Le nyɔnɔnwi mɛɔ, denyi gɔnmɛsese ci yí le kpukpui cɛ nu nɛ o. Vɔ mɛ ci yí dokɔ go cukaɖawo gbɛmɛgbɛmɛ, gan yí dokɔ ji nu yí exokɔ nuxu so.

Mína mìakpɔ kpukpui ciwo yí trɔdo kpukpui 16 lɔ: “Ŋgbe le shigbe flafinɔ ci yí ji yí a fi enu le amɛ nywi shi alo yí a kaka yi xwe o. Nɔ́ amɛ nywi jwin ze adrɛ ɔ, a gbe fɔn jete ke. Vɔ, wo a ɖu amɛ vɔnwo ji toto cukaɖawo mɛ. Ŋgbe nɔ̀ jijɔ mɛ hwecinu ao ketɔnɔ le cukaɖawo mɛ o. Ŋgbe nɔ̀ jijɔ mɛ hwecinu é jwin o.”—Elo. 24:15-17.

Mɛɖewo bui mɔ kpukpui 16 lɔ xokɔ nuxu so mɛ ci yí wanɔ nuvɔn yí trɔnɔ jimɛ nu. Sɛnsɛnŋkɔnɔtɔ amɛve ciwo yí so Grande-Bretagne ŋwlɛ mɔ “le blema koɖo egbɛmɛɔ, eŋɛnywidratɔwo zan kpukpui cɛ sugbɔ” do ahan ji. Sɛnsɛnŋkɔnɔtɔ lɔwo nu kpi mɔ susu lɔ gɔnmɛ yí nyi mɔ “amɛ nywi tɛnŋ je . . . nuvɔn ganganwo mɛ, vɔ agbekpɔtɔ alɔnkɔ Mawu yí yɛ nu akpe nɔ Mawu, ɖo étrɔnɔ jimɛ.” Mɛ ci yí deji mɔ yeami nuvɔn wawaɔ, susu cɛ atɛnŋ ajɔ ji ni. Étɛnŋ bui mɔ nɔ yewakɔ nuvɔn gbɛmɛgbɛmɛ can ɔ, Mawu asɔ kekɔ ye tɛgbɛɛ.

Vɔ denyi gɔnmɛsese ci yí le kpukpui 16 lɔ nu nɛ o.

Woatɛnŋ azan Ebre nyɔgbe ci gɔnmɛ woɖe mɔ “jwin” le kpukpui 16 koɖo 17 lɔ mɛ le emɔ vovovo ji. Le kpɔwɛ mɛ, woatɛnŋ anu mɔ nyibu juin do mɔ ji, amɛ juin so xɔta alo ekpe je nyigban. (2 Ese. 22:4, 8; Amo. 9:9, NWT) Woatɛnŋ azan nyɔgbe cɛ le kpɔwɛnyɔnunu mɛ mɔ: “Yehowa danasɛ mɔ nɔ amɛ fɔɖeɖewo, nɔ amɛ lɔ mɔwo jɔ ji ni. Nɔ éjuin can ɔ, daci nyigban o, ɖo Yehowa ale alɔ ni.”—Eha. 37:23, 24; Elo. 11:5; 13:17; 17:20, NWT.

Vɔ do jeshi nyɔ ci Nukplamɛtɔ Edward H. Plumptre nu, émɔ: “Wodezan Ebre nyɔgbe ci yí nyi [“jwin”] yí sɔ xo nuxu so nuvɔn mɛ jeje nu kpɔ o. Gbesɔ kpe niɔ, wemanyatɔ bu ɖe kpukpui 16 lɔ mɛ mɔ: “Nɔ wocukɔ nu kpɔ koɖo Mawu mɛwo can ɔ, gbali yɔ, ɖo woaɖunɔ ji tɛgbɛɛ, vɔ amɛvwinwo aci mɛ!”

Eyi taɖo enyɔ cɛwo pleŋ dasɛ mɔ denyi nuvɔnwawa nu yí Elododo Wema 24:16 xokɔ nuxu so o, vɔ cukaɖawo koɖo nɔnɔmɛ sɛnŋsɛnŋwo mɛ toto gbɛmɛgbɛmɛ nu yí exokɔ nuxu so. Le xexe vwin cɛ mɛ gbɛɔ, amɛjɔjɔɛ atɛnŋ ado go lanmɛsɛn cukaɖa alo cukaɖa buwo. Acɛkpakpawo tɛnŋ ci yumɛ ni do yi xɔse ŋci. Vɔ átɛnŋ akando ji mɔ Mawu akpedo ye nu yí yeakpanŋkɔ nɔnɔmɛ lɔ keke aɖu ji. Ci èkpɔɛ ɖe, enuwo demlɛnɔ nɔ Mawu sɛntɔwo nywiɖe ba? Nyi yí taɖoɔ? Mìkando ji mɔ “[Yehowa] fɔnnɔ amɛ ciwo yí jwin tɔte. Tɔhonɔ [kpenɔdo] amɛ ciwo yí le cukaɖa mɛ nu.”—Eha. 41:1-3; 145:14-19.

“Amɛ nywi” dekpɔnɔ jijɔ nɔ mɛbuwo tokɔ cukaɖawo mɛ o. Ewaɖeɔ, ékpɔnɔ afɔnfafa ci enya mɔ “enuwo anyɔ nɔ mɛ ciwo yí vɔnnɔ nɔ Mawu adodwi lɔ, ɖo wovɔnnɔ ni.”—Ŋun. 8:11-13, NWT; Job 31:3-6; Eha. 27:5, 6.