Èji mɔ yeaɖu le nɔ amɛɖekɛnukplakpla aotɔ nywiɖe sɔwua? Enu cɛwo atɛnŋ akpedo eo nu nasɔ susu ɖo enu ci èkplakɔ lɔ ji nywiɖe sɔwu:

• Ji texwe ci yí nyɔ. Nɔ anyɔɔ, nɔ texwe ci yí mɛ̀ yí klɛnklɛn le yí atɛnŋ akpedo eo nu nakpla nu lɔ nywiɖe. Àtɛnŋ anɔ bilo mɛ alo kplɔntu alo àtɛnŋ anɔ fini àvo le, le xexenu.

• Ji texwe ci yí eoɖekɛ anɔ. Yesu “fɔn ezan” yí “yì afi ci . . . Yiɖekɛ” anɔ keŋ afankwi. (Maki 1:35) Nɔ dekpɔ fini ànɔ eoɖekɛ leɔ, àtɛnŋ anu nɔ ao xomumɛtɔwo, alo mɛ ciwo eo koɖo wowo le xɔ ɖekɛ mɛ nɔ woanya hwenuwo yí èkplanɔ nu yí wodado nuxu nɔ eo o.

• Ŋgbelɔn nɔ ŋɖekɛ ado nuxu nɔ eo o. Nɔ ezankɔ ao telefonu alo ao tablɛti yí asɔ kpla nuɔ, cí enu ci yí adɔ ado axwa alo asɔ ɖo (mode avion) mɛ nɔ ŋɖekɛ ŋgbedo nuxu nɔ eo o. Nɔ èɖo ŋwi ŋɖe ci èɖo awa le gaxoxo ci mɛ èkplakɔ nu lɔ leɔ, ŋwli daɖɛ yí nɔ èkpla nu lɔ ɖegbɔɔ, nawɛ. Nɔ egbɔnkɔ nu nɔ eo mɔ asɔ susu ɖo enu ci èkplakɔ lɔ jiɔ, gbɔn domɛ hwɛɖeka yí azɔn zɔnlin alo adɛn kanmɛ.