1. Lé ao gbe le do gbɔxwe yí ètɔ Bibla kplakplaɔ?

 LÉ AO gbe le do gbɔxwe yí ètɔ Bibla kplakpla koɖo Yehowa Kunuɖetɔwoɔ? Amɛ sugbɔ le mì mɛ dejinɔ mɔ yewoabu tamɛ kpɔ so nu kpetii o. Taŋfuin enu ci xexe lɔ mɔ yinyɔ alo yidɔn yí kpɔ ŋsɛn do wana koɖo agbenɔnɔ mìwotɔwo ji vayi. Nɔ enyi ahan yɔ nɛɔ, anyi “ŋkuɖoɖo de le [mì] shi o, yí [mì] de jeshi Mawu” hwenɔnu o. (Efe. 2:12) Vɔ ci mìtɔ Bibla kplakplaɔ, lé mìnɔnɔ agbe do trɔ!

2. Nyiwo yí èkpla ci ètɔ Bibla kplakplaɔ?

² Ci ètɔ Bibla kplakplaɔ, èvakpɔ mɔ yeɖo Eda ɖeka le jeŋkwi mɛ ci yí lɔn ye sugbɔ. Èkpɔɛ mɔ gbɔxwe ye nu akpe nɔ Yehowa yí yeanɔ yi sɛntɔwo mɛɔ, yeɖo atrɔ lé yenɔnɔ agbe koɖo lé yebunɔ tamɛ kpɔ do. Ègbekpla hɛnnɛ mɔ yeɖo anɔ agbe asɔ koɖo agbenywinɔnɔse Yehowa tɔwo.—Efe. 5:3-5.

3. Sɔgbe koɖo Kolosetɔwo 3:9, 10 ɖe, nyi Yehowa ji mɔ mìwo le waɔ, yí nyi mìakpɔ le nyɔta cɛ mɛɔ?

³ Yehowa yí nyi Enuwowatɔ koɖo mìwo Da ci yí le jeŋkwi mɛ, eyi dɔ eɖo acɛ anu lé mɛ ciwo yí sinkɔ ɖo awanɔ nu do. Énu mɔ gbɔxwe mìawa ʒinʒindoshimɛɔ, mìɖo aje gbla veviɖe yí asɔ “[mìwo] gbe xoxwi koɖo yi nɔ̀nɔmɛwo kɔnŋgbe.” * (Hlɛn Kolosetɔwo 3:9, 10.) Nyɔta cɛ akpedo mɛ ciwo yí jikɔ awa ʒinʒindoshimɛ nu woakpɔ ɖoŋci nɔ nyɔbiɔse amɛtɔn cɛwo: (1) Nyi “agbe xoxwi” lɔ nyiɔ? (2) Nyi yí taɖo Yehowa ji mɔ mìwo le tashi agbe xoxwi lɔɔ? (3) Lé mìatɛnŋ awɛ doɔ? Nyɔta cɛ agbekpedo mɛ ciwo yí wa ʒinʒindoshimɛ vɔ nu, nɔ woakpɔ lé woawɛ keŋ nɔ  woŋgbevatɔ agbe xoxwi lɔ nuwanawo wawa ke o.

4. Nɔ mɛɖe nɔkɔ “agbe xoxwi” lɔ ɖe, lé ewanɔ nu doɔ?

⁴ Mɛ ci yí nɔnɔ “agbe xoxwi” lɔ sɔ susu ɖonɔ gbazanuwo ji yí wanɔ nuvɔn ciwo gbaza dronɔ. Étɛnŋ jinɔ mɔ yeɖekɛ tɔ yí anyɔ, ádonɔ dɔmɛzi blaŋblaŋ, ányi akpemadotɔ yí agangannɔ yiɖeki. Mamaɖeɖenuwo alo fimu ciwo mɛ wowanɔ tamɛsɛnnuwo le kpɔkpɔ tɛnŋ jɔnɔ ji ni. Kankandojitɔɔ, éɖo nɔnɔmɛ nywi ɖewo yí enyɔmasɔgbe ciwo yí enunɔ koɖo enudɔndɔn ciwo yí ewanɔ tɛnŋ venɔ nu. Vɔ edro sɛnŋ ɖe dele mɛ keke amɔ yeatrɔ susu koɖo lé yewanɔ nu do o.—Gal. 5:19-21; 2 Tim. 3:2-5.

5. Mìatɛnŋ atashi agbe xoxwi lɔ keŋkeŋ a? Ðre mɛ. (Edɔwawawo 3:19)

⁵ Ci mìnyi amɛmakpemakpewoɔ, mìdatɛnŋ aɖe susu koɖo edro dɔndɔnwo si le eji koɖo eta mɛ vɛ keŋkeŋ o. Hweɖewonuɔ, mìnunɔ nyɔ ɖe alo wanɔ ŋɖe yí evavenɔ nɔ mì. (Ʒer. 17:9; Ʒaki 3:2) Vɔ nɔ mìtekpɔ yí tashi agbe xoxwi lɔɔ, nuvɔn ciwo yí gbaza wanɔ degbekpɔnɔ ŋsɛn do mì ji o. Eyi mìwo gbenɔnɔ vatrɔnɔ keŋkeŋ.—Ezai 55:7; hlɛn Edɔwawawo 3:19.

6. Nyi yí taɖo Yehowa do ŋsɛn mì mɔ mìwo le tashi agbe xoxwi lɔ susu baɖawo koɖo yi dɛn dɔndɔnwoɔ?

⁶ Ci Yehowa lɔn mì sugbɔ yí ji mɔ agbe lɔ le nyɔ nɔ mìɔ, édo ŋsɛn mì mɔ mìwo le mi susu baɖawo bubu kpɔ yí ami adɛn dɔndɔnwo wuwu. (Ezai 48:17, 18) Énya mɔ mɛ ciwo yí tashi wowoɖekiwo ɖɛ nɔ edro dɔndɔnwo donɔ vevisese nɔ wowoŋtɔwo koɖo mɛ ciwo yí trɔdo wo. Nɔ ékpɔ mɔ mìdokɔ vevisese nɔ mìwoɖeki koɖo mɛbuwoɔ, ésenɔ vevi.

7. Sɔgbe koɖo Rɔmatɔwo 12:1, 2 ɖe, gbeta ci mìɖo asɔɔ?

⁷ Nɔ mìteteɛkpɔ yí atrɔ lé mìnɔnɔ agbe doɔ, mìwo xlɔ ɖewo koɖo mìwo xomumɛtɔ ɖewo tɛnŋ ko mì. (1 Piɛ 4:3, 4) Wotɛnŋ nu nɔ mì mɔ mìɖo acɛ awa enuɖekpokpui ci yí dro mì, yí mìdeɖo alɔn nɔ mɛbuwo anu enu ci mìɖo awa nɔ mì o. Vɔ mɛ ciwo yí gbe mɔ yewodawa do Yehowa sewo ji devo ŋtɔŋtɔ o. Le nyɔnɔnwi mɛɔ,  wotashi wowoɖekiwo ɖɛ yí xexe cɛ ci ji Satana kpakpa acɛ do kpɔkpɔ ŋsɛn do wo ji. (Hlɛn Rɔmatɔwo 12:1, 2.) Mì pleŋ ɖo asɔ gbeta ɖeka: Nakpɔtɔ anɔkɔ agbe xoxwi lɔ yí atashi nyɛɖeki nɔ nuvɔn koɖo Satana xexe lɔ atrɔkɔŋ a alo natashi nyɛɖeki yí Yehowa akpɔtɔ atrɔkɔŋ nɔ manyi amɛnywi shigbe lé ŋle do gbɛ nɛ?—Ezai 64:8.

8. Nyi yí akpedo mì nu mìatashi susu baɖawo bubu kpɔ koɖo adɛn dɔndɔnwo wuwuɔ?

⁸ Yehowa nya mɔ yɛaxɔ gamɛ yí mìɖo ado gbla gbɔxwe ami susu baɖawo bubu kpɔ koɖo adɛn dɔndɔnwo wuwu. (Eha. 103:13, 14) Vɔ Yehowa to yi Nyɔ, gbɔngbɔn kɔkɔɛ lɔ koɖo yi habɔbɔ lɔ ji keŋ na mì nunya, ŋsɛn koɖo alɔdu ci mìʒan nɔ mìatrɔ mɛ ciŋmɛ mìnyi. Kankandojitɔɔ, ékpedo eo nu vayi vɔ. Ecɛyɛɔ, mìakpɔ enuŋtɔŋtɔ ɖewo ciwo àtɛnŋ awa yí atatashi agbe xoxwi lɔ keŋ aje awa ʒinʒindoshimɛ.

9. Nyi Mawu Nyɔ lɔ atɛnŋ akpedo eo nu nawaɔ?

⁹ Zan Bibla asɔ gbeje eoɖeki mɛ kpɔ nywiɖe. Mawu Nyɔ lɔ le shigbe ŋmɛkpɔnlin nɛ, atɛnŋ akpedo eo nu nagbeje enu ciwo yí èbunɔ kpɔ, enyɔ ciwo yí ènunɔ koɖo lé èwanɔ nu do mɛ. (Ʒaki 1:22-25) Mɛ ci yí kplakɔ nu koɖu koɖo Kristotɔ bu ciwo yí shin le gbɔngbɔn mɛ atɛnŋ akpla nu eo. Le kpɔwɛ mɛ, woatɛnŋ azan Enuŋwlɛŋwlɛ lɔwo asɔ kpedo eo nu nakpɔ finiwo yí èsɛnŋ le koɖo finiwo yí ègbɔjɔ le. Woatɛnŋ agbekpla eo lé àwɛ akpɔ nukplamu ciwo yí le Bibla mɛ ciwo yí atɛnŋ akpedo eo nu naɖu adɛn baɖabaɖawo ji. Yehowa can le gbesɔsɔ gashiagamɛ akpedo eo nu. Eyi nyi amɛnywitɔ ci yí atɛnŋ ado alɔ eo, ɖo énya enu ci yí le ji mɛ nɔ eo. (Elo. 14:10; 15:11) Eyi taɖo tekpɔ nɔ gbedodoɖa nɔ Yehowa koɖo yi Nyɔ lɔ kplakpla ŋkeŋke anyi numamɛ nɔ eo.

10. Nyi èkpla so enu ci yí jɔ do Elie ji mɛɔ?

¹⁰ Kando ji mɔ agbenywinɔnɔse Yehowa tɔwo yí nyi enywitɔ. Mìatɛnŋ akpɔ nyɔna le enuɖekpokpui ci Yehowa nu mɔ mìwo le wa mɛ. Mɛ ciwo yí wanɔ do agbenywinɔnɔse yitɔwo ji bunɔ wowoɖekiwo, wowo gbe ɖonɔ ta yí eji ŋtɔŋtɔ jɔnɔ wo. (Eha. 19:7-11) Vɔ mɛ ciwo yí gbe mɔ yewodawa do agbenywinɔnɔse Yehowa tɔwo ji kpɔnɔ gbaza mɛ nuvɔn ciwo yí wowanɔ lɔwo lɔzu. Mìakpɔ nyɔ ci ŋsu ɖeka ci yí tɔ mɔ Elie nu so mɛɖe ci yí gbe mɔ yedawa do agbenywinɔnɔse Mawu tɔwo ji ɖa. Edalɔ koɖo nɔlɔ ciwo yí hin lɔn Yehowa. Vɔ ci etɔ shinshin ɔ, étɔ egbɛ vwinwo dodo. Étɔ gee yɔyɔ, wanɔ gbɔdɔndɔn masɔkoɖosenuwo yí gbefinɔ fi hɛnnɛ. Elie nu mɔ yevadokɔ dɔmɛzi doji yí gbewakɔ tamɛsɛnnuwo haan. Énu mɔ: “Ŋɖekpokpui ci wokplaŋ mɔ Kristotɔwo deɖo awa yí ŋwa.” Ele ahan gan, Elie deŋlɔbe enu ci wokplɛ le vihwɛ mɛ o. Le yiyimɛɔ, égbevatɔ Bibla kplakpla. Éje agbla veviɖe yí mi adɛn dɔndɔn yitɔ lɔwo wuwu keŋ wa ʒinʒindoshimɛ le exwe 2000 mɛ. Nyɔna ciwo yí ekpɔ so wawa do agbenywinɔnɔse Yehowa tɔwo ji mɛɔ? Elie nu mɔ: “Ecɛyɛɔ, ŋvo le susu mɛ yí ɖo ayexadohwɛnamɛnu mɛmi.” * Elie kpɔwɛ lɔ dasɛ nɔ mì mɔ mɛ ciwo yí gbe mɔ yewodawa do agbenywinɔnɔse Yehowa tɔwo ji donɔ vevisese nɔ wowoɖekiwo. Nɔ egbenyi ahan can ɔ, Yehowa le gbesɔsɔ mɔ yeakpedo wo nu woatrɔ.

11. Nyiwo yí Yehowa gbeɔ?

 ¹¹ Tekpɔ agbenɔ enu ciwo Yehowa gbe. (Eha. 97:10) Bibla nu mɔ Yehowa gbe “ŋkuvi ciwo yí dasɛ mɔ amɛ nyi egoyitɔ, aɖe ciwo yí le ŋsu kankɔ, alɔ̀ ciwo yí wunɔ amɛ manyaɖe.” (Elo. 6:16, 17) Égbenɔ ha nɔ “amɛ ciwo yí wanɔ totomɛwo le bebe mɛ yí a sɔ wa enu vɔn koɖo amɛ buwo” hɛnnɛ. (Elo. 5:6) Nuwana koɖo adɛn cɛwo dejɔnɔ ji nɔ Yehowa ɖeeɖe o, keke eyi dɔ egu amɛvwin ciwo pleŋ yí li le Nowe hwenu; ɖo tamɛsɛnsɛn ɖɔ nyigban lɔ ji gahunnɔmɛ. (Gɔnm. 6:13) Mìakpɔ kpɔwɛ bu. Yehowa toto enyɔnuɖɛtɔ Malashi ji yí nu mɔ yegbe ŋwan nɔ mɛ ciwo yí tonɔ ayemɔwo ji keŋ gbenɔ mɛ ci woɖe. Mawu mɔ yedaxɔ sɛnsɛn nɛnɛmunɔwo tɔ o, yí yeagbeɖo kojo nɔ wo do wowo nuwana lɔwo ŋci.—Mal. 2:13-16; Ebre. 13:4.

12. “Gbé evwin” gɔnmɛ ɖe?

¹² Yehowa ji mɔ mìwo le “gbé evwin.” (Rɔm. 12:9) Enyɔgbe “gbé” ci wozan le lɛtɔxu gɔnmɛ yí nyi woanyɔŋ ŋɖe veviɖe keke enu lɔ ato le ŋmɛ nɔ amɛ. Nɔ wosɔ ŋɖuɖu ci yí dahɛn do agban mɛ mɔ eo le ɖu ɖe, lé àwa nɔ eoɔ? Nɔ èbui kpɔ kpetiiɔ, etɛnŋ na àble. Ahanke enu ci Yehowa mɔ yidɔn ɖo anyɔnɔŋ nɔ mì nɛ.

13. Nyi yí taɖo mìɖo agbe susu dɔndɔnwo bubu kpɔɔ?

¹³ Ŋgbebunɔ susu dɔndɔnwo kpɔ o. Enu ciwo mìbunɔ kpɔ kpɔnɔ ŋsɛn do enu ciwo mìwanɔ ji. Eyi taɖo Yesu kpla nu mì mɔ mìwo le gbe susu ciwo yí adɔ mìawa nuvɔn gangan ɖe bubu kpɔ. (Mt. 5:21, 22, 28, 29) Kankandoji li mɔ mìji mɔ mìwo nu le jɔ ji nɔ Yehowa. Eyi taɖo ele veviɖe mɔ mìagbe susu dɔndɔn ɖe ci yí ava tamɛ nɔ mì zeɖeka le afɔdumɛ.

14. Nyi yí enyɔ ciwo mìnunɔ danasɛ so mì nuɔ, yí enyɔ ciwo mìɖo abiɔ mìwoɖekiwo seɔ?

¹⁴ Ŋgbenunɔ enyɔ dɔndɔnwo o. Yesu nu mɔ: “Enyɔ ci yí tónɔ le aglan mɛ nɔ agbetɔ ɔ, eji mɛ yí é sonɔ.” (Mt. 15:18) Nyɔnɔnwi yɔ, enyɔ ciwo mìnunɔ danasɛ enu sugbɔ le mɛ ci mìnyi le xomɛ nu. Eyi taɖo biɔ enyɔ cɛwo eoɖeki se: ‘Ŋgbenɔ mɔ ŋdakan ŋsu, nɔ nyɔnɔnwi nunu adɔ nakpe fun can a? Ci ŋɖe asu alo nyɔnu ɖe, ŋhɛnnɔ nyɛɖeki nywiɖe nɔ nyɛŋgbeɖo ŋkuvi nɔ mɛbuɖea? Ŋgbe laganyɔwo nunu keŋkeŋ a? Nɔ mɛɖe do dɔmɛzi nɔŋ ɖe,  ŋɖonɔ ŋci ni koɖo fafaa?’ Anyɔ sugbɔ nɔ èbu tamɛ kpɔ so biɔse cɛwo nu. Woatɛnŋ asɔ enyɔ ciwo yí ènunɔ sɔ koɖo awu kpewo. Nɔ èɖe awu kpewo gbɔxwe anɔ fafɛɖe nɔ eo mɔ naɖe awu lɔ ŋtɔ. Ahanke nɔ ètekpɔ yí mi amɛzuzunyɔwo, ŋsunyɔwo koɖo laganyɔwo nunuɔ, ale fafɛɖe mɔ nasɔ agbe xoxwi lɔ kɔnŋgbe.

15. Mìakan mìwo gbe xoxwi do ‘aci nu’ gɔnmɛ ɖe?

¹⁵ Le gbesɔsɔ awa ŋɖekpokpui ci yí ʒan. Apotru Pɔlu wa kpɔwɛ sɛnŋ ɖeka yí sɔ kpla lé ele veviɖe do mɔ mìɖo atrɔ mìwo gbenɔnɔ. Éŋwlɛ mɔ mìɖo akan mìwo gbe xoxwi do ‘aci nu.’ (Rɔm. 6:6) Enyɔ ci ejikɔ anu yí nyi mɔ; ci Yesu ji mɔ ye nu le jɔ ji nɔ Yehowaɔ, élɔn mɔ wo le kan ye do aci nu. Nɛnɛke ele mɔ, mìwo can nɔ mìji mɔ mìwo nu le kpe nɔ Yehowaɔ, mìɖo ale gbesɔsɔ atashi adɛn koɖo wana ciwo yí dejɔnɔ ji nɔ Yehowa o. Mìɖo awa nu cɛwo keŋ gbɔxwe atɛnŋ aɖo ayexa mɛmi yí akpɔkɔ emɔ nɔ agbe mavɔ. (Ʒan 17:3; 1 Piɛ 3:21) Ðo ŋwi mɔ Yehowa datrɔ agbenywinɔnɔse yitɔwo keŋ nɔ anɔ shigbe lé mìwojikɔ do nɛ o. Vɔ mìwo yí ɖo atrɔ mɛ ciŋmɛ mìnyi keŋ awa do agbenywinɔnɔse yitɔwo ji.—Ezai 1:16-18; 55:9.

16. Nyi taɖo èɖo aɖui mɔ yeakpɔtɔ aɖunɔ edro vwinwo jiɔ?

¹⁶ Kpɔtɔ aɖunɔ edro vɔnwo ji. Nɔ èwa ʒinʒindoshimɛ ɖegbɔ can ɔ, èɖo akpɔtɔ aɖunɔ edro vɔnwo ji. Kpɔ enu ci mɛ ŋsu ɖeka ci yí tɔ mɔ Maurício to ɖa. Hwenu enyi jajɛɔ, édɔnnɔ koɖo ŋsuwo. Le yiyimɛɔ, évado go Yehowa Kunuɖetɔwo yí tɔ Bibla kplakpla. Ci etrɔ yi gbenɔnɔ goduɔ, éwa ʒinʒindoshimɛ le xwe 2002 mɛ. Ci Maurício sɛn Yehowa keke ewa exwe sugbɔ yɛ can ɔ, énu mɔ: “Ŋɖo alɔn do ji mɔ ele mɔ madonɔ gbla aɖu edro vɔnwo ji gaɖowomɛ.” Dena yí ecɛ gbɔjɔ yi o. Énu mɔ: “Ci ŋnya mɔ anyi nu akpe nɔ Yehowa nɔ ŋsɔ gbeta mɔ ŋdawa do edro vwin lɔwo jiɔ, efa akɔn nɔŋ.” *

17. Nyi èkpɔ le Nabiha kpɔwɛ lɔ mɛ ci yí do ŋsɛn eoɔ?

¹⁷ Do gbe ɖaɖa nɔ Yehowa nɔ akpedo eo nu, ŋgbekando eoŋtɔ ŋsɛn ji o vɔ kando yi gbɔngbɔn kɔkɔɛ ji. (Gal. 5:22; Fili. 4:6) Mìɖo ado gbla sɛnsinɖe nɔ mìji mɔ mìaɖe agbe xoxwi lɔ da ɖɛ yí mìdagbedui ke o.  Mìakpɔ enu ci mɛ yí nyɔnu ɖeka ci yí tɔ mɔ Nabiha to. Exwe amadɛn kpaŋ yí eɖo yí dalɔ so gbeɖi ɖɛ. Énu mɔ: “Ena ŋse vevi haan.” Ci Nabiha shinkɔɔ, édonɔ dɔmɛzi yí wanɔ cukaɖa sugbɔ. Évatɔ gee sasa yí woli do gakpa mɛ. Ci ele gakpa mɛɔ, Kunuɖetɔwo vatɔ enu kplakpla koɖi. Nabiha wa trɔtrɔ ganganwo le yi gbe mɛ. Énu mɔ. “Enɔ fafɛɖe nɔŋ mɔ mami enudɔndɔn ɖewo ciwo ŋwanɔ wawa. Vɔ lé nawɛ ami shiga yɔyɔ yɛ gbɔnnu nɔŋ haan.” Nabiha do gbla sɛnsinɖe wu exwe ɖeka gbɔxwe yí sun ji yí mi shiga yɔyɔ keŋkeŋ. Lé ewɛ yí tɛnŋ sun jiɔ? Énu mɔ: “Enuvevitɔ ci yí kpedo ŋnu yí nyi mɔ, ŋdo gbe ɖaɖa mamimami nɔ Yehowa mɔ le kpedo ŋnu nɔ mami.” Ecɛyɛɔ, énunɔ nɔ mɛbuwo mɔ: “Ŋkando ji mɔ ci ŋtɛnŋ kpe ji yí wa trɔtrɔwo nɔ anyi nu akpe nɔ Yehowaɔ, anyi mɛɖekpokpui awɛ dru!” *

18. Sɔgbe koɖo 1 Korɛntitɔwo 6:9-11 ɖe, nyi Mawu sɛntɔ sugbɔtɔ kpe ji yí waɔ?

¹⁸ Le exwe sanŋdi ŋkɔtɔ mɛɔ, ŋsu koɖo nyɔnu ɖewo ciwo Yehowa sɔ mɔ woaɖu fyɔ koɖo Kristo wa enudɔndɔnwo vayi gbɔxwe yí vanyi Kristotɔwo. Le kpɔwɛ mɛ, ɖewo nyi hashiwatɔwo, vijinuɖekɛŋmɛ gbɔ dɔntɔwo koɖo flafinɔwo. Vɔ toto Mawu gbɔngbɔn kɔkɔɛ kpekpedonu jiɔ, wokpe ji yí trɔ wowo dɛnwo. (Hlɛn 1 Korɛntitɔwo 6:9-11.) Ahanke le egbɛ mɛɔ, Bibla kpedo amɛ miliɔn nɛniɖe nu yí wotrɔ wowo gbenɔnɔ. * Ci enudɔndɔn lɔwo tatashi gbɔnnu nɔ wo can ɔ, wokpe ji yí mi wo wawa. Wowo kpɔwɛ lɔ dasɛ mɔ eɔ can àtɛnŋ akpe ji yí atrɔ mɛ ciŋmɛ ènyi koɖo adɛn dɔndɔn lɔwo keŋ aje awa ʒinʒindoshimɛ.

19. Nyi mìakpɔ le nyɔta ci yí kplɔɛdo mɛɔ?

¹⁹ Nɔ mɛ ciwo yí ji mɔ yewoawa ʒinʒindoshimɛ tekpɔ yí sɔ wowo gbe xoxwi lɔ kɔnŋgbeɔ, woɖo ado gbla yí anɔkɔ agbe yoyu lɔ. Nyɔta ci yí kplɔɛdo axo nuxu so lé mìatɛnŋ awɛ do koɖo lé mɛbuwo atɛnŋ akpedo mì nu do.