1. Nyi yí taɖo Yehowa wa nuwo do agbeɔ?

HWEÐEKANUƆ, Yehowa ɖekɛ yí li. Vɔ kpɔ deci akogo o. Ðo denyi mɛɖe yí anɔ Yehowa gbɔ duu gbɔxwe akpɔ jijɔ o. Ele ahan gan Mawu ji mɔ mɛbuwo anɔ agbe akpɔ jijɔ hɛnnɛ. Lɔnlɔn cucu Yehowa yí etɔ enuwo wawa.—Eha. 36:9; 1 Ӡan 4:19.

2. Lé Yesu koɖo mawudɔlawo se le wowoɖekiwo mɛ so enu ciwo Yehowa wa nuɔ?

² Doŋkɔɔ, Yehowa wa Eviɛ Yesu. Yi goduɔ, éto Eviɛ ŋkɔtɔ lɔ ji yí “wa enuwo pleŋ.” Mawudɔla miliɔn nɛniɖe can le enuwawa lɔwo mɛ. (Kol. 1:16) Enyi jijɔ gangan nɔ Yesu, ci ewakɔ dɔ koɖo Dalɔ. (Elo. 8:30) Mawudɔlawo can kpɔ jijɔ. Wole tɔxu gbɔxwe Yehowa koɖo Yesu ci yí nyi yi Dɔwatɔ bibi, wakɔ jeŋkwi koɖo nyigban. Lé mawudɔlawo kpɔ jijɔ doɔ? ‘Wododoɔ axwa koɖo jijɔ hwecinu’ wowa nyigban lɔ yí kankandoji li mɔ wokpɔtɔ kanfukɔ Yehowa le edɔ kpɛtɛ ciwo ewa mɛ, vevitɔ agbetɔviwo. (Job 38:7; Elo. 8:31) Enuwawa cɛwo pleŋ dasɛ Yehowa lɔnlɔn koɖo yi nunya.—Eha. 104:24; Rɔm. 1:20.

3. Shigbe lé wonui le 1 Korɛntitɔwo 15:21, 22 mɛ ɖe, emɔ ci yí Yesu tafɛn vɔnsa lɔ hun nɔ agbetɔviwoɔ?

³ Yehowa ji mɔ agbetɔviwo anɔ agbe tɛgbɛɛ le nyigban nyakpɔkpɔ ci yewa nɔ wo ji. Vɔ ci Adamu koɖo Ɛva fɔn gu do wowo Da amɛlɔntɔ lɔ nuɔ, nuvɔn koɖo ku zo je wo  koɖo wowo jijimɛviwo pleŋ ji. (Rɔm. 5:12) Nyi Yehowa waɔ? Zeɖeka kakaɔ, énu lé avahwlɛn agbetɔ xomu lɔ gan do. (Gɔnm. 3:15) Yehowa ɖui mɔ yeasɔ ye Viye cu fɛn, nɔ Adamu koɖo Ɛva jijimɛviwo atɛnŋ avo so nuvɔn koɖo ku shi. Yí nɔ mɛɖe lɔn yí sɛn Yehowaɔ, ána agbe mavɔ yi.—Ӡan 3:16; Rɔm. 6:23; hlɛn 1 Korɛntitɔwo 15:21, 22.

4. Nyɔbiɔse ciwo mɛ mìagbeje le nyɔta cɛ mɛɔ?

⁴ Enyɔ sugbɔ li mìatɛnŋ abiɔ se so egbe ci Mawu ɖo mɔ yeafɔn amɛwo so ku nu. Le kpɔwɛ mɛ, lé fɔnfɔnsoku lɔ ayi doɔ? Mìatɛnŋ ajeshi mìwo mɛ vevi ciwo woafɔn so kua? Emɔ ciwo ji fɔnfɔnsoku lɔ ahɛn jijɔkpɔkpɔ va nɔ mì leɔ? Yí nyi fɔnfɔnsoku kpla mì so Yehowa lɔnlɔn, nunya koɖo ӡinxododo nuɔ? Mína mìagbeje nyɔbiɔse lɔwo mɛ ɖekaɖeka.

5. Nyi yí taɖo mìatɛnŋ akpɔ emɔ mɔ woafɔn amɛwo so ku le ɖoɖonu viviviɔ?

⁵ Nɔ Yehowa to Eviɛ ji yí afɔn amɛ miliɔn sugbɔ so kuɔ, mìatɛnŋ akpɔ emɔ mɔ wodafɔn wo pleŋ so ku zeɖeka o. Nyi yí taɖoɔ? Ðo nɔ wofɔn amɛwo pleŋ doju ahan ɔ, nyigban lɔ ji aɖɔ yí atɛnŋ ahɛn cakacaka va. Gbesɔ kpe niɔ, Yehowa dewanɔ yi nuwo yakayaka gbeɖe o. Énya mɔ gbɔxwe fafa akpɔtɔ aniɔ, enuwo ɖo anɔ ɖoɖonu. (1 Kor. 14:33) Yehowa zan nunya koɖo ӡinxododo hwenu yɛ koɖo Yesu drakɔ nyigban lɔ ji do vivivi nɔ agbetɔwo anɔ ji. Eyi taɖo Yesu can azan nɔnɔmɛ cɛwo le Exwe Kotokun ɖeka Cɛkpakpa lɔ mɛ, hwenu awakɔ dɔ koɖo mɛ ciwo yí ci agbe le Harmagedɔn mɛ yí woadra nyigban lɔ ji do keŋ axɔ mɛ ciwo woafɔn so ku.

6. Sɔ koɖo Edɔwawawo 24:15 ɖe, miwo yí ale mɛ ciwo yí woafɔn mɛɔ?

 ⁶ Emɔ vevitɔ ci ji mɛ ciwo yí ci agbe le Harmagedɔn mɛ akpedo mɛ ciwo yí woafɔn so ku nu le yí nyi mɔ, woakpla nu wo so Mawu Fyɔɖuxu lɔ koɖo Yehowa nujijiwo nu. Nyi yí taɖoɔ? Ðo amɛ sugbɔtɔ ci woafɔn so ku anyi ‘amɛmajɔmajɔwo.’ (Hlɛn Edɔwawawo 24:15.) Woɖo awa trɔtrɔ sugbɔwo gbɔxwe akpɔ nyɔna mavɔwo so Kristo tafɛn vɔnsa lɔ mɛ. Kpɔ edɔ gangan ci enyi mɔ woakpla nyɔnɔnwi ci yí kudo Mawu nu amɛ miliɔn nɛniɖe ciwo yí dejeshi ɖa! Woakpla nu koɖo wo ɖekaɖeka shigbe lé mìwanɔ Bibla nukplakpla gbɛ nɛa? Woasɔ amɛ yoyu lɔwo ɖaɖa hamɛwo mɛ keŋ ana kpla wo, nɔ woakpla nu mɛ ciwo woavafɔn le wowo godua? Mìdenya o, mìanɔ te akpɔ lé avanɔ do. Vɔ mìnya mɔ le vɔvɔnu nɔ Exwe Kotokun ɖeka Cɛkpakpa Kristo tɔ lɔɔ, nyigban ji “a ɖɔ koɖo ŋununyanya so Tɔhonɔ nu shigbe le axu ɖɔ koɖo eshi ɛnɛ.” (Ezai 11:9) Edɔ sugbɔ ciwo mɛ jijɔkpɔkpɔ le yí mìawa le exwe kotokun ɖeka lɔ mɛ!

7. Nyi yí taɖo Mawu mɛwo ɖo ase vevi do mɛ ciwo woafɔn so ku nu hwenu woakplakɔ nu woɔ?

⁷ Le Exwe Kotokun ɖeka Cɛkpakpa Kristo tɔ lɔ hwenuɔ, Yehowa vi ciwo pleŋ yí le nyigban ji ɖo awa trɔtrɔwo nɔ wowo nu akpe ni. Eyi taɖo wo pleŋ ɖo ase vevi do mɛ ciwo woafɔn so ku nu, gbɔxwe akpedo wo nu nɔ woaɖu susu koɖo droamu vwinwo ji keŋ anɔ agbe asɔ koɖo Yehowa sewo. (1 Piɛ 3:8) Mɛ ciwo yí woafɔn so ku ado jeshi mɔ Yehowa mɛwo sɔ wowoɖekiwo hwe yí kpɔtɔ wakɔ trɔtrɔwo nɔ wowo nu akpe nɔ Yehowa. Eyi taɖo woaji mɔ yewoasɛn Yehowa koɖo wo.—Fili. 2:12.

8. Nyi yí taɖo mìatɛnŋ akpɔ emɔ mɔ mìajeshi mìwo xomumɛtɔ koɖo mìwo xlɔ ciwo yí afɔn so kuɔ?

⁸ Susu sugbɔ li ci yí taɖo mìatɛnŋ akpɔ emɔ mɔ, mɛ ciwo yí dokɔ ozɔn nɔ mɛ ciwo yí fɔn so ku atɛnŋ ajeshi wowo mɛ veviwo. Le kpɔwɛ mɛ, sɔ koɖo lé wofɔn amɛwo so ku do le blemaɔ, ewa shigbe mɔ Yehowa atrɔ afɔn amɛwo yí wo zezemɛ, nuxuxoxo koɖo tamɛbubukpɔ ale shigbe lé wole gbɔxwe yí woku hannɛ. Ðo ŋwi mɔ Yesu sɔ eku sɔ koɖo alɔndɔndɔn yí sɔ fɔnfɔnsoku sɔ koɖo amɛ fɔnfɔn so alɔn mɛ. (Mt. 9:18, 24; Ӡan 11:11-13) Nɔ mɛɖe nyɔ so alɔn mɛɔ, yi zezemɛ detrɔnɔ o yí egbexonɔ nuxu yí ɖonɔ ŋwi enyɔ ciwo yí le susumɛ ni gbɔxwe emlɔ anyi. Mìasɔ Lazar kpɔwɛ. Éku yí wa ŋkeke amɛnɛ, eyi taɖo yi gbaza tɔ bebe. Vɔ ci Yesu fuin so kuɔ, nɔviɛ nyɔnuwo jeshi ɖɛ zeɖeka yí kankandojitɔɔ, Lazar ɖo ŋwi wo hɛnnɛ.—Ӡan 11:38-44; 12:1, 2.

9. Nyi yí taɖo mɛ ciwo yí afɔn so ku danyi amɛ maɖoafɛnwo zeɖekaɔ?

⁹ Yehowa ɖo gbe mɔ mɛɖekpokpui ci yí anɔ agbe le Kristo cɛkpakpa hwenu danu mɔ: “Ŋ ble o.” (Ezai 33:24; Rɔm. 6:7) Eyi taɖo mɛ ciwo yí afɔn so ku ale lanmɛsɛn mɛ. Vɔ wodatrɔ amɛ maɖoafɛnwo zeɖeka kaka o. Ðo nɔ denyi ahan ɔ, wowo mɛ veviwo datɛnŋ ajeshi wo ɖɛ o. Ewa shigbe mɔ agbetɔ xomu lɔ atrɔkɔ amɛ maɖoafɛnwo vivivi le Exwe Kotokun ɖeka Cɛkpakpa Kristo tɔ mɛ nɛ. Vɔvɔnu nɔ Exwe Kotokun ɖeka Cɛkpakpa lɔ gbɔxwe Yesu asɔ Fyɔɖuxu lɔ do alɔ mɛ nɔ Dalɔ. Keke nɔcuɔ, Fyɔɖuxu lɔ aɖe gbɔ nɔ yi dɔwo pleŋ yí agbetɔ xomu lɔ  atrɔ amɛ maɖoafɛnwo.—1 Kor. 15:24-28; Enyɔ. 20:1-3.

10. Lé fɔnfɔnsoku lɔ ana àse le eoɖeki mɛɔ?

¹⁰ Kpɔ lé ozɔndodo nɔ ao mɛ veviwo anɔ do le susumɛ. Jijɔ ci àkpɔ ana àko nukuia, alo àfan vin? Àkpɔ jijɔ keke aji kanfukanfu hawo nɔ Yehowaa? Mìatɛnŋ akando ji mɔ, fɔnfɔnsoku mɔkpɔkpɔ lɔ ana mìavalɔn mìwo Da ci yí lenɔ bu nɔ mì koɖo Eviɛ amɛlɔntɔ lɔ veviɖe.

11. Sɔ koɖo Yesu nyɔ ciwo yí le Ӡan 5:28, 29 mɛ ɖe, nyi yí mɛ ciwo yí wanɔ do Mawu se jɔjɔɛwo ji akpɔɔ?

¹¹ Kpɔ jijɔ ci mɛ ciwo yí afɔn so ku akpɔ hwenu woasɔ wowo gbenɔnɔ xoxwi koɖo yi nɔnɔmɛwo kɔnŋgbe keŋ anɔ agbe asɔ koɖo Mawu se jɔjɔɛwo ɖa! Mɛ ciwo yí wa trɔtrɔ cɛwo anɔ agbe mavɔ le Paradiso mɛ. Vɔ Mawu dalɔn yí mɛ ciwo yí fɔn gu do ji anɔ agbe keŋ adahɛn fafa ci yí le Paradiso lɔ mɛ o.—Ezai 65:20; hlɛn Ӡan 5:28, 29.

12. Emɔ ciwo ji yí Yehowa acu shi nɔ mɛ ciwo yí anɔ agbe le nyigban lɔ ji leɔ?

¹² Hwenu Fyɔɖuxu lɔ akpakɔ acɛɔ, Mawu mɛwo pleŋ akpɔ mɔ enyɔ ciwo yí le Elododo Wema 10:22 mɛ nyi nyɔnɔnwi. Émɔ: “Shicu ci yí so [Yehowa] gbɔ a hɛn dɔkunu nyɔnɔnwitɔ vɛ nɔ eo. Yi dá hɛn cukaɖawo va koɖi o.” Ci Yehowa gbɔngbɔn awakɔ dɔ le yi sɛntɔwo jiɔ, woaje dɔku le gbɔngbɔnmɛ alo nɔ mìanuiɔ, woaɖyikɔ Kristo doji keke avatrɔ amɛ maɖoafɛnwo. (Ӡan 13:15-17; Efe. 4:23, 24) Ŋkeke ɖeshiaɖeɔ, wowo lanmɛ asɛnkɔŋ doji yí woanyi amɛ nywiwo. Agbenɔnɔ avivi hwenɔnu haan! (Job 33:25) Vɔ lé tamɛbubukpɔ so fɔnfɔnsoku lɔ nu atɛnŋ akpedo eo nu le kaka cɛ mɛ doɔ?

13. Sɔ koɖo Ehajiji Wema 139:1-4 ɖe, lé fɔnfɔnsoku dasɛ mɔ Yehowa jeshi mì ɖɛ nywiɖe doɔ?

¹³ Shigbe lé mìkpɔɛ vayi nɛɔ, nɔ Yehowa fɔn amɛwoɔ, wowo tamɛbubukpɔ koɖo mɛ ciŋmɛ wonyi agbele shigbe lé wole do sa nɛ. Bu tamɛ kpɔ so gɔnmɛsese ci yí le nyɔ cɛ nu. Yehowa lɔn eo sugbɔ keke yí do jeshi enu ciwo yí èbunɔ kpɔ, lé èsenɔ le eoɖeki mɛ, enyɔ ciwo yí ènunɔ koɖo enu ciwo yí èwanɔ. Eyi taɖo dagbɔnnu ni mɔ, nɔ éfɔnkɔ eo so kuɔ, áwa eo yí nale shigbe lé èle do sa nɛ o. Efyɔ Davidi nya mɔ Yehowa jeshi mìwo domɛtɔ ɖeshiaɖe nywiɖe. (Hlɛn Ehajiji Wema 139:1-4.) Lé nyanya mɔ Yehowa jeshi mì ɖɛ, ana mìase le mìwoɖekiwo mɛɔ?

14. Nɔ mìbu tamɛ kpɔ so lé Yehowa jeshi mì ɖɛ nywiɖe do ɖe, lé mìɖo ase le mìwoɖekiwo mɛɔ?

¹⁴ Nɔ mìbu tamɛ kpɔ so lé Yehowa jeshi mì ɖɛ nywiɖe doɔ, mìdeɖo avɔn o. Nyi yí taɖoɔ? Ðo ŋwi mɔ Yehowa lenɔ bu nɔ mì veviɖe. Ékpɔnɔ mìwo domɛtɔ ɖekaɖeka mɔ mìnyi amɛ vevi nɔ ye. Éwaɖaŋ donɔ jeshi enu ciwo pleŋ yí kpɔ ŋsɛn do mì ji le mìwo gbemɛ. Ecɛ nyanya fa akɔn nɔ amɛ sugbɔ! Mìdeɖo abui gbeɖe mɔ mìci akogo o. Le ŋkeke ɖeshiaɖe mɛɔ, Yehowa le mì gbɔ yí jinɔ mɔ yeakpedo mì nu.—2 Kro. 16:9.

15. Lé fɔnfɔnsoku dasɛ mɔ Yehowa nya ŋɖɛ sugbɔ doɔ?

¹⁵ Vɔnvɔn nɔ ku nyi ahwawanu sɛnŋ ɖeka. Mɛ ciwo ji Satana kpa cɛ do zannɔ vɔnvɔn lɔ keŋ asɔ ӡin amɛwo ji, nɔ woasa  wowo xlɔwo alo nɔ woawa nudɔndɔn. Vɔ vɔnvɔn cɛ yɛ dewa dɔ le mìwo gbɔ o. Ðo mìnya mɔ nɔ mìwo ketɔnɔwo wu mìɔ, Yehowa afɔn mì do agbe. (Enyɔ. 2:10) Mìkando ji mɔ, ŋɖe deli woawa keke exlɔnyinyi koɖo Yehowa aglo mì gbeɖe o. (Rɔm. 8:35-39) Ci Yehowa na fɔnfɔnsoku mɔkpɔkpɔ lɔ mìɔ, edasɛ mɔ énya ŋɖɛ sugbɔ! To mɔkpɔkpɔ lɔ jiɔ, ékpo ŋsɛn nɔ Satana hwawanu sɛnŋ ci yí nyi vɔnvɔn lɔ keŋ yí na edɔngbegbe ci yí nyi ahwawanu sɛnŋ ɖeka mì.

16. Enyɔ ciwo yí èɖo abiɔ eoɖeki seɔ, yí lé ɖoŋci lɔwo atɛnŋ akpedo eo nu yí nanya lé èkando Yehowa ji sugbɔ doɔ?

¹⁶ Nɔ Yehowa ketɔnɔwo sɔ eku dokɔ vɔnvɔn nɔ eo ɖe, àlɔn akando ji mɔ yɛavafɔn ye do agbea? Lé àwɛ anya mɔ yeakando Yehowa ji hwenɔnuɔ? Ŋkɔtɔɔ, biɔ eoɖeki se mɔ: ‘Gbeta hwɛhwɛ ciwo ŋsɔnɔ ŋkeŋke danasɛ mɔ ŋkando Yehowa jia?’ (Luiki 16:10) Àtɛnŋ agbebiɔ eoɖeki se mɔ: ‘Ci Yehowa ɖo gbe mɔ yeale bu nɔ nyɛ, nɔ ŋsɔ yi Fyɔɖuxu lɔ ɖo texwe ŋkɔtɔ ɖe, lé ŋzannɔ eho koɖo gamɛ do danasɛ mɔ ŋkando gbeɖu cɛ jia?’ (Mt. 6:31-33) Nɔ èɖo enyɔ lɔwo ŋci mɔ ɛɛɔ, anyi èdadasɛ mɔ yekando Yehowa ji yí dra do ɖɛ nɔ tetekpɔ ɖekpokpui ci àdo go.—Elo. 3:5, 6.

17. (a) Lé fɔnfɔnsoku dasɛ mɔ Yehowa donɔ ӡinxo doɔ? (b) Lé mìatɛnŋ adonɔ akpe nɔ Yehowa ci edonɔ ӡinxo nɔ mìɔ?

¹⁷ Yehowa ɖo ŋkeke koɖo gamɛ ci ji agu xexe vwin cɛ le. (Mt. 24:36) Dagbe ӡinxo mado keŋ atɔ enu lɔwo wawa gbɔxwe gamɛ lɔ aɖo o. Éjikɔ veviɖe mɔ yeafɔn amɛkukuwo, vɔ édokɔ ӡinxo. (Job 14:14, 15) Énɔkɔ te, nɔ gamɛ nywitɔ ci ji afɔn wo do agbe aɖo. (Ӡan 5:28) Susu nywiwo li ci yí taɖo mìadonɔ akpe nɔ Yehowa, ci edonɔ ӡinxo. Bui kpɔ: Ci Yehowa donɔ ӡinxoɔ, amɛ sugbɔ kpɔ gamɛ keŋ yí “trɔjimɛ,” mìwo can. (2 Piɛ 3:9) Yehowa ji mɔ emɔ le hun nɔ amɛ sugbɔ nɔ woakpɔ agbe mavɔ. Eyi taɖo mína mìadonɔ akpe ni mɔ édonɔ ӡinxo. Lé mìawɛ doɔ? Mìajinɔ “mɛ ciwo shi yí eji nɔnɔmɛ nywi le nɔ agbe mavɔ kpɔkpɔ” veviɖe yí akpedo wo nu nɔ woalɔn Yehowa keŋ asin. (Edɔ. 13:48, NWT) Nɔ wowɛ ahan ɔ, woakpɔ nyɔna so Yehowa ӡinxododo mɛ, shigbe mìwo nɛ.

18. Nyi yí taɖo mìɖo adonɔ ӡinxo nɔ mɛbuwoɔ?

 ¹⁸ Yehowa ado ӡinxo yí akpɔ emɔ mɔ, mìatrɔ amɛ maɖoafɛnwo le exwe kotokun ɖeka lɔ vɔvɔnu. Keke nɔcuɔ, Yehowa alɔn faa aŋlɔbe mìwo nuvɔnwo. Kankandojitɔɔ, mìasran yi kpɔwɛ hwenɔnu yí asɔ susu ɖonɔ amɛwo nɔnɔmɛ nywiwo ji yí adonɔ ӡinxo nɔ wo. Mìakpɔ nɔvinyɔnu ɖeka kpɔwɛ. Asuɔ tɔ enubukpɔdɔ̀ lele sɛnsinɖe yí detɛnŋ gbeyinɔ bɔbɔwo o. Énu mɔ: “Enyɔ lɔ nyi vevisese nɔŋ sugbɔ. Mìwo gbe trɔ bu zeɖeka yí mìdatɛnŋ agbewa enu ciwo pleŋ yí mìdrɔ ɖɛ sa o.” Ele ahan gan, nyɔnu amɛlɔntɔ cɛ kpɔtɔ dokɔ ӡinxo nɔ asuɔ. Éɖoŋ do Yehowa nu yí dena ta kpɔ o. Shigbe Yehowa nɛɔ, éɖe ŋkuvi so cukaɖa lɔ ji yí sɔ susu ɖo asuɔ nɔnɔmɛ nywiwo ji. Énu mɔ: “Asunyɛ ɖo nɔnɔmɛ dojijɔnamɛwo yí gbedokɔ gbla, nɔ edɔ̀ lɔ ahaya ni vivivi.” Ele veviɖe mɔ mìadonɔ ӡinxo nɔ mɛ ciwo yí le mìwo xomu alo hamɛ lɔ mɛ yí tekɔkpɔ mɔ yewoaɖu cukaɖa sɛnŋwo ji.

19. Nyi mìɖo aɖo gligaan yí awaɔ?

¹⁹ Ci wowa nyigban lɔ zeɖekaɔ, Yesu koɖo mawudɔlawo kpɔ jijɔ. Vɔ kpɔ lé woakpɔ jijɔ nɔ wokpɔ nyigban lɔ ɖɔ koɖo amɛ maɖoafɛn ciwo yí lɔn Yehowa yí gbesinni ɖa! Kpɔ jijɔ ci mɛ ciwo yí woxwle so nyigban yi jeŋkwimɛ yí woakpa acɛ koɖo Kristo akpɔ, nɔ wokpɔkɔ agbetɔ xomu lɔ kpɔkɔ nyɔna so wowo dɔwawawo mɛ ɖa! (Enyɔ. 4:4, 9-11; 5:9, 10) Gbekpɔ lé agbe lɔ anɔ do hwenu jijɔ vin aɖɔli vevisese vin yí dɔ̀lele, vevisese koɖo eku agu tɛgbɛɛ ɖa! (Enyɔ. 21:4) Gbɔxwe hwenɔnu aɖoɔ, ɖui gligaan yí asran Dao amɛlɔntɔ, ŋɖɛnyatɔ koɖo ӡinxodotɔ lɔ. Nɔ èwɛ ahan ɔ, àkpɔtɔ akpɔnɔ jijɔ nɔ èdo go tetekpɔ ɖekpokpui can. (Ӡaki 1:2-4) Mìdokɔ akpe sugbɔ nɔ Yehowa, ci eɖo gbe mɔ “wo a fɔn [amɛwo] so ekumɛ”!—Edɔ. 24:15.