EGBƆNNƆNU nɔ eo mɔ àkpɔtɔ awanɔ amɛɖekɛnukplakpla kwɛshila ɖeka duu yí asenɔ vivi nia? Kankandoji li mɔ egbɔnnɔnu nɔ mì pleŋ hweɖewonu. Vɔ bu tamɛ kpɔ so nubu ciwo mìwanɔ gashiagamɛ nu shigbe eshilele nɛ. Gbɔxwe mìale eshiɔ, mìʒan gamɛ koɖo agblajeje, vɔ nɔ mìliɔ, lanmɛ mìwotɔ fanɔ! Bibla kplakpla can le shigbe wo “le eshi koɖo Mawu Nyɔ” lɔ yí afa gotu nɔ mì hannɛ. (Efe. 5:26) Mìaxo nuxu so ŋɖewo ciwo atɛnŋ akpedo mì nu:

• Ðo gamɛ ɖe ɖɛ. Amɛɖekɛnukplakpla le “enu ciwo yí le veviɖe wu” wo mɛ yí Kristotɔ ɖe deɖo akpɔɛni do enuvlɛkɛsɛ ji o. (Fili. 1:​10, NWT) Asɔ kpedo eo nu yí nazɔnnɔ do ao gamɛ jiɔ, danyɔ mɔ àŋwlini do fini yí nyi enukpɔxu shigbe kpako ɖe ci ji èŋwlɛnɔ enu do abi fligo ji ba? Alo àŋwlɛ gamɛ ci yí èkplanɔ enu lɔ do ao tefonu mɛ yí gbɔxwe gamɛ lɔ aɖoɔ, telefonu lɔ atɔ fanfan.

• Kplanɔ nu yí asɔ koɖo lé èle do. Éle fafɛɖe nɔ eo mɔ àsɔ susu ɖo enu ci èjikɔ akpla lɔ ji tiin na nɔ hwenu kleŋ kleŋwo alo na nɔ hwenu jinjinɖea? Eoŋtɔ yí nya lé ele do nɔ eo nywiɖe sɔwu. Wa toto nɔ enukplakpla lɔ nɔ asɔ koɖo lé ao nɔnɔmɛ le do. Nɔ enukplakpla lɔ dedrodroɔ eo hwecinu yí àkpla nu ɖe, danyɔ mɔ àsɔ minici amɛwó kpoŋ yí asɔ kpla nu lɔ ba? Nɔ èkpla nu lɔ nɔ egbenyi hwenu nyɛkuin-nyɛkuin yɔ can ɔ, anyɔ sɔwu mɔ dekpla ɖeeɖe o. Yí nɔ èvlɛ yí tɔ jiɔ, atɛnŋ ado ŋsɛn eo yí nakpɔtɔ ale nukplakpla lɔ ji.—Fili. 2:13.

• Sɔ nyɔta lɔwo doŋkɔ. Nɔ ènɔ nyinɔnɔ yí bu tamɛ kpɔ so enu ci àkpla nuɔ, taŋfuin ‘dezanzan ao gamɛ’ nywiɖe o. (Efe. 5:16) Danyɔ mɔ àŋwlɛ nyɔtawo koɖo enyɔ vevi ciwo èji mɔ yeakpla do wema ji daɖɛ ba? Nɔ nyɔbiɔse ɖe vlɛ yí va tamɛ nɔ eoɔ, ŋwli daɖɛ. Nɔ èɖegbɔ nɔ nukplakpla ɖeɔ, ètɛnŋ ŋwlɛ susu buwo daɖɛ ciwo nu àmɔ yeavakpla nu so.

• Wanɔ trɔtrɔwo. Tekpɔ yí awanɔ trɔtrɔ ɖewo so ao gamɛ lɔ nu shigbe mɔ gaxoxo nɛni ci yí èzan yí sɔ wanɔ nukplakpla lɔ abi nyɔta ci yí ècan lɔwo. De hwenu, lé ejinjin do alo enu ci yí èkpla lɔ yí le veviɖe o, vɔ lé èkplɛni kwɛshila ɖekaɖeka duu yɔ.

Nɔ mìzɔnnɔ do enukplakpla toto mìwotɔ jiɔ, mìaɖu ele ni sugbɔ. Mìate gogo Yehowa, awa nu le nunya mɛ yí agbekpɔ fafa.—Ʒozue 1:8.