Enyɔbiɔse Ciwo yí so yi Hlɛntɔwo Gbɔ
Hwenu Yesu ɖo Axwetɔ Fiɛfiŋɖuɖu lɔ ɖe, fini yi nukplavi 70 ciwo yí edɔ sa mɔ woavayi ɖe kunu lɔwo leɔ? Wogbe Yesu yɔa?
Deʒan mɔ mìabu tamɛ kpɔ so nyɔ ŋtɔ́ nu o, ɖo hwenu yí Yesu ɖo Axwetɔ Fiɛfiŋɖuɖu lɔɔ, nukplavi 70 lɔwo dele nɔ o, Yesu ŋtɔ delɔn yí xɔ wo alo wowoŋtɔwo yí gbi. Yesu jijiɛ kpoŋ mɔ apotru yetɔwo yí anɔ koɖo ye le hwenu ŋtɔ́ mɛ.
Amɛ 12 lɔwo koɖo 70 lɔwo pleŋ yí nyi Yesu nukplaviwo. Doŋkɔɔ, Yesu can ŋsu 12 le yi nukplavi sugbɔ lɔwo mɛ ciwo yí eyɔ mɔ apotruwo. (Luiki 6:12-16) Éle Galile hwenu yí eyɔ “Amɛdɔdɔ wive lɔwo” yí “É dɔ wo ɖaɖa Mawu Fyɔɖuxu enyɔ lɔ nu gbe koɖo edɔ da gbe.” (Luiki 9:1-6) Le yiyimɛɔ, ci wovaɖo Ʒudeɔ, Yesu “can amɛ katakpuhowohove bu yí ɖe wo eve eve.” (Luiki 9:51; 10:1) Eyi dɔ Yesu ɖo yi dokplɔtɔwo le afi vovovowo ciwo yí adra yi ŋɛdu lɔ le.
Ʒuifu ciwo yí vatrɔ Yesu nukplaviwo ɖunɔ Paki xweshiaxwe tɛgbɛɛ sa, taŋfuin koɖo wowo xomumɛtɔwo. (Hun. 12:6-11, 17-20) Ci yi ku lɔ gogokɔɔ, Yesu koɖo apotru yitɔwo yi Ʒerusalɛmu. Vɔ deyɔ yi nukplaviwo pleŋ ciwo yí le Ʒude, Galile koɖo Pere mɔ wo le vaɖu Paki lɔ koɖo ye o. Eze petii mɔ, Yesu ji mɔ yɛanɔ koɖo apotru yetɔwo le hwenu ŋtɔ́ mɛ. Énu nɔ wo mɔ: “É dro Ŋ sugbɔ mɔ Na ɖu Paki xwe cɛ koɖo mí gbɔxwe yí Na se gbazavi.”—Luiki 22:15.
Susu nywi yí dɔ yí ewa ahan. Ekpɔtɔ hwɛɖeka yí Yesu aku, yɛ ci yí nyi “Mawu Lɛngbɔvi, ci yí cucunɔ agɔjeje xexe lɔ tɔ.” (Ʒan 1:29) Éɖo aku le Ʒerusalɛmu, ɖo nɔtɔxu yí wosanɔ avɔn nɔ Mawu le so exwe nɛniɖe ke. Paki lɔ ɖonɔ ŋwi nɔ Izraɛliviwo mɔ Yehowa hwlɛn wo gan so Eʒipti, vɔ Yesu vɔnsa lɔ yɛ awa nu sɔwu ahan. Áhwlɛn agbetɔwo pleŋ gan so nuvɔn koɖo eku shi. (1 Kor. 5:7, 8) Enu ci Yesu wa koɖo amɛ Wive lɔwo ahun emɔ nɔ wo nɔ woanyi gɔnmɛɖokpe nɔ Kristotɔwo hamɛ lɔ. (Efe. 2:20-22) Enu ci yí gbejiŋ yí nyi mɔ wocu jugan kɔkwɛ Ʒerusalɛmu jeŋkwi mɛ tɔ do “ekpe gangan wive ji” yí woŋwlɛ “Lɛngbɔvi lɔ Mɛdɔdɔ wive lɔwo ŋkɔwo do ekpe lɔwo ji.” (Enyɔ. 21:10-14) Eyi taɖo, edɔ vevi ɖeka yí Apotru egbejinɔtɔ wive lɔwo jikɔ awa, woawɛ nɔ Mawu dro anyi wawa. Ecɛ yí dɔ yí mìmɔŋje enu ci yí taɖo Yesu ji mɔ woaɖu Paki kpɛtɛkpɛtɛ koɖo ye yí Axwetɔ Fiɛfiŋɖuɖu lɔ vakplɔɛdo zeɖeka.
Amɛ 70 lɔwo koɖo nukplavi kpɛtɛ buwo denɔ koɖo Yesu le ŋɖuɖu ŋtɔ́ hwenu o. Ele ahan gan, nukplaviwo pleŋ ciwo yí nɔ gbeji kpɔ nyɔna so Axwetɔ Fiɛfiŋɖuɖu cɛ ci Yesu ɖo mɛ. Le yiyimɛɔ, amɛ ciwo pleŋ yí vanyi Kristotɔ amɛshiaminɔwo avaɖo fyɔɖuxu nublabla ci nyɔ Yesu nu nɔ apotru yitɔ lɔwo le zan ŋtɔ́ mɛ.—Luiki 22:29, 30.
