Denyi enyɔ ci ejikɔ anu teŋ nɛ o. Legba denu nɔ Ɛva mɔ nɔ yiɖu acikusɛnsɛn ci Mawu mɔ woŋgbeɖuɔ, yi gbaza aku gan yi se ato le mɛ kɛŋ ayi nɔ agbe le fibu o. Ci Satana xokɔ nuxu to edan lɔ jiɔ, éshi kan nu nɔ Ɛva mɔ nɔ yiɖu acikusɛnsɛn lɔɔ, ‘yidaku gbeɖe o.’ Énukɔ ni kpoŋ mɔ yɛakpɔtɔ anɔ agbe yí ase vivi nɔ agbe lɔ le nyigban ji yí Mawu dagbekpa cɛ ni o.​—Gɔnm. 2:17; 3:3-5.

Ci denyi Edɛn kpamɛ yí ŋsukankan nukplakpla ci yí nyi ese makumaku jɔ so ɖe, hwenu ejɔɔ? Mìdenya hwenu enyi teŋ o. Vɔ mìnya mɔ Eshiɖɔɖɔ lɔ gu ŋsusɛnsɛnwo pleŋ le Nowe hwenu. Ŋsusɛnsɛn susu ɖe dekpɔtɔ le Eshiɖɔɖɔ lɔ godu o, ɖo Nowe koɖo yi xomu ɖekɛ ciwo yí ci agbe nyi Mawu sɛntɔ adodwiwo.

Eyi taɖo kankandoji li mɔ, Eshiɖɔɖɔ lɔ godu yí ese makumaku nukplakpla lɔ ajɔ so. Hwenu Mawu caka egbewo le Babɛli yí “amɛwo kaka do nyigban lɔ ji keŋkeŋ” ɔ, kankandojitɔɔ, ese makumaku susu lɔ ci wo shi woso koɖi. (Gɔnm. 11:8, 9) Nɔ egbenyi gaɖemɛ yí ŋsukankan nukplakpla cɛ jɔ can ɔ, mìatɛnŋ akando ji mɔ Satana Legba, ci yí nyi “ŋsùkankan da lɔ” le godu ni yí ejɔnɔ ji ni mɔ ŋsukankan lɔ kaka sugbɔ do xexeɛ mɛ.​—Ʒan 8:44.