Gbesɔ kpe nɔ toto ci mìawa le Eŋwiɖoɖo lɔ hwenuɔ, mìatɛnŋ ayɔ mɛbuwo nɔ woava. (1 Tim. 2:4) Dre enu ciwo yí ajɔ le Eŋwiɖoɖo lɔ hwenu nɔ mɛ ciwo èjikɔ ayɔ lɔwo. Àtɛnŋ akpɔ enu ci yí akpedo wo nu nɔ èdasɛ video ciwo yí nyi Nyi yí taɖo Yesu kuɔ? koɖo Ðoŋwi Yesu ku ji le jw.org ji. Hamɛmɛshinshinwo le ɖo ŋwi ayɔ mɛ ciwo yí gbɔjɔ le gbɔngbɔn mɛwo. Kpɔ jijɔ ci yí ani le jeŋkwi mɛ koɖo nyigban ji nɔ mɛɖewo le Yehowa lɛngbɔ bubuwo mɛ trɔva yi lɛngbɔha lɔ mɛ ɖa! (Luiki 15:​4-7) Mìawɛ keke  nɔ le Eŋwiɖoɖo lɔ hwenuɔ, ŋgbenyi mìwonɔnɔwo ɖekɛ yí mìado gbe nɔ o, vɔ mɛ ciwo yí nyi amɛyoyuwo koɖo mɛ ciwo yí degbeva bɔbɔwo kpɔ hɔɖo o. Mìji mɔ woakpɔɛ mɔ woxɔ yewo nywiɖe!—Rɔm. 12:13.

16. Nyi yí taɖo mìɖo aji mɔ mìawa sugbɔ doji le gbɔngbɔn mɛ dɔwo mɛ le Eŋwiɖoɖo lɔ hwenuɔ?

¹⁶ Àtɛnŋ awa gbɔngbɔn mɛ dɔwo sugbɔ le Eŋwiɖoɖo lɔ hwenua? Enyi emɔ nywi ɖeka ci ji mìato yí adasɛ mɔ enu ciwo pleŋ Mawu koɖo Kristo wa nɔ mì jeŋ nɔ mì. Lé èwakɔ sugbɔ doji le Yehowa sɛnsɛn mɛ doɔ, ahanke agbekpekɔ do eo nu nɛ. Ecɛ adɔ yí kankandoji ci mìɖo do nu agbesɛnŋ doji. (1 Kor. 3:9) Gbesɔ kpe niɔ, tekpɔ yí azɔn do Eŋwiɖoɖo Bibla hlɛnhlɛn toto ci yí le Gbeje Enuŋwlɛŋwlɛ lɔwo mɛ Ŋkeŋke alo ci yí le kwɛshila dodomɛ bɔbɔ nukplawema mɛ ji. Àtɛnŋ agbezan Bibla kpaxwe ŋtɔ́wo asɔ wa toto nɔ amɛɖekɛnukplakpla aotɔ.

17. Nyi yí jɔnɔ eji nɔ nɔ Yehowaɔ? (Gbekpɔ Dakavi ci yí nyi: “ Enu Ciwo mɛ Mìadasɛ le mɔ Yehowa Lɔnlɔn Jeŋ nɔ mì.”)

¹⁷ Nyɔnɔnwi enyi mɔ ao nɔnɔmɛ lɔ datɛnŋ aɖe emɔ nɔ eo nawa do enu ciwo pleŋ wonu le nyɔta cɛ mɛ ji o. Vɔ ɖo ŋwi mɔ Yehowa dekpɔkpɔ emɔ mɔ yeasɔ lé èwa edɔ do sɔ sɔ koɖo ciwo mɛbuwo wa o. Ékpɔnɔ enu ci yí le ji mɛ nɔ eo. Nɔ ékpɔ le ao ji mɛ mɔ tafɛn lɔ ci yí nyi enunana vevi jeŋ nɔ eoɔ, ejɔnɔ eji ni.—1 Sam. 16:7; Maki 12:​41-44.

18. Nyi yí taɖo Yehowa Mawu koɖo Yesu Kristo nu jeŋ nɔ mìɔ?

¹⁸ Tafɛn lɔ ɖekɛ yí adɔ woasɔ mìwo nuvɔnwo ke mì, anyi exlɔ bakpomadɔnwo koɖo Yehowa yí akpɔkpɔ emɔ nɔ agbe tɛgbɛɛ nɔnɔ. Mì le dasɛ gashiagamɛ mɔ lɔnlɔn Yehowa tɔ jeŋ nɔ mì, ci yí dɔ yí mìatɛnŋ akpɔ shicu ŋtɔ́wo. (1 Ʒan 4:19) Mìagbedasɛ nɔ Yesu can mɔ yi nu jeŋ nɔ mì. Eyɛ ci yí lɔn mì sugbɔ keke yí sɔ nyigban ji gbenɔnɔ yitɔ sɔ na dota nɔ mì!—Ʒan 15:13.