Enyɔbiɔse Ciwo yí so yi Hlɛntɔwo Gbɔ
Enyɔgbe “A kpɔ wo ji,” ciwo yí le Ehajiji Wema 12:7, xokɔ nuxu so “mɛ ciwo yí ci ŋshishi mɛa” (Kpukpui 5) alo “Yehowa nyɔwo” nua? (Kpukpui 6)
Enyɔ ciwo yí trɔdo kpukui cɛ dasɛ mɔ agbetɔwo nu woxokɔ nuxu so.
Le Ehajiji Wema 12:1-4 mɛɔ, mìhlɛn mɔ “egbejinɔtɔ ɖekɛ degbe li o.” Le yi godu le Ehajiji Wema 12:5-7 mɛɔ, énu mɔ:
“‘Ðo woʒin mɛ ciwo yí le ŋshishi mɛ ji,
Yí wamɛnɔwo le vevi sekɔ,
Yehowa nu mɔ, nà so jete yí awa ŋɖe’.
‘Nàhwlɛn wo gan le mɛ ciwo yí gbanɔli wo lɔmɛ.’
Yehowa nyɔwo le kɔkɔɛɖe;
Wole shigbe egacuho ci wololo le ezokpu mɛ, yí wotrɔ klɔ ze adrɛ hannɛ.
Oo Jehovah, àkpɔ wo ji;
Àglɔn ta nɔ mɛɖekamɛɖeka ciwo yí le jijimɛ cɛ mɛ keke asɔyi mavɔ mavɔ.”
Kpukpui 5 tɔ lɔ nu ŋciwo Mawu avawa nɔ “mɛ ciwo yí ci ŋshishi mɛ.” Áhwlɛn wo gan.
Kpukpui 6 tɔ lɔ nu kpi mɔ “Yehowa nyɔwo le kɔkɔɛɖe,” ‘shigbe gacuho ci woklɔ hannɛ.’ Ecɛ dasɛ lé enu wanɔ nɔ mì ɖaɖa Yehowa Nyɔ lɔ gbɔ do.—Eha. 18:30; 119:140.
Ecɛyɛ, kpɔ kpukpui ci yí kplɔɛdo, Ehajiji Wema 12:7: “Oo Jehovah, àkpɔ wo ji; àglɔn ta nɔ mɛɖekamɛɖeka ciwo yí le jijimɛ cɛ mɛ keke asɔyi mavɔ mavɔ.” Mi nu yí “wo” lɔ xokɔ nuxu soɔ?
Ci kpukpui 7 tɔ lɔ kplɔ enyɔgbe “Yehowa nyɔwo” doɔ, mɛɖewo atɛnŋ akpɔɛ mɔ Mawu nyɔ nu yí “wo” lɔ xokɔ nuxu so. Mìnya mɔ Mawu glɔn ta nɔ Bibla vayi ci ketɔnɔwo je agbla mɔ yewoaɖo te yi alo agui can.—Ezai 40:8; 1 Piɛ 1:25.
Vɔ, enyi nyɔnɔnwi hɛnnɛ mɔ Yehowa aglɔn ta nɔ mɛ ciwo nu woxo nuxu so le kpukpui 5 tɔ lɔ mɛ. Yehowa akpedo “mɛ ciwo yí ci ŋshishi mɛ” koɖo mɛ ciwo ji wo “ʒinʒin ɛ” nu yí akpɔtɔ ahwlɛnhwlɛn wo gan.—Job 36:15; Eha. 6:4; 31:1, 2; 54:7; 145:20.
Eyi taɖo, nyi nu “wo” ci yí le kpukpui 7 tɔ lɔ mɛ xokɔ nuxu soɔ?
Enyɔ ciwo wonu do Ehajiji wema cɛ mɛ na mìkpɔɛ mɔ agbetɔwo nu “wo” lɔ xokɔ nuxu so.
Le tɔtɔmɛ nɔ Ehajiji Wema 12:1 tɔ lɔɔ, Davidi xo nuxu so “Yehowa sɛntɔ egbejinɔtɔ” ciwo yí amɛvɔnwo kan ŋsuwo nɔ. Le yi goduɔ, mìkpɔ enyɔgbe ci yí nu mɔ Yehowa aso jete do mɛ ciwo yí wa afɛn yí zanzan aɖe wowotɔ nu. Ehajiji Wema lɔ ɖoɖo kpe yi ji nɔ mì mɔ mìatɛnŋ akando Mawu ji mɔ yɛawa nunywiwo nɔ yi mɛwo ɖo yi nyɔwo le kɔkɔɛɖe.
Eyi taɖo kpukpui 7 tɔ lɔ nunuɔ mɔ Yehowa akpɔ “wo” ji, mɛ ciwo yí amɛvɔnwo do vevisese nɔ.
Le Ebretɔ Masorɛtiwo nuŋwlɛŋwlɛ mɛɔ, wozan “wo.” Septante Grɛki tɔ zan “mì” zeve le kpukpui 7 tɔ lɔ mɛ ci yí xokɔ nuxu so egbejinɔtɔ ciwo ji woʒin yí woci ŋshishi mɛ. Le vɔvɔnuɔ, kpukpui 7 tɔ lɔ mɔ woaglɔn ta egbejinɔtɔ “ɖekaɖeka” le “jijimɛ cɛ mɛ” le mɛ ciwo yí wakɔ nuvuin lɔwo lɔ mɛ. (Eha. 12:7, 8) Le Ebretɔwo nuŋwlɛŋwlɛ ci woɖe do Aramugbe mɛɔ, kpukpui 7 tɔ lɔ nu mɔ: “Àglɔn ta nɔ amɛjɔjɔɛwo yí ahwlɛn wo gan yí akpɔ wo ji le jijimɛ vuin cɛ lɔ mɛ sɔyi mavɔ.” Ecɛ gbevaɖo kpe yi ji yí eze gbawlɛ mɔ Ehajiji Wema 12:7 dexokɔ nuxu so Mawu nyɔwo nu o.
Susu cɛ yí dɔ kpukpui cɛ nana emɔkpɔkpɔ “egbejinɔtɔwo” mɔ Mawu avahwlɛn wo gan.
