ENUKPLAKPLA NYƆTA 3
EHAJIJI 35 “Kpɔ Enu Ciwo yí Le Veviɖe Wu Ajeshi”
Sɔ Gbeta Ciwo yí Ado Jijɔ Nɔ Yehowa
“[Vɔnvɔn nɔ Yehowa] nyi afɔɖeɖe ŋkɔtɔ ɖaɖa ŋununyanya xɔxɔ gbɔ. Tɔhonɔ ŋununyanya xɔxɔ nyi afɔɖeɖe ŋkɔtɔ ɖaɖa enugɔnmɛsese gbɔ.”—ELO. 9:10.
SUSU VEVI LƆ
Mìakpɔ lé mìazan enujejeshi, enumɛmɔŋje koɖo nugɔnmɛsese yí asɔ sɔ gbeta nywiwo do.
1. Cukaɖa ci mì pleŋ donɔ goɔ?
ŊKEKE ÐEKAÐEKA duuɔ, mìɖo asɔ gbetawo. Ðewo degbɔnnu sɔsɔ o, shigbe enu ci mìaɖu nyidin alo hwenu mìayi mlɔn anyi nɛ. Enyɔ buwo li yí gbeta sɔsɔ so wo nu gbɔnnɔnu haan. Mìtɛnŋ sɔ gbeta ɖe yí awa nu do mìwo lanmɛsɛn, mìwo jijɔkpɔkpɔ, mìwo mɛveviwo alo sɛnsɛn ci mìsɔ nakɔ Yehowa nu. Mìji mɔ mìwo gbetasɔsɔwo awa nywi nɔ mìwoŋtɔwo koɖo mìwo xomumɛtɔwo. Ci yí gbele veviɖe sɔwu yí nyi mìkpɔkpɔ emɔ mɔ mìwo gbetasɔsɔwo ado jijɔ nɔ Yehowa.—Rɔm. 12:1, 2.
2. Afɔ ciwo mìaɖe gbɔxwe yí asɔ gbeta nywiwoɔ?
2 Kankandoji li mɔ àsɔ gbeta nywi sɔwu nɔ (1) ènya enuwo pleŋ so enu lɔ nu, (2) èji Yehowa susu le nyɔ lɔ mɛ, yí (3) èda gbeta ciwo yí èsɔ lɔwo kpɔ. Le nyɔta cɛ mɛɔ, mìaxo nuxu so afɔɖeɖe ŋtɔ́wo nu yí woagbekpedo mì nu mìakpɔ lé mìawɛ ana ekpla enugɔnmɛsese ŋsɛn mìwotɔ do.—Elo. 2:11.
NYA ENUWO PLEŊ SO NYƆ LƆ NU
3. Dre enu ci yí taɖo eʒan mɔ woɖo anya enuwo pleŋ so nyɔ ɖe nu gbɔxwe yí asɔ gbeta ɖe.
3 Afɔɖeɖe ŋkɔtɔ ci yí ana mìasɔ gbeta nywiwo yí nyi mɔ mìanya enuwo pleŋ so nyɔ lɔ nu. Nyi yí taɖo ecɛ le veviɖeɔ? Sɔɛ mɔ dɔ̀nɔ ɖe va doto de gbɔ nɔ ale ŋkuvi do lanmɛsɛn cukaɖa sɛnŋsɛnŋ ɖe ci edokɔ go nu. Doto lɔ atɛnŋ atɔ edɔ̀ dada nɔ amɛ lɔ nɔ degbeje yi lanmɛ kpɔ alo biɔ enyɔwo yi sea? Kankandoji li mɔ dawɛ ahan o. Eo can àtɛnŋ asɔ gbeta nywiwo nɔ èbu tamɛ kpɔ nywiɖe doŋkɔ so enu ciwo pleŋ yí kan ao nɔnɔmɛ lɔ nu. Lé àtɛnŋ awa ecɛ doɔ?
4. Sɔ koɖo Elododo Wema 18:13 ɖe, lé àwɛ akando ji mɔ yenya enuwo pleŋ so nyɔ ɖe nuɔ? (Kpɔ foto lɔ hɛnnɛ.)
4 Àtɛnŋ anya enuwo pleŋ so nyɔ ɖe nu nɔ èbiɔnɔ enyɔwo se. Mìasɔɛ le kpɔwɛ mɛ mɔ woyɔ eo nɔ ejunɔnɔ ɖe. Èɖo ayia? Nɔ denya nu so mɛ ci yí yɔ eo lɔ nu alo ci yí wa toto lɔ nuɔ, eʒan mɔ àbiɔ nyɔ cɛ hanwo eoɖeki se: “Fini koɖo hwenu yí mìavabɔ doɔ? Amɛwo asugbɔ ava enɔa? Mi yí jikɔ akpɔ enu lɔ jiɔ? Miwo yí jikɔ ava enɔ lɔɔ? Nyiwo yí amɛwo jikɔ awa le nɔ lɔɔ? Woana aha muamɛ amɛwoa?” Ðoŋci nɔ nyɔbiɔse ŋtɔ́wo akpedo eo nu yí nasɔ gbeta nywi.—Hlɛn Elododo Wema 18:13.
Nya enuwo pleŋ so enu lɔ nu yí abiɔ enyɔwo se (Kpɔ mamamɛ 4) a
5. Nɔ ènya enuwo pleŋ so nyɔ ɖe nu ɖegbɔ ɖe, nyi èɖo awaɔ?
5 Ci ènya enu lɔwo ɖegbɔɔ, bu tamɛ nywiɖe so nɔnɔmɛ lɔ pleŋ nu. Le kpɔwɛ mɛ, nɔ èvanya mɔ mɛ ciwo yí jikɔ ava enɔwo dezɔnnɔ do Bibla gɔnmɛɖosewo ji o yí aha muamɛwo ale enɔ yí amɛwo anukɔ yí mɛɖe dale enɔ yí alé ŋkuvi do wo nu nɔ woŋgbenu aha sugbɔ ɖe, èkpɔɛ mɔ ejunɔnɔ ŋtɔ́ atɛnŋ avatrɔ azanɖuɖu vwin ɖea? (1 Piɛ 4:3) Le akpa bu jiɔ, nɔ azanɖuɖu lɔ gamɛ vajinjinkɔ sugbɔ ɖe, atɛnŋ ana yí àji gamɛ nɔ bɔbɔwo alo datɛnŋ gbeyi kunuɖegbea? Nɔ èvamɔŋje enyɔ lɔwo pleŋ mɛɔ, avale fafɛɖe nɔ eo mɔ, àsɔ gbeta nywi. Vɔ afɔ buwo li yí èɖo agbeɖe. Ènya lé èkpɔkpɔ nɔnɔmɛ lɔ do, vɔ lé awa nɔ Yehowa yɛɔ?—Elo. 2:6.
JI YEHOWA SUSU KPƆ
6. Sɔ koɖo Ʒaki 1:5 ɖe, nyi yí taɖo mìɖo ado gbe ɖaɖa nɔ Yehowa nɔ akpedo mì nuɔ?
6 Biɔ Yehowa nɔ akpedo eo nu nɔ namɔŋje yi susuwo mɛ. Yehowa ɖo gbe mɔ yeana mì ŋɖɛnyanya nɔ mìanya gbeta ciwo mìasɔ yí ajɔ eji ni. Énanɔ nunya ŋtɔ́ “amɛshamɛ faa koɖo xomɛ.”—Hlɛn Ʒaki 1:5.
7. Lé àwɛ anya Yehowa susuɔ? Na kpɔwɛ ɖeka.
7 Nɔ èdo gbe ɖaɖa nɔ Yehowa mɔ yi le dasɛ emɔ nɔ eye ɖegbɔɔ, lé ŋkuvi do lé ana eo ɖoŋci lɔ do nywiɖe. Kpɔwɛ ɖeka ke: Nɔ èyikɔ eju ɖe mɛ yí buɔ, àtɛnŋ abiɔ eju lɔ mɛ tɔ ɖe se nɔ akpedo eo nu. Vɔ àso axɔ emɔ keŋ gbɔxwe amɛ lɔ avana ɖoŋci lɔ eoa? Oo, dawɛ ahan o. Àɖo eto amɛ lɔ nywiɖe nɔ adasɛ emɔ nɔ eo. Ahanke, nɔ èbiɔ Yehowa mɔ yi le na ŋɖɛnyanya yeɔ, tekpɔ yí akpɔ lé eɖo ŋci nɔ eo do, nɔ èji ese koɖo gɔnmɛɖose ciwo yí le Bibla mɛ ciwo yí sɔ koɖo ao nɔnɔmɛ lɔ. Le kpɔwɛ mɛ, gbɔxwe àsɔ gbeta so ejunɔnɔ ci nu mìxo nuxu so vayi mɔ yeayi alo yedayi nuɔ, ètɛnŋ kpɔ enyɔ ciwo Bibla nu so azan vwinwo ɖuɖu, egbɛ vwinwo dodo koɖo lé ele veviɖe mɔ woasɔ Fyɔɖuxu lɔ nuwo ɖo texwe ŋkɔtɔ nɔ mìwoŋtɔwo drowo do.—Mt. 6:33; Rɔm. 13:13; 1 Kor. 15:33.
8. Nyi àtɛnŋ awa nɔ èʒan kpekpedonu nɔ enu ci èjijiɛ kpɔɔ? (Kpɔ foto lɔ hɛnnɛ.)
8 Hweɖewonuɔ, ètɛnŋ ʒan kpekpedonu gbɔxwe yí akpɔ enyɔ ciwo yí èjijiɛwo. Ètɛnŋ biɔ nukplamu nɔviŋsu ɖe alo nɔvinyɔnu ci yí to enu sugbɔ mɛ le agbe mɛ gbɔ. Vɔ, àgbekpɔ nyɔna nɔ eoŋtɔ èji nugɔnmɛ kpɔ. Enu sugbɔ le mìwo nukplakpla dɔwanuwo mɛ shigbe Numekuku Ŋuti Mɔfiagbalẽ Na Yehowa Ðasefowo koɖo Kpukpui Ciwo Akpedo mì nu Mìanɔ Agbe Mɛ̀mi mɛ. Ðo ŋwi mɔ ye tajinu lɔ yí nyi mɔ yeasɔ gbeta ci yí ado jijɔ nɔ Yehowa.
Ji Yehowa susu kpɔ (Kpɔ mamamɛ 8) b
9. Lé mìawɛ akando ji mɔ gbeta ci mìasɔ ado jijɔ nɔ Yehowaɔ? (Efezitɔwo 5:17)
9 Lé mìawɛ akando ji mɔ gbeta ci mìsɔ ajɔ eji nɔ Yehowaɔ? Doŋkɔɔ, mìɖo ajeshi ɖɛ nywiɖe. Bibla nu mɔ: “Tɔhonɔ ŋununyanya xɔxɔ nyi afɔɖeɖe ŋkɔtɔ ɖaɖa enugɔnmɛsese gbɔ.” (Elo. 9:10) Nyɔnɔnwi enyi mɔ, nɔ wojeshi Yehowa nɔnɔmɛ nywiwo, enu ciwo edrɔdrɔ mɔ yeawa koɖo enu ciwo elɔn alo ciwo yí delɔn ɔ, mìaɖo enumɛmɔŋje adodwi lɔ. Biɔ eoɖeki se mɔ: ‘Nɔ te do enu ciwo yí ŋnya so Yehowa nu ɖe, gbeta ci natɛnŋ asɔ yí ado jijɔ niɔ?’—Hlɛn Efezitɔwo 5:17.
10. Nyi yí taɖo Bibla gɔnmɛɖosewo le veviɖe sɔwu mìwo kɔta alo kɔnu ci wowanɔ le fini mìleɔ?
10 Mìɖo awa ŋɖe ci yí ajɔ eji nɔ Yehowa, vɔ yí ado dɔmɛzi nɔ mɛ ciwo yí le koɖo mì hweɖewonu. Le kpɔwɛ mɛ, jilawo tɛnŋ ɖo susu nywi yí aʒin wowo vi nyɔnuvi ji mɔ yɛ le ɖe ŋsu ci shi eho le sugbɔ alo ci yí atɛnŋ ana agban gangan nɔ wo, nɔ ŋsu lɔ desɛnŋ le gbɔngbɔn mɛ can. Nyɔnɔnwi enyi mɔ wojijiɛ mɔ wo le lébu nɔ yewo vi nyɔnuvi le ŋcilanmɛ. Vɔ mi yí avakpedo nu yí awa ŋkɔyiyi yí avanyi mɛ ci yí shin le gbɔngbɔn mɛɔ? Lé Yehowa kpɔnɔ nyɔ cɛ doɔ? Mìkpɔ ɖoŋci lɔ le Matie 6:33 mɛ. Le enɔɔ, wodo ŋsɛn Kristotɔwo mɔ wo le “ji Mawu Fyɔju lɔ doŋkɔ.” Ci mìlɔn mìwo jilawo yí donɔ bubu mɛ ciwo yí le mìwo ju mɛ can ɔ, enu ci yí axa mì veviɖe yí nyi mɔ mìawɛ nɔ Yehowa akpɔ jijɔ.
DA ENU LƆWO KPƆ
11. Nɔnɔmɛ ci nu yí Filipitɔwo 1:9, 10 xo nuxu so ci yí akpedo eo nu yí nada enu lɔwo kpɔɔ?
11 Nɔ èbu tamɛ kpɔ so Bibla gɔnmɛɖose ciwo yí kuso ao gbetasɔsɔ lɔ nuɔ, èɖo ada enu lɔwo kpɔ yí akpɔ mɔ ci yí anyɔ ma. (Hlɛn Filipitɔwo 1:9, 10.) Enugɔnmɛsese nyi nɔnɔmɛ ɖeka ci yí akpedo eo nu nakpɔ enu ci yí ato so gbeta ɖekaɖeka ci àsɔ mɛ. Hweɖewonuɔ, gbeta ɖewo sɔsɔ nɔnɔ fafɛɖe. Vɔ denyi gbeta lɔwo pleŋ yí yinɔ nɔ amɛ shigbe lé woji do nɛ o. Enugɔnmɛsese akpedo eo nu nasɔ gbeta nywiwo, nɔ enyi le nɔnɔmɛ gbɔnnugbɔnnuwo mɛ can.
12-13. Lé enugɔnmɛsese atɛnŋ akpedo eo nu nasɔ gbeta nywi so edɔ ci àwa nuɔ?
12 Kpɔ enu cɛ le susu mɛ. Èjijiɛ edɔ keŋ asɔ kpɔ ao xomu ji. Edɔ amɛve to nɔ eo. Èbu tamɛ kpɔ so wo nu yí kpɔ edɔ ci han ŋmɛ wonyi, gaxoxo nɛni azɔn emɔ yí asɔ yi edɔ lɔ mɛ koɖo nyɔ buwo. Le nɔnɔmɛ amɛve lɔwo mɛɔ, Kristotɔwo atɛnŋ awa edɔ lɔ dru. Taŋfuin, èlɔn ɖeka le edɔ lɔwo mɛ ɖo edɔ ci han ŋmɛ enyi jɔ eji nɔ eo alo woacu eho sugbɔ nɔ eo le edɔ lɔ mɛ. Vɔ enubuwo li, ciwo nu àgbebu tamɛ kpɔ so gbɔxwe asɔ gbeta ɖeka.
13 Le kpɔwɛ mɛ, edɔ lɔwo ɖeka gamɛ je do bɔbɔwo gamɛ ji nɔ eoa? Edɔ lɔwo ɖeka gamɛ je do hwenu yí alé bu nɔ ao xomu yí avoŋ, akpɔ jijɔ yí ate gogo Yehowaa? Enyɔ cɛwo biɔbiɔ se akpedo eo nu nakpɔ “enu ciwo yí le veviɖe wu,” ciwo yí nyi ekacaca ci yí le gblamɛ nɔ eo koɖo Yehowa koɖo ao xomu ʒanwo. Ðo wowo le veviɖe sɔwu gbɛmɛnu sugbɔ ciwo yí àkpɔ. Eyi nasun ji yí asɔ gbeta ci ji Yehowa acu shi do.
14. Lé enugɔnmɛsese zanzan koɖo lɔnlɔn dadasɛ akpedo mì nu mìdanyi afɔklɛnnu nɔ mɛbuwo doɔ?
14 Enugɔnmɛsese agbekpedo mì nu mìabu tamɛ kpɔ so lé gbeta ciwo mìsɔ atɛnŋ awa enu do mɛbuwo nu do, nɔ mìŋgbevanyi “afɔklɛnnu nɔ mɛbuwo” o. (Fili. 1:10, NWT) Ecɛ le veviɖe nɔ mìjikɔ asɔ gbeta so enu ciwo mìado wo koɖo mìwo zezemɛ nu. Le kpɔwɛ mɛ, mìtɛnŋ lɔn enudodo alo acɔwawa alɔkpa ɖe. Vɔ nɔ dradrado mìwotɔ lɔ ɖefun nɔ mɛ ciwo yí dele hamɛ lɔ mɛ alo mɛ ciwo yí le mɛ ɖe? Enugɔnmɛsese akpedo mì nu mìado bubu lé enu wanɔ nɔ wo do. Lɔnlɔn adɔ yí mìaji “eleɖuɖu mɛbuwo tɔ” yí ajeshi sɛnxu nɔ mìwoɖekiwo. (1 Kor. 10:23, 24, 32; 1 Tim. 2:9, 10) Eyi mìasɔ gbeta ci yí adasɛ mɔ mìlɔn mɛbuwo yí gbebunɔ wo.
15. Toto vevi ci èɖo awa gbɔxwe yí asɔ gbeta vevi ɖeɔ?
15 Nɔ èjikɔ asɔ gbeta gangan ɖeɔ, bu tamɛ kpɔ so enu ciwo pleŋ eʒan gbɔxwe anyi wawa nu. Yesu kpla mì mɔ “drɔ eho nɛni ci yí [à] zan kpɔ.” (Luiki 14:28) Eyi taɖo bu tamɛ kpɔ so gamɛ ci axɔ nɔ eo, eho nɛni aɖu nɔ eo koɖo egbla ciwo àdo gbɔxwe yí gbeta ci esɔ lɔ anyi wawa. Le nɔnɔmɛ ɖewo mɛɔ, ànu enu ci mɛɖekamɛɖeka ɖo awa le xomu lɔ mɛ nɔ gbeta ci èsɔ lɔ anyi wawa. Nyi yí taɖo toto cɛ wawa le veviɖeɔ? Atɛnŋ akpedo eo nu nanya nɔ èɖo awa trɔtrɔ ɖewo alo agbesɔ alɔkpa bu ciwo yí akpedo eo nu sɔwu. Yí nɔ ènu nɔ ao xomu yí ɖo to nukplamu wowotɔwoɔ, woawa edɔ koɖo eo nɔ gbeta ci èsɔ lɔ anyi wawa.—Elo. 15:22.
SƆ GBETA CI YÍ AJE JI
16. Afɔɖeɖe ciwo yí akpedo eo nu nasɔ gbeta ci yí avaje jiɔ? (Gbekpɔ dakavi ci yí nyi, “ Lé Àwɛ Asɔ Gbeta Nywiwo.”)
16 Nɔ èwa do afɔɖeɖe ciwo nu mìxo nuxu so vayiwo jiɔ, èle gbesɔsɔ yí asɔ gbeta nywi. Èbu enu lɔwo kpɔ nywiɖe yí gbeje gɔnmɛɖose ciwo yí akpedo eo nu nasɔ gbeta ci yí ajɔ eji nɔ Yehowa. Ecɛyɛ àtɛnŋ abiɔ Yehowa nɔ akpedo eo nu nɔ gbeta ci èsɔ lɔ aje ji nɔ eo.
17. Enuvevitɔ ci yí adɔ woasɔ gbeta nywiwoɔ?
17 Nɔ èsɔ gbeta sugbɔ ciwo yí je ji nɔ eo vayi can ɔ, ɖo ŋwi mɔ enuvevitɔ ciwo yí ana àsɔ gbeta nywiwo denyi kankando eoŋtɔ ŋununyanya alo enu ciwo mɛ èto vayi ji yɔ o, vɔ kankan do nunya ci yí so Yehowa gbɔ ji yɔ. Yiɖekɛ yí atɛnŋ ana eo enujejeshi adodwi, enumɛmɔŋje koɖo enugɔnmɛsese ciwo yí le veviɖe gbɔxwe àɖo nunya. (Elo. 2:1-5) Yehowa atɛnŋ akpedo eo nu nasɔ gbeta ciwo yí ado jijɔ ni.—Eha. 23:2, 3.
EHAJIJI 28 Nyi Xlɔ Koɖo Yehowa
