Miziki nyi akpaxwe vevi ɖeka le blema Izraɛliviwo kɔta mɛ. Zenɛniɖeɔ, Bibla xo nuxu so miziki xonuwo koɖo miziki nu. Akpaxwe sugbɔtɔ le Bibla mɛ nyi ehajijiwo, Le kpɔwɛ mɛ, Ehajiji wema, Salomɔ Ha koɖo Avin Hawo nyi ehajijiwo. Wema ɖeka ci yí xo nuxu so lé agbeɛ le do le Bibla hwenu nu mɔ: “Woxonɔ miziki le edɔ sugbɔtɔ hwenu ci Izraɛliviwo wanɔ le agbe mɛ.”

Miziki le gbeshiagbe gbenɔnɔ mɛ. Izraɛliviwo xonɔ miziki yí sɔ danasɛ lé enu wanɔ do nɔ wo. (Ezai 30:29) Nɔ wojikɔ aɖu xwe ɖe, aɖo fyɔ ɖe ʒinkpin ji alo ɖu ahwa jiɔ, nyɔnuwo xonɔ kpanu yí sɔ jijɔ jinɔ ha yí gbeɖunɔ we. (Koj. 11:34; 1 Sam. 18:​6, 7; 1 Efy. 1:​39, 40) Nɔ wole vevisese mɛɔ, Izraɛliviwo gbejinɔ ha yí donɔ axwa lélélé. (2 Kro. 35:25) McClintock koɖo Strong wema dasɛ kpeti mɔ, “miziki jɔnɔ ji nɔ Ebretɔwo haan.

Miziki jɔnɔ ji nɔ Izraɛli fyɔwo. Nɔ Izraɛli fyɔwo sekɔ mizikiɔ, éjɔnɔ ji nɔ wo. Efyɔ Sɔlu yɔ Davidi mɔ yi le va efyɔ xomɛ keŋ avanyi ehajitɔ nɔ ye. (1 Sam. 16:​18, 23) Le yiyimɛ hwenu Davidi ŋtɔ vanyi fyɔɔ, éɖo miziki xonu vovovowo, yí kpa ehawo yí gbewa toto nɔ amɛwo axonɔ miziki le Yehowa gbedoxɔ mɛ. (2 Kro. 7:6; Amosu 6:5) Efyɔ Salomɔ yɛ wa ehajitɔ ŋsuwo koɖo nyɔnuwo do efyɔ xomɛ.—Ŋun. 2:8.

Wozannɔ miziki le Yehowa sɛnsɛn mɛ. Vevitɔ lɔ yí nyi mɔ, Izraɛliwo zannɔ miziki keŋ asɔ sɛn Yehowa. Le nyɔnɔnwi mɛɔ, ŋsu 4000 yí xonɔ miziki xonuwo le gbedoxɔ lɔ mɛ le Ʒerusalɛmu. (1 Kro. 23:5) Woxonɔ kpanu ganganwo, miziki xonuwo koɖo ginŋtawo yí gbexunɔ kpɛnwo. (2 Kro. 5:12) Vɔ denyi mɛ cɛwo ɖekɛ ciwo yí bi le mizikixoxo mɛ yí zannɔ miziki le Yehowa sɛnsɛn mɛ o. Eze petii mɔ, Izraɛlivi sugbɔtɔ can jinɔ ha. (Eha. 120-134) Sɔ koɖo Ʒuifuwo nuŋwlɛŋwlɛwoɔ, Izraɛliviwo jinɔ Hallel Hawo a le paki xweɖuɖu hwenu.

Miziki kpɔtɔ le veviɖe nɔ Mawu mɛwo. (Ʒaki 5:13) Ehajiji nyi akpaxwe ɖeka nɔ mìwo sɛnsɛn. (Efe. 5:19) Miziki bɔnɔ mì doju koɖo mìwo kpena Kristotɔwo. (Kol. 3:16) Égbedonɔ ŋsɛn mì nɔ mìtokɔ cukaɖa sɛnŋsɛnŋwo mɛ. (Edɔ. 16:25) Mìtonɔ hajijiwo ji yí danasɛ xɔse koɖo lɔnlɔn ci mìɖo nɔ Yehowa.