Denyi susu ŋkɔtɔ ci yí taɖo wonu nyɔ ci yí le 2 Ese Wema 22:25-27 mɛ yí nyi mɔ woaɖo kpe nuvɔn ci ŋsu lɔ wa ji o, ɖo wonya mɔ yɛwa nuvɔn vɔ. Ese cɛ dadasɛ mɔ denyi nyɔnuvi lɔ yí wa afɛn o. Lé ŋkuvi do kpukpui ciwo trɔdo ese cɛ nu.

Kpukpui ciwo yí doŋkɔ xo nuxu so ŋsu ci yí dɔn nyɔnuvi ci wosɔ ɖogbe nɔ ŋsu bu gbɔ le “juganmɛ.” Ci ŋsu lɔ wa ahan ɔ, éxɔ mɛbu shi, ɖo wosɔɛ mɔ nyɔnuvi ci wosɔ ɖo gbe lɔ ɖe asu vɔ. Le woawɛ nɔ nyɔnuvi lɔ yɛɔ? “Juganmɛ woli le, vɔ dedo axwa o.” Nɔ édo axwa saɔ, mɛbuwo asi dandandan yí ava xɔ ni. Vɔ dedo axwa o. Ecɛ dasɛ mɔ yɛ can wa su, yí wo koɖo ve je ese mɛ.​—2 Ese. 22:23, 24, NWT.

Ese ci yí kplɔɛ do xo nuxu so nɔnɔmɛ bu nu, énu mɔ: “Vɔ nɔ ŋsu ɖe kpɔ nyɔnuvi ci wosɔ ɖo gbe nɔ ŋsu bu le gbemɛ yí li sɛnsin keŋ dɔn gbɔɔ, ŋsu ci yí dɔn gbɔ lɔ ɖekɛ woɖo awu, vɔ mídawa ŋɖekɛ nɔ nyɔnuvi lɔ yɛ o. Nyɔnuvi lɔ dewa nuvɔn ɖe keke aku o. Enyɔ cɛ le shigbe mɔ lé ŋsu ɖe je yi kpena ji keŋ wui hannɛ. Ðo gbemɛ yí edo go nyɔnuvi lɔ le, yí nyɔnuvi lɔ do axwa, vɔ mɛɖe de le nɔ yí axɔ ni o.”​—2 Ese. 22:25-27, NWT.

Le nɔnɔmɛ cɛ mɛɔ, kojoɖotɔwo sɔɛ mɔ nyɔnuvi lɔ “do axwa, vɔ mɛɖe de le nɔ yí axɔ ni o.” Ecɛ dasɛ mɔ dewa asu o. Vɔ ŋsu lɔ yí woado hwɛ mɔ yiwa akpasɛnsinnu yí xɔ mɛbu shi, ɖo ci wosɔ nyɔnuvi lɔ ɖo gbe nɔ ŋsu bu can ɔ, ‘éli sɛnsin keŋ dɔn gbɔ.’

Eyi taɖo ci Ese lɔ mɔ nyɔnuvi lɔ dewa nuvɔn can ɔ, esɔgbe mɔ kpukpui cɛwo dre ŋsu lɔ mɔ yɛwa akpasɛnsinnu yí xɔ mɛbu shi. Mìatɛnŋ akando ji mɔ, kojoɖotɔwo “aji gɔnmɛ kpɔ nɔ nyɔ lɔ kitokito” yí asɔ gbeta ciwo yí asɔ koɖo Mawu gɔnmɛɖose ciwo yí éɖonɔ ŋwi nɔ amɛ gashigamɛ.​—2 Ese. 13:14; 17:4, NWT; Hun. 20:14.