Hwenu yí èdradrado yí akpla nuɔ, àtɛnŋ abiɔ eoɖekise mɔ: ‘Nyi ŋjikɔ akplaɔ?’ Vɔ, anyɔ mɔ mìakpɔ mìwoɖekiwo ji nɔ mìŋgbena yí enu ci mìjikɔ akpla abia ŋkuvi nɔ mì keke mìatashi enu ci Yehowa ji mɔ yeakpla mì o. Lé mìawɛ atekpɔ anya enu ci Yehowa ji mɔ yeakpla mì hwenu yí mìkplakɔ nuɔ?

Do gbe ɖaɖa yí abiɔ nunya. Biɔ Yehowa nɔ akpedo eo nu nɔ nado jeshi enu ci eji mɔ yeakpla eo kakayɛ. (Ʒaki 1:5) Ŋgbekannɔdo lé èmɔŋje enuwo mɛ do sa vayi ɖekɛ ji o.—Elo. 3:​5, 6.

Tashi ŋsɛn ci yí le Mawu Nyɔ lɔ nu nɔ awa dɔ le ao gbe mɛ. “Mawu Nyɔ le agbe.” (Ebre. 4:12) Eyi taɖo, hweɖekpokpuinu ci mìhlɛn Mawu “Nyɔ” lɔɔ, atɛnŋ akpla enuyoyu ɖeka mì ci yí akpedo mì nu le enu vovovowo mɛ le mìwo gbe mɛ. Vɔ nɔ mìdo jeshi mɔ mìʒan Mawu nukplamu ɖekɛ yí adɔ yí ecɛ anyi wawa.

Enuɖekpokpui ci yí le Yehowa kplɔn ji le jeŋ nɔ eo. Yi gbɔngbɔnmɛŋɖuɖu lɔ le shigbe “ekplɔn ɖeka ci ji yí ŋɖuɖu doamiwo” le nɛ. (Ezai 25:​6, NWT) Ŋgbeze nɔ “ŋɖuɖu doami” ciwo yí èkpɔkpɔ mɔ wodado jijɔ nɔ ye o. Denyi nyɔna ɖekɛ àkpɔ le mɛ o, vɔ àgbekpɔ jijɔ ŋtɔŋtɔ le enu ci Mawu na eo mɛ!