Danyɛ nyi hamɛmɛgan le cɔci ɖeka mɛ le Canada. Kwɛshilagbe duuɔ, ékplɔnɔ nyɛ koɖo nɔvinyɛ nyɔnushitɔ yi suklu ɖeka ci wowanɔ nɔ ɖeviwo le cɔci lɔ mɛ yí nɔ exo ga wiɖekaɔ, mìvayinɔ cɔci lɔ koɖo mìwo da. Le fiɛfi mɛɔ, mìvayinɔ Fyɔɖuxuxɔ mɛ koɖo mìwo nɔ. Mìkpɔ vovototo ci yí le sɛnsɛn amɛve lɔwo mɛ fafɛɖe.

Nɔnyɛ xo nuxu so yi jixɔse yoyu lɔwo nu nɔ Bob koɖo Marion Hutcheson ciwo yí nyi yi xlɔwo so gbeɖegbe ɖyii yí wowo can vatrɔ Yehowa Kunuɖetɔwo. Le 1958 mɛɔ, nɔviŋsu koɖo nɔvinyɔnu Hutcheson kplɔ enyɛ koɖo wowo vi ŋsuvi amɛtɔn lɔwo yi jukɔnwo mɛ takpekpe ci wowa na nɔ ŋkeke amɛnyi le New York jugan mɛ ci nyɔta yí nyi Edro Mawu tɔ. Nɔ ŋɖo ŋwi hwenɔnu kpɔɔ, ŋkpɔ mɔ egbla ŋtɔteŋ yí wodo gbɔxwe yí kplɔŋ yi takpekpe lɔ, vɔ takpekpe ŋtɔ́ nyi ɖeka le enunywi ciwo ŋɖonɔ ŋwi le anyi gbe mɛ.

Hwenu ŋnyi ɖajɛvihwɛɔ, mìnɔ boji fiɖeka yí ebulele nɔ elanwo jɔnɔ ji nɔŋ. Edronɔŋ veviɖe mɔ mavanyi veterinɛ. Enɔnyɛ nui nɔ hamɛmɛshinshin ɖeka. Ésɔ xomɛfafa ɖo ŋwi nɔŋ mɔ mìle ‘ŋkeke kpɛtɛkpɛtɛwo’ mɛ yí egbebiɔŋ se mɔ lé winivɛshite yiyi na nɔ xwe sugbɔ awa nɔ exlɔnyinyi ci yí le nyɛ koɖo Yehowa gblamɛ ma.  (2 Tim. 3:1) Le yi goduɔ, ŋsɔ gbeta mɔ ŋdagbeyi winivɛshite o.

Ŋkpɔtɔ biɔkɔ nyɛɖeki se mɔ nyi nawa nɔ ŋxɔ baki ɖegbɔ ma. Ci ŋyinɔ kunuɖegbe le kwɛshila vɔvɔnu ɖeshiaɖe can ɔ, ŋdekpɔnɔ jijɔ le kunuɖeɖedɔ lɔ mɛ o yí ŋdebuini can mɔ natɛnŋ anyi emɔɖetɔ o. Edanyɛ ci yí dele nyɔnɔnwi lɔ mɛ o koɖo tɔɖinyɛ do ŋsɛnŋ mɔ nyɛ le wa dɔ le assurance dɔwaxu gangan ɖeka le Toronto. Tɔɖinyɛ nyi ga le dɔwaxu ŋtɔ́ lɔ, eyi ŋlɔn mɔ nawa dɔ lɔ.

Ci ŋzannɔ gamɛ sugbɔ yí sɔ wanɔ dɔ le Toronto yí gbedonɔ gbɛ koɖo jimaxɔsetɔwoɔ, ena ŋtɔ godu yiyi le gbɔngbɔn mɛ. Tɔgbuinyɛ gbɔ ŋnɔ doŋkɔ, vɔ ci evakuɔ, ele mɔ ŋɖo aji fibu anɔ.

Nɔviŋsu koɖo nɔvinyɔnu Hutcheson ciwo yí kplɔŋ yi takpekpe le xwe 1958 mɛ le shigbe eda koɖo enɔ han nɔŋ. Womɔ nyɛ le va nɔ yewo gbɔ le axomɛ yí wokpedo ŋnu ŋshin le gbɔngbɔn mɛ. Nyɛ koɖo wowo vi John bɔ wa ʒinʒindoshimɛ le xwe 1960 mɛ. John tɔ emɔɖeɖedɔ lɔ wawa yí edo ŋsɛnŋ ŋvaɖekɔ kunu doji. Ci nɔviwo kpɔ lé ŋwakɔ ŋkɔyiyi do le gbɔngbɔn mɛɔ, wokanfuŋ yí sɔŋ sɔ ɖo enu ci woyɔnɔ gbɛ mɔ Kristotɔwo gbenɔnɔ koɖo Sumɔsumɔdɔ Bɔbɔ jikpɔtɔ.

Ŋɖe Randi Berge le xwe 1966 mɛ, ényi mɔɖetɔ dovevinu ɖeka yí eɖo dro mɔ yeawa dɔ le fini eʒan sugbɔ le. Ekán lɔ mɛ hamɛwo jikpɔtɔ mìwotɔ sɔ ɖe le ji nɔ mì veviɖe yí do ŋsɛn mì mɔ mìwo le yi kpedo hamɛ ci yí le Orillia, Ontario nu. Eyi mìpotɛ nuwo yí yi ci nɔ.

Ci mìyi Orillia dejinjin ɔ, ŋbɔdo Randi nu le gbeshiagbe mɔɖeɖedɔ lɔ wawa mɛ. Ésɔ ezolelanmɛ yitɔ lɔ ba nɔŋ! Ci ŋdokɔ gbla mɔ manyi emɔɖetɔ nywiɔ, ŋkpɔ jijɔ ci wokpɔnɔ nɔ wozankɔ Bibla yí kpɔkpɔ lé amɛwo mɔŋje mɛ do. Shicu enyi nɔŋ mɔ ŋkpedo asu koɖo ashi ɖeka nu le Orillia yí wowa trɔtrɔwo le wowo gbe mɛ yí vatrɔ Yehowa sɛntɔwo.

Gbeɖeka ci mìɖyi sa yi Torontoɔ, ŋdo go nɔviŋsu Arnold MacNamara ci yí nyi ɖeka le nɔviŋsu ciwo yí kpɔkɔ dɔ ji le Betɛli mɛ. Ébiɔŋ se mɔ mìwo alɔn anyi emɔɖetɔ veviwo ma. Ŋɖo ŋci ni zeɖeka mɔ: “Ɛɛ, vɔ danyi le Québec o.” Susu masɔgbe ciwo yí mɛ ciwo yí donɔ Ŋlɛshigbe le Canada ɖo do mɛ ciwo yí donɔ Flansegbe nu le Québec yí dɔ ŋnu ahan. Hwenɔnuɔ, amɛwo fɔn gu do acɛkpakpa lɔ ji yí jijiɛ mɔ Québec ju lɔ le xɔ ablɔɖe.

Arnold ɖo ŋci mɔ: “Québec ɖekɛ yí alɔjedɔwaxu lɔ sɔkɔ emɔɖetɔ veviwo ɖaɖa yɛ.” Eyi ŋlɔn zeɖeka mɔ nayi. Ŋnya daɖɛ sa mɔ Randi aji mɔ yeawa kunuɖeɖedɔ lɔ le nɔ. Le yiyimɛɔ, ŋvakpɔɛ mɔ ecɛ nyi ɖeka le gbeta nywi ciwo mìsɔ le mìwo gbe mɛ.

Ci mìkpla Flansegbe na nɔ kwɛshila amatɔn ɖegbɔɔ, nyɛ koɖo Randi sɔ kpe nɔ asu koɖo ashi bu vayi ci Rimouski ci yí le kpeci 540 han le tagbe wezexu nɔ Montréal. Enu sugbɔ kpɔtɔ nɔ mì yí mìagbekpla, ecɛ ze gbajɛɛ hwenu yí ŋhlɛn nunɔwoase ɖewo nɔ hamɛ lɔ le bɔbɔ ɖeka. Ci ŋjikɔ anu mɔ le mìwo takpekpe ci yí gbɔgbɔ mɛɔ, “Australie mɛdɔdɔwo” avaɔ, ŋvanu mɔ “autruche mɛdɔdɔwo” ava.

Le Rimouski ɔ, nɔvinyɔnu trɛnnɔ amɛnɛ ɖekawo ciwo yí ɖenɔ kunu koɖo zo sɔ kpe nɔ Huberdeau-wo koɖo wowo vi nyɔnuvi amɛve lɔwo va bɔdo mì nu. Nɔviŋsu koɖo nɔvinyɔnu Huberdeau haya axwe gangan ɖeka yí mɔɖetɔ lɔwo pleŋ jɔnɔ ho yí wosɔ cunɔ exɔho lɔ. Mìyɔnɔ axwe lɔ mɔ Axwe Ɣi, ɖo woshi sɛn ɣi do axwe lɔ koɖo ekpemɛmɛ ciwo yí lenɔ exɔ do te yitɔwo. Mìwo 12 alo 14 yí nɔnɔ axwe lɔ mɛ. Ci nyɛ koɖo Randi nyi emɔɖetɔ veviwoɔ, mìɖenɔ kunu nyidinwo, nyidɔnmɛwo koɖo fiɛfiwo, yí ejɔnɔ ji nɔ mì mɔ mìkpɔnɔ mɛ ci yí akplɔ mì yi kunuɖegbe duu nɔ enyi zanmɛ le vuvɔ hwenuwo can.

Mìwo koɖo emɔɖetɔ egbejinɔtɔ cɛwo vanyi xlɔwo keke wovale shigbe xomumɛtɔwo hannɛ nɔ mì. Hweɖewonuɔ, mìnɔnɔ anyi trɔdo ezo alo le ŋkeke ɖewo jiɔ, mìbɔ yí ɖanɔ nu doju. Nɔvi ɖeka le mì mɛ yí xonɔ miziki, eyi taɖo le zozangbe fiɛfiwoɔ, mìjinɔ ha yí ɖunɔ we.

Amɛ sugbɔ le Rimouski jinɔ mɔ yewoakpla Bibla. Le xwe amatɔn gblamɛɔ, mìkpla Bibla koɖo amɛ sugbɔ, ɖewo wa ŋkɔyiyi keke wa ʒinʒindoshimɛ. Hamɛ lɔ gangan yí eŋɛnywidratɔ 35 han yí le mɛ.

Eŋɛnywidradradɔ ci mìwa le Québec nyi kpla nywi ɖeka nɔ mì. Mìkpɔ lé Yehowa kpedo mì nu do le kunuɖeɖedɔ lɔ mɛ yí gbekpɔ mìwo ʒanwo gbɔ nɔ mì. Gbesɔ kpe niɔ, mìkpla lé mìawɛ alɔn mɛ ciwo yí donɔ Flansegbe, wowo gbe lɔ koɖo wowo kɔnuwo yí edɔ mìgbelɔn mɛbuwo koɖo wowo kɔnuwo can.​—2 Kor. 6:13.

Alɔjedɔwaxu lɔ nu nɔ mì maɖoŋdonutɔ mɔ mìwo le vayi ci Tracadie jugan lɔ mɛ, ele wezexu nɔ Nouveau-Brunswick. Ecɛ nyi cukaɖa ɖeka, ɖo yi nɛ mìdo alɔ wema mɛ mɔ mìahaya xɔ ɖeka yɛ nɛ yí ŋgbekplakpla nu amɛwo le suklu ɖeka. Gbesɔ kpe niɔ, yi nɛ yí mìwo Bibla nukplavi ɖewo nyi eŋɛnywidratɔwo yɛ nɛ yí mìgbecukɔ Fyɔɖuxuxɔ ɖeka yí dɔ lɔwo yikɔ nywiɖe.

Mìdo gbe ɖaɖa so nyɔ lɔ nu le kwɛshila vɔvɔnu lɔ pleŋ yí mìɖyi sa yi Tracadie, eju cɛ to akpo nɔ Rimouski. Vɔ mìnu mɔ, nɔ Yehowa ji mɔ mìwo le yi nɔɔ, mìɖo ayi. Mìdo Yehowa kpɔ yí kpɔ lé eɖe  emɔcunu ɖekpokpui swi do. (Mal. 3:10) Ci Randi nyi mɛɖeka ci yí sɛnŋ le gbɔngbɔn mɛ, sɔ yiɖeki sanɔ vɔn yí gbedonɔ nukwi nɔ amɛ dɔ yí soso avayi ci Tracadie lɔ le fafɛɖe.

Nɔviŋsu Robert Ross ɖekɛ yí nyi hamɛmɛshinshin le mìwo hamɛ yoyu lɔ mɛ. Yi koɖo ashiɛ Linda wa emɔɖeɖedɔ lɔ le nɔ, yí woɖui mɔ yewoakpɔtɔ anɔ nɔ, ci woji evi ŋkɔtɔ. Ci wolekɔ be nɔ wowo vi ŋsuvi lɔ can ɔ, lé woxɔ mì do koɖo lé woɖekɔ kunu koɖo zolelanmɛ do, do ŋsɛn nyɛ koɖo Randi.

Ci mìwa mɔɖeɖedɔ lɔ le Tracadie na nɔ xwe ve goduɔ, enumaɖoŋdonu ɖeka gbejɔ: womɔ mìwo le wa ekán lɔ mɛ hamɛwo jijikpɔdɔ lɔ. Mìji Ŋlɛshigbe hamɛwo kpɔ na nɔ xwe amadrɛ, yí goduɔ, womɔ mìwo le ji Flansegbe hamɛwo kpɔ le Québec. Nɔviŋsu Léonce Crépeault ci yí nyi ekánwo jikpɔtɔ le Québec kannɔfuŋ nɔ Bibla mɛ nuxu ciwo ŋxonɔ. Vɔ évabiɔnɔŋ se mɔ: “Lé àwɛ yí sɔɖu agbele wo mɛ sɔwuɔ?” a Ðesɔleji cɛ kpedo ŋnu yí anyi nukplakpla ɖonɔ tajinu ɖe koŋ yí yi gɔnmɛsese gbenɔnɔ fafɛɖe.

Edɔ ɖeka ci ŋwa yí kpɔtɔ ɖonɔ ŋwi yí nyi edɔ ci ŋwa le jukɔnwo mɛ takpekpe ci nyɔta yí nyi “La foi victorieuse” le Montréal le 1978 mɛ. Ŋwa dɔ le ŋɖuɖu maxu. Agbetɔ 80000 han yí ava yí lé mìama ŋɖuɖu lɔwo do nɔ wo to akpo nɔ lé mìwanɔ wo do sa. Enushianu trɔ: enu ci woasɔ ɖa ŋɖuɖu lɔwo, ŋɖuɖu lɔwo koɖo lé woaɖa wo do. Mìɖo frigo gangan 20, vɔ hweɖewonuɔ, wodewanɔ dɔ nywiɖe o. Gbɔxwe ŋkeke ŋkɔtɔ lɔ atɔ jiɔ, ezan shinshin gbɔxwe mìtɛnŋ yí ɖo kpa lɔ mɛ yí ɖo nuwo, ɖo wowa kanmɛtetenuwo le nɔ lɔ. Eyi mìɖo abɔ zo aɖa nyidin ŋɖuɖu gbɔxwe eŋ ake. Enu cikɔ nɔ mì, vɔ ŋkpla nu sugbɔ le anyi kpena lɔnlɔn faa dɔwatɔwo gbɔ: wowanɔ dɔ sɛnsinɖe, shin le gbɔngbɔn mɛ yí gbedonɔ nukwi nɔ amɛ. Mìkpɔtɔ nyi xlɔwo keke je egbɛ. Jijɔ gangan enyi nɔŋ mɔ ŋyi takpekpe vevi cɛ ci wowa le Québec. Québec nyi jugan ci mɛ yí woci yumɛ nɔ nɔviwo sɛnŋsɛnŋɖe le 1940-wo koɖo 1950-wo mɛ.

Ŋkpla nu sugbɔ le anyi kpena ekán lɔ mɛ hamɛwo jikpɔtɔwo gbɔ le takpekpegan ciwo mìwanɔ le Montréal hwenu. Le xweɖekaxweɔ, David Splane ci yí vanyi Dɔjikpɔha mɛ  tɔ yí nyi takpekpe lɔ jikpɔtɔ. Le takpekpe ci yí kplɔɛdoɔ, womɔ enyɛ yí akpɔ takpekpe lɔ ji yí David do alɔŋ sugbɔ.

Le 2011 mɛɔ, hwenu yí mìwa ekán lɔ mɛ hamɛwo jijikpɔdɔ na nɔ exwe 36 goduɔ, wosɔŋ mɔ nyɛ le nyi enukplamɛtɔ nɔ suklu ci wowanɔ nɔ hamɛmɛshinshinwo. Nyɛ koɖo Randi dɔn eba vovovo 75 ji le xwe amɛve gblamɛ, vɔ ejɔ ji nɔ mì mɔ mìwa avɔnsa cɛwo. Le kwɛshila ɖeshiaɖe vɔvɔnuɔ, eji jɔnɔ hamɛmɛshinshin lɔwo, ɖo wokpɔ lé hamɛmɛshinshinwo gbɔngbɔnmɛnyinyi le veviɖe nɔ Edɔjikpɔha lɔ do.

Le yiyimɛɔ, ŋvanyi enukplamɛtɔ le Fyɔɖuxu Ŋɛnywidratɔwo Suklu. Toto ciwo yí le suklu lɔ mɛ dɔ enu cinɔkɔ nɔ sukluvi lɔwo: wonɔnɔ nyinɔnɔ le sukluxɔ mɛ keke awa gaxoxo amadrɛ han gbeɖeka duu, fiɛfiwoɔ, wowanɔ axomɛdɔwo na nɔ gaxoxo amɛtɔn han yí wogbewanɔ edɔ amɛnɛ alo amatɔn han kwɛshila ɖeka duu. Nyɛ koɖo enukplamɛtɔ ɖetɔ lɔ dre mɛ nɔ wo mɔ wodasun ji awa ŋɖe nɔ Yehowa dekpedo wo nu o. Nɔ sukluvi lɔwo kpɔ lé ci wogo do Yehowa nu kpedo wo nu yí wowa nu sugbɔ sɔwu lé wobui doɔ, ekpanɔca wo. Enyi ŋɖeka ci ŋkpɔtɔ yí ɖonɔ ŋwi.

Lé nɔnyɛ sɔnɔ ɖe le ji nɔ mɛbuwo do na etɛnŋ kpedo yi Bibla nukplaviwo nu wowa ŋkɔyiyi, egbena danyɛ trɔ susu do nyɔnɔnwi lɔ nu. Ŋkeke amɛtɔn le mìwo nɔ ku goduɔ, ekpaca mì mɔ mìwo da va Fyɔɖuxuxɔ mɛ yí vase jugbaja nuxu ci woxo lɔ, eyi le yi goduɔ, degɔn bɔbɔ ɖe kpɔ so xwe 26 ke o. Ci papa dewa ʒinʒindoshimɛ can ɔ, hamɛmɛshinshinwo nu nɔŋ mɔ, eyi nyi amɛ ŋkɔtɔ ci yí vanɔ bɔbɔ lɔwo.

Mìwo nɔ nyi kpɔwɛ nɔ nyɛ koɖo nɔvinyɛ nyɔnushiwo. Nɔvinyɛ nyɔnushi amɛtɔn lɔwo sɛnkɔ Yehowa koɖo wowo suwo le gbejinɔnɔ mɛ. Amɛve le wo mɛ wawa dɔ le Betɛli, ɖeka le Portugal yí vetɔ lɔ le Haïti.

Evyɛɔ, nyɛ koɖo Randi nyi emɔɖetɔ veviwo le Hamilton, Ontario. Hwenu mìwakɔ ekán lɔ mɛ hamɛwo jijikpɔdɔ lɔɔ, mìkplɔnɔ nɔviwo yí wowanɔ trɔtrɔyiwo koɖo Bibla nukplakplawo. Vɔ ecɛyɛɔ, ejɔkɔ ji nɔ mì mɔ mìkpekpeɛdo mìwoŋtɔwo Bibla nukplaviwo nu wowakɔ ŋkɔyiyi le gbɔngbɔn mɛ. Eyi mìvanyi xlɔwo koɖo nɔviŋsu koɖo nɔvinyɔnu ciwo yí le mìwo hamɛ yoyu lɔ mɛ. Ci mìkpɔ lé Yehowa kpekɔdo wo nu le hwenu nywiwo koɖo hwenu vɔnwo mɛ doɔ, edokɔ ŋsɛn mì.

Nɔ mìɖo ŋwi enu ciwo mɛ mìtoɔ, lé nɔviwo sɔ ɖe le ji nɔ mì do jeŋ nɔ mì sugbɔ. Eyi mìwo can mìɖo “edro veviɖe” mɔ mìasɔ ɖe le ji nɔ mɛbuwo yí ado ŋsɛn wo nɔ woasɛn Yehowa lé wokpe ji do. (2 Kor. 7:6, 7) Le kpɔwɛ mɛ, le xomu ɖeka mɛɔ, vinɔ lɔ koɖo viɛ ŋsuvi sɔ kpe nɔ eviɛ nyɔnuvi nyi gbeshiagbe mɔɖetɔwo. Eyi ŋbiɔ xomutatɔ lɔ se mɔ yɛbui kpɔ gbeɖe mɔ yeavanyi gbeshiagbe mɔɖetɔ ma. Éɖo ŋci nɔŋ mɔ yekpekpeɛdo gbeshiagbe mɔɖetɔ amɛtɔn nu vɔ. Eyi ŋbiɛ se mɔ: “Àtɛnŋ akpedo wo nu nywiɖe sɔwu Yehowa a?” Ŋdo ŋsɛn yi mɔ yi le wa gbeshiagbe mɔɖeɖedɔ lɔ yí akpɔ jijɔ ci han yí wowo kpɔkpɔ le mɛ. Le wleci amadɛn goduɔ, étrɔ gbeshiagbe mɔɖetɔ.

Nyɛ koɖo Randi akpɔtɔ axokɔ nuxu nɔ “hɛnnu yoyu” alo jijimɛ yoyu ci yí ava so “enu nyakpɔkpɔ” ciwo Yehowa wa nu, eyi mìnya mɔ wowo can akpɔ jijɔ le Yehowa sɛnsɛn mɛ shigbe lé mìwo can kpɔ jijɔ le mɛ nɛ.​—Eha. 71:17, 18.