1. Nyiwo yí nyi enunana ɖewo ci Yesu na mìɔ?

 AGBETƆ ɖekpokpui deli yí nanɔ enu amɛ shigbe Yesu nɛ o. Hwenu ele nyigban jiɔ, élɔn yí zan yi ŋsɛn yí wa enujiŋwo yí sɔ kpedo mɛbuwo nu. (Luiki 9:​12-17) Enunana ci yí gangan wu kpɛtɛwo pleŋ yí nyi ci esɔ yi gbe na dota nɔ mì. (Ʒan 15:13) So hwenu Yesu fɔn so kuɔ, ékpɔtɔ yí nana enu mì. Shigbe lé éɖo gbe ɖɛ nɛɔ, énu nɔ Yehowa mɔ yi le sɔ yi gbɔngbɔn kɔkɔɛ asɔ kplanu mì, yí asɔ fa akɔn nɔ mì. (Ʒan 14:​16, 17; 16:13) Yesu gbekpɔtɔ yí totoɔ hamɛ lɔ bɔbɔwo ji yí sɔ kpekpeɛdo mì nu nɔ mìaɖo nukplaviwo le nyigban lɔ keŋkeŋ ji.—Mat. 28:​18-20.

2. Miwo yí nyi “enunana [ciwo yí nyi] amɛwo” ci nyɔ wonu le Efezitɔwo 4:​7, 8 mɛɔ?

² Mìakpɔ ɖeka le enunana ciwo yí Yesu na mì mɛ. Ci Yesu yi jeŋkwi mɛ goduɔ apotru Pɔlu ŋwlɛ mɔ, yɛna “enunana [ciwo yí nyi] amɛwo.” (Hlɛn Efezitɔwo 4:​7, 8.) Pɔlu dre mɛ mɔ Yesu na enunana cɛwo. (Efe. 1:​22, 23; 4:​11-13) Egbɛɔ, sumɔsumɔdɔwatɔwo, hamɛmɛshinshinwo koɖo ekan lɔ mɛ hamɛwo jikpɔtɔwo can le “enunana [ciwo yí nyi] amɛwo mɛ.” a Le nyɔnɔnwi mɛɔ, ŋsu cɛwo denyi amɛkpekpewo o, eyi taɖo wowanɔ afɛnwo. (Ʒaki. 3:2) Éle ahan gan, mìwo Xwetɔ Yesu Kristo zanzan wo yí sɔ kpekpeɛdo mì nu; enunanawo wonyi ena mì.

3. Nà kpɔwɛ ɖeka yí asɔ dasɛ lé mì pleŋ atɛnŋ anɔ godu nɔ edɔ ci yí “enunana [ciwo yí nyi] amɛwo” wakɔ.

³ Yesu sɔ “enunana [cɛwo ciwo yí nyi] amɛwo” nɔ woado ŋsɛn hamɛ lɔ. (Efe. 4:12) Vɔ mìwo kpɛtɛwo atɛnŋ akpedo  wo nu nɔ woawa edɔ vevi cɛ. Mìasɔ kpɔwɛ ɖeka asɔ ɖe mɛ: Mɛɖewo le mì mɛ yí cunɔ fyɔɖuxu xɔwo. Mɛbuwo ɖanɔ ŋɖuɖuwo keŋ yí sɔ donɔ alɔ edɔ lɔ, ebuwo kɔkɔnɔ enuwo vayi yí mɛbuwo gbewanɔ edɔ buwo hɛnnɛ. Ahanke mìwo pleŋ mìatɛnŋ akpedo sumɔsumɔdɔwatɔwo, hamɛmɛshinshinwo koɖo ekan lɔ hamɛwo jikpɔtɔwo nu to nyɔ ciwo mìnunɔ koɖo ŋciwo mìwanɔ mɛ. Mìakpɔ lé edɔ sɛnsin ci wowanɔ hɛnnɔ nyɔna vɛ nɔ mì do koɖo lé mìadasɛ do mɔ wo koɖo Yesu ci yí na mì “enunana [cɛwo ciwo yí nyi] amɛwo” nu jenɔŋ nɔ mì do.

SUMƆSUMƆDƆWATƆWO ‘KPENƆDO AMƐ NU’

4. Le xwe sanŋdi ŋkɔtɔ mɛ ɖe edɔ ɖewo ciwo sumɔsumɔdɔwatɔwo wa yí sɔ ‘kpedo amɛ nuɔ’?

⁴ Le exwe sanŋdi ŋkɔtɔ mɛɔ, Wosɔ nɔvi ɖewo nɔ woanyi sumɔsumɔdɔwatɔwo. (1 Tim. 3:8) Éwa shigbe mɔ wowo yí nyi mɛ ciwo yí ‘kpenɔdo amɛ nu’ ciwo nu Pɔlu ŋwlɛ nu so. (1 Kor. 12:28) Sumɔsumɔdɔwatɔwo wa edɔ veviwo le hamɛ lɔ mɛ keŋ nɔ hamɛmɛshinshinwo asɔ susu do enukplakpla koɖo lɛngbɔkplɔkplɔdɔ lɔ ji. Le kpɔwɛ mɛ, sumɔsumɔdɔwatɔwo wanɔ kɔpi nɔ Enuŋwlɛŋwlɛ lɔwo alo vayi xwlenɔ ŋciwo yí woʒan keŋ asɔ wa kɔpi lɔwo.

5. Edɔ ɖewo ciwo yí sumɔsumɔdɔwatɔwo wanɔ le egbɛ mɛ yí sɔ kpenɔdo hamɛ lɔ nuɔ?

⁵ Bu tamɛ kpɔ so edɔ ɖewo ci sumɔsumɔdɔwatɔwo wanɔ yí sɔ kpenɔ do ao hamɛ lɔ nu. (1 Piɛ 4:10) Wotɛnŋ sɔ mɛɖe nɔ akpɔnɔ hamɛ lɔ hozanzanwo gbɔ, alo hamɛ lɔ nyigbanmamawo, aɖo wemawo yí a mini nɔ eŋɛnywidratɔwo, axonɔ odio-video dɔwanu lɔwo, akpɔnɔ Fyɔɖuxuxɔ lɔ ji alo ana kpekpedonu le ebulele ni mɛ. Edɔ cɛwo le veviɖe gbɔxwe hamɛ lɔ ayikɔ nywiɖe. (1 Kor. 14:40) Gbesɔ kpe niɔ, sumɔsumɔdɔwatɔ ɖewo wanɔ akpaxwe ɖewo le agbenɔnɔ koɖo sumɔsumɔdɔ bɔbɔ lɔ mɛ yí gbexonɔ jugbaja nuxuwo. Wotɛnŋ gbesɔ sumɔsumɔdɔwatɔ ɖe nɔ akpenɔdo kunuɖegbɛ jikpɔtɔ nu. Hweɖewonuɔ, sumɔsumɔdɔwatɔ ɖe ci yí je atɛnŋ akplɔ hamɛmɛshinshinwo do yí woavayi ji nɔvi ɖe kpɔ le hamɛ lɔ mɛ keŋ ado ŋsɛn yi.

6. Susu ɖewo ciwo yí dɔ yí Sumɔsumɔdɔwatɔ edɔsɛnsinwatɔ mìwotɔwo nu jɔnɔ ji nɔ mìɔ?

⁶ Lé hamɛ lɔ kpɔnɔ nyɔna so edɔ ciwo sumɔsumɔdɔwatɔwo wanɔ mɛ doɔ? Nɔvinyɔnu Beberly ci yí so Bolivie nu mɔ “Akpe nɔ mìwo sumɔsumɔdɔwatɔwo, wonanɔ yí bɔbɔ lɔwo vivinɔ nɔŋ. b Edɔ ciwo yí wowanɔ yí dɔ yí natɛnŋ aji ha, ana ɖoŋciwo, aɖoto nuxuwo yí agbekpla nu so foto koɖo video ciwo yí wodanasɛ mɛ. Wowɛni yí amɛshiamɛ atɛnŋ anɔ vofamɛ yí gbekpenɔdo mɛ ciwo yí le azɔge nu nɔ woatɛnŋ awa bɔbɔ lɔwo to video kacaca ji. Le bɔbɔ goduɔ, wokpenɔ ŋkuvi do Fyɔɖuxu xɔ lɔ mɛ dradrado nu, kpenɔ ŋkuvi do eho kɔnŋtawo nu yí gbewɛni nɔ mì pleŋ akpɔ wema ci mìʒan axɔ.” Leslie ci yí nɔnɔ Colombie yí asuɔ nyi hamɛmɛshinshin nu mɔ: “Sumɔsumɔdɔwatɔwo kpenɔdo asunyɛ nu le edɔ vovovowo mɛ. Nɔ wowotɔ dɛn le mɛɔ, ájan sugbɔ sugbɔ. Eyi taɖo ŋji mɔ na do akpe nɔ wo nɔ kpekpedonu ci wosɔ edro yí nakɔ mì koɖo ezolelanmɛ.” Kankandoji li mɔ ahan eo can anu so wo nu nɛ.—1 Tim. 3:13.

7. Lé mìatɛnŋ adasɛ nɔ Sumɔsumɔdɔwatɔwo mɔ wowo nu jeŋ nɔ mì doɔ? (Gbe kpɔ foto lɔ hɛnnɛ.)

⁷ Ci sumɔsumɔdɔwatɔwo nu tɛnŋ jeŋ nɔ mì can ɔ, Bibla do ŋsɛn mì mɔ mìwo le “donɔ  akpe” nɔ wo. (Kol. 3:15) Ahan yí hamɛmɛshinshin ɖeka ci tɔ mɔ Krzysztof,  ci yí so Finland nu mɔ yedonɔ akpe do ke: “Ŋsɔnɔ wema ɖe alo enuŋwlɛŋwlɛ ɖe ci mɛ ŋŋwlɛ mawunyɔkpuikpui ɖe do yí anu enuvevi ɖe ci koŋ sumɔsumɔdɔwatɔ ɖe wa yí sɔ do ŋsɛnŋ alo ŋci taɖo yí edɔ ci ewa jeŋ nɔŋ ɖɛɖɛ.” Pascal koɖo Jael, ciwo yí le Nouvelle-Calédonie, donɔ gbe ɖaɖa do ta nɔ sumɔsumɔdɔwatɔwo. Pascal ɖe mɛ mɔ: “Van cɛyɛɔ, mìdo gbe ɖaɖa sugbɔ do ta nɔ sumɔsumɔdɔwatɔwo mìwotɔwo yí do akpe nɔ Yehowa so wo nu yí biɛ mɔ le nɔ koɖo wo yí akpedo wo nu.” Yehowa senɔ gbedoɖa ŋtɔ́ hanwo yí hamɛ lɔ pleŋ kpɔnɔ nyɔna so mɛ.—2 Kor. 1:11.

HAMƐMƐSHINSHINWO “WANƆ EDƆ SƐNSIN KOÐO MÌ”

8. Nyi yí taɖo Pɔlu tɛnŋ ŋwlɛ mɔ hamɛmɛshinshin ciwo yí ni le exwe sanŋdi ŋkɔtɔ mɛ nyi “edɔ sɛnsinwatɔwoɔ”? (1 Tɛsalonikitɔwo 5:​12, 13)

⁸ Le exwe sanŋdi ŋkɔtɔ mɛɔ, hamɛmɛshinshinwo wa dɔ sɛnsinɖe nɔ hamɛ lɔ. (Hlɛn 1 Tɛsalonikitɔwo 5:​12, 13; 1 Tim. 5:17) ‘Wokplɔnɔ’ hamɛ lɔ, kpɔnɔ bɔbɔwo ji yí sɔnɔ gbetawo le hamɛmɛshinshinwo-ha lɔ mɛ. ‘Wogbenɔ nyɔ’ nɔ wowo nɔviŋsu koɖo nɔvinyɔnuwo yí nanɔ wo nukplamu ciwo mɛ lɔnlɔn le keŋ asɔ glɔn ta nɔ hamɛ lɔ. (1 Tɛs. 2:​11, 12; 2 Tim. 4:2) Nyɔnɔnwi enyi mɔ, ŋsu cɛwo wanɔ dɔ sɛnsinɖe keŋ akpɔ wowo xomumɛtɔwo ʒanwo gbɔ yí woagbewɛ keŋ nɔ wowoŋtɔwo akpɔtɔ anɔ sɛnsinɖe le gbɔngbɔn mɛ.—1 Tim. 3:​2, 4; Titu 1:​6-9.

9. Edɔ ɖewo ciwo hamɛmɛshinshinwo wanɔ nɔ mì le egbɛ mɛɔ?

⁹ Hamɛmɛshinshinwo xanɔ sugbɔ. Eŋɛnywidratɔwo yí wonyi. (2 Tim. 4:5) Wokpenɔ ŋkuvi do kunuɖeɖedɔ lɔ nu koɖo ezolelanmɛ, wanɔ toto nɔ kunuɖeɖedɔ lɔ le wowo nyigbanmama mɛ yí gbe nanɔ kpla mì nɔ mìadra ŋɛnywi lɔ yí akpla nu amɛwo nywiɖe. Wonyi kojoɖotɔ ciwo kunɔ ŋshishi nɔ amɛ yí gbe ɖonɔ kojo jɔjɔɛ. Nɔ Kristotɔ ɖe wa nuvɔn gangan ɖeɔ, hamɛmɛshinshinwo jenɔ agbla keŋ akpedo nu nɔ adra ekacaca ci yí le yi koɖo Yehowa gblamɛ do. Le ga ɖekɛ lɔ ke mɛɔ, wolénɔ bu nɔ hamɛ lɔ nɔ akpɔtɔ ale mɛmiɖe. (1 Kor. 5:​12, 13; Gal. 6:1) Vevitɔɔ, wojeshi hamɛmɛshinshinwo ɖɛ mɔ wonyi lɛngbɔkplɔtɔwo. (1 Piɛ. 5:​1-3) Woxonɔ Bibla mɛ nuxu ciwo wodrado nywiɖe yí jenɔ agbla keŋ ajeshi mɛɖemɛɖeka le hamɛ lɔ mɛ yí gbewanɔ lɛngbɔkplɔkplɔ dɔ lɔ. Hamɛmɛshinshin ɖewo gbenanɔ kpekpedonu le Fyɔɖuxuxɔwo cucu koɖo ebulele nɔ wo mɛ, wanɔ toto nɔ takpekpewo, wanɔ dɔ le dodotoxwe kacaca jikpɔgbɛwo mɛ koɖo gbɛbɔbɔ ciwo yí jinɔ dɔ̀nɔwo kpɔ mɛ, sɔ kpenɔ edɔ buwo ciwo yí woɖo wo. Hamɛmɛshinshinwo wanɔ edɔ sugbɔ nɔ mì!

10. Susu ɖewo ciwo yí dɔ yí hamɛmɛshinshin edɔsɛnsinwatɔ mìwotɔwo nu jɔnɔ ji nɔ mìɔ?

¹⁰ Yehowa nu ɖɛ mɔ lɛngbɔkplɔtɔwo ale bu nɔ mì nywiɖe “yí mì da vɔn alo a hunhun o.” (Ʒer. 23:4) Nɔvinyɔnu Johanna, ci yí so Finland, kpɔɛ mɔ nyɔnɔnwi nyɔ cɛwo nyi hwenu yí nɔlɔ ble sɛnŋsɛnŋɖe. Énu mɔ: “Ci egbɔnnɔnu nɔŋ mɔ manu lé enu wakɔ do nɔŋ nɔ mɛbuwo can ɔ, hamɛmɛshinshin ɖeka ci ŋdejeshi nywiɖo o xɔ jigbɔnɖɛ nɔŋ, do gbe ɖaɖa koɖoŋ yí gbena ŋkando ji mɔ Yehowa lɔnŋ. Ŋdegbeɖo ŋwi enyɔ ciwo enu pɛpɛpɛ o, vɔ ŋɖo ŋwi mɔ éwɛ yí voŋ le nyɛɖeki mɛ. ŋkando ji mɔ Yehowa yí dɔɛ ɖaɖa yí evakpedo ŋnu le gamɛ nywitɔ lɔ ji.” Lé ao hamɛmɛshinshinwo kpedo eo nu vayi doɔ?

11. Lé mìawɛ adasɛ enujeŋnɔamɛ mìwotɔ hamɛmɛshinshinwoɔ? (Gbekpɔ foto lɔ hɛnnɛ.)

¹¹ Yehowa ji mɔ “sɔ kudo edɔ” ci hamɛmɛshinshinwo  wanɔ ŋciɔ, mìadasɛ nɔ wo mɔ wowo nu jeŋ nɔ mì sugbɔ. (1 Tɛs. 5:​12, 13) Henrietta, ci yí nɔnɔ Finland can nu mɔ: “Hamɛmɛshinshinwo lɔnnɔ faa yí kpenɔdo mɛbuwo nu, vɔ ecɛ dedasɛ mɔ gamɛ sugbɔ le wo shi yí ŋsɛn sugbɔ le wowo shi sɔwu mɛbuwo o alo wodetokɔ cukaɖawo mɛ le agbe mɛ o. Gaɖewomɛɔ, ŋnunɔ nɔ wo kpoŋ mɔ, ‘Ènyaa? hamɛmɛshinshin nywi yí ènyi. Ŋji mɔ eo le nya ahan.’” Nɔvinyɔnu Sera ci le Turquie c nu mɔ: “Hamɛmɛshinshinwo ʒan ‘ŋsɛndoamu’ keŋ akpɔtɔ awakɔ wowo dɔwo. Eyi taɖo mìŋwlɛnɔ nu ɖaɖa wo, yí yɔnɔ mɔ wo le vaɖu nu koɖo mì yí agbewa dɔ doju koɖo wo le kunuɖeɖedɔ lɔ mɛ.” Èjeshi hamɛmɛshinshin ɖe ɖɛ yí ewanɔ dɔ sɛnsin nɔ hamɛ lɔ ci èji mɔ yeado akpe nɔa? Ji emɔ ciwo ji àto yí adasɛ enujeŋnɔamɛ aotɔ nɔ wo.—1 Kor. 16:18.

EKÁN LƆ MƐ HAMƐWO JIKPƆTƆWO DONƆ ŊSƐN MÌ

12. Ŋsɛndoamu toto ci wowa nɔ hamɛwo le exwe sanŋdi ŋkɔtɔ mɛɔ? (1 Tɛsalonikitɔwo 2:​7, 8)

¹² Yesu Kristo na “enunana [ciwo yí nyi] amɛwo” yí wowo gbewanɔ edɔ buwo nɔ hamɛ lɔ. Édasɛ mɔ nɔ hamɛmɛshinshin ciwo yí le Ʒeruzalɛmu, yí wodɔ Pɔlu, Barnabasi, koɖo mɛbuwo nɔ woavayi ji hamɛwo kpɔ. (Edɔ. 11:22) Nyi yí taɖoɔ? Susu ci yi dɔ woɖo sumɔsumɔdɔwatɔwo koɖo hamɛmɛshinshinwo lɔ ke yɔ, nɔ woado ŋsɛn hamɛwo. (Edɔ. 15:​40, 41) Ŋsu cɛwo wanɔ vɔnsa sugbɔwo yí sɔnɔ wowo gbe donɔ afɔkumɛ ŋtɔkpu.—Hlɛn 1 Tɛsalonikitɔwo 2:​7, 8.

13. Edɔ ɖewo ci ekán lɔ mɛ hamɛwo jikpɔtɔwo wanɔɔ?

¹³ Ekán lɔ mɛ hamɛwo jikpɔtɔwo zɔnnɔ mɔ sugbɔ. Wozɔnnɔ mɔ kpeci sanŋdi nɛniɖewo keŋ avayi ji hamɛwo kpɔ.  Kwɛshila ɖekaɖekaɔ, ekán lɔ mɛ hamɛwo jikpɔtɔwo nanɔ nuxu sugbɔ, wanɔ lɛngbɔkplɔkplɔdɔ lɔ, wanɔ bɔbɔ koɖo mɔɖetɔwo koɖo hamɛmɛshinshinwo yí gbekpɔnɔ kunuɖegbe bɔbɔ lɔ ji. Wodranɔ nuxuwo do yí wanɔ toto nɔ ekán lɔ mɛ takpekpewo koɖo takpekpeganwo. Wokplanɔ nu mɔɖetɔwo le wowo suklu, wanɔ toto nɔ mɔɖetɔwo bɔbɔ vevi ci wowanɔ le ekán lɔ mɛ takpekpe hwenu, yí gbewanɔ edɔ vevi bu ciwo yí ʒan kpata yí alɔjedɔwaxu lɔ ɖo nɔ wo.

14. Susu ɖewo ciwo yí dɔ yí ekán lɔ mɛ hamɛwo jikpɔtɔ edɔsɛnsinwatɔwo nu jenɔŋ nɔ mìɔ?

¹⁴ Lé hamɛwo kpɔnɔ nyɔna so enunana ciwo yí nyi ekán lɔ mɛ hamɛwo jikpɔtɔwo mɛ doɔ? Nɔviŋsu ɖeka ci le Turquie xo nuxu so ekán lɔ mɛ hamɛwo jikpɔtɔwo nu yí nu mɔ: “Wowo vava ɖekaɖeka donɔ ŋsɛnŋ mɔ mazan gamɛ sugbɔ keŋ asɔ kpedo nɔvinyɛ ŋsu koɖo nɔvinyɛ nyɔnuwo nu. Ŋdogo koɖo ekan lɔ mɛ hamɛwo jikpɔtɔwo sugbɔ, vɔ ɖekɛ dele wo mɛ yí wa nu shigbe mɔ yexa sugbɔ alo wodatɛnŋ agogo ye o.” Johanna, ci nu mìxo nuxu so vayi yɛ wadɔ doju koɖo ekán lɔ mɛ hamɛwo jikpɔtɔ le kunuɖeɖedɔ lɔ mɛ vɔ wodekpɔ mɛ ɖekɛ le axomɛ o. Énu mɔ “Éle ahan gan, naɖoɖoɔ ŋwi ŋkeke ŋtɔ́ tɛgbɛɛ. Yi nɛ yi nɔvinyɛ nyɔnu amɛve so gbeɖeŋ ɖɛ yɛ nɛ yí wowu doŋ. Ekán lɔ mɛ hamɛwo jikpɔtɔ sɔ lɔnlɔn do ŋsɛnŋ yí kpedoŋ nu ŋkpɔɛ mɔ nɔ mìjinjin le mìwonɔnɔwo gbɔ le Yehowa sɛnsɛn mɛ can ɔ, hwenu kleŋ yɔ, vɔ le xexe yoyu lɔ mɛɔ, emɔ sugbɔ ahun nɔ mì yí mìanɔ ju koɖo mìwonɔnɔwo keke asɔyi mavɔ.” Jijɔ ŋtɔ́ han yí ekán lɔ mɛ hamɛwo jikpɔtɔwo vayi donɔ nɔ mɛ ciwo wovayi jinɔ kpɔ nɛ.—Edɔ. 20:37–21:1.

15. (a) Sɔ koɖo 3 Ʒan 5-8 ɖe, lé mìatɛnŋ adasɛ nɔ ekán lɔ hamɛwo jikpɔtɔwo mɔ wowo nu jeŋ nɔ mì doɔ? (Gbekpɔ foto lɔ hɛnnɛ.) (b) Nyi yí taɖo mìɖo adasɛ nɔ ŋsu ciwo yí woɖo wo shiwo mɔ wowo nu jenɔŋ nɔ mìɔ, yí lé mìawɛ doɔ? (Kpɔ dakavi ci yí nyi,  Ðo Ŋwi Wowo Shiwo.”)

 ¹⁵ Apotru Ʒan do ŋsɛn Gayo mɔ yɛ le xɔ nɔvi ciwo yí avaji wo kpɔ nywiɖe yí adɔ “wo ɖaɖa do alɔkpa ci ji yí a jɔji nɔ Mawu.” (Hlɛn 3 Ʒan 5-8.) Emɔ ɖeka ci ji mìato awɛ yí nyi mɔ mìayɔ ekán lɔ mɛ hamɛwo jikpɔtɔ nɔ ava ɖu ŋɖe koɖo mì. Emɔ bu yí nyi mɔ mìavanɔ kunuɖegbe le yi vava hwenu. Leslie, ci nu mìxo nuxu so vayi can dasɛ enujeŋnamɛ yitɔ le mɔ buwo nu. Énu mɔ “ŋdo gbe ɖaɖa nɔ Yehowa mɔ yi le kpɔ wowo ʒanwo gbɔ. Nyɛ koɖo asunyɛ ŋwlɛnɔ wema ɖaɖa wo yí nunɔ nɔ wo lé wowo vava lɔ kpedo mì nu sugbɔ do.” Ðo ŋwi mɔ ekán lɔ mɛ hamɛwo jikpɔtɔwo can tonɔ cukaɖawo mɛ yí enu cinɔ kɔ nɔ wo hɛnnɛ. Hweɖowonuɔ woblenɔ, lonɔ nu kpɔ yí gbɔnɔjɔ ŋtɔkpu. Taŋfuin enyɔ nywi ɖe ci ènu abi enu kankin ɖe ci èna ekán lɔ mɛ hamɛwo jikpɔtɔ aotɔ teŋ nyi ɖoŋci nɔ yi gbedoɖa!—Elo. 12:25.

MÍƷAN “ENUNANA [CIWO YÍ NYI] AMƐWO”

16. Sɔ koɖo Elododo wema 3:27 ɖe, nyi nɔviŋsuwo atɛnŋ abiɔ wowoɖekiwo seɔ?

¹⁶ Le xexe lɔ pleŋ mɛɔ, mìʒan nɔviŋsuwo doji nɔ woanyi “enunana [ciwo yí nyi] amɛwo.” “À tɛnŋ sun ji” nɔ ènyi nɔviŋsu ci yí wa ʒinʒindoshimɛa? (Hlɛn Elododo wema 3:27.) Èle gbɔsɔsɔ yí aje anyi sumɔsumɔdɔwatɔa? Àtɛnŋ awa ŋkɔyiyi yí anyi hamɛmɛshinshin keŋ akpedo nɔviowo nua? d Èle gbesɔsɔ yí awa trɔtrɔwo le ao gbe mɛ keŋ ayi Fyɔɖuxu Ŋɛnywidratɔwo Suklua? Suklu ŋtɔ́ akpedo eo nu yí Yesu awa ɖaŋ azan eo nywiɖe. Nɔ èkpɔɛ mɔ yedejeɔ, do gbe ɖaɖa nɔ Yehowa. Biɔɛ nɔ akpedo eo nu koɖo yi gbɔngbɔn kɔkɔɛ nɔ nawa edɔ ɖekpokpui ci woaɖo nɔ eo nywiɖe.—Luiki 11:13; Edɔ. 20:28.

17. Nyi “enunana [ciwo yí nyi amɛwo] dasɛ so mìwo fyɔ Kristo Yesu nuɔ”?

¹⁷ Nɔvi ciwo Yesu sɔ nɔ woanyi “enunana [ciwo yí nyi] amɛwo” dasɛ mɔ ékplɔkplɔ mì le ŋkeke kpɛtɛkpɛtɛ cɛwo mɛ. (Mat. 28:20) Dejɔ ji nɔ eo mɔ mìɖo Efyɔ ci yí lɔnnɔ amɛ yí nanɔ nu amɛ, ɖonɔ to mì nywiɖe yí gbena mì nɔviŋsu ciwo yí je, nɔ woakpɔ mìwo ʒanwo gbɔ ba? Eyi taɖo, ji emɔ ɖekpokpui ci yí ahun nɔ eo keŋ adasɛ nɔ ŋsu edɔsɛnsinwatɔ cɛwo mɔ wowo nu jeŋ nɔ ye. Eyi donɔ akpe nɔ Yehowa tɛgbɛɛ, eyɛ ci gbɔ yí “enunana nywiwo pleŋ koɖo enunana kpɛnkpinwo pleŋ so.”—Ʒaki. 1:17.